Tuisi ko kaka beto veka

1-2. a) Bila mbi tulenda tubila ti tunuanisanga ko kaka zinzomono beto veka? b) Mbi matu tadila mu disolo diadi?

MU THANGU tulembo dengana zinzomono zinneni, tulenda kukimona banga beto veka tuidi mu mua buatu bufioti mu m’bu wowo widi ngualu ngualu. Vayi tunuanisanga ko zinzomono beto veka. Sieto di mazulu nioni widi luzolo kasukilanga ko kaka mu mona zinzomono zieto, vayi veni phe tsila yikutusadisa muingi tuzinunga. Mu luzolo loso, Yehova veni bisadi biandi bikuikama tsila ti: “Ndiela kulusadisa.”​—Yes. 41:10.

² Mu disolo diadi, tueka mmona phila yoyi Yehova keta kutusadisila 1) mu kututuadisa, 2) mu dukisa ziphuila zieto, 3) mu kututanina, ayi 4) mu kutubomba. Yehova wutuveni sikididi ti buba zinzomono mbi tun’dengana mu luzingu lueto, kadi khumbu kela kutuzimbakana. Kadi khumbu kela kutuyekula. Diawu tuisi ko kaka beto veka.

YEHOVA WETA KUTUTUADISA

3-4. Bue Yehova keta kututuadisila? (Minkunga 48:14)

³ Tanga Minkunga 48:14. Yehova zebi ti tulendi ko kukituadisa beto veka ayi phuila tuidi yi niandi muingi katutuadisa. Bue keta tuadisila bisadi biandi bikuikama lumbu kiaki? Yimosi yi ziphila yoyi keta kubutudila yidi mu nzila yi Bibila. (Nku. 119:105) Yehova weta sadila Bibila mu diambu di katulonga ayi katusadisa tubaka zinzengolo zimboti ayi muingi tuba banga niandi mu phil’eto yivangila mambu ayi yi yindudila. Beto tumukina mambu momo kakutulonga mu Bibila, matu ba mu luzingu lumboti tona thangu yayi ayi matu ba vuvu ki zinga luzingu lu mvu ka mvu.a Mu kifuani, weta kutulonga tubika lundanga nganzi, tutubanga kiedika mu mambu moso momo tueta vanga ayi tuzolanga badieto mu ntim’eto woso. (Nku. 37:8; Ebe. 13:18; 1 Pi. 1:22) Mu thangu tulembo monisa bikadulu biphila yoyi bi bunzambi, matu ba bambuta bamboti, bakala voti nketo wumboti mu dikuela, ayi matu ba bakundi bamboti.

⁴ Mu buela, Yehova wutula mu Bibila masolo ma batu bobo badengana zinzomono banga ziozi tueta dengana ayi bobo beba kukimonanga banga phila yoyi tueta kukimuena. (1 Ko. 10:13; Zaki 5:17) Mu thangu tuntanga masolo makiedika ma luzingu lu batu beni ayi mu thangu tunsadila malongi momo tum’baka mu masolo beni, tueta baka mamboti nduka nduka mu ziphila ziwadi. Phila yitheti, tueta kuiza sudika ti tuisi ko beto veka​—mu zaba ti kuidi na batu bankaka bobo badengana zinzomono banga zio zieto ayi bazimonisina mvibudulu mu lusadusu lu Yehova. (1 Pi. 5:9) Ayi yimmuadi, tueta longuka nuanisa zinzomono zieto.​—Loma 15:4.

