Mbi Bilenda Kusadisa Kukolama bo Wumbaluka Kimvuka Kinkaka?

Yaya Nicolas ayi Céline baviokila mu diambu dinkaka disuasana. Bawu bavitika kiyeku baba vana ku filiali yi França, ki kubaluka mu kimvuka kinkaka. Bawu batuba: “Va thonono tuba mu mayangi, vayi bo vavioka mua thangu tutona kuyindula bakundi tubika kumbusa. Befu tusa ba ko kikundi kingolo na zikhomba mu kimvuka tubaluka.”a Mu mambu maphasi, buidi wulenda nungina bikaku bo wumbaluka kimvuka kinkaka? Mbi bankaka balenda vanga muingi ku kusadisa? Ayi lusakumunu mbi wulenda tambula mu kimvuka kinkaka?

MAMBU MANNA MALENDA KUSADISA KUNUNGA BIKAKU

1. Fiatila mu Yave. (Minku. 37:5) Kazumi wunkalanga ku Japão, wubika kimvuka kio kaviokisa 20 di mimvu ayi wubaluka kimvuka kinkaka bo nnuni’andi bambalula mu kisalu. Buidi nandi kafiatila mu Yave? Nandi wutuba: “Yizibudila Yave ntim’ami ayi yinkamba buidi yaba muena mu mambu maba kuthatisa. Ayi kadika khumbu yaba vanganga mawu, Yave waba kuphananga mangolo mantombulu.”

Buidi ngie wulenda buedila lufiatu luaku mu Yave? Dedi bo kikunusu kintombuluanga nlangu ayi muinya muingi kiyonzuka, kiminu kitu kintombuluanga nlangu wu kiphevi muingi kiyonzuka. Nicolas tuma tubila kumbusa, wuvisa ti kuyindula mu kifuani ki Abalahami, Yesu ayi Polo—batu ba kivana beni mu kisalu ki Nzambi—kukindisa lufiatu luandi mu lusalusu lu Yave. Thuadusulu yi ndongukulu yi Kibibila, yisinkuiza kusadisa ko to muingi kununga bo mambu mambaluka. Vayi mvandi yinkuiza kusadisa kubaka minkhailu mi kiphevi mio ngie wulenda kindisila batu bankaka bamona mu kimvuka widi.

2. Bika kukidedikisa. (Mpovi 7:10) Jules waba kalanga ku Benim wuyenda ku Estados Unidos, wuvanga mangolo ma kukolama mu kikhulu kimona. Nandi wutuba: “Vaba tombulu yizabikisa kikhulu kiami kuidi kadika mutu yaba zabanga.” Bo mambu maba disuasana na mambu kayuku, nandi wutona kutatuka zikhomba. Vayi bo kazaba buboti zikhomba, nandi wubalula mayindu mandi. Nandi wutuba: “Minu yinkikinina ti kioso kua kibuangu tulenda ba va ntoto, batu boso bake phila yimueka, bawu bake to disuasana mu thubulu ayi phila yi kuvangila mambu. Vayi diambu to dintombulu, kuvitika batu mu phila badidi.” Bika kukidedikisa na kimvuka wuba. Yaya Anne-Lise widi ntuami ntuala wutuba: “Yisa baluka ko kimvuka muingi kue bata momawu mambu yibika mu kimvuka yiba, vayi muingi kubakula mambu mamona.”

Bakulutu ba kimvuka mvandi bafueti bika kudedikisa kimvuka kinkaka na kimvuka kio baba. Disi ko diambu dimbi kuvangila mambu mu phila yiviakana. Didi diambu dimboti kuzaba zikhomba ava kuvana diyindu. (Mpovi 3:​1, 7b) Ayi buboti kulongila mu kifuani kena kukuika mayindu maku kuidi zikhomba.—2 Ko. 1:24.

3. Buela kukivana. (Fil. 1:27) Vantombuluanga thangu ayi mangolo muingi kubaluka, vayi dike diambu dinkinza bo wumbaluka kufika landakananga zikhutukunu—boti kuba mu kimutu. Kibila boti zikhomba mu kimvuka wubalukizi ba kumonanga ko beni, buidi balenda kusadisila? Yaya Lucinda wubaluka mu kimvuka kinkaka ku divula dinneni ku África do Sul na bana bandi buadi ba bakietu wutuba: “Bakhindisa muingi yibuela kukivana, mu kimvuka mu kubasikanga mu kisalu ki kusamuna ayi kuvananga mimvutu mu zikhutukunu. Mvandi tukamba zikhomba basadilanga nzu’itu muingi kuvanganga zikhutukunu zi kubasikila mu kisalu ki kusamuna.”

‘Kutatamana kukindasana mu kiminu’ bo tumvanga mambu ma kiphevi va kimueka na zikhomba zitu, yidi phila yi kubuedila mioku mambu “matedi zitsangu zimboti.” Anne-Lise, tuba tubila kumbusa, bankindisa kuidi bakulutu ba kimvuka kavanga mangolo ma kusamunanga na zikhomba zioso. Ndandu mbi kabaka? Nandi wutuba: “Mu thinu, minu yivisa ti mawu maba tombulu muingi yiyolama.” Mvandi kukivana mu bisalu bi kudiodisa ayi kubuongisa Nzo yi Kintinu, wunkuiza monisa ti akiokio, kiawu kieka kimvuka kiaku. Diawu bo wumfika kukivana ayi kukikinina mambu mamona, ngie wunkuiza mona ti mabaka dikanda dimona di kiphevi.

