Ngie Wuntebuka Moyo?
Ngie betanga buboti malongi moso ma Kibanga ki Nsungi ki mvu awuwu? Boti buawu, vana mimvutu mi biuvu abibi binlanda:
Mbi bi tuvanganga kuvana nkembo kuidi Yave?
Tumvangilanga mawu kibila befu tunzolanga beni Yave ayi tu kunkinzikanga. Mvandi, tu kumvananga nkembo kibila tuntomba muingi bankaka mvandi bavanga mawu.—w25.01, tsielu 3.
Buidi tulenda monisina nlemvu bo ba tulueka ntima?
Tulendi lenza ko mabanza mitu, vayi kusola kulemvukila ayi kubika suekila nganzi, kulenda ku tusadisa kubika kuyituadisa ziphasi befu veka.—w25.02, tsielu 15-16.
Kibila mbi Malaku kabela kifuani kimboti kuidi zikhomba zi matoko?
Malaku wukikinina kiyeku kimona mu mayangi. Kheti mu mambu ma kiunda kayiza viokila, nandi kasa vonga ko. Malaku wutatamana kuba kikundi kimboti na mvuala Polo ayi baklistu bankaka bayonzuka.—w25.04, tsielu 27.
Mbi Yesu kaba tomba kutuba bo kasambila: “Yiba zabikisa dizina diaku?” (Yoane 17:26)
Minlandikini mi Yesu bazaba dizina di Nzambi. Vayi kheti bobo, Yesu wuba zabikisa dizina di Nzambi mu kuba sudikisa ntindu mutu mbi tat’andi kadi, zikhadulu ziandi ayi zikhanu ziandi.—w25.05, tsielu 20-21.
Mu kuzaba ndilu’itu, mayindu mbi tufueti ba matedi befu veka?
Tufueti kikinina ti tusa zaba ko mambu moso. Dedi, tusa zaba ko kilumbu mbi tsukulu yi nza yala kuiza, voti mambu mbi Yave kala vanga mu thangu beni. Mvandi tusa zaba ko mambu mala monika yono ayi tulendi visa ko nati kitesu mbi Yave ka tuzebi.—w25.06, tsielu 15-18.
Mbi bilenda tusadisa kubaka ndandu mu dilongi di baboso?
Tulenda kuyikuvusa: ‘Bivisa mbi badi mu kusadila, muingi kunyikunina mintima mi batu badi mu kukuwa? Kifuani mbi yilenda sadila muingi kusadisa mutu yinlonga kiedika?’ Ayi nani kalenda vua nkinza mambu amama ayi thangu mbi yilenda kunzabikisa mawu?’—w25.07, tsielu 19.
Mbi tulenda longuka matedi nlemvu wu Yave, mu phila nandi kalemvukila Ntinu Davidi?
Kheti Ntinu Davidi wuvanga zinzimbala ziwombo, vayi bo kanyongina masumu mandi, Yave wunlemvukila. (1 Minti. 9:4, 5) Bo Nzambi kanlemvukila mutu, nandi katebukilanga ko moyo nzimbala mutu beni kavanga, ayi kalasa sadila ko nzimbala beni muingi kufundisa mutu beni mu bilumbu binkuiza.—w25.08, tsielu 17.
Mbi wulenda vanga muingi kusadisa nlonguki wu Kibibila mu mambu kafueti balula?
Va kutombulu, bika kufika tubila mambu nandi kafueti balula mu luzingu luandi, vayi bumviokila thangu mulenda vutukila kubue tubila mawu muingi kunsadisa.—w25.09, tsielu 24.
Kibibila kintubila matedi “luvunu lu masumu.” (Ebe. 3:13) Mbi mawu mansundula?
Disumu dilenda ku tunata kuvanga mambu mambi. Mvandi, dilenda ku tuvukumuna ayi ku tuvanga kuba divuda boti Nzambi wu tuzolanga.—w25.10, tsielu 16.
Mambu mbi matatu malenda tusadisa kusambila mu ntima woso?
(1) Yindula mu zikhadulu zi Yave. (2) Yindula mu mambu wunkuiza tuba. (3) Vanga minsambu mikula. Mawu mankuiza tusadisa kuzibudila ntim’itu ayi kuzabikisa Yave mabanza mitu.—w25.10, tsielu 19-20.
Buidi tulenda sadisila zikhomba zima nuna?
Tulenda kuba tela mu telefone ayi kue batala mu zinzo ziawu. Mvandi tulenda yenda yawu ku nzo mbuku, voti kubasikanga yawu mu kisalu ki kusamuna.—w25.11, tsielu 6-7.
Mambu mbi malenda sadisa Baklistu kuzitisa Nzambi mu kilumbu ki dikuela diawu?
Kutumukina minsiku mi tsi matedi dikuela. Kuvanga mangolo muingi nkungi wu dikuela yibika ba dedi minkungi mi nza, ayi kutina bikhulu bikhambulu kithuadi na minsua mi Kibibila. Kuvuata mu phila yifuana ayi kuzaba ndilu’itu mu kutadila mbakulu’itu. Ayi kuba masolo mamboti na basi dikanda mu thangu yi kukibika nkungi wu dikuela.—w25.12, tsielu 21-24.