5. Nani Yehova keta sadila muingi katutuadisa mu nzila yi luzingu?

⁵ Yehova wubaka zikhubukulu muingi bisadi biandi binkaka bitutuadisa.b Mu kifuani, minkengi mi zunga beta tala bimvuka thangu ka thangu muingi batukindisa. Masolo mawu meta kindisa minu kieto ayi meta kutusadisa tutatamana ba mu bumosi. (Mav. 15:40–16:5) Bakulutu bawu phe beta tula ngolo mu sadisa wumosi mosi mu beto tutatamana ba pfika pfika ayi Yehova. (1 Pi. 5:2, 3) Bambuta beta tuadisa bana bawu mu kipheve mu kubasadisa baba na maluaku ma yindudila mu phila yimboti ayi baba na bifu bimboti. (Zin. 22:6) Ayi baketo ba Bakristu bobo bayonzuka mu kipheve beta sadisa mintueni mi baketo mu kubamonisina kifuani kimboti, mu kubavananga zindongi zifuana ayi mu kubakindisanga mu luzolo loso.​—Tito 2:3-5.

6. Mbi tufueti tula muingi tubaka mamboti mu lutuadusu lu Yehova?

⁶ Yehova wutuvana zindongi ziozi tuidi phuila muingi tubaka zinzengolo zimboti ayi muingi tuba mu luzingu lu mayangi. Bue tulenda monisina phutudulu matondo mu momo katuvangila? Zingana 3:5, 6 yitubidi ti: “Tudila Yehova ntim’aku woso ayi kadi tudila madiela maku ntima.” Beto kubutudila, “wela kutumonisa ayi wela kutulonga nzila yoyi tufueti diatila,” yawu yin’zola tuba ti wela kutusadisa tumanga mambu momo malenda kutunatina zithatukusu ziwombo muingi tuba mu luzingu lu mayangi. Tuidi na phutudulu matondo mawombo bila Yehova wutuzebi bumboti ayi weta kutuzola buwombo mu vana wumosi mosi mu beto zindongi ziozi tuidi phuila!​—Nku. 32:8.

YEHOVA WETA DUKISA ZIPHUILA ZIETO

7. Mu ziphila mbi Yehova keta dukisila ziphuila zieto? (Filipi 4:19)

⁷ Tanga Filipi 4:19. Botula kututuadisa mu kipheve, Yehova weta sakumuna zingolo ziozi tueta tula mu diambu di baka kidia, kivuata ayi va leka. (Mat. 6:33; 2 Tes. 3:12) Ka diambu ko beto boso tueta kukitatikisa mu diambu di ziphuila zieto zi kinsuni, Yehova wulembo tukindisa tubika kitatikisanga buwombo mu mambu beni. (Tala noti yi ndongokolo mu Matayi 6:25, nwtsty-F.) Bila mbi? Bila Dise dieto kela sie yekula ko bisadi biandi bikuikama mu thangu badi mu phuila. (Mat. 6:8; Ebe. 13:5) Tulenda kuntudila buwombo ntima mu thangu katukembi ti wela dukisa ziphuila zieto.

8. Diambu mbi Yehova kavangila Davidi?

⁸ Tutadila phila yoyi Yehova kasadisila Davidi. Mu mimvu miomi kamuena ziphasi mu kue tinanga tinanga, Yehova wudukisa ziphuila ziandi ayi zi babakala bobo beba kue yendanga yandi muingi batatamana zinga. Mu thangu kayindula phila yoyi Yehova kansadisila mu mimvu miomi mivioka, Davidi wusonika ti: “Ndiba ditoko, buabu ndieka nnunu; vayi ndisia mona ko mutu wusonga wuyekolo voti ndisia mona ko bana bandi balomba dipha.” (Nku. 37:25) Bulendakana mu luzingu luaku, wumona phe phila yoyi Yehova kadukisila mu luzolo luandi ziphuila zi bisadi biandi bikuikama.