4. Tomba bakundi bamona. (2 Ko. 6:​11-13) Kuvua nkinza bankaka, yike phila yi kuvangila bukundi. Kubotulanga thangu ava lukutukunu lutona ayi bo lummana, yike phila yi kufikimina zikhomba ayi kuba zaba buboti. Vanga mangolo muingi wuzaba mazina mawu. Kutebukanga moyo mazina ma batu, kuba monisa luzolo ayi kuba yambanga, kuala vanga batu ba kufikama ayi mawu mala kuvanga kubaka bakundi mamboti.

Bika kuvuna kubalula kimutu kiaku muingi zikhomba ba kuzola. Vayi bika bawu bazaba kimutu kiaku buboti. Landakana kifuani ki yaya Lucinda. Nandi wutuba, “Befu tuidi bafikama na zikhomba, kibila tuntuamanga ntuala muingi kuba tumisa ku nzu’itu.”

“YAMBANGA BANKAKA”

Batu bawombu bammonanga zitsoni kukota ku nzo Kintinu yike batu bawombu bakhambu zaba. Buabu, mbi fueti vanga kuidi zikhomba zimona babalukizi mu kimvuka widi? “Yambanga bankaka.” Mvuala Polo wukindisa zikhomba, “yambanganu bankaka dedi bo Klistu ka luyambila.” (Lom. 15:7) Mu kulandakana kifuani ki Yesu, bakulutu ba kimvuka, bansadisanga zikhomba zimona muingi kukolama. (Tala quadro yintuba “Mbi Binsadisanga Batu Bamona Kukolama?”) Diawu, baboso mu kimvuka kubunda mvandi bibabana, badi mambu ma kuvanga muingi kusadisa zikhomba zimona kukolama.

Kuyambanga, yidi mbonosono yi kuvanina ndizulu yimboti, vayi mvandi vantombulu kuvana lusalusu. Dedi, tala mambu mavanga khomba mueka yinkietu. Nandi wubotula thangu muingi kumonisa khomba yimona divula ayi kunsudikisa phila yi kubakila taxi. Mambu amomo, manyikuna ntima wu khomba yimona ayi mansadisa kukolama.

LUAKU MUINGI KUKONZUKA

Tala kifuani ki mindedeka, miawu mimbalulanga nkanda nyitu’aku ava mavavi kukonzuka. Bobuawu mvandi, bo wumbaluka mu kimvuka kinkaka, wufueti botula boma bulenda kutula nkaku wu kubuela kukivana mu kisalu ki Yave. Nicolas ayi Céline batuba: “Kubaluka yike khubumunu yimboti. Kibila kuzinga na batu bamona mu bibuangu biviakana, kutusadisa kukuna zikhadulu zimona.” Jean-Charles tuba tubila kumbusa, wutuba ndandu nandi ayi dikanda diandi babaka: “Kubaluka mu kimvuka kinkaka, kusadisa bana bitu kukonzuka mu kiphevi ayi kubuela fikama Yave. Mu mua zingonda to, muan’itu wunkietu wukikinina kiyeku ki lukutukunu lu khati sabala ayi muan’itu wu dibakala, wuyiza ba nsamuni wukhambu botama.”

Buabu, boti ngie wisi ko luaku lu kukuenda kuma kuke beni tsatu? Boti buawu, buna wulenda sadila mambu 4 tuma tubila mu dilongi adidi, mu kimvuka ngie widi. Fiatila mu Yave, wukivana mu bisalu bi kimvuka mu kubasikanga na bankaka mu kisalu ki kusamuna, kuvanga bakundi bamona ayi kukindisa kikundi kiaku na batu bake yaku kikundi. Wulenda yoluka na zikhomba zimona ayi kuba vana lusalusu bantomba? Kuzaba ti luzolo kiawu kidimbu ki Baklistu bakiedika, mawu mala kusadisa kukonzuka mu kiphevi. (Yoa. 13:35) Ngie wulenda ba lufiatu ti, “minkhailu amiomio, minkuangidikanga Nzambi.”—Ebe. 13:16.

Kheti mu bikaku, Baklistu bawombu banunga kukolama bo babaluka kimvuka kinkaka—ayi mvaku wulenda nunga! Yaya Anne-Lise wutuba: “Kubaluka kimvuka, kutsadisa kubuela zibula ntim’ami.” Yaya Kazumi wutuba, “ngie kubaluka kimvuka, wulenda mona lusalusu lu Yave mu ziphila ka wumueni’abu ko.” Ayi yaya Jules wutuba: “Bakundi yibaka, batsadisa yibika kubue yindulanga kuma yiba. Buabu yimana zola kimvuka kinkaka yidi ayi dilenda ba diambu diphasi kubika kiawu.”