DILONGI 19
Bambangi zi Yehova badi bakristu bakiedika?
Bambangi zi Yehova beta kikinina ti bawu bakristu bakiedika. Bila mbi? Mu bila ki mambu matatu mamfunu: 1) Mambu mo masimbidi luwiluku lueto, 2) Dizina dio dieta tutula tuba luviakunu ayi bankaka ayi 3) Luzolo lo tukala beto na beto.
1. Mu mambu mbi luwiluku lu Bambangi zi Yehova lusingimini?
Yesu wutuba ti: ‘Mbembo Nzambi yidi yi kiedika.’ (Yowani 17:17) Banga Yesu, luwiluku lu Bambangi zi Yehova lukala kaka mu Mbembo yi Nzambi Bibila. Tutala mu kifuani mambu mo mavioka kutsuka yi tandu ki 19. Mu mvu 1870, mua ndambu batu bakivana mu longuka bumboti mboti Bibila. Luwiluku luawu lusingimina mu mambu mo Bibila kieta tuba kadiambu ko maba disuasanu ayi mo mabundu babe longanga. Ayi bayiza tona tubila kiedika beni ki Bibila kuidi batu bankaka.a
2. Bila mbi tueta tedolo “Bambangi zi Yehova?”
Yehova weta tedila bisadi biandi “Bambangi” ziandi bila beta monikisa kiedika kintadidi. (Ebelewo 11:4–12:1) Mu kifuani, mu thangu thama Nzambi wukamba dikanda diandi ti: “Luidi Bambangi ziama.” (Tanga Yesaya 43:10.) Yesu tedolo “Mbangi yi kuikama.” (Tsongolo 1:5) Mu mvu 1931, tuyiza tona tedolo Bambangi zi Yehova. Tueta yangalala tedolo mu dizina beni diodi.
3. Bue Bambangi zi Yehova beta sokudila luzolo lu Yesu?
Yesu wuzola kuwombo minlonguki miandi ayi wubatadila banga dikanda diandi. (Tanga Malako 3:35.) Phila mosi phe, Bambangi zi Yehova badi dikanda dimosi mu nza yimvimba. Diawu tueta telisinina “bakhomba voti baphangi.” (Filemo 1, 2) Tueta tumukina phe lutumu lualu lutubidi ti: “Luzola bakhomba boso.” (1 Piela 2:17) Tueta monisa luzolo beni mu ziphila ziwombo. Mu kifuani, tueta sadisa bakhomba zietu ba babakala ayi babaketo badi na phuila yi lusadusu, buba koso kuandi beta vuanda.
TUVISA MBOTI MBOTI
Tutubila disolo di Bambangi zi Yehova ayi tutala bidimbu bio bimmonisa ti badi bakristu bakiedika.
Bakristu bakiedika beta tula luwiluku luawu mu Bibila ayi beta kitubila kuidi batu bankaka
4. Luwiluku lueto lusimbimini mu Bibila
Yehova wusamuna ti kiedika ki Bibila kiela luta visu mu bilumbu bitsuka. Tanga Danieli 12:4 ayi noti, ayi vana mvutu mu kiuvu kiaki:
Mbi bisadi bi Nzambi biela baka, bobuawu banluta longukila Bibila?
Tutala phila yo mua ndambu yi minlonguki mi Bibila, wu mosi mu bawu Charles Russell, balongukila mbembo Nzambi. Tala VIDEO ayi vana mvutu mu kiuvu kiaki kilandikini.
Phila mbi Charles Russell ayi mua ndambu batu bo baba yandi balongukila Bibila?
Wubedi buzabilanga?
Thangu zinkaka tuyiza balula mambu mo tube wilukilanga. Bila mbi? Banga phila thangu yeta kienzudila nza, Nzambi phe wutula ti batu basudika mbembo’andi malembi malembi. (Tanga Zingana 4:18.) Diawu kadiambu ko Bibila kibalukanga ko, bobuawu tunluta kisudikila, buawu tueta yonzudila luwiluku lueto.
