Bue bakulutu beta sadisila kimvuka?

Mu khubukulu eto, tuisi ko bamfumu zi dibundu bo beta futu mu diambu di kisalu kiawu. Bobuawu kuandi, bu bela kudi baklisto ba thete, bankengidi bo badukisidi mambu momo Bibila kieta lomba beta tulu mu diambu di “kebanga kimvuka ki Nzambi.” (Mavanga 20:28) Baphangi beni badi ayi nguizani yi wombo ayi Yehova; beta tuadisa kimvuka ayi beta tanina kiawu “bika sia ti mu kuika vayi mu luzolo; bika sia ti mu diambu di tomba ndandu vayi mu luzolo lu ntima.” (1 Petelo 5:1-3) Bisalu mbi beta kutusadila?

Beta kutusadisa ayi beta kututanina. Bakulutu beta tuadisa ayi beta tanina kimvuka mu diambu kiba mu nguizani yi mbote ayi Yehova. Bo bazebi ti Nzambi wu bavana kiyeko ki mfunu wombo, batuyadilanga ko beto bisadi bi Nzambi, vayi, beta tusadisa tukimona mbote ayi kiese. (2 Kolinto 1:24) Bobuawu kuandi nsungi wu mamemi keta tudila ngolo kakipa dimeme dimosidimosi, bakulutu phe beta tula ngolo bazaba phangi mosimosi mu kimvuka.—Zingana 27:23.

Beta kutulonga phila yivangila luzolo lu Nzambi. Kadika sabala, bakulutu beta tuadisa zikhutulunu zi kimvuka ziozi zieta kutusadisa tuba minu kingolo. (Mavanga 15:32) Babakala beni ba kimfuzi beta tuadisa diaka kisalu ki samuna nsamu wumbote; beta samuna kithuadi ayi beto, ayi beta tumonisa phila zioso zi samunina.

Beta kutukindisa wumosimosi. Mu diambu di kutusadisa tuba kikundi ki mbote ayi Yehova, bakulutu balenda kuiza kututala ku nzo eto, voti ku Nzo yi Kimfumu, ayi kutu vana lusadusu, ayi lukindusu lolo lubedi mu Bibila.—Yakobi 5:14, 15.

Botula biyeko biobi badi mu kimvuka, bakulutu bawombo beta kuenda ku kisalu ayi badi ayi biyeko bi dibuta biobi bafueti dukisa. Yifueni tukinzikanga baphangi beni bobo beta sala kisalu ki ngolo.—1 Tesalonika 5:12, 13.

• Biyeko mbi bakulutu badi mu kimvuka?

• Lusadusu mbi beta kutunatina wumosimosi?