Tatamana Kudukisa Tsatu’aku yi Kipheve

1. Zitsatu mbi Yave katula mu batu? (Matai 5:3)

YAVE wuvanga batu na zitsatu. Dedi, nandi wunkebanga luzingu luitu mu kutuvana bidia, bikhutu ayi vama va kukala. Biuma abiobio bia kukhambu mu befu kheti mu mua thangu, luzingu luitu lunkuiza ba beni phasi. Vayi, Yave kasa tuvanga ko to na zitsatu mu biuma abiobio, vayi mvandi wutuvanga na phuila yi mambu ma kipheve. (Tanga Matai 5:3.) Boti tuntomba kuba mu mayangi, tufueti kikinina tsatu ayoyo ayi kudukisa yawu.

2. Buidi tulenda fuanikisila mutu wuzebi tsatu’andi mu mambu ma Nzambi?

² Mbi binsundula kuba “phuila yi mambu ma Nzambi”? Kikuma ki kingeleko basekudila kuba phuila yi mambu ma Nzambi, kinsundula batu bazebi ti badi kiphumbulu mu mambu ma kipheve. Buidi tulenda fuanikisila mawu? Yindula mutu widi beni mvindu, bevuata bikhutu bibakuka ayi wunkala mu nzila. Nandi kasi ko beni mangolo kibila kasi ko bidia. Ayi kasi ko bu kusuamina muinya ayi va builu wummonanga beni kiozi. Nandi wunkikinina ti muingi luzingu luandi lubaluka, kafueti tambula lusalusu. Bobuawu mvandi, mutu wuzebi phuil’andi yi mambu ma Nzambi voti widi kiphumbulu mu kipheve, kafueti tomba lusalusu muingi kabalula luzingu luandi. Diawu nandi wunkuiza vanga mamoso muingi kabaka ndandu mu mambu moso ma kipheve Yave kamvananga kuidi batu ba kunzolanga.

3. Mbi tunkuiza tubila mu dilongi adidi?

³ Mu dilongi adidi, theti tunkuiza tubila mbi befu tulenda longuka mu kifuani ki nkietu musi Fenisi wudinda Yesu kansadisa. Kinongu beni kinkuiza monisa zikhadulu zitatu batu bazebi tsatu’awu mu mambu ma Nzambi bafueti kuna. Bosi tunkuiza tubila kifuani ki mvuala Petelo, mvuala Polo ayi ntinu Davidi, baba kipheve kimboti.

KIFUANI KI KUKIKULULA, KUTATAMANA AYI KIMINU

4. Mambu mbi nkietu musi Fenisi kaba tomba muingi Yesu kavanga?

⁴ Kilumbu kimueka, nkietu mueka musi Fenisi wufikama vo Yesu kaba. Muana wu nkietu beni wuba mu “thuadusulu yi zipheve zimbi.” (Mat. 15:​21-28) Nkietu beni wufukama va ntuala Yesu ayi wulomba lusalusu luandi. Nandi wumonisa zikhadulu zinkinza bo kafikama Yesu. Ndoko tumona zikhadulu mbi nandi kamonisa.

5. Zikhadulu mbi nkietu musi Fenisi kamonisa, ayi buidi ziawu zinatina Yesu kunsadisa? (Tala mvandi fikula.)

⁵ Nkietu musi Fenisi wuyikulula. Kibila mbi tulenda tubila mawu? Kibila nandi kasa fuema ko bo Yesu kasadila kifuani kiaba kundedikisa buka muana mbua, ayi ḿba batu bakhambu ba basi Yuda baba tuilanga zimbua. Boti ngie, khanu mambu mbi wuvanga bo wuyuwa kifuani Yesu kasadila? Khanu wudasuka ayi wusa bue tomba ko lusalusu luandi? Masi ko mawu nkietu musi Fenisi kavanga. Nandi kasa kuyikulula to, vayi mvandi wutatamana. Tuntubila mawu kibila nandi wudinda lusalusu lu Yesu. Mbi binnata kuvanga mawu? Kiminu kiandi mu Yesu. Kiminu ki nkietu musi Fenisi, kinyikuna beni ntima wu Yesu ayi diawu Yesu kamvangila diambu di kukuitukila. Kheti Yesu wuzaba ti nandi wuyizila muingi kusadisa mameme mazimbala ma basi Isaeli, vayi nandi wukukisa pheve yimbi yiba mu muana wu nkietu awowo wukhambu ba musi Isaeli.

