Lucas

2 Teʼ kʼiinoʼob jeʼeloʼ César Augustoeʼ tu yaʼalaj ka tsʼíibtaʼak u kʼaabaʼ tuláakal u kajnáaliloʼob le luʼum ku gobernarkoʼ 2 (le yáax censoaʼ beetaʼab tu kʼiiniloʼob táan u gobernar Quirinio tu luʼumil Siria). 3 Le oʼolal tuláakal máak bin u tsʼíibt u kʼaabaʼ teʼ kaaj tuʼux síijoʼ. 4 José+ xaneʼ bey tu beetiloʼ, letiʼeʼ lukʼ Nazaret, le kaaj yaan tu luʼumil Galileaoʼ ka bin tak Belén,+ le u kaajal David yaan tu luʼumil Judeaoʼ. Joséeʼ bin tak teʼeloʼ tumen tiʼ u taal tiʼ u paalaloʼob Davideʼ. 5 Bin yéetel María u yatan+ utiaʼal u tsʼíibtik u kʼaabaʼob. Teʼ kʼiinoʼob jeʼeloʼ jach taʼaytak u yantal u chaambal María.+ 6 Le tiaʼanoʼob túun Belénoʼ kʼuch u kʼiinil u síijil le chaambaloʼ. 7 Síij juntúul chan xiʼipal, u yáax paal María,+ letiʼ túuneʼ tu báatsʼtepʼteʼ ka tu chikúuntaj teʼ tuʼux ku tsʼaʼabal u yoʼoch le baʼalcheʼoboʼ.+ Bey tu beetiloʼ tumen maʼ yanchaj tuʼux u pʼáatloʼob teʼ najoʼob tuʼux ku pʼáatal le uʼulaboʼoboʼ.

8 Maʼ sen náach tiʼ le kaajoʼ yaan kaʼach j-kanan tamanoʼob pʼaatloʼob kajtal ich kʼáax. Letiʼobeʼ bul áakʼab táan kaʼach u kanáantkoʼob u yalakʼ tamanoʼobiʼ. 9 Chéen ka téek chíikpaj u ángel Jéeoba tu yiknaloʼob, yéetel u sáasilil u poder Jéeobaeʼ léembalnaj tu baʼpachoʼob ka jach sajakchajoʼob. 10 Chéen baʼaleʼ le ángeloʼ tu yaʼalajtiʼob: «Maʼ a chʼaʼikeʼex saajkil, tumen teneʼ taalen in waʼalteʼex junpʼéel maʼalob baʼal ken u beet u jach kiʼimaktal u yóol tuláakal le kaajoʼ. 11 Bejlaʼeʼ tu kaajal Davideʼ+ tsʼoʼok u síijil le máax kun salvarkeʼexoʼ,+ tsʼoʼok u síijil Cristo le Yuumtsiloʼ.+ 12 Lelaʼ letiʼe baʼax kun áantkeʼex a kʼaj óolteʼexaʼ: yaan a wilkeʼex juntúul chaambal báatsʼtepʼtaʼan, chikúuntaʼan teʼ tuʼux ku tsʼaʼabal u yoʼoch le baʼalcheʼoboʼ». 13 Tu tséel le ángel túunoʼ téek chíikpaj yaʼabkach ángeloʼobiʼ,+ letiʼobeʼ táan u alabarkoʼob Dios, táan u yaʼalikoʼob: 14 «Alabartaʼak Dios teʼ kaʼanoʼ, yéetel teʼ luʼumaʼ yanak jeetsʼelil tiʼ le máaxoʼob ku lúubloʼob utsil tiʼ Diosoʼ».

15 Le ka lukʼ le ángeloʼob tu yiknaloʼob utiaʼal u binoʼob teʼ kaʼanoʼ le j-kanan tamanoʼoboʼ káaj u yaʼalikoʼob: «Koʼoneʼex tak tu kaajil Belén ka k-il le baʼax tsʼoʼok u yúuchloʼ, le baʼax tsʼaʼab k-ojéelt tumen Jéeobaoʼ». 16 Binoʼob túun tu séebaʼanileʼ ka tu yiloʼob María yéetel José, bey xan le chaambal chikúuntaʼan teʼ tuʼux ku tsʼaʼabal u yoʼoch le baʼalcheʼoboʼ. 17 Le ka tu yiloʼobeʼ tu tsikbaltoʼob le baʼax aʼalaʼabtiʼob tu yoʼolal le chaambaloʼ. 18 Tuláakal le máaxoʼob chʼenxikint le baʼax tu yaʼalaj le j-kanan tamanoʼoboʼ jach jaʼakʼ u yóoloʼob. 19 Chéen baʼaleʼ Maríaeʼ káaj u tuukul tiʼ le baʼaloʼobaʼ bey xan tiʼ baʼax u kʼáat u yaʼaloʼob.+ 20 Le j-kanan tamanoʼoboʼ binoʼob táan u kʼaayoʼob yéetel táan u alabarkoʼob Dios yoʼolal tuláakal le baʼaxoʼob tu yiloʼob yéetel tu yuʼuboʼoboʼ. Letiʼobeʼ tu yiloʼob jach jaaj tuláakal le baʼax aʼalaʼabtiʼoboʼ.

