Bue tulenda tatiminina monisa luzolo lu ngolo beto na beto

1-2. a) Bila mbi thumu Polo katubila ti luzolo didi “diambu dilutidi mfunu”? b) Biuvu mbi matu tadila?

MU thangu thumu Polo katubila minu, vuvu, ayi luzolo, wuyiza sukisila mu tuba ti “diambu dilutidi mfunu mu mambu mama luzolo.” (1 Ko. 13:13) Bila mbi Polo katubila bobo? Mu bilumbu binkuiza, tuela sie bue ba ko phuila yiba na vuvu mu zitsila zi Nzambi banga diambu ditedi nza yimona voti ba na vuvu ti zitsila beni ziela lungana bila ziawu zikilunginina. Vayi tuela ba kaka na phuila yi monisa luzolo thangu zioso kuidi Yehova ayi kuidi batu bandi. Mu diawu, luzolo lueto kuidi Yehova ayi kuidi batu luela tatamana yonzuka mvimba mvimba.

² Boyidi ti tuela tatamana ba phuila yi monisa luzolo, tutadila biuvu bitatu. Kitheti, bila mbi tufueti zolasana beto na beto? Kimmuadi, bue tufueti monisina luzolo kuidi badieto? Kintatu, bue tulenda tatiminina monisa luzolo kuidi badieto?

BILA MBI TUFUETI ZOLASANA BETO NA BETO?

3. Mambu mbi mafueti kututuma tuzola bakhomba zieto?

³ Bila mbi yidi mfunu kuidi beto tuzolanga badieto? Yimosi mu bibila yidi ti, mu thangu tulembo monisa luzolo kuidi bakhomba zieto buawu tueta monisina ti tuidi Bakristu bakiedika. Yesu wukamba kuidi balonguki bandi ti: “Buawu bobo bela zabila ti luidi minlonguki miama​—enati luzolo luidi yeno beno na beno.” (Yow. 13:35) Mu buela, ba luzolo kuidi badieto yeta tusadisa tutatamana ba mu bumosi. Polo wutuba ti luzolo “luidi nsinga wufuana wu bumosi.” (Kol. 3:14) Kuidi diaka na bila kinkaka kimfunu kio tufueti monisina luzolo kuidi badieto. Thumu Yowani wusonikina bakhomba ziandi ba babakala ayi ba baketo ti mutu nioni weta zola Nzambi kazola phe khomb’andi.” (1 Yow. 4:21) Mu thangu tulembo monisa luzolo kuidi badieto buawu tueta monisina ti tueta zola Nzambi.

4-5. Vana kifuani kio kimmonisa bue luzolo lueto kuidi Nzambi lukadila nguizani ayi lolo tukala kuidi batu.

⁴ Mu phila mbi luzolo lolo tuidi kuidi Nzambi luididi nguizani ayi luzolo lolo tueta monisa kuidi bakhomba zieto? Mu monisa diambu beni, tutadila nguizani yo yikala ntima ayi binnama binkaka bi nitu. Mu thangu munganga kalembo tutadi tansion mu koko, enati ntima wulembo sadi nsualu voti malembi, yawu yilenda monisa ti ntim’aku wumvimba widi voti wubela widi. Bue tulenda sadila tsikudukusu yoyi mu diambu ditedi luzolo?

⁵ Banga kuandi phila yo munganga kakadila luve luzabila mambu matedi buvini buntima mu thangu kalembo tadi tansion mu koko, beto phe tulenda zaba ntindu mbi luzolo tuidi kuidi Nzambi enati tulembo fiongunina luzolo lolo tuidi kuidi batu bankaka. Enati tumueni luzolo lolo tuidi kuidi batu bankaka lume- dekuka, yawu yilenda monisa ti luzolo lueto kuidi Nzambi lume dekuka phe. Vayi thangu tulembo monisa luzolo lueto kuidi bakhomba zieto bakristu, kiawu kikala dimbu kimmonisa ti luzolo lueto kuidi Nzambi luidi lungolo.

6. Bila mbi tufueti kukitatikisila enati luzolo lueto kuidi bakhomba zieto ba babakala ayi ba baketo lulembo dekuka? (1 Yow. 4:7-9, 11)

⁶ Tufueti kitatikisa enati tulembo moni ti luzolo lueto kuidi bakhomba zieto bakristu lulembo dekuka. Bila mbi? Bila yawu yimmonisa ti kipheve kieto mu vonza kidi. Thumu Yowani wutuba diambu beni mboti mboti mu thangu katubambula moyo ti: “Mutu wukambu zola khomb’andi, mutu nioni kalembo moni, buna buevi kalenda zodila Nzambi, nioni kakambu mona?” (1 Yow. 4:20) Dilongi mbi tubeki? Yehova weta tumona khini enati tulembo “zolasana beto na beto.”​—Tanga 1 Yowani 4:7-9, 11.

