Wukhidi bue bambuka moyo?

Wumanisa tanga zinimero zi Nzo yi Nkengidi zi mvu wawu? Ti buawu buididi tala keni mawu vutula mimvutu mu biuvu biabi bilandikini:

“Kituka bamona mu mayindu” mbi yinsundula? (Loma 12:2)

Yikadi tombana ti luzingu luaku loso luwala mu mambu mamboti. Yawu yintia tuba ti tadila mboti mboti mambu momo madi mu khati ntim’eto ayi baluka mu nata luzingu lueto mu phila buididi zitsikudukusu zi Nzambi.​—w23.01-LI, pha. 8-9.

Bue fueti bela mu bukhati khati mu thangu wulembo landakana mambu malembo vioki mu nza yayi?

Tutidi zaba phila yoyi zimbikudulu zilembo lunginina lumbu kiaki. Va buangu kivana mayindu mu mambu makambulu kuandi ndandu ayi mo malenda nata khabuani, yilenda luta ba mfunu tutubilanga mambu momo malembo totuka mu khubukulu yi Yehova. (1 Ko. 1:10)​—w23.02-LI, pha. 16.

Phila mbi mbotama yi Yesu yididi disuasanu ayi yo yi balonguki bandi?

Bo Yesu kabutukila mu dikanda dio dikivana kuidi Nzambi, yisi bandi mfunu ko kakivana kuidi Yehova, banga beto phila tueta butudila. Yesu wuba mutu nio wuba wuduka ayi kondolo masumu. Yisi tombana ko kabaluka mu masumu mandi.​—w23.03-LI, pha. 5.

Bue tulenda sadisilanga batu bankaka bavutulanga mimvutu bo tuidi mu zikhutukunu?

Tufueti vana mimvutu mikhufi, ayi bikila batu bankaka batuba. Tufueti manganga tubila mambu mawombo bo tumvana mimvutu. Kuidi na mambu mankaka batu bankaka balenda vanina mimvutu.​—w23.04-LI, pha. 23.

“Nzila yinlongo” yo yidi mu Yesaya 35:8, mbi yinsundula?

Nzila yo yi kifuani batubila yidi nzila yi Bayuda yo yitonina ku Babiloni tii kubuala buawu. Buabu mu thangu’eto, mbi yinsundula? Mu mvu 1919, kisalu kibongisa mambu kitona​—bangula Bibila ayi minkanda minkaka. Dikanda di Nzambi didiatila “mu nzila yinlongo”, yin’zola sundula mu paladiso yi kipheve, ayi yi lusakumunu yi Kipfumu ki Nzambi.​—w23.05-LI, pha. 15-19.

Zingana kapu 9 zilembo tubila zindongi zio zilenda tunga zio zitubulu mu kifuani ki baketo buadi?

Zingana zitubidi “nketo wuvulu” nio tedolo mu nzila yi “lufua” ayi nketo “wunduenga,” nio monikini banga nketo nio tedolo mu nzila “yi phisulu” ayi yo yeta nata mu baka moyo. (Zingana 9:1, 6, 13, 18)​—w23.06-LI, pha. 22-24.

Bue ku kikulula ku Nzambi ayi bikadulu bikondolo mambu mangolo ngolo bimonikina mu phila kavangila Loti mambu?

Yehova wukamba Loti ti kabotuka ku Sodomo ayi kenda ku mbanza yidi miongo, mu thangu Loti kakamba Nzambi ketinina kuandi ku Soali, wukikinina dibanza diandi.​—w23.07, p. 21.

Mbi nketo kalenda tula enati dibakala diandi weta tala pornografi?

Kalenda bambuka moyo ti kedi kunteminina ko. Kafueti kukivana mu nguizani’andi ayi Nzambi ayi fiongunina ziverse zi Bibila zio zitubidi baketo bobo badengana mambu ma ziphasi ayi babaka lusadusu. Kalenda sadisa bakala diandi kabika zinzila zio zilenda kunnatina bivonza.​—w23.08-LI, pha. 14-17.

Mu thangu batu balembo findi ziphaka mu luwiluku lueto, bue nduenga yilenda kutusadisila tuba na buphombo?

Tulenda tadila kiuvu kio mutu katuyuvudi banga diluaku di zabila mayindu mandi. Beto butudila, buawu matu bela bakubama mu vutudila mutu mvutu mu phila yimboti.​—w23.09-LI, pha. 17.

Dilongi mbi tulenda baka kuidi Maliya mu diambu ditedi ba ngolo?

Mu thangu kazaba ti wela ba nguandi Mesiya, Maliya wubaka zingolo kuidi batu bankaka. Mbasi Ngabi ayi Elizabeti bakindisa Maliya mu nzila yi masonoko. Beto phe tulenda baka zingolo mu nzila yi bakhomba zieto bakristu.​—w23.10-LI, pha. 15.

Bue Yehova kalenda vanina mvutu mu zindombolo zieto?

Wutuveni tsila ti maka wa zindombolo zieto ayi maka tala bue zilenda bela nguizani ayi lukanu luandi. (Yel. 29:12) Kalenda tuvutudila mvutu mu ziphila ziwombo vayi maka tusadisa thangu zioso.​—w23.11, pha. 21-22.

Loma 5:2 yitubidi “vuvu,” vayi bila mbi yitubidi diaka kuma beni mu verse 4?

Mu thangu mutu kawilu nsamu wumboti, kalenda ba na vuvu ti wela ba mu luzingu lumboti ku paladiso va ntoto. Vayi mu thangu kalembo dengana zinzomono, bo kalembo zimonisina mvibudulu ayi bo kamueni ti kikununu kuidi Nzambi, vuvu kiandi kieta kuiza luta ba kikinda.​—w23.12, pha. 12-13.