Nehemías

8 Tuláakal le kaaj túunoʼ tu muchʼuba yéetel junpʼéeliliʼ tuukul teʼ kʼíiwik yaan aktáan tiʼ le joonaj ku kʼaabaʼtik u Joonajil Jaʼoʼ,+ tsʼoʼoleʼ ka tu yaʼaloʼob tiʼ Esdras +le escriba ka u taas u libroil u Ley Moisés,*+ le ley u yaʼalmaj Jéeoba tiʼ u kaajil Israel ka u tsʼoʼokbesoʼ.+ 2 Le oʼolal tu yáax díail le mes sieteoʼ,+ Esdras le sacerdoteoʼ tu taasaj le Ley tu táan tuláakal le máaxoʼob u muchʼmubaʼoboʼ,+ tu táan le xiiboʼob, le koʼoleloʼob yéetel tu táan tuláakal le máaxoʼob jeʼel u páajtal u naʼatkoʼob le baʼax kun aʼalbil kaʼachoʼ. 3 Le tiaʼan tu táan le kʼíiwik yaan aktáan tiʼ le joonaj ku kʼaabaʼtik u Joonajil Jaʼoʼ letiʼeʼ tu kʼaʼam xokaj+ le Ley desde temprano tak medio díaoʼ, tu xokaj u yuʼub le xiiboʼob, le koʼoleloʼob yéetel tuláakal le máaxoʼob jeʼel u páajtal u naʼatkoʼoboʼ. Tuláakal le kaaj túunoʼ tu jach uʼuyaj+ le baʼax ku yaʼalik u libroil le Leyoʼ. 4 Esdras le escribaoʼ waʼalakbal kaʼach yóokʼol junpʼéel plataforma de cheʼ beetaʼan utiaʼal u meyaj teʼ kʼiin jeʼeloʼ, tu x-noʼoj kʼabeʼ tiʼ waʼalakbal kaʼach Matitías, Sema, Anaya, Urías, Ilquías yéetel Maaseya. Tu x-tsʼíik kʼabeʼ tiʼ waʼalakbal kaʼach Pedaya, Misael, Malkiya,+ Asum, As-badaná, Zacarías yéetel Mesulam.

5 Esdras túuneʼ tu jeʼekʼabtaj le libro tu táan tuláakal le kaajoʼ, letiʼeʼ tiʼ yaan kaʼach tiʼ junpʼéel lugar kaʼanal yanileʼ. Mientras táan kaʼach u jeʼekʼabtik le librooʼ tuláakal le kaajoʼ waʼalaji. 6 Esdras túuneʼ tu alabartaj Jéeoba u jaajil Dios, le nojoch Diosoʼ. Ka tsʼoʼokeʼ le kaajoʼ tu yaʼalaj: «¡Ka béeyak! ¡Ka béeyak!»,*+ tsʼoʼoleʼ ka tu líiʼsaj u kʼaboʼob. Ku tsʼoʼokoleʼ chinlajoʼob yéetel noklajoʼob tu táan Jéeoba. 7 Ka tsʼoʼokeʼ mientras waʼalakbal le kaajoʼ táan kaʼach u tsoʼololtiʼob baʼax ku yaʼalik le Ley tumen le levitaʼobaʼ:+ Jesúa, Baní, Serebías,+ Jamín, Akub, Sabetay, Odías, Maaseya, Kelitá, Azarías, Jozabad,+ Aanán yéetel Pelayá. 8 Letiʼobeʼ seguernaj u kʼaʼam xokikoʼob u libroil u Ley u jaajil Diosoʼ, jach maʼalob kaʼach xan u tsolkoʼob yéetel u yaʼalikoʼob baʼax u kʼáat u yaʼale. Letiʼobeʼ tu yáantoʼob le kaaj utiaʼal u naʼatik le baʼax táan u xoʼokloʼ.+