BUE TUFUETI MONISINA LUZOLO KUIDI BADIETO?

7-8. Mu ziphila mbi tulenda monisinanga luzolo lueto kuidi bakhomba zieto?

⁷ Mu khumbu ziwombo tueta mona mu phova yi Nzambi nsiku wowo wutubidi ti “tuzolasananga beto na beto.” (Yow. 15:12, 17; Lom. 13:8; 1 Tes. 4:9; 1 Pi. 1:22; 1 Yow. 4:11) Diawu, luzolo kidi kadulu kioki kidi mu khati ntima voti kimutu kikhati, kioki mutu kalendi mona ko. Diawu, bue tulenda tudila ti luzolo lueto lumonika kuidi badieto? Mu ziphova ayi mu mavanga meto.

⁸ Kuidi na phila ziwombo tulenda monisina kuidi bakhomba zieto ba babakala ayi ba baketo ti tueta bazola. Tala mua ndambu bifuani bilandikini: “Lutubasananga kiedika beno na beno.” (Zak. 8:16) “Zingilangeno mu ndembama.” (Mlk. 9:50) Lubakanga diyindu “di kinzasananga beno na beno.” (Lom. 12:10) “Luyambasananga beno na beno.” (Lom. 15:7) “Lutatamana . . . lemvukila badieno.” (Kol. 3:13) “Lunatasananga bizitu beno na beno.” (Nga. 6:2) “Lukindasananga beno na beno.” (1 Tes. 4:18) “Lutatamana . . . tungasananga beno na beno.” (1 Tes. 5:11) “Lusambidilanga badieno.”​—Zk. 5:16.

9. Bila mbi kindisa batu bankaka kididi dimbu kimfunu ki kubamonisina luzolo lueto? (Tala phe foto.)

⁹ Tutadila phila yimosi yi monisina luzolo kuidi batu bankaka. Tutadila ndongi yoyo thumu Polo kavana: “Lukindasananga beno na beno.” Bila mbi kindisa bankaka yidi phila yimfunu yi monisina luzolo lueto? Mu tadila buku yo yinsudikisanga bikuma bi Bibila, kuma kioki Polo kasadila “kindisa” kinsundula “ba va ndambusu mutu muingi wunkindisa mu thangu kalembo dengana ziphasi zinneni.” Mu thangu tueta vana lukindusu, tueta sadisa bakhomba zieto bakristu bobo badi mu phasi zingolo bakinda ayi batatamana diatila mu nzila yi luzingu. Mu thangu tulembo vani lukindusu kuidi bakhomba zieto ba babakala ayi ba baketo tueta monisa ti tueta kubazola.​—2 Ko. 7:6, 7, 13.

10. Nguizani mbi yidi mu mona kiadi ayi kindisa?

¹⁰ Mona kiadi ayi kindisa, nguizani yi ngolo bikala. Mu phila mbi? Mutu nioni wummonanga batu bankaka kiadi weta kubakindisa ayi weta kubasadisa mu ziphasi ziawu. Tueta vana lukindusu mu thangu tueta mona batu kiadi. Tala phila yoyi Polo kadedikisila ntima kiadi wu Yehova ayi lukindusu lolo keta vana. Polo wutuba ti Yehova widi banga “Disa difulukidi mu kiadi ayi Nzambi wum’bombanga mu mambu moso.” (2 Ko. 1:3) Banga phila noti yi verse beni yilembo sudikisila, Polo wusadila thubulu “disa difulukidi mu kiadi” mu diambu di sudikisa phila yimonisina batu bankaka kiadi. Diawu, “Nzambi tedolo disa voti tho yifulukidi ntima wu kiadi bila ntima kiadi kuidi niandi weta ba.” Ayi ntima kiadi beni wawu weta kuntuma katubomba mu “ziphasi zieto zioso.” (2 Ko. 1:4) Banga kuandi phila nlangu mboti weta totukila mu tho wukadila phozi kuidi bobo badi mu phuila yi nlangu, Yehova weta kitisa batu ntima ayi weta kindisa bobo badi mu ziphasi. Bue tulenda sokudila Yehova mu monisina batu kiadi ayi mu kubavana lukindusu? Phila yimosi yi kubutudila yidi mu kuna bikadulu mu ntim’eto biobi bidi nguizani ayi lukindusu. Bikadulu beni bikadulu mbi?