21 Le ka tu tsʼáaj ocho días tiʼ le chaambaloʼ bisaʼab utiaʼal ka circuncidartaʼak,*+ ka tsʼaʼab u kʼaabaʼt Jesús. Lelaʼ letiʼe kʼaabaʼ tsʼaʼabtiʼ tumen le ángel táanil tiʼ u yantal tu jobnel Maríaoʼ.+

22 Le ka kʼuch u kʼiinil u limpiokíinkubaʼob tu táan Dios jeʼex u yaʼalik u Ley Moiséseʼ*+ le chaambaloʼ bisaʼab Jerusalén utiaʼal ka yanak tu táan Jéeoba. 23 Tu beetoʼob le baʼax tsʼíibtaʼan tu Ley Jéeobaaʼ: «Tuláakal le yáax xiib ku síijiloʼ u tiaʼal Jéeoba».+ 24 Letiʼobeʼ tu kʼuboʼob xan le baʼax ku yaʼalik u Ley Jéeoba unaj u kʼuʼubuloʼ: «Kaʼatúul mukuy wa kaʼatúul mejen palomaʼob».+

25 Tu kaajil Jerusaléneʼ yaan kaʼach juntúul máak ku kʼaabaʼtik Simeón, letiʼeʼ juntúul máak uts yéetel jach u kʼubmaj u yóol tiʼ Dios. Simeóneʼ táan kaʼach u páaʼtik u kʼuchul u kʼiinil u salvartaʼal u kaajil Israel,+ tiʼ letiʼeʼ tsʼaʼan espíritu santo. 26 Tsʼoʼoleʼ u espíritu santo Dioseʼ tu tsʼáaj u yojéelt maʼ kun kíimil táanil tiʼ u yilik le Máax yéeyaʼan tumen Jéeobaoʼ. 27 Le espíritu santooʼ tu tsʼáaj tu tuukul Simeón ka okok teʼ templooʼ. Le oʼolal le ka taasaʼab chan Jesús tumen u taataʼob utiaʼal u tsʼoʼokbeskoʼob le baʼax ku yaʼalik le Leyoʼ+ 28 Simeóneʼ tu méekʼaj le chaambaloʼ ka tu alabartaj Dios táan u yaʼalik: 29 «Kiʼichkelem Yuum, beoraaʼ jeʼel u páajtal in kíimileʼ+ tumen tsʼoʼok u yúuchul le baʼax ta waʼalajtenoʼ. 30 Teneʼ tsʼoʼok in wilik le máax kun meyajtech utiaʼal a salvartik wíinikoʼ,+ 31 le máax tsʼoʼok a tsʼáaik tu táan tuláakal kaajoʼoboʼ.+ 32 Letiʼeʼ bey junpʼéel sáasil+ kun luʼsik le éeʼjochʼeʼenil yaan teʼ kaajoʼoboʼ,+ bey junpʼéel kiʼichkelem sáasil kun juul yóokʼol u kaajil Israeleʼ». 33 José yéetel Maríaeʼ jaʼakʼ u yóoloʼob le ka tu yuʼuboʼob le baʼaxoʼob ku yaʼalaʼal tu yoʼolal le chaambaloʼ. 34 Simeón xaneʼ tu bendecirtoʼob yéetel tu yaʼalaj tiʼ María, u maama le chaambaloʼ: «¡Ilawile! Yoʼolal le chaambalaʼ yaan u lúubul yaʼab máakoʼob+ tu kaajil Israel, tu yoʼolal xaneʼ yaʼab máakoʼob kun kaʼa líikʼloʼob.+ Dioseʼ yaan u yeʼesik tiaʼan tu yéeteleʼ kex beyoʼ yaan u pʼektaʼal tumen le máakoʼoboʼ.+ 35 Le chan xiʼipalaʼ yéeyaʼan utiaʼal ka u chíikbes baʼax yaan tu puksiʼikʼal yaʼab máakoʼob. Teech xaneʼ junpʼéel chowak espada ken u táatsʼmáans a puksiʼikʼal».+

