DISOLO DI NDONGOKOLO 22
NKUNGA 15 Tókumisa Mwana ya liboso ya Yehova!
Dizina di Yehova—Tsundu mbi didi kuidi Yesu
“Minu ndibazabikisa dizina diaku ayi ndiela buela kubazabikisa diawu.”—YOW. 17:26.
MU BUKHUFI
Tueka nlonguka phila yoyi Yesu kazabikisila dizina di Yehova, phila yoyi kadisantisila ayi phila yoyi kadinungisila.
1-2. a) Mambu mbi Yesu kavanga mu builu butsuka tuamina kafua? b) Biuvu mbi tueka ntadila mu disolo diadi?
MU MASIKA ma kinya, mu lumbu ki 14 Nisani mu mvu 33 T.E, thangu yiyiza fuana mu diambu di bavakula Yesu, bansambisa, bam’baka mambu, kummonisa phasi ayi kumvonda. Bame manisa dia bidia bimfunu ku vinga kiyilu ayi mimvuala miandi mikuikama. Kumanima ma ndiwulu beni, Yesu wukamba mimvuala miandi mua ndambu ziphova zitsuka zi lukindusu tuamina kafua. Ayi mua thangu tuamina babotuka mu vinga beni kiyilu, Yesu wutelama, ayi wutula lusambulu lolo luidi tsundu yimfunu wombo. Mvuala Yowani wutubila lusambulu beni lolo luidi mu Yowani kapu 17.
2 Lusambulu lu Yesu mbi lulembo tumonisa mu mambu momo meba kuntatisa mu thangu beni yina? Bue lusambulu beni lulembo monisina diambu diodi diba mfunu kuidi niandi mu thangu yoyi kaviokisa mu kisalu kiandi ki tsamununu va ntoto? Tutadila mimvutu mi biuvu beni biobi.
“MINU NDIBAZABIKISA DIZINA DIAKU”
3. Diambu mbi Yesu katuba mu diambu di dizina di Yehova ayi mbi kazola tuba? (Yowani 17:6, 26)
3 Mu lusambulu luandi, Yesu wutuba: “Minu ndibazabikisa dizina diaku.” Diawu, mu khumbu ziwadi katubila ti wuzabikisa dizina di Yehova kuidi balonguki bandi. (Tanga Yowani 17:6, 26.) Mbi kazola tuba? Wubakamba dizina diodi ka basi zaba ko? Balonguki ba Yesu baba Bayuda, yawu yimmonisa ti bakizabila kuawu dizina di Nzambi ti Yehova. Dizina beni dimonika mu zimili zi bibuangu mu masonoko ma ki Ebelewo. Diawu Yesu kasi sukila ko kaka mu kubakamba ti dizina di Nzambi Yehova vayi wubamonisa phe tsundu yi dizina beni. Yesu wuzabikisa bumutu bobo buidi kumanima ma dizina di Yehova, yinsundula wusadisa balonguki bandi bazaba bumboti mboti Yehova, mu kubamonisa lukanu luandi mu diambu di ntoto ayi mu diambu di batu, mambu momo kavanga, momo kela vanga ayi wubamonisa bikadulu biandi. Yimonikini bumboti mboti ti Yesu niandi kaka lutidi zaba bumboti mboti Yehova.
4-5. a) Bue dizina di mutu difueti bela mfunu kuidi beto? b) Mu phila mbi balonguki ba Yesu bazabila dizina di Yehova?
4 Mu kifuani, yindula theti, enati mu kimvuka kieno muidi na nkulutu nioni widi mu dizina di David ayi widi diaka phe munganga. Ayi tona wuzaba khomba beni vame vioka mimvu miwombo. Vayi lumbu kimosi yitombana ti babuka mu nsualu nsualu. Baneti ku nzo m’buku koko nkulutu beni keta sadila ayi niandi weka nsadila madiela mandi ma ki munganga muingi kavukisa. Mu thangu beni yina, dizina di munganga beni madi luta ba mfunu kuidi ngeyo? Mu kondo finda phaka, buawu buididi! David kasi kuiza ba ko kaka nkulutu nioni zebi; vayi maka ba phe munganga nioni vukisidi luzingu luaku.