6. Mbi tulenda longuka mu kufiongunina kifuani ki nkietu musi Fenisi?

⁶ Muingi kudukisa tsatu’itu yi kipheve, tufueti kukikulula, kutatamana ayi kuba kiminu kingolo. Batu bayikuludilanga bawu to bantatamananga kutomba lusalusu lu Nzambi. Mvandi, befu tufueti ba kiminu kingolo mu Yesu Klistu ayi kufiatila batu nandi kadi mu kusadila muingi kutuadisa minlandikini miandi. (Mat. 24:​45-47) Yave ayi Yesu badi phuila yi kudukisa zitsatu zi kipheve zi batu bammonisanga zikhadulu aziozio. (Dedikisa mawu na Tiagu 1:​5-7.) Buabu, ndoko tutubila buidi Yave ka tuvaninanga bidia bi kipheve, bikhutu ayi kisuamunu ki kipheve. Tunkuiza tubila mvandi mbi tufueti vanga muingi kudukisa zitsatu aziozio mu kulonguka kifuani ki mvuala Petelo, mvuala Polo ayi Ntinu Davidi.

TATAMANA KUDIA BIDIA BI KIPHEVE DEDI MVUALA PETELO

7. Kiyeku mbi Yesu kavana kuidi mvuala Petelo, ayi mambu mbi maba tombulu Petelo kavanga? Sudikisa. (Ebeleo 5:14–6:1)

⁷ Mona kifuani ki mvuala Petelo. Nandi wuba wumueka mu basi Yuda bakikinina ti Yesu nandi Mesia, mutu Yave kasola muingi kuvana malongi mamvananga luzingu lu mvu ka mvu. (Yoa. 6:​66-68) Ava Yesu kavulubuka ayi katombuka ku diyilu, nandi wukamba mvuala Petelo: “Kiebanga bana bama ba mamemi.” (Yoa. 21:17) Mvuala Petelo wudukisa kiyeku akiokio bamvana kuidi Yave ayi wusadila luaku alolo muingi kusonika minkanda miodi midi mu khati zibuku zi Kibibila. Nandi wulonguka mu minkanda mvuala Polo kasonika mua mimvu kumbusa. Nandi wukikinina ti mambu mankaka Polo kasonika maba beni phasi muingi kuvisa. (2 Pet. 3:​15, 16) Vayi nandi wutatamana kibila wuba lufiatu ti Yave wunkuiza nsadisa muingi kavisa ayi kasadila malongi ma phinda mvuala Polo kasonika mu minkanda miandi.—Tanga Ebeleo 5:14–6:1.

