Bila mbi tueta kuendila mu zikhutukunu zieto zinene e?

Bila mbi batu baba badi mu kiese? Bila badi ku lukutukunu lueto lumosi lunene. Dede kuandi bisadi bi Nzambi mu thangu yi thama, bobo bakindusu mu kutakananga khumbu tatu mu mvu, beto phe tueta vingila zikhutukunu zieto zinene. (5 Mose 16:16) Kadika mvu, tueta ba zikhutukunu zinene zitatu: zikhutukunu zizungidila ziwadi zi lumbu kimosi ayi lukutukunu lu zunga lu bilumbu bitatu. Mamboti mbi tueta baka mu zikhutukunu zinene beni?

Zieta kindisa kiphangi kieto ki buklisto. Bobuawu kuandi bana ba Isaeli babe yangalalanga kembisa Nzambi mu “lukutukunu luneni,” beto phe tueta yangalala kutakana mu sambila Nzambi mu zikhutukunu zieto zinene. (Nkunga 26:12, noti, NW; Nkunga 111:1) Tueta baka diluaku di denginina diaka ayi di vuanda vakimosi ayi baphangi ba bimvuka binkaka voti ba zitsi zinkaka. Mu thangu yi vunda midi, tueta dia mua kima ayi baphangi va buangu ki lukutukunu. Yawu yeta buela kiese mu zikhutukunu zieto beni. (Mavanga 2:42) Mu zikhutukunu zinene, tueta mona mu meso nzola yoyi yisangisidi ‘zikhomba zieto mu minu’ mu nza yimvimba.—1 Petelo 2:17.

Zieta kutusadisa mu diambu tukula mu kipheve. Bana ba Isaeli babeyangalalanga bila “basudika tsundu yi ziphova” zi Masonoko momo babe kusundudilanga. (Nehemia 8:8, 12) Beto phe tueta yangalala mu malongi ma Bibila momo tueta baka mu zikhutukunu zieto zinene. Kadika lukutukunu lueta baka ntu disolo dio dibedi mu Bibila. Tueta longuka bue bu vangila luzolo lu Nzambi mu luzingu lueto mu nzila zi diskure ayi mu nzila zi mbonosono. Wa masolo ma baklisto bobo banunga mambu ma phasi momo badengana mu kinzika minsiku mi Nzambi kueta kutukindisa. Zidrame ziozi batu beta vuatila dede mu thangu yi thama voti mu thangu eto zieta kutuvana malongi mawombo ma mfunu. Mu zikhutukunu zioso zinene, batu beta baka mbotama mu monisa ti bakiveni kudi Nzambi.

• Bila mbi zikhutukunu zieto zinene zikadila thangu mosi yi makhini?

• Mamboti mbi lenda baka enati wedi ku lukutukunu lumosi lu nene?