Isaías
32 ¡Ileʼex! Yaan u yantal juntúul rey+ kun gobernar yéetel justicia,+
yéetel yaan u yantal príncipeʼob kun gobernaroʼob utiaʼal u beetkoʼob baʼax toj.
2 Cada juntúul tiʼ letiʼobeʼ yaan u pʼáatloʼob bey junpʼéel tuʼux u balikuba máak tiʼ iikʼeʼ,
bey junpʼéel tuʼux u taʼakikuba máak tiʼ kʼaʼamkach jaʼeʼ,
yaan u pʼáatloʼob jeʼex le jaʼ ku yáalkab yéetel ku kʼuchul tiʼ junpʼéel tikin luʼumeʼ,+
beyoʼob u boʼoy junpʼéel nuxiʼ tuunich tiʼ junpʼéel tuʼux jach choko kʼiineʼ.
3 Le máaxoʼob sáasil u paakatoʼoboʼ maʼ kun kaʼa múutsʼul u yichoʼob,
le máaxoʼob ku páajtal u yuʼubikoʼob tʼaanoʼ yaan u jach chʼenxikintikoʼob baʼax ku yaʼalaʼal.
4 Le máaxoʼob chéen ku jáajan beetkoʼob wa baʼaxoʼ yaan u jach tuukuloʼob antes tiʼ u beetkoʼob wa baʼax.
Le máaxoʼob kʼalkʼalak u tʼaanoʼoboʼ maʼ kun tʼiʼilil u yaakʼoʼob yéetel yaan u naʼataʼal tubeel baʼax ku yaʼalikoʼob.+
5 Yaan u xuʼulul u yaʼalaʼal utsul máak tiʼ juntúul j-maʼ naʼat,
yaan u xuʼulul u yaʼalaʼal tsʼuul tiʼ juntúul kʼasaʼan máak.
6 Le j-maʼ naʼatoʼ yaan u yaʼalik baʼaloʼob minaʼan u cuentail,
yéetel chéen baʼaloʼob kʼaastak kun síijil tu puksiʼikʼal,+
le baʼaxoʼob ku beetkoʼ ku péeksik u maasil utiaʼal u náachtaloʼob tiʼ Dios* yéetel utiaʼal u tʼaanoʼob tu contra Jéeoba,
letiʼeʼ ku beetik maʼ u yantal baʼal u jaant le máax wiʼijoʼ
yéetel ku beetik maʼ u yantal baʼax u yukʼ le máax ukʼajoʼ.
7 Le kʼasaʼan máakoʼ chéen baʼaloʼob kʼaastak ku chʼaʼtuklik u beetik,+
ku péeksik máak u beet baʼaloʼob suʼtsiltak.
Yéetel u tuusoʼobeʼ ku beetik u bin kʼaasil tiʼ le máax ku muʼyajoʼ.+
Kex maʼalob baʼax ku yaʼalik le máax óotsiloʼ ku beetik u bin kʼaasil tiʼ.
8 Le máax utsoʼ ku tuklik bix jeʼel u yeʼesik u yutsileʼ,
yéetel mantatsʼ ku yilik u yeʼesik u yutsil.
9 «Koʼoleleʼex,* ¡líikʼeneʼex a wuʼuyeʼex baʼax kin waʼalik!
X-chʼúupalaleʼex,*+ ¡uʼuy a wuʼuyeʼex baʼax kin waʼalik!
10 Beoraaʼ mix baʼal chiʼichnakkúuntikeʼex, chéen baʼaleʼ le kéen máanak junpʼéel año yéetel wa jaypʼéel kʼiinoʼobeʼ yaan túun a tuukuleʼex,
tumen mix junpʼéel u yich uva kun juntarbil le kéen tsʼoʼokok u kʼiinil u cosechartaʼal.+
11 Koʼoleleʼex,* ¡sen sajakchajkeʼex!
X-chʼúupalaleʼex,* ¡sajakchajkeʼex!
Láaj luʼseʼex le nookʼ a takme’exo’
ka a búukinteʼex toʼotoch nookʼoʼob.+
12 Unaj a loʼoloxik a tseemeʼex tu yoʼolal baʼax tsʼoʼok u yúuchul
tiʼ le luʼum yéetel tiʼ le uva jach ku tsʼáaik u yich kaʼachoʼ.
13 Le luʼum tuʼux yaan in kaajaloʼ yaan u chuʼupul yéetel jejeláas kʼiʼixoʼob,
yaan u chuʼupul yéetel kʼiʼixoʼob tuláakal le najoʼob tuʼux yaan kiʼimak óolal kaʼachoʼ,
jach beyoʼ, yaan u chuʼupul yéetel kʼiʼixoʼob le kaaj tuʼux yaan kaʼach kiʼimak óolaloʼ.+
14 Tsʼoʼok u xúumpʼattaʼal le nukuch lugaroʼob tuʼux ku taʼakikuba máak kaʼachoʼ.+
Tsʼoʼok u pʼáatal mix máak yaan teʼ kaaj tuʼux ku yuʼubaʼal kaʼach u juum máakoʼoboʼ.
Le lugar ku kʼaabaʼtik Ofel+ yéetel le kaʼanal lugaroʼob tuʼuxoʼob ku yúuchul kananoʼ tsʼoʼok u pʼáatloʼob bey desiertoeʼ,
junpʼéel maʼalob lugar utiaʼal le burroʼoboʼ,*
junpʼéel tuʼux utiaʼal u máan u janal baʼalcheʼob.+
15 Chéen baʼaleʼ le kéen u láal u poder Dios desde teʼ kaʼanoʼ+
le desiertooʼ yaan u suut junpʼéel parcela,
le parcela xanoʼ yaan u yilaʼal bey junpʼéel kiʼichkelem kʼáaxeʼ.+
16 Teʼ desierto túunoʼ yaan u beetaʼal justiciaiʼ
yéetel teʼ parcelaoʼ yaan u beetaʼal baʼax tojiʼ.+
17 Tumen ku beetaʼal justicia teʼ lugaroʼobaʼ yaan u yantal jeetsʼeliliʼ,+
tumen ku beetaʼal baʼax tojeʼ mix baʼal kun beetik u sen tuukul yéetel u sajaktal máak.+
18 In kaajaleʼ yaan u kajtal tuʼux yaan jeetsʼelil,
tuʼux mix baʼal jeʼel u beetik u sajaktaleʼ yéetel tuʼux maʼalob utiaʼal u jeʼelskuba.+
19 Chéen baʼaleʼ le kʼáaxoʼ yaan u kaʼakachaʼal tumen nukuch bat,
yéetel le kaajoʼ yaan u beetaʼal u lúubul tak luʼum.
20 Kiʼimakchajak a wóoleʼex teʼex ka paakʼaleʼex tu jáal le jaʼoboʼ,
teʼex le ka jáalkʼabtikeʼex le wakax yéetel le burrooʼ».+