8. Buidi mvuala Petelo katadila thuadusulu yimona katambula mu nzila mbasi yi Yave?

⁸ Mvuala Petelo wumonisa ti wuba kiminu mu Yave mu kutumamana zithuadusulu zioso katambula. Dedi, bo kaba ku divula di Jope, nandi wumona mu kimona mesu mbasi yi Yave wunkamba muingi kadia bibulu bakandimina mu nsiku wu Mose. Kuidi basi Yuda, thuadusulu ayoyo yisa ba ko yifuana. Diawu va thonono, Petelo wuvutudila kuidi mbasi: “Yidianga ko ni kiuma kimueka ki mvimdu ayi kio bakandimina mu minsiku.” Diawu mbasi kankambila: “Bika kutedila biuma Nzambi kadiodisa, biuma bi mvindu.” (Mav. 10:​9-15) Mvuala Petelo wuvisa tsundu yi mambu beni. Buidi tuzabidi mawu? Kibila, bo kamona kimona mesu beni, Koloneliu wukhambu ba musi Yuda, wufila babakala batatu ku nzo Petelo muingi kuntumisa kenda yoluka yandi. Khanu Petelo kasa kikinina ko kukota ku nzo mutu wukhambu ba musi Yuda. Kibila basi Yuda baba tadilanga batu ba mimvila minkaka banga batu ba mvindu. (Mav. 10:​28, 29) Vayi mvuala Petelo mu nsualu wukikinina thuadusulu ayoyo yimona Yave kamvana. (Zinga. 4:18) Nandi wusamuna Koloneliu ayi dikanda diandi, ayi wumona mayangi bo Koloneliu ayi dikanda diandi bakikinina kiedika, batambula pheve yinlongo ayi babotama.—Mav. 10:​44-48.

9. Mu ziphila mbi ziwadi tumbakilanga ndandu mu kuba phuila yi kudia bidia bingolo bi kipheve?

⁹ Dedi mvuala Petelo, befu tufueti tatamana kulongukanga malongi matheti ma kibibila, ayi mvandi kudianga bidia bingolo bi kipheve voti kuvanga mangolo muingi kuvisa minsua mi Kibibila. Tufueti botulanga thangu ayi kuba wukubama muingi kuvanga mangolo moso mantombulu muingi kuvisa buboti diambu di Nzambi. Kibila mbi? Kibila tumbakanga ndandu mu ziphila ziwadi: Yitheti, tunlongukanga mambu manluta buela luzolo ayi lukinzu tuidi mu Yave; Ayi yimmuadi, tumbanga phuila muingi kuzabikisa kuidi bankaka kiedika kitedi tat’itu yi diyilu. (Lom. 11:33; Nzai. 4:11) Kifuani ki mvuala Petelo ki tulonga diambu dinkaka dinkinza. Bo tuntambula phisulu yimona matedi mambu tunkikininanga mu Diambu di Nzambi, tufueti vanga mangolo muingi kubalula phil’itu yi kuyindudila ayi mavanga mitu mu nsualu. Mu phila ayoyo, tuala tatamana kuba buvinya bumboti bu kipheve, ayi Yave wala luta ku tusadila.

VUATA KIMUTU KIMONA DEDI MVUALA POLO

10. Mbi binsundula kuvuata bikhutu bi kipheve? (Kolosai 3:​8-10)

¹⁰ Muingi tuyangidika Nzambi, tufueti baka ndandu mu phuatulu yi kipheve. Mbi mawu mansundula? Mvuala Polo wusonika ti tufueti vula zikhadulu zi kimutu kitu kikhulu ayi kuvuata kimutu kimona. (Tanga Kolosai 3:​8-10.) Disi ko diambu diluelu kuvuata kimutu kimona. Tala kifuani ki mvuala Polo. Tona kaba ditoko, nandi waba vanga mangolo mawombo muingi kubaka lunungu lu Nzambi. (Nga. 1:14; Fil. 3:​4, 5) Vayi nandi kasaba ko nzailu yikiedika kitedi luzolo lu Nzambi, diawu kabela kiphumbulu mu kipheve. Mu kukhambu vua nkinza malongi ma Klistu ayi kukinangika, nandi wuyiza ba mvuezi waba thuadusu mu mavanga mambi.—1 Ti. 1:13.