9. Bilumbu biabi, bue Yehova keta dukisila ziphuila zi bisadi biandi mu thangu yi bivonza? (Tala phe zifoto.)

⁹ Yehova weta dukisa phe ziphuila zi bisadi biandi mu thangu yi bivonza. Mu kifuani, mu thangu nzala yiyiza builukulu Bakristu mu tandu kitheti, Bakristu bobo baba mu zitsi ziphila mu phila batinda lusadusu kuidi bakhomba ziawu ba babakala ayi ba baketo bobo baba mu phuila. (Mav. 11:27-30; Loma 15:25, 26) Bisadi bi Nzambi lumbu kiaki bawu phe beta monisa pheve beni yina yi kaba. Mu thangu bivonza bieta kuiza totuka, Yehova weta tuma bisadi biandi mu luzolo bavana bima biobi bidi mfunu banga bidia, nlangu, minledi ayi bilongo kuidi bakhomba bobo badi mu bibuangu biobi bidi bivonza beni. Ziekipi zithungulu zieta bongisa zinzo zi bakhomba ayi Zinzo zi Kipfumu ziozi zibebidi. Ayi bisadi bi Yehova beta vana mbombolo ayi lukindusu lu kipheve kuidi batu bobo bazimbisidi mutu mu lufua.c

10-11. Dilongi mbi beki mu kifuani ki Borys?

¹⁰ Mu luzolo loso Yehova weta dukisa phe ziphuila zi batu bobo ka bansadidi ko. Bobuawu, tueta tomba maluaku ma monisina zanti kuidi batu bobo ka basadilanga ko Yehova. (Nga. 6:10) Beto kubutudila, bulendakana tulenda kubasadisa baluta zaba mambu mawombo momo matutadidi ayi momo matadidi Yehova phe. Tutadila kifuani ki Borys, nioni widi direki di nzo nkanda ku Ukraine. Ka diambu ko Borys kasi ko Mbangi Yehova, thangu zioso weba vangilanga bana ba nzo nkand’andi mambu mu zanti ayi wumonisa luzitu mu mambu momo beta wilukila. Mu thangu Borys kabaka nzengolo yitina buangu ki mvita kioki keba zingilanga ayi kuenda ku buangu kinkaka kioki kiba lutanunu mu tsi beni, bakhomba zieto bansadisa. Kuntuala, Borys wukutakana mu Mbambukulu moyo yi lufua lu Kristu. Mu thangu kayindula mambu momo kadengana, Borys wutuba ti: “Bambangi zi Yehova bathudila buwombo thalu ayi batsadisa. Ndidi na phutudulu matondo kuidi Bambangi zi Yehova.”

¹¹ Beto phe tulenda sokudila Dise dieto di mazulu nioni wedi ntima kiadi mu monisanga luzolo kuidi batu bobo badi mu phuila buba minu kimosi tukala voti nana. (Luka 6:31, 36) Tuidi na vuvu ti zingolo zieto mu diambu di zola batu mazi batuma baba balonguki ba Kristu. (1 Pi. 2:12) Basadila Yehova voti nana, tuela ba kaka mu mayangi bila “khini yidi mu vana yiviokidi yoyi yidi mu tambula.”​—Mav. 20:35.

YEHOVA WETA KUTUTANINA

12. Lutanunu mbi Yehova kavanini bisadi biandi tsila banga nkangu? (Minkunga 91:1, 2, 14)

¹² Tanga Minkunga 91:1, 2, 14. Lumbu kiaki, Yehova wutuveni tsila yikutuvana lutanunu lu kipheve. Kadi khumbu kela bikila Satana nzila kabebisa tsambudulu yikiedika. (Yow. 17:15) Ayi mu thangu “ziphasi zinneni” ziela kuiza, tulenda ba sikididi kingolo ti Yehova wela lungisa tsil’andi yitanina batu bandi bika kaka mu kipheve vayi ayi mu kinsuni phe.​—Tso. 7:9, 14.

13. Mu ziphila mbi Yehova keta tanina wumosi mosi mu beto?

¹³ Lutanunu mbi Yehova keta vana kuidi wumosi mosi mu beto? Mu nzila yi masonoko, Yehova weta kutusadisa tusuasikisa mamboti ayi mambimbi. (Ebe. 5:14) Mu thangu tulembo zingila mu landakana zitsikudukusu ziozi zidi mu Mbembo Nzambi, tueta kukitanina mu bivonza biobi bilenda kutubuilukulu mu kipheve ayi mu kinsuni. (Nku. 91:4) Mu buela, Yehova weta sadila kimvuka mu kututanina. (Yes. 32:1, 2) Beto banga pfika pfika ayi batu bobo beta zola Yehova ayi bobo beta zingila mu landakana zitsikudukusu ziandi, matu baka lukindusu ayi kibakala kisiamina mu mambu mambimbi momo malenda kutuvukumuna.​—Zin. 13:20.