11. Mu tadila Kolosayi 3:12 ayi 1 Piela 3:8, bikadulu mbi diaka binkaka tufueti yonzula muingi tutatamana monisa luzolo lo lukututuma tukindisa batu bankaka?

¹¹ Mbi bilenda tusadisa mu tanina nzola yoyi tuidi mfunu muingi “tutatamana kindasana beto na beto” lumbu ka lumbu? Tufueti kuna bikadulu banga monasananga kiadi, zolasananga banga bakhomba, ayi monasananga zanti. (Tanga Kolosayi 3:12; 1 Piela 3:8.) Bue bikadulu beni bieta tusadisila? Mu thangu tulembo moni bakhomba zieto kiadi ayi tulembo kitatikisa buwombo mu bila kiawu, matu ba na phuila yi ngolo yikuba kindisa mu thangu balembo moni ziphasi. Banga phila Yesu katubila, “mu mambu momo mafulukidi mu ntima muawu mueti ba mambu meti tuba mutu. Mutu wumboti weta tuba mambu momo madi mu kiuka kiandi kimboti.” (Mat. 12:34, 35) Vana lukindusu kuidi bakhomba zieto ba babakala ayi ba baketo bobo badi mu phuila, yikala phila yimfunu yi kubamonisina ti tueta kubazola.

BUE TULENDA TATIMININA MONISA LUZOLO LUNGOLO KUIDI BADIETO?

12. a) Bila mbi tufueti tatamana kukikenga? b) Buabu, kiuvu mbi tueka ntadila?

¹² Beto boso tutidi “zolasananga beto na beto.” (1 Yow. 4:7) Vayi didi diambu dimfunu mu bambuka moyo phila Yesu katukebisila ti “luzolo lu batu bawombo [luela] dekuka.” (Mat. 24:12) Yesu kasi tuba ko ti luzolo lu balonguki bandi bawombo luela dekuka. Diawu, tufueti tatamana kukikenga mu kambu landakana kambu ku luzolo kuidi mu nza yayi. Beto ba dibanza beni diodi mu mayindu meto, tutadila kiuvu kiaki kimfunu: Diambu mbi difueti kutusadisa mu zaba ti luzolo lueto kuidi bakhomba zieto luidi lu ngolo?

13. Mbi bilenda tula luzolo lueto luba mu nzomono?

¹³ Phila mosi yi kubutudila yidi yi zaba keni luzolo lueto kuidi bakhomba zieto luidi lungolo mu tadila phila yoyi tueta vangila mambu momo tueta dengana mu luzingu lueto. (2 Ko. 8:8) Mu mambu momo tueta dengana kuidi na diambu dimosi thumu Piela katubila: “Diambu dilutidi mfunu mu mamoso, lumonasananga luzolo lungolo, bila luzolo lueta fuka masumu mawombo.” (1 Pi. 4:8) Mu kifuani kambu kulunga ku batu bankaka kulenda tula luzolo lueto mu nzomono.

14. Mu tadila 1 Piela 4:8, ntindu mbi wuluzolo tufueti ba? Vana kifuani.

¹⁴ Tutadila bumboti mboti zi phova zi Piela. Tini kitheti ki verse 8 kimonisini phila yi luzolo lolo tufueti ba​—“luzolo lungolo.” Tini kikuma kio Piela kasadila “ngolo” kinsundula “ba luzolo lunianguka.” Tini kimmuadi ki verse beni kilembo tumonisa mambu momo luzolo lungolo lulenda tula kuidi bakhomba zieto. Lueta fuka masumu ma bakhomba zieto. Tutadila kifuani kiaki: Enati tusimbidi luzolo lueto mu mioko banga nledi wo weta zibuka, ayi tuwuyalumuni tii wukuiza fuki bika disumu dimosi voti mamuadi vayi “mawombo.” “Fuka” yinsundula lemvukila. Banga kuandi tini kinledi kilenda fukila ditono, luzolo lulenda kuandi fuka zinzimbala ayi kambu kulunga ku batu bankaka.