9 Nehemías le máax ku beetik u gobernadoril* kaʼachoʼ, Esdras+ le sacerdote yéetel escribaoʼ bey xan le levitaʼob ku kaʼanskoʼob le máakoʼoboʼ tu yaʼaloʼob tiʼ tuláakal le kaajoʼ: «Le kʼiin jeʼelaʼ santo tu táan Jéeoba a Dioseʼex.+ Maʼ u yaatal a wóoleʼex mix a wokʼoleʼex». Tumen tuláakal le kaajoʼ táan kaʼach u yokʼol mientras táan u yuʼubik baʼax ku yaʼalik le Leyoʼ. 10 Nehemíaseʼ tu yaʼalajtiʼob: «Xeeneʼex, jaanteʼex le kiʼikiʼ baʼaloʼoboʼ* yéetel ukʼeʼex baʼaloʼob chʼujuktak. Túuxteʼex xan junpʼíit janal+ tiʼ le máaxoʼob mix baʼal yaan u jaantoʼoboʼ. Le kʼiin jeʼelaʼ santo tu táan k-Yuumtsil, maʼ u lúubul a wóoleʼex tumen le kiʼimak óolal ku taal tiʼ Jéeobaoʼ letiʼ beetik u yantal a muukʼeʼex». 11 Le levitaʼoboʼ táan kaʼach u yaʼalikoʼob tiʼ tuláakal le kaajoʼ: «¡Maʼ a wokʼoleʼex!, tumen le kʼiin jeʼelaʼ santo, maʼ u lúubul a wóoleʼex». 12 Ka tsʼoʼokeʼ tuláakal le kaajoʼ bin janal yéetel bin u yukʼ le baʼaloʼob chʼujuktakoʼoboʼ, yéetel tu túuxtoʼob junpʼíit janal tiʼ u maasil máakoʼoboʼ, le kaajoʼ jach kiʼimakchaj u yóol+ tumen tu naʼataj le baʼax aʼalaʼabtiʼoboʼ.+

13 Tu kaʼapʼéel kʼiineʼ u nuuktakil le familiaʼob yaan tiʼ tuláakal le kaajoʼ, le sacerdoteʼoboʼ yéetel le levitaʼoboʼ tu muchʼubaʼobeʼ ka waʼalajoʼob tu baʼpach Esdras le escriba, utiaʼal u maas naʼatkoʼob le baʼax ku yaʼalik le Leyoʼ. 14 Letiʼob túuneʼ tu yiloʼobeʼ teʼ Ley tu tsʼáaj Jéeoba por medio tiʼ Moisésoʼ tsʼíibtaʼaneʼ le israelitaʼoboʼ unaj u yantaloʼob tiʼ paseloʼob* tu kʼiiniloʼob le fiesta ku beetaʼal teʼ mes sieteoʼ.+ 15 Yéetel unaj u máan u yaʼaloʼob+ tiʼ tuláakal Jerusalén yéetel tiʼ tuláakal le kaajoʼob tuʼux yaan le israelitaʼob le kʼuben tʼaanaʼ: «Xeeneʼex teʼ montañaʼoboʼ ka a taaseʼex u kʼab cheʼob piim u leʼob, cheʼob jeʼex olivo, pino, mirto, palmera yéetel u kʼab uláakʼ cheʼob piim u leʼob utiaʼal a beetkeʼex paseloʼob, jeʼex tsʼíibtaʼanil unaj u beetaʼaloʼ».

16 Le kaaj túunoʼ jóokʼeʼ ka tu taasaj u kʼab cheʼob utiaʼal u beetik paseloʼob, cada juntúul máakeʼ tu beetaj tu yóokʼol u techoil u yotoch, yaan xaneʼ tu beetaj tu táankabil u yotoch, tu táankabil u yotoch u jaajil Dios,+ teʼ kʼíiwik yaan teʼ joonaj ku kʼaabaʼtik u Joonajil Jaʼoʼ+ bey xan teʼ kʼíiwik yaan teʼ joonaj ku kʼaabaʼtik u Joonajil Efraínoʼ.+ 17 Tuláakal túun le máaxoʼob tsʼoʼok u suutoʼob, le bisaʼanoʼob kaʼach táanxel luʼumiloʼ, tu beetoʼob paseloʼob yéetel tiʼ pʼáatoʼobiʼ. Desde tu kʼiiniloʼob Josué+ u hijo Nuneʼ le israelitaʼoboʼ maʼ u beetoʼob kaʼach beyoʼ, le oʼolal jach kiʼimakchaj u yóoloʼob.+ 18 Sáamsamal táan kaʼach u xoʼokol u libroil u Ley u jaajil Dios,+ bey beetaʼabik desde tu yáax díail le fiestaoʼ tak tu tsʼook kʼiin. Siete días táan kaʼach u kʼiinbeskoʼob le fiestaoʼ, tu ocho díaseʼ beetaʼab junpʼéel asamblea especial jeʼex u yaʼalik le Leyoʼ.+