1 Tesalonicenses

5 Beora túunaʼ, sukuʼuneʼex, tiʼ baʼax yaan yil yéetel kʼiinoʼob bey xan yéetel temporadaʼobeʼ,* maʼ kʼaʼabéet u tsʼíibtaʼalteʼex mix baʼaliʼ. 2 Tumen tak teʼex jach a wojleʼexeʼ u kʼiinil Jéeobaeʼ yaan u taal jach jeʼex u taal juntúul j-ookol de áakʼabeʼ. 3 Le táan u yaʼalaʼal tumen le máakoʼob: «¡Tuláakal jejetsʼkil yéetel maʼalob yanil!», letiʼ túun ken téek taalak xuʼulsajil tu yóokʼoloʼob, jeʼex le kʼiʼinam ku muʼyajtik juntúul koʼolel le táan u síijil u chaambaloʼ, yéetel junpuliʼ maʼ kun púutsʼloʼob. 4 Baʼaleʼ, sukuʼuneʼex, teʼexeʼ minaʼaneʼex ich éeʼjochʼeʼenil utiaʼal ka téek taalak le kʼiin ta wóokʼoleʼex jeʼex u taal tu yóokʼol j-ookoloʼobeʼ, 5 tumen teʼexeʼ tuláakleʼex u paalaleʼex le sáasiloʼ yéetel u paalaleʼex le kʼiinoʼ. Maʼ u tiaʼaloʼon áakʼabiʼ mix u tiaʼaloʼon éeʼjochʼeʼeniliʼ.

6 Le oʼolaleʼ maʼ k-weenleʼex jeʼex u beetik le uláakʼ máakoʼoboʼ, baʼaxeʼ unaj k-pʼilik k-ich mantatsʼ yéetel unaj k-kanáantik maʼ u saʼatal k-óol. 7 Tumen le máaxoʼob ku weenloʼoboʼ, u suukileʼ de áakʼab ku weenloʼob; le máaxoʼob xan ku káaltaloʼoboʼ, u suukileʼ de áakʼabeʼ kalaʼanoʼob. 8 Baʼaleʼ toʼon u tiaʼaloʼon le kʼiinoʼ, unaj k-kanáantik maʼ u saʼatal k-óol, k-búukintmaj le fe yéetel le yaabilaj beyoʼob junpʼéel u piixil tseemeʼ yéetel k-tsʼaamaj u esperanzail k-salvartaʼal jeʼex junpʼéel cascoeʼ; 9 tumen Dioseʼ maʼ tu yéeyajoʼon utiaʼal u yeʼesiktoʼon u pʼujaʼaniliʼ, baʼaxeʼ utiaʼal k-kʼamik salvación tu yoʼolal k-Yuumtsil Jesucristo. 10 Letiʼeʼ kíim t-oʼolal, utiaʼal beyoʼ, kex ajaʼanoʼon wa kex táan k-weenleʼ, ka kuxlakoʼon junmúuchʼ tu yéetel. 11 Le oʼolaleʼ, seguernak a paklan líiʼsik a wóoleʼex yéetel a paklan muʼukʼaʼankúuntik a wóoleʼex jach jeʼex táan a beetkeʼexoʼ.

12 Beora túunaʼ, sukuʼuneʼex, k-kʼáatikteʼex ka a weʼeseʼex tsiikil tiʼ le máaxoʼob jach ku xupkubaʼob meyaj ichileʼexoʼ yéetel ku nuʼuktikoʼob a beeleʼex tiʼ baʼax yaan yil yéetel u meeyjil Yuumtsil yéetel ku tsolkoʼob a xikneʼex. 13 Eʼeseʼex maas nojoch utsil tiʼ letiʼob yéetel yaabilteʼexoʼob tu yoʼolal le meyaj ku beetkoʼoboʼ. Ilawileʼex a kuxtaleʼex ich jeetsʼelil ta baatsileʼex. 14 Yaan xan uláakʼ baʼal k-jach kʼáat aʼalteʼex sukuʼuneʼex: chan aʼaleʼex u nuʼuk tiʼ le máaxoʼob maʼatech u yuʼubikoʼob tʼaanoʼ, tʼaaneneʼex yéetel le máaxoʼob jach yaachajaʼan u yóoloʼoboʼ utiaʼal a líiʼskeʼex u yóoloʼob, áanteʼex le máaxoʼob minaʼan u muukʼoʼoboʼ, yanakteʼex paciencia tiʼ tuláakal máak. 15 Ilawileʼex mix máak ka u sut u jeel le kʼaas ku beetaʼaltiʼoʼ; baʼaxeʼ mantatsʼ ka a kaxteʼex baʼax uts ta baatsileʼex bey xan utiaʼal tuláakal máak.

16 Kiʼimakchajak a wóoleʼex mantatsʼ. 17 Maʼ u jáawal a orareʼex. 18 Tsʼáaʼex u diosboʼotikil tuláakal baʼal, tumen lelaʼ letiʼe baʼax u kʼáat Dios yéetel Cristo Jesús ka a beeteʼexoʼ. 19 Maʼ a tupikeʼex u kʼáakʼil le kiliʼich muukʼoʼ. 20 Maʼ a mixbaʼalkúuntikeʼex le profecíaʼoboʼ. 21 Xakʼalteʼex tuláakal baʼal utiaʼal ka a wileʼex wa maʼalob; chʼíikikeʼex a beeteʼex baʼax maʼalob. 22 Náachkuntabaʼex tiʼ tuláakal u jejeláasil kʼasaʼanil.

23 Kiliʼichkúuntaʼakeʼex tu chúukaʼanil tumen u Diosil le jeetsʼeliloʼ. Sukuʼuneʼex, ichil a tuukuleʼex,* a puksiʼikʼaleʼex* yéetel ichil a wíinklileʼexeʼ minaʼan mix junpʼíit kʼasaʼaniliʼ; k-tsʼíiboltik ka kanáantaʼakoʼob tak tu kʼiinil way yaan* k-Yuumtsil Jesucristoeʼ, utiaʼal maʼ u yantal u siʼipiloʼob. 24 Le máax tʼankeʼexoʼ chúukaʼan u yóol tiʼ baʼax ku yaʼalik yéetel jach tu jaajil yaan u béeykuntik tuláakal.

25 Sukuʼuneʼex, maʼ u xuʼulul a orareʼex t-oʼolal.

26 Saludarteʼex tuláakal le sukuʼunoʼob yéetel junpʼéel kiliʼich tsʼuʼutsʼoʼ.

27 Kin kʼáatikteʼex tu kʼaabaʼ Yuumtsil ka xoʼokok tiʼ tuláakal le sukuʼunoʼob le tsʼíibaʼ.

28 Ka yanak u nojoch utsil k-Yuumtsil Jesucristo ta wéeteleʼex.