5 Phila mosi phe, balonguki ba Yesu bakizabila dizina di Yehova. Vayi dizina beni diyiza luta ba tsundu kuidi bawu bila Yesu wubasadisa bazaba bumboti mboti Yehova. Bila mbi tulenda kubutubila? Bila Yesu wusokudila bumutu bu Dise diandi mu mambu moso momo keba tubanga ayi keba vanganga. Buawu phe mimvuala miyiza “zabila” bumboti mboti Yehova mu landakananga phila yoyi Yesu keba longilanga ayi mu talanga phila yoyi keba vangilanga batu mambu.—Yow. 14:9; 17:3.
“DIZINA DIAKU, DIODI WUPHANA”
6. Mu phila mbi Yehova kavanina Yesu dizina diandi? (Yowani 17:11, 12)
6 Mu lusambulu luandi, Yesu wusambila mu diambu di balonguki bandi, mu tuba ti: “Bika wubakeba mu lulendo lu dizina diaku, dizina diodi wuphana.” (Tanga Yowani 17:11, 12.) Yawu yinsundula ti Yesu wedi katomba zabakana mu dizina di Yehova? Nana. Zaba ti mu lusambulu luandi, Yesu wutubila dizina di Yehova, mu sadila ziphova ziazi “dizina diaku.” Diawu, dizina di Yehova disi kuiza ba ko dizina di Yesu. Buabu Yesu mbi kazola tuba mu thangu katuba ti dizina di Nzambi diodi bamvana? Theti theti, Yesu wuba mmonisi ayi nnati tsangu wu Yehova. Wuyizila mu dizina di Dise diandi ayi wudukisa mambu mangitukulu mu dizina beni. (Yow. 5:43; 10:25) Mu buela, dizina di Yesu dinsundula “Yehova widi Mvulusi.” Bukiedika, dizina di Nzambi diba na nguizani yingolo ayi dizina di Yesu.
7. Bila mbi Yesu kafuanina tubila mu dizina di Yehova? Vana kifuani.
7 Mu kifuani, bo yidi ti am’basadere niandi weta monikisa kipfumu kimosi ku tsi yinkaka, kalenda tubila mu dizina di kipfumu beni. Ziphova zi am’basadere beni zidi na luve banga ziozi zi kipfumu ki tsi’andi. Bobuawu phe, Yesu weba monikisanga Yehova ayi weba tubilanga kuidi batu mu dizina di Yehova.—Mat. 21:9; Luka 13:35.
8. Bue dizina di Yehova dibela “mu” Yesu tuamina kiza va ntoto? (2 Mose 23:20, 21)
8 Mu kiyeko kiandi ki Mbembo, Yesu wuba nnati tsangu wu Yehova nioni wunnatanga zitsangu ayi zithumunu kuidi bana bankaka ba kipheve ba Nzambi ayi kuidi batu phe. (Yow. 1:1-3) Bulendakana Yesu wuba mbasi yoyi Yehova katuma mu diambu di tanina bana ba Iseli mu thangu beba kuenda ku tsi yi tsila. Mu thangu kakamba kuidi bana ba Iseli batumukina mbasi beni, Yehova wutuba ti: “Bila dizina diama didi mu niandi.”a (Tanga 2 Mose 23:20, 21.) Dizina di Yehova diba “mu” Yesu mu phila yoyi kamonikisina Yehova ayi niandi wuluta nungisa ayi santisa dizina di Siandi.