14. a) Bila mbi Yehova katutaninanga ko mu zinzomono zioso? Sikididi mbi Minkunga 9:10 yituveni? (Tala phe noti kuwanda phapi.)

¹⁴ Mu thangu thama, thangu zinkaka Yehova wutanina bisadi biandi mu bivonza bi kinsuni. Vayi kasi kubutudila ko mu mambu moso momo badengana. Thangu zinkaka tueta dengana “mambu makondo ku kana.” (Mpo. 9:11) Mu Buela, Yehova wubikila nzila bisadi biandi mu thama badengana zinzomono voti buba phe vondu muingi kamonisa ti Satana widi nkua mayuya. (Yobi 2:4-6; Mat. 23:34) Buawu phe bukadila lumbu kiaki. Buba ti Yehova kakadi botula zinzomono zieto, tulenda ba sikididi ti kalendi ko yekula batu bobo beta kun’zola.d​—Nku. 9:10.

YEHOVA WETA KUTUBOMBA

15. Bue tueta bakila mbombolo mu lusambulu, mu Mbembo Nzambi ayi kuidi bakhomba zieto Bakristu? (2 Kolinto 1:3, 4)

¹⁵ Tanga 2 Kolinto 1:3, 4. Thangu zinkaka, tueta dengana mambu maphasi, zithatukusu zi mayindu ayi mambu makiadi. Bulendakana thangu yayi wulembo dengana mambu makiadi momo malembo tudi ti wukimona ngeyo veka. Kuidi na mutu nioni wulembo sudika phila yoyi wulembo kukimuena? Yehova. Kasukanga ko kaka mu mona ziphasi zieto, vayi “weta kutubomba mu mambu moso.” Mu phila mbi? Mu thangu tukunlebidila mu lusambulu, weta kutuvana “ndembama yi Nzambi yoyi yiviokidi diela dioso.” (Flp. 4:6, 7) Tueta baka phe mbombolo mu thangu tueta tanga Bibila Mbembo Yehova. Ziphova zi luzolo, zi nduenga ayi zi vuvu ziozi zidi mu Mbembo’andi zilenda kutulembika voti kutukindisa mu kipheve. Ayi zikhutukunu zi Bukristu zieta kutubomba mu kututula tuba va kimosi ayi bakhomba ba luzolo ayi kuawu tueta bakila lukindusu lolo luidi mu Bibila.

16. Dilongi mbi beki mu kifuani ki Nathan ayi Priscilla?

¹⁶ Muingi tumona phila yoyi Yehova keta vanina mbombolo ayi lukindusu mu nzila yi Mbembo’andi, tutadila kifuani ki Nathan ayi ki Priscilla bobo bakala ku États-Unis. Mua mimvu kuntuala, babaka nzengolo yikuenda kuma koko kuidi phuila yi minsamuni mi Kipfumu. Nathan tubidi ti, “tuba na sikididi ti Yehova wela sakumuna zingolo zieto.” Vayi mu thangu batula kuma koko babatinda, mu kinzimbukila badengana zithatukusu zi buvini bunitu ayi zithatukusu zi mambu ma zimbongo. Tsuka tsuka bavutuka koko baba, kuna batatiminina dengana zithatukusu zi zimbongo. Nathan tubidi ti, “Bila mbi Nzambi kasi kutusakumunina ko mu phila yoyi tueba yindudila? Kutu nditona kukiyuvula keni diambu dimbimbi ndivanga.” Kumanima, Nathan ayi Priscilla bayiza sudika ti Nzambi kasi kubayekula ko mu thangu yoyi baba mu phuila. Nathan tubidi diaka ti, “Mu thangu beni yina yi ziphasi, Bibila kiyiza ba banga nkundi wu nduenga nioni weba kutukindisanga ayi kututuadisa. Bo tuluta tula mayindu meto mu phila yoyi Yehova katusadisila tumonisa mvibudulu mu zinzomono beni, yawu yitusadisa tubika luta tula mayindu mu nzomono beni vayi yitusadisa tuba bakubama mu dengana mambu maphasi mu minu mu bilumbu binkuiza.”