11. Zikhadulu mbi mvuala Polo kavanga mangolo muingi kununga? Sudikisa.

¹¹ Ava mvuala Polo kaba nlandikini wu Yesu, nandi wuba mutu wu nganzi. Buku yi Mavanga yintubila ti mvuala Polo waba tomba kuvonda minlandikini mioso mi mfumu mu kibila ki nganzi kaba mu bawu. (Mav. 9:1) Bo kayiza ba wumueka mu Baklistu, nandi wuvanga mangolo mawombo muingi kubika tuadusu mu zikhadulu ziba kithuadi na kimutu kiandi kikhulu. (Efe. 4:​22, 31) Vayi kheti bobo, bo nandi ayi Balinabasi bayiza bakasana mambu, bawu basombula beni. (Mav. 15:​37-39) Kheti thangu zinkaka mvuala Polo kaba monisanga zikhadulu zi kimutu kiandi kikhulu, vayi nandi kasa vonga ko. Nandi wuvanga mangolo muingi kununga zikhadulu ziandi zimbi muingi kubaka lunungu lu Yave.—1 Ko. 9:27.

12. Mbi bisadisa mvuala Polo kubika zikhadulu zimbi?

¹² Mvuala Polo wununga kuvula kimutu kikhulu ayi kuvuata kimutu kimona kibila nandi kabasa fiatilanga ko mu mangolo mandi veka. (Fil. 4:13) Vayi dedi Petelo, nandi wufiatila mu mangolo ma Nzambi. (1 Pet. 4:11) Kheti bobo, Khumbu zinkaka mvuala Polo waba kuyimuena ti kasi ko luvalu. Vayi mu thangu kaba banga mu kiunda, nandi waba yindulanga mu mambu mamboti Yave kamana kumvangila, ayi mawu maba kunsadisanga kabika kuvonga.—Lom. 7:​21-25.

13. Buidi tulenda landikinina kifuani ki mvuala Polo?

¹³ Kheti tumana sadila Yave mu mimvu miwombo, tulenda landikinina kifuani ki mvuala Polo mu kutatamana kuvanga mangolo ma kuvula kimutu kikhulu, ayi kuvuata kimutu kimona kidi kithuadi na luzolo lu Nzambi. Boti mu mua thangu befu kuvutuka kumonisa zikhadulu zi kimutu kikhulu dedi kukhambu monisa mvibudulu voti kutubila bankaka bubi, tulendi yindula ko ti tusiedi ko luvalu. Vayi tufueti vanga mangolo muingi kubaludila phil’itu yi kuyindudila ayi yi kuvangila mambu. (Lom. 12:​1, 2; Efe. 4:24) Bo tumvanga mawu, tufueti tebuka mvandi moyo ti kuvuata kimutu kimona kidi disuasana kena kuvuata bikhutu. Kibila befu tulenda ludika bikhutu muingi bi tufuana, vayi matedi bikhutu bi kipheve, befu tufueti vanga mangolo muingi kubalula mua mambu mu luzingu luitu. Diawu muingi mawu mamonika, tufueti balula mavanga ayi mayindu mitu, muingi tuba bafuana va mesu ma Nzambi.

TATAMANA MU KISUAMUNU KI KIPHEVE DEDI NTINU DAVIDI

14-15. Mu phila mbi Yave kavanina kuidi dikabu diandi kisuamunu ki kipheve? (Minkunga 27:5) (Tala mvandi foto levista.)

¹⁴ Muingi tubaka mayangi ma kiedika mu luzingu, vasintombulu to kudia bidia bi kipheve ayi kuvuata bikhutu bi kipheve. Mvandi tufueti ba ku kisuamunu ki kipheve. Mbi biobio kisuamunu ki kipheve ayi buidi tulenda ba lufiatu ti kisuamunu beni ki tukiebanga?