“TATA, KEMBISA DIZINA DIAKU”
9. Dizina di Yehova mfunu mbi diba kuidi Yesu? Sudikisa.
9 Banga phila tume bumuena, buba tuamina Yesu kiza va ntoto, dizina di Yehova mfumu wombo diba kuidi niandi. Tulendi yituka ko mu zaba ti dizina di Yehova nguizani yingolo diba ayi mambu moso momo Yesu kavanga mu thangu kaba va mbata ntoto! Kutsuka yi kisalu kiandi, Yesu wuyamikina ti: “Tata, kembisa dizina diaku.” Yo yawu thangu, Siandi wumvutudila mu mbembo yi bidumi yoyi yiwakakana ku diyilu: “Minu ndikembisa diawu ayi ndiela buela kudikembisa diaka.”—Yow. 12:28.
10-11. a) Bue Yesu kakembisila dizina di Yehova? (Tala phe foto.) b) Bila mbi dizina di Yehova difueti santusulu ayi nungusulu?
10 Yesu wukembisa phe dizina di Siandi. Mu phila mbi? Yimosi yi ziphila ziozi kabutudila yidi yimonisa bikadulu ayi mavanga mangitukulu ma Siandi. Vayi wubuevanga diambu dinkaka mu diambu di kembisa dizina beni. Yitombana ti dizina di Yehova disantusu ayi dinungusu mu tadila bumutu buandi.b Yesu wumonisa ti mambu beni momo mfunu wombo maba mu thangu kalongisa balonguki bandi lusambulu lu kifuani. Wutuba: “Tat’eto widi ku diyilu, bika dizina diaku diba dinlongo.”—Mat. 6:9.
11 Bila mbi yitombinina ti dizina di Yehova disantusu ayi dinungusu? Bila ku tsola yi Edeni, Satana Diabulu wuvueza ayi wuvunina Yehova Nzambi mambu. Satana wutuba ti Yehova widi nkua mayuya ayi wusuekila Adamu ayi Eva diambu dimosi dimboti. (1 Mo. 3:1-5) Satana wutuba phe ti phila yivangila mambu yi Yehova yisi ba ko yimboti. Mambu momo Satana kavunina Yehova, mabebisa lukumu luandi voti dizina diandi. Kuntuala, mu thangu yi Yobi, wutuba diaka ti batu bobo beta sadila Yehova beta kubutudila kaka bila diambu beta tomba baka kuidi Niandi. Mvuezi beni wowo wubuela bue tuba diaka ti kuisi ko kadi mutu weta zola Yehova nioni lenda tatamana Kunsadila buba mu thangu yi zinzomono. (Yobi 1:9-11; 2:4) Thangu yitombana mu monisa nani nkua mayuya mu bawu buadi, Yehova voti Satana.
Yesu wulongisa balonguki bandi mfunu wu santisa dizina di Nzambi (Tala paragrafi 10)
“NDIETI VANA LUZINGU LUAMA”
12. Diambu mbi Yesu kabela wukubama mu vanga mu luzolo luandi lu dizina di Yehova?
12 Mu bila ki luzolo luandi mu diambu di dizina di Yehova, Yesu wutomba vanga mamoso momo kalenda vanga mu diambu di santisa ayi nungisa dizina di Yehova. Yesu wutuba ti: “Ndieti vana luzingu luama.” (Yow. 10:17, 18) Bukiedika, wuba phe wukubama mu fua mu diambu di dizina di Yehova.c Batu baba buadi batheti bobo baba balunga, Adamu ayi Eva, babanda Yehova mbusa ayi basobula kuawu ba kundambu Satana. Vayi Yesu wuba wukubama mu kuiza va ntoto ayi mu monisa luzolo luandi mu diambu di Yehova. Yesu wubutudila mu zingila mu luzingu lukuikama ayi luduka. (Ebe. 4:15; 5:7-10) Wutatamana ba wukuikama mu luzingu luandi loso, tii ku lufua luandi mu nti wuphasi. (Ebe. 12:2) Buawu bobo kamonisina luzolo luandi kuidi Yehova ayi mu dizina diandi.
