Phila mbi Kimvuka kintuadisi kieta sadila lumbu kiaki?

Mu thangu yi baklisto ba thete, mua kimvuka mosi ki ‘bantumua ayi bakulutu ku Yelusalemi,’ kiawu kiba kimvuka kintuadisi mu diambu di baka nzengolo yi mfunu mu diambu di kimvuka ki baklisto bobo batulu mafuta. (Mavanga 15:2) Mu nzengolo yo baboso bakikinina, babetadilanga mo Masonoko mantuba ayi pheve yi Nzambi yibatuadisa. (Mavanga 15:25) Buawu yeta salimina lumbu kiaki phe.

Kiawu Nzambi kalembo sadila muingi kadedikisa luzolo luandi. Baphangi bo batulu mafuta bobo badi mu Kimvuka kintuadisi beta tia Phova Nzambi buwombo ayi badi batu bo bayuku baka nzengolo mu mambu matedi tsambudulu ayi kisalu kieto. Beta kutakana kadika sabala mu diambu di tadila tsatu yi ziphangi mu nza yimvimba. Bo buawu kuandi bubela mu thangu yi baklisto ba thete, bimvuka bieta baka malongi mo mabedi mu Bibila mu nzila yi minkanda voti mu nzila mi minkengidi mikodiatanga, voti mu nzila yinkaka. Yawu yeta tula ti dibuta di Nzambi diba mu lubundanu mu zingindu ayi mu mavanga. (Mavanga 16:4, 5) Kimvuka kintuadisi kieta tuadisa kisalu ki kubika bidia bi kipheve, kieta kutukindisa beto boso muingi tukivana mu kisalu ki samuna Kimfumu, ayi kieta tadila mambu ma bieka baphangi zi babakala mu biyeko mu kimvuka.

Kieta landakana lutuadusu lu pheve yi Nzambi. Kimvuka kintuadisi kieta tadila Yehova, Mfumu Nio Lutidi mu luyalanganu, ayi Yesu, Mfumu yi kimvuka mu diambu di baka lutuadusu. (1 Kolinto 11:3; Efeso 5:23) Baphangi beni bakimonanga ko ti badi bamfumu ba bisadi bi Nzambi. Vayi, mu kithuadi ayi baklisto bankaka bo batulu mafuta, “beti landakana Muana dimemi [Yesu] koso ku kankuenda.” (Tsongolo 14:4) Kimvuka kintuadisi kieta yangalala ti tusambila Nzambi mu diambu diawu.

• Ba nani baba mu kimvuka kintuadisi mu thangu yi baklisto ba thete?

• Phila mbi Kimvuka kintuadisi beta tombila lutuadusu lu Nzambi lumbu kiaki?