36 Teʼeloʼ tiaʼan kaʼach juntúul koʼolel profetaiʼ, u kʼaabaʼeʼ Ana. Letiʼeʼ u hija Fanuel, tiʼ u taal tu tribu Asereʼ. Le koʼolelaʼ tsʼoʼok u yantal u jaʼabil. Desde ka tsʼoʼok u beeleʼ* chéen siete años kajlaj yéetel u yíicham. 37 Beoraaʼ Anaeʼ 84 años yaantiʼ yéetel úuch kíimik u yíicham. Letiʼeʼ sáamsamal ku bin kaʼach teʼ templooʼ, de kʼiin bey xan de áakʼabeʼ letiʼeʼ ku adorartik Dios, ku ayunar* yéetel ku orar. 38 Teʼ súutuk jeʼeloʼ náatsʼeʼ ka joʼopʼ u tsʼáaik gracias tiʼ Dios, yéetel joʼopʼ u tʼaan yoʼolal le chan xiʼipal tu táan tuláakal le máaxoʼob táan u páaʼtkoʼob u salvartaʼal Jerusalén tumen Diosoʼ.+

39 José yéetel María túuneʼ ka tsʼoʼok u beetkoʼob tuláakal le baʼaxoʼob ku kʼáatik u Ley Jéeobaoʼ+ suunajoʼob Nazaret,+ le u kaajaloʼob yaan tu luʼumil Galileaoʼ. 40 Le chan xiʼipaloʼ seguernaj u nojochtal, u muʼukʼaʼantal, u sen yantal u naʼat bey xan u lúubul utsil tiʼ Dios.+

41 U taataʼobeʼ suukaʼan kaʼach u binoʼob láalaj jaʼab tu kaajil Jerusalén utiaʼal u fiestail le Pascuaoʼ.*+ 42 Le ka tu tsʼáaj 12 años tiʼ Jesúseʼ, jeʼex suukileʼ, binoʼob Jerusalén utiaʼal le Pascuaoʼ.+ 43 Ka tsʼoʼok túun le fiestaoʼ le táan u suut tuláakal le máakoʼoboʼ Jesúseʼ pʼáat Jerusalén, chéen baʼaleʼ u taataʼobeʼ maʼ tu tsʼáajoʼob cuentaiʼ. 44 Letiʼobeʼ tu tukloʼob tiʼ yaan ichil u maasil máakoʼob ku suutoʼob tu yéeteloʼoboʼ, le oʼolal xíimbalnajoʼob túulis kʼiin, tsʼoʼoleʼ ka joʼopʼ u máan u kaxtoʼob Jesús ichil u láakʼtsiloʼob bey xan ichil le máaxoʼob u kʼaj óoloʼoboʼ. 45 Chéen baʼaleʼ tumen maʼ tu yiloʼobeʼ suunajoʼob Jerusaléneʼ ka joʼopʼ u sen máan u kaxtoʼob. 46 Ka tsʼoʼok túun u máan óoxpʼéel kʼiineʼ tu kaxtoʼob, tiaʼan kaʼach teʼ templooʼ, kulukbal chúumuk tiʼ le j-kaʼansajoʼoboʼ táan u chʼenxikintikoʼob yéetel táan u kʼáatik u chiʼob. 47 Tuláakal le máaxoʼob chʼenxikintik kaʼachoʼ ku jaʼakʼal u yóoloʼob tu yoʼolal le naʼat yaantiʼoʼ bey xan tu yoʼolal bix u núukik le baʼaxoʼob ku kʼáataʼaltiʼoʼ.+ 48 U taataʼobeʼ jaʼakʼ u yóoloʼob ka tu yiloʼob. U maamaeʼ tu yaʼalajtiʼ: «In paal, ¿baʼaxten ta beetajtoʼon lelaʼ? ¿Maʼ wa ta wilik teen yéetel a papáeʼ táan k-sen máan kaxtech yéetel táan k-sen tuklik tuʼux tsʼoʼokech?». 49 Chéen baʼaleʼ letiʼeʼ tu yaʼalajtiʼob: «¿Baʼaxten táan a máan a kaxteneʼex? ¿Maʼ wa a wojleʼex tu yotoch in Taata kʼaʼabéet in wantaliʼ?».+ 50 Chéen baʼaleʼ letiʼobeʼ maʼ tu naʼatoʼob le baʼax tu yaʼalajtiʼoboʼ.

51 Jesús túuneʼ jóokʼeʼ ka suunaj Nazaret tu yéeteloʼob. Letiʼeʼ seguernaj u yuʼubik u tʼaan u taataʼob.+ U maama xaneʼ ku tsʼáaik kaʼach ichil u puksiʼikʼal tuláakal le baʼaxoʼob ku yúuchloʼobaʼ.+ 52 Jesús túuneʼ seguernaj u sen yantal u naʼat, u nojochtal bey xan u lúubul utsil tiʼ Dios yéetel tiʼ le máakoʼoboʼ.