1 Samuel
1 Yaan kaʼach juntúul máak kajakbal Ramataim-zofim,*+ le lugar jeʼelaʼ tiaʼan kaʼach tu montañailoʼob Efraíneʼ.+ U kʼaabaʼ le máakaʼ Elkaná,+ letiʼeʼ u hijo Jeroam, u hijo Eliú, u hijo Tow, u hijo Zuf, letiʼeʼ juntúul efraimita kaʼachi. 2 Letiʼeʼ yaan kaʼach kaʼatúul u yatanoʼob, u kʼaabaʼ juntúuleʼ Ana yéetel le uláakʼoʼ Peniná. Penináeʼ yanchaj u paalal, chéen baʼaleʼ Anaeʼ minaʼan kaʼach u paalal. 3 Le máakaʼ cada año ku lukʼul tu kaajal utiaʼal u bin tak Siló+ u adorart* yéetel u kʼub sacrificioʼob tiʼ Jéeoba,* le máax gobernartik le ángeloʼoboʼ. Teʼeloʼ tiaʼan kaʼach Ofní yéetel Fineás,+ u kaʼatúul paalal Elí. Letiʼobeʼ tiʼ ku meyajoʼob bey sacerdoteʼob utiaʼal Jéeobaiʼ.+
4 Junpʼéel kʼiineʼ, le ka tu kʼubaj Elkaná junpʼéel sacrificioeʼ, letiʼeʼ tu tsʼáaj jujunpʼéel parteʼob tiʼ Peniná u yatan bey xan tiʼ u hijoʼob yéetel tiʼ u hijaʼob,+ 5 chéen baʼaleʼ tiʼ Anaeʼ tu tsʼáaj junpʼéel parte jach especial, tumen maas u yaabiltmaj. Pero Jéeobaeʼ maʼ u chaʼa u yantal u paalal Ana kaʼachiʼ. 6 Tsʼoʼoleʼ Anaeʼ maʼ tu xuʼulul u sen burlartaʼal kaʼach tumen le uláakʼ u yatan u yíichamoʼ. Le koʼolelaʼ ku beetik beyaʼ utiaʼal ka lúubuk u yóol Ana, tumen Jéeobaeʼ maʼ u chaʼa kaʼach u yantal u paalal Anaiʼ. 7 Cada añoeʼ bey u beetik kaʼach Penináoʼ. Cada ken xiʼik Ana tu yotoch Jéeobaeʼ+ ku sen aʼalaʼal baʼal tiʼ tumen Peniná, le oʼolal letiʼeʼ ku sen okʼol yéetel ku pʼáatal maʼ tu janal. 8 Chéen baʼaleʼ Elkaná, u yíichameʼ, tu yaʼalajtiʼ: «Ana, ¿baʼaxten ka wokʼol, baʼaxten maʼ ta janal, baʼaxten jach lubaʼan a wóol?* ¿Maʼ wa maas maʼalob yanilen ta wéetel ke ka yanak diez a paalaliʼ?».