13. Bila mbi Yesu kaluta bela wufuana mu monisa ti Satana widi nkua mayuya? (Tala phe foto.)
13 Mu luzingu luandi, mu kondo finda phaka Yesu wumonisa ti Satana widi nkua mayuya, vayi bika Yehova! (Yow. 8:44) Yesu wuluta zaba bumboti mboti Yehova viokila batu boso bobo bame zinga mu nza yayi. Enati kuba na diambu dikiedika mu mambu momo Satana kafundila Yehova, nginu Yesu wudizaba. Vayi Yesu wutatamana ba wukuikama mu nungisa bumutu bu Yehova voti dizina diandi. Buba ti mu thangu yoyi yiyiza monika banga ti Yehova yekudi Yesu, Yesu wuba wukubama mu fua va buangu kibanda mbusa Siandi di luzolo.—Mat. 27:46.d
Mambu moso momo Yesu kavanga mamonisa ti Satana widi nkua mayuya vayi bika Yehova! (Tala paragrafi 13)
“MINU . . . NDIMANISINI KISALU KIOKI WUPHANA”
14. Bue Yehova kavanina Yesu nsendo mu kuikama kuandi?
14 Mu lusambulu lolo katula mu builu butsuka tuamina kafua, Yesu wuyiza ba mu tezo kituba ti: “Minu . . . ndimanisini kisalu kioki wuphana.” Wuba na sikididi ti Yehova maka mvana nsendo mu kuikama kuandi. (Yow. 17:4, 5) Sikididi ki Yesu kuidi siandi kisi ba ko ki luvunu. Yehova kasi kum’bika ko katatamana ba mu khati ziami. (Mav. 2:23, 24) Wufulukisa Yesu ayi wumvana buangu kizangama ku diyilu. (Flp. 2:8, 9) Tsuka tsuka, Yesu wuyiza tona yala ntinu mu Kipfumu ki Nzambi. Mambu mbi Kipfumu beni kiela lungisa? Tini kimmuadi ki lusambulu lu kifuani kieta kutukamba ti: “Bika Kipfumu kiaku kiza. Bika luzolo luaku [lu Yehova] luvangama va ntoto, banga bu lueti vangimina ku diyilu.”—Mat. 6:10.
15. Mambu mbi mankaka Yesu kela lungisa?
15 Fioti fisiedi, Yesu wela nuana mvita ayi bambeni zi Nzambi ayi wela vonda batu boso bambimbi mu mvita wu Alimangedoni. (Tso. 16:14, 16; 19:11-16) Fioti fisiedi phe, maka loza Satana mu “dibulu diphinda” mu kuntula mu tezo ki kondo bue sala kadi kiasa banga mutu wufua. (Tso. 20:1-3) Yesu wela vutula ndembama ayi lunga ku batu boso mu Luyalu luandi lu Mili ki Mimvu. Wela fulukisa bafua. Wela tula ntoto woso paladiso. Lukanu lu Yehova luela lungana!—Tso. 21:1-4.
16. Mambu mbi mela salama kutsuka yi Mbiadulu yi Mili ki Mimvu?
16 Bue luzingu luela bela kutsuka yi mbiadulu yi mili ki mimvu? Disumu ayi kondo ku lunga ku mutu biela mana. Batu boso bela sie bue ba ko phuila yilomba nlemvo mu masumu mawu mu nzila khudulu, bela sie bue ba ko phuila yi mutu nioni wukubasadisa muingi baba nguizani yimboti ayi Nzambi voti phuila yi ba na nganga-nzambi. Ayi ‘mbeni yitsuka, lufua [lolo lutukisa Adamu], luela mana mvimba mvimba.’ Biziami biela sie bue ba ko. Bafua bela kubafulukisa. Mutu nioso va ntoto wela ba wulunga.—1 Ko. 15:25, 26.