15. Enati luzolo lueto kuidi bakhomba zieto ba babakala ayi ba baketo luidi lungolo, mbi tulenda tula? (Kolosayi 3:13)

¹⁵ Luzolo lueto lufueti ba lungolo muingi tubaka bu lemvukila zinzimbala zi bakhoma zieto Bakristu buba ti thangu zinkaka yilembo tombi tutula zingolo ziwombo. (Tanga Kolosayi 3:13.) Mu thangu tulembo lemvukila batu bankaka, buawu tummonisina ti luzolo lueto luidi lungolo ayi tutidi yangidika Yehova. Mbi bilenda tusadisa tubika luta tulanga thalu mu mambu mambimbi voti mu zinzimbala zi batu bankaka?

16-17. Mbi bifueti kutusadisa tubika kipanga zinzimbala zifioti zi batu bankaka? Vana kifuani. (Tala phe foto.)

¹⁶ Tuluta tulanga thalu mu mambu mamboti ma bakhomba zieto bakristu bika mu mambu mambimbi. Tutadila kifuani kiaki. Yindula theti, wulembo viokisa thangu va kimosi ayi bakhomba ba babakala ayi ba baketo. Lulembo viokisa thangu yimboti ayi kutsuka lukangimini foto. Lubuesi bue kangama zifoto ziwadi, bila yo yitheti lukangiminingi yisi ko yimboti. Buabu yeka zifoto zitatu lume kangama. Vayi, mu zifoto zia zitatu, kuidi na foto mosi yo yidi na khomba mosi widi na zizi kikangama. Mbi mawu tula foto beni? Mawu yikubula bila mu zifoto zinkaka muidi na bakhomba bobo balembo sevi.

¹⁷ Zifoto zio tueta lunda zidi banga mambu momo tueta lunda mu ntima. Nduka nduka tueta bambukila moyo zithangu zimboti zio tuviokisa ayi bakhomba zieto ba babakala ayi ba baketo. Vayi bulendakana mu zithangu beni zio wuviokisa, khomba mosi wubakala voti wunketo wutuba voti wuvanga diambu dimbimbi. Diambu mbi tufueti lunda? Bila mbi dilenda bela diambu dimboti mu zimbakana mambu beni banga beto tunkubula foto yimbimbi? (Zin. 19:11; Efe. 4:32) Tulenda kueto zimbakana bina bi zinzimbala bifioti bi bakhomba zieto bakristu bila tuidi na zisuvenire ziwombo zimboti mu tadila thangu yo tuviokisa na bawu. Mambu mamboti ma bakhomba zieto mawu tufueti luta yindulanga ayi kumazola.

BILA MBI LUZOLO LULUTIDI MFUNU LUMBU KIAKI

18. Mambu mbi mamfunu matadidi luzolo tume tadila mu disolo diadi?

¹⁸ Bila mbi tufueti tanina luzolo lungolo kuidi bakhomba zieto? Banga phila tume muena, mu thangu tulembo monisa luzolo kuidi bakhomba zieto ba babakala ayi ba baketo buawu tueta monisina ti tueta zola Yehova. Bue tufueti monisina luzolo lueto kuidi bakhomba zieto bakristu? Phila mosi yi kubutudila yidi mu kubavananga lukindusu. Matu ba bafuana mu “kindasananga beto na beto” enati tueta mona bakhomba zieto kiadi. Bue tulenda tudila ti luzolo lueto kuidi bakhomba lutatamana ba lungolo? Mu tulanga ngolo mu lemvukila zinzimbala zi batu bankaka.

19. Bila mbi dididi diambu dimfunu lumbu kiaki tumonasananga luzolo?

¹⁹ Bila mbi didi diambu dimfunu tumonasananga luzolo lungolo lumbu kiaki? Tala bila kioki Piela kaveni: “Tsukulu yi mambu moso yeka nduka. Diawu, . . . lumonasananga luzolo lungolo.” (1 Pi. 4:7, 8) Banga phila nza yayi yi masumu yilembo yendila kutsuka, mambu mbi tulenda vingila malenda kutukuizila? Yesu wutuba kuidi balonguki bandi ti: “Batu ba makanda moso bela kululenda mu diambu di dizina diama.” (Mat. 24:9) Muingi tueba nunga kimbeni kiphila yoyi, tufueti ba mu bumosi. Beto butudila, zingolo zi Satana ziela suwa, bila bumosi bueto buidi bukinda mu nzila yi luzolo​—“lo luidi nsinga wufuana.”​—Kol. 3:14; Flp. 2:1, 2.