9 Le ka tsʼoʼok túun u janaloʼob yéetel u yukʼuloʼob tu kaajil Silóeʼ, Anaeʼ líikʼeʼ ka bini. Teʼ kʼiinoʼob jeʼeloʼ, Elí le sacerdoteoʼ, tiʼ kulukbal kaʼach tu entradail u templo*+ Jéeobaoʼ. 10 Anaeʼ jach táaj lubaʼan u yóol kaʼachi, le oʼolaleʼ joʼopʼ u orar tiʼ Jéeoba,+ yéetel joʼopʼ u sen okʼol. 11 Letiʼeʼ tu beetaj le promesaaʼ: «Kiʼichkelem Yuum Jéeoba, le máax gobernartik le ángeloʼoboʼ, wa ka wilik bix in sen muʼyaj,* wa maʼ ta tuʼubsiken, wa ka kʼaʼajsiken yéetel wa ka beetik u yantal juntúul in chan hijoeʼ,+ kin prometertiktecheʼ Jéeoba de ke yaan in tsʼáaiktech utiaʼal ka u meyajtech tuláakal u kʼiiniloʼob u kuxtal, yéetel mix bikʼin kun kʼosbil u tsoʼotsel u pool».+
12 Anaeʼ xáanchaj táan u orar tu táan Jéeoba, mientras táan u orareʼ Elíeʼ táan kaʼach u paktik u chiʼ Ana. 13 Anaeʼ chéen ichil u tuukul* táan kaʼach u orar, maʼ tu yuʼubaʼal baʼax ku yaʼalik, chéen u chiʼ ku kikilankil. Le oʼolal Elíeʼ tu tukleʼ kalaʼan. 14 Elíeʼ tu yaʼalajtiʼ: «¿Baʼaxten kalaʼanech? Xuʼuluk a káaltal». 15 Ana túuneʼ tu núukaj: «¡Maʼ, in yuum! Maʼ in wukʼmaj vinoiʼ mix uláakʼ baʼal ku káalkuntik máakiʼ, teneʼ chéen jach táaj yaachajaʼan in wóol, chéen táan in waʼalik tiʼ Jéeoba tuláakal baʼax yaan ichil in puksiʼikʼal.+ 16 Maʼ a wilken bey juntúul koʼolel mix baʼal u biilaleʼ, tumen tak beoraaʼ le baʼax tsʼoʼok in waʼalik ichil in oraciónoʼ tin waʼalaj tumen jach yaachajaʼan in wóol yéetel tumen jach táan in muʼyaj». 17 Elí túuneʼ tu núukajtiʼ: «Maʼalob, ka xiʼiktech utsil, ka tsʼaʼabaktech tumen u Dios u kaajil Israel le baʼax ta kʼáatajtiʼoʼ».+ 18 Ana túuneʼ tu yaʼalaj: «Ka lúubken utsil tiʼ teech». Le ka tsʼoʼokeʼ lukʼ teʼeloʼ suunajeʼ ka jaani, yéetel maʼ kaʼa lúub u yóoliʼ.
19 Letiʼob túuneʼ líikʼoʼob jach tempranoeʼ, chinlajoʼob tu táan Jéeobaeʼ ka suunajoʼob teʼ tu yotochoʼob yaan Ramáoʼ.+ Elkaná túuneʼ yanchaj baʼal u yil yéetel Ana, u yatan, yéetel Jéeobaeʼ tu kʼaʼajsaj Ana.+ 20 Le ka máan óoliʼ junpʼéel añoeʼ,* Anaeʼ pʼáat embarazadaeʼ ka yanchaj juntúul u chan hijo, ka tu tsʼáaj u kʼaabaʼt+ Samuel,* tumen letiʼeʼ tu yaʼalaj: «Tiʼ Jéeoba tin kʼáataj».
21 Le ka máan kʼiineʼ, Elkaná yéetel le máaxoʼob yanoʼob ichil u yotochoʼ bin u kʼuboʼob le sacrificio ku tsʼaʼabal cada año tiʼ Jéeobaoʼ+ bey xan le sacrificio ku kʼuʼubul yoʼolal junpʼéel promesaoʼ. 22 Chéen baʼaleʼ Anaeʼ maʼ biniʼ,+ tumen tu yaʼalaj tiʼ u yíicham: «Jach chéen pʼelak u pʼatik u chuʼuch le chan xiʼipalaʼ yaan in biskiʼ. Teʼ kʼiin jeʼeloʼ yaan u yantal tu táan Jéeoba, yéetel desde teʼ kʼiin jeʼeloʼ tiʼ kun pʼáatliʼ».+ 23 Elkaná, u yíichameʼ, tu yaʼalajtiʼ: «Beet le baʼax ka tuklik maas maʼaloboʼ.* Pʼáaten tak ken kʼuchuk u kʼiinil a luʼsik u chuʼuch. Jéeoba ka u beet u yúuchul le baʼax tsʼoʼok a waʼalikoʼ». Ana túuneʼ pʼáat tu yotocheʼ ka seguernaj u kanáantik u chan hijo tak ka kʼuch u kʼiinil u luʼsik u chuʼuchoʼ.
24 Jach chéen pʼelak tu luʼsil u chuʼuch le chan paaloʼ, Anaeʼ bin Siló, ka tu bisaj juