Biuvu bi mintangi

2 Tesalonika 3:14 yitubidi ti ‘lutula dimbu’ batu bankaka. Nzengolo yitula mutu dimbu, bakulutu bafueti baka yawu voti minsamuni mioso mu kimvuka?

Thumu Polo wusonika kuidi Bakristu ba Tesalonika mu tuba ti: “Enati mutu mengi tumimina mambu tulukamba mu nkanda wawu, luntula dimbu.” (2 Tes. 3:14) Mu thama, tueba banzilanga ti bakulutu kaka bafueti kubutudila. Enati mutu weba tatamananga vuezila zitsikudukusu zi Bibila kadiambu ko zindongi ziwombo ziozi beba kumvananga, bakulutu beba tulanga diskur mu diambu di lubula kimvuka. Ayi minsamuni mieba bue tulanga ko kikundi ayi mutu beni nioni wutulu dimbu.

Vayi tufueti bongisa mambu mankaka. Ndongi yi Polo yitubila diambu diodi kadika Mukristu kafueti vanga mu mambu mankaka. Diawu, yisi kuandi ko mfunu bakulutu ba bue tula diskur yi lubula kimvuka mu diambu di mutu nioni batudidi dimbu. Bila mbi diambu beni dime balukila? Tutadila ndongi yi Polo mu disolo beni.

Polo wumona bakhomba bankaka mu kimvuka balembo “diatila mu divunzi.” Babe landakananga ko zindongi ziozi zisonimina mu lutuadusu lu pheve santu. Mu visite yoyi katula basi Tesalonika, wuvana lutumu lolo lutuba ti: “Woso mutu mengi kuandi sala, buna kabika tomba bidia.” Kadiambu ko bankaka babe manganga kuawu kaka sala kisalu mu diambu di dukisa ziphuila ziawu. Ayi mu buela, beba kotanga mu mambu mangana. Bue bakristu bafuanina tadila divunzi diphila yoyi?​—2 Tes. 3:6, 10-12.

Polo wutuba ti ‘babatula dimbu.’ Kuma kingeleki kituba ti, bafueti zaba batu beni muingi babakebila. Polo wukamba lutuadusu beni kuidi kimvuka kioso vayi bika kaka kuidi bakulutu. (2 Tes. 1:1; 3:6) Diawu, kadika Mukristu nioni wumona Mukristu wunkaka wummanga tumukina zindongi ziozi zisonimina mu lutuadusu lu pheve santu, wuba na luve “lutatukila” woso Mukristu wun’diatila mu divunzi.

Yawu yinsundula ti bafueti tadila mutu beni banga niandi wutotulu mu kimvuka? Nana, bila Polo wubue tuba ti: ‘Lutatamana kunlubula banga khomba.’ Diawu, kadika Mukristu maka fikama Mukristu nioni tudulu dimbu mu zikhutukunu ayi mu kisalu ki tsamununu vayi bakuiza mfikama ko mu maluaku ma bukundi ayi mu maluaku ma phiokosolo thangu. Bila mbi? Polo wutuba ti: “Muingi kamona tsoni.” Bawu kuntula dimbu, Mukristu beni kalenda mona tsoni mu mavanga mandi ayi kalenda kumabalula.​—2 Tes. 3:14, 15.

Bue bakristu balumbu kiaki balenda sadila ndongi beni? Ditheti theti, tufueti keta tomba zaba ti bukiedika ndiatulu yi mutu beni yidi yi “divunzi.” Kasi tubila ko Bakristu bo badi na luviakunu ayi beto mu mambu matedi kansasa kieto ayi ziphuila zieto. Ayi kasi tubila ko phe batu bobo batuluekidi mu ntima mu kondu kulunga. Vayi Polo wutubila batu bobo beta baka nzengolo yikondu tumukina zindongi zi Nzambi mu nko.

Lumbu kiaki enati tubakudi Mukristu nioni widi na phevea yikondo ku tumamana, matu baka nzengolo beto veka mu kondu kumfikama, kadi tula yandi kikundi voti kadi viokisa yandi thangu. Bo yidi ti nzengolo beni beto veka tufueti kuyibaka, tulendi ko kue yikambi batu bankaka bobo basi ko mu dikanda dieto di kinsuni. Ayi tufueti ba kaka pfika pfika mu zikhutukunu zieto ayi mu kisalu ki tsamununu na Mukristu nioni tutudidi dimbu. Niandi bongisa bikadulu biandi, tulenda luta bue kuntudisa kikundi.