¹⁵ Ntinu Davidi wutubila matedi kisuamunu ki kipheve Yave kamvananga. (Tanga Minkunga 27:5.) Yave wukieba dikabu diandi muingi ni mutu kanunga kutulula kiminu kiawu mu nandi. Buidi Yave kankiebilanga bisadi biandi mu mambu malenda tulula kiminu kiawu? Nandi wukanikisa ti vasi ko ni kiuma zimbeni balenda sadila dilenda tulula dikabu diandi. (Minku. 34:7; Yesa. 54:17) Kheti Satana ayi bo badi va khonzo’andi badi mangolo, bawu balendi nunga ko kumanisa bisadi bi Yave. Kheti bawu balenda ku tuvonda, Yave wala ku tuvulubusa. (1 Ko. 15:​55-57; Nzai. 21:​3, 4) Yave mvandi wu tusadisanga kununga kiunda kingolo kilenda manisina ndembam’itu. (Zinga. 12:25; Mat. 6:​27-29) Ayi mvandi, nandi wu tuvana dikanda di kipheve di tusadisanga ayi bakulutu ba kimvuka ba tukindisanga. (Yesa. 32:​1, 2) Bo tuidi mu zikhutukunu, Khumbu ziwombo ba tutebulanga moyo ziphila tulenda bakila ndandu mu lukiebu lu Yave.—Ebe. 10:​24, 25.

16. Mu ziphila mbi Yave kakiebila Davidi?

¹⁶ Bo Davidi katumikina Yave, nandi wunkieba muingi kabika viokila mu ziphasi zinkuizilanga kuidi batu baba vanganga disumu mu lutia luawu. (Dedikisa na Zingana 5:​1, 2.) Vayi mu thangu Davidi kabayisa minsua mi Nzambi, Yave wumbika muingi katovuka. (2 Samu. 12:​9, 10) Buabu, mbi Davidi kaba vanganga mu thangu kaba tovukanga kheti mu khambu vanga ni diambu dimbi? Nandi waba zabikisanga mabanza mandi kuidi Yave mu nzila nsambu. Ayi Yave wuvumbika mabanza ma Davidi, ayi wunsadisa kaba lufiatu ti nandi wunkuiza nsadisa ayi kunkieba.—Minku. 23:​1-6.

17. Buidi tulenda landikinina kifuani ki Davidi?

¹⁷ Tulenda landikinina kifuani ki Davidi, mu kutomba zithuadusulu zi Yave ava kubaka makani mu luzingu. Mvandi mu kukikinina ti khumbu zinkaka tulenda viokila mu mambu maphasi kubika ti Yave kasa tukieba ko vayi mu kibila ki makani mambi tubaka. (Nga. 6:​7, 8) Ayi bo tumviokila mu mambu maphasi kheti tusa vanga ko ni diambu dimbi, tufueti zibudila ntim’itu kuidi Yave mu nzila nsambu mu kuba lufiatu ti nandi wala kieba mintima mitu ayi mayindu mitu.—Fil. 4:​6, 7.

TATAMANA KUDUKISA TSATU’AKU YI KIPHEVE

18. Mbi bilenda ku tutula nkaku muingi tubika ba phuila mu mambu ma Nzambi Ayi mbi binkuiza tusadisa muingi tuvanga mangolo ma kudukisa tsatu’itu yi kipheve? (Tala mvandi zifoto.)

¹⁸ Matangu ma mvu 2026 mantuba: “Mayangi kuidi batu badi phuila yi mambu ma Nzambi.” Mambu amomo madi makiedika, bulutidi mu bilumbu abibi tuidi mu kuzingila. Kibila tunzingilanga na batu bakhambulu mayangi, bakhambu vua nkinza zitsatu ziawu zi kipheve, voti bantombanga kudukisa zitsatu ziawu zi kipheve mu nzila malongi ma binganga bi luvunu voti mayindu ma batu. Tulendi bika ko muingi mayindu mawu mambi ma tuvukumuna. Buidi? Tulenda vanga mawu, mu kutatamana kudianga bidia bi kipheve Yave ka tuvananga, kuvuata kimutu kimona ayi kukota ku kisuamunu ki kipheve muingi tubaka lukiebu Yave kamvananga.