17-18. a) Mambu mbi mela salama kutsuka yi mili ki mimvu? b) Mambu mbi Yesu kela vanga mu thangu yoyi luyalu luandi luela manina? (1 Kolinto 15:24, 28) (Tala phe foto.)
17 Mambu mbi diaka mankaka mela salama kutsuka yi Luyalu lu Mili ki Mimvu? Mu thangu beni, diambu dimosi di sipesiali diela salama. Ziphaka mu tsantusulu yi dizina di Yehova ziela mana. Mu phila mbi? Ku tsola yi Edeni, Satana wuvunina Yehova mambu ti widi nkua mayuya ayi kayadilanga ko batu mu luzolo. Tona mu na thangu beni yina, dizina diandi dieta santusu mu khumbu ziwombo kuidi batu bobo beta kunkembisa ayi kun’zitisa. Diawu, kutsuka yi mbiadulu yi mili ki mimvu, bukiedika lukumu lu Yehova luela luta nungusu bumboti mboti. Mu kondo finda phaka wela monisa ti widi Dise dieto di mazulu nioni wedi luzolo.
18 Tsuka tsuka, yela monika ti mambu momo Satana katuba madi mayuya. Mambu mbi Yesu kela vanga mu thangu yoyi luyalu luandi luela manina? Yesu wela tombukila Yehova mu kifuani ki Satana? Nana! (Tanga 1 Kolinto 15:24, 28.) Yesu wela vutula kitinu kuidi Siandi. Wela tumukina luyalu lu Yehova. Bukiedika, mu luviakunu ayi Satana, Yesu widi wukubama mu kukiyimina dioso kuandi diambu mu bila ki luzolo lolo kadi kuidi Yehova.
Yesu wela vutula kitinu ki Yehova kutsuka yi Luyalu lu Mili ki Mimvu (Tala paragrafi 18)
19. Dizina di Yehova tsundu mbi didi kuidi Yesu?
19 Tuedi yituka ko ti Yehova wuyangalala vana dizina diandi kuidi Yesu! Yesu wukimonikisa ti widi mmonisi wuduka wu Siandi. Diawu, dizina di Yehova tsundu mbi didi kuidi Yesu? Diawu dilutidi mfunu kuidi niandi viokila bima bioso. Wuba wukubama mu fua mu diambu di dizina beni, ayi wela ba wukubama mu vutula mamoso kuidi Yehova kutsuka yi Luyalu lu Mili ki Mimvu. Bue tulenda sokudila kifuani ki Yesu? Tuela baka mvutu mu kiuvu beni mu disolo diodi dilandikini.
NKUNGA 16 Bókumisa Yah mpo na Mwana na ye oyo atyami mafuta
a Thangu zinkaka, bambasi bamonikisa phe Yehova mu thangu batudisa zitsangu mu dizina diandi. Diawu mu Bibila tueta mona mu bibuangu binkaka biobi bieta monisa ti Yehova niandi wulembo tubi kosoko yidi mbasi nioni wulembo tubila mu dizina diandi. (1 Mo. 18:1-33) Kadiambu ko Masonoko meta tuba ti Mose wubaka nsiku wu Yehova, ziverse zinkaka zieta monisa ti Yehova wusadila bambasi mu diambu di batudisa nsiku beni mu dizina Diandi.—3 Mo. 27:34; Mav. 7:38, 53; Nga. 3:19; Ebe. 2:2-4.
b TSUDUKUSULU YI ZIPHOVA: “Santisa” yinsundula zitisa, tadila mu phila yi busantu voti kuditadila mu lukinzu loso. “Nungisa” yinsundula monisa ti mutu niandi nungini mu mambu ma luvunu momo banfundidi ayi monisa ti kasi zaba ko kadi kiasa mu mambu beni.
c Lufua lu Yesu lusadisa phe batu babaka luzingu lu mvu ka mvu.
d Tala “Biuvu bi mintangi” mu Nzo yi Nkengidi wu Avril 2021, phapi 30-31 mu dingala.