17. Bue khomba Helga kabakila mbombolo? (Tala phe foto.)

¹⁷ Bakhomba zieto ba babakala ayi ba baketo belenda kutuvana diaka phe mbombolo. Mu phila mbi? Tutadila kifuani ki Helga nioni wukala ku Hongrie. Mu mimvu miwombo kadenginina mintindu mi mambu mawombo maphasi momo mantula ti kabika bue ba vuvu ayi kabika bue kukimona mfunu. Vayi niandi tala kumbusa, kalenda mona phila yoyi Yehova kansadisila mu nzila yi kimvuka. Tubidi ti: “Yehova weta kutsadisa kaka mu thangu keta mona zingolo ziama zin’dekuka mu bila ki kisalu ki kinsuni, mu kipa muan’ama nioni weta bela ayi mu bila ki zinzomono zinkaka nkaka. Mu 30 ki mimvu miomi mime vioka, kadi khumbu Yehova kasi kambu dukisa ko tsil’andi yikumbomba. Khumbu ziwombo keta kumbombila mu nzila yi ziphova zi zanti, zimboti ayi ziphutudulu matondo ziozi batu bankaka beta kukhamba. Khumbu ziwombo beta kuthindila zimesaje, minkanda voti ziphova zi zifelisitasio mu thangu yoyi ndieta luta bela phuila yi mambu beni momo.”

18. Bue tulenda bombila batu bankaka?

¹⁸ Tuidi na diluaku disokudila Nzambi’eto mu kindisa batu bankaka. Bue tulenda kubutudila? Tulenda kubawa mu mvibudulu woso, kubakambila mambu mu phila yimbombolo ayi kubasadisa mu phila yifuana. (Zin. 3:27) Tutulanga ngolo mu kindisa batu bobo balembo moni ziphasi, buba phe bobo ka basadidi ko Nzambi. Mu thangu batu bobo beta zinga yeto balembo dengana mambu makiadi, kimbevo, zithatukusu zi mayindu, tubawanga ayi tubakambanga bibuku bi lukindusu bi Bibila. Mu thangu tunsokudila Yehova, “Nzambi wum’bombanga mu mambu moso,” tusukilanga ko kaka mu sadisa bakhomba zieto Bakristu mu monisa mvibudulu mu zinzomono, vayi tueta lembika phe mintima mi batu bobo basi ko Bakristu muingi batula thalu’awu mu tsambudulu yivedila.​—Mat. 5:16.

YEHOVA WETA KUTUSADISA MU ZITHANGU ZIOSO

19. Mambu mbi Yehova keta kutuvangila ayi bue tulenda kunsokudila?

¹⁹ Yehova weta kitatikisa buwombo mu diambu di batu bobo beta kun’zola. Katuyekulanga ko mu thangu tuidi mu zinzomono. Banga kuandi phila mbuta keta kipila mu luzolo loso muan’andi, Yehova weta kipa phe bisadi biandi bikuikama. Weta kututuadisa, weta dukisa ziphuila zieto, weta kututanina ayi weta kutubomba. Tueta sokudila Dise dieto di mazulu nioni wedi na luzolo mu thangu tueta sadisa ayi kindisa batu bobo balembo dengana zinzomono. Buba ti tubuilukulu mambu maphasi voti makiadi, tulenda ba sikididi ti Yehova widi yeto. Mu mambu moso, Yehova wutuveni tsila ti: “Kadi mona tsisi, bila Ndidi yaku.” (Yes. 41:10) Tuidi na sikididi kiwombo mu kubuzabila! Bukiedika tuisi ko kaka beto veka.