5. Tueta vanga mambu mu nguizani yi dizina dieto
Bila mbi tuyika tedulu Bambangi zi Yehova? Tala VIDEO ayi vana mvutu mu kiuvu biabi.
Bila mbi difuanini ti tutedolo Bambangi zi Yehova?
Bila mbi Yehova kavanina kiyeku kuidi batu kiba Bambangi ziandi? Mu diambu di basadisa batu bazaba nani Nzambi yi kiedika ayi bamonisa ti mambu momo batu beta yoluka mu diambu diandi madi maluvunu. Tutadila mambu mmuadi maluvunu mo beta tuba mu diambu di Nzambi.
Mabundu meta longa ti Nzambi katidi bansambidila mu nzila bima, banga bitumba voti zipfikula. Tanga 3 Mose 26:1 ayi vana mimvutu mu biuvu biabi bilandiki:
Mambu mbi makiedika Bibila kitubidi matadidi bitumba? Ayi bue Yehova keta bimuena?
Mabundu mawombo meta longa ti Yesu niandi Nzambi. Tanga Yowani 20:17 ayi vana mimvutu mu biuvu biabi:
Bibila diambu mbi dikiedika kitubidi mu matadidi Nzambi ayi Yesu? Baba buadi badi kuandi mutu wumosi?
Bue wummuena bo mezaba ti Yehova wutuma Bambangi ziandi mu diambu di longisa kiedika kintadidi ayi kitadidi muan’andi?
6. Tueta zolasana beto na beto
Bibila kidedikisidi bakristu banga binama bi nitu. Tanga 1 Kolinto 12:25, 26 ayi vana mimvutu mu biuvu biabi:
Mambu mbi bakristu bakiedika beta tula mu thangu bakhomba ziawu bakristu bame builukulu ziphasi?
Mu tadila mambu mo metanga, phila mbi Bambangi zi Yehova beta monisina luzolo bawu na bawu?
Mu thangu Bambangi zi Yehova bazunga kimosi babuilukulu ziphasi, Bambangi zi Yehova zinza yimvimba beta bavana lusadusu. Tala VIDEO ayi vana mvutu mu kiuvu kiaki kilandikini.
Phila mbi mambu mo meta vanga Bambangi zi Yehova mu diambu di sadisa badiawu babuiluku ziphasi meta monisa ti nzola badi?
Mu luzolo, bakristu bakiedika beta sadisa batu bo balembu moni ziphasi
BATU BANKAKA BETA TUBA TI: “Dibundu di Bambangi zi Yehova didi dibundu dimona.”
Tona thangu mbi Yehova katona tedila bisadi biandi “Bambangi?”
MU BUKHUFI
Bambangi zi Yehova badi bakristu bakiedika. Tuidi dikanda dimosi mu nza yimvimba, luwiluku lueto lusingimini mu Bibila ayi tueta sadisa batu bazaba kiedika kitadidi Yehova.
Phutukulu
Bila mbi tuyika tedolo Bambangi zi Yehova?
Bue tueta vangisinina mambu beto na beto?
Kikinini ti Bambangi zi Yehova badi bakristu bakiedika?
TALA MAMBU MANKAKA
Disolo di Bambangi zi Yehova
Batatoli ya Yehova—Kondima emonani na misala, Eteni 1: Balongwe na molili (1:00:53)
Tutala fuani kio Bambangi zi Yehova bamonisina luvunu lu mabundu.
Mimvutu mu biuvu biobi weta kiyuvusa thangu zinkaka mu diambu di Bambangi zi Yehova.
“Mituna oyo bato batunaka mingi mpo na Batatoli ya Yehova” (Lisolo oyo ezali na Internet)
Kikhenene kitinda Stephen kaba mvangi mambimbi. Mambu mo kalonguka kuidi Bambangi zi Yehova mantuma kabaluka.
“Bomoi na ngai ezalaki kobeba se kobeba” (Linɔ́ngi ya Mosɛnzɛli ya 01/07/2015)
a Nkengidi widi nkand’eto wo tueta luta sadila, weta tusadisa mu zabikisa kiedika ki Bibila mu kambu zenga tona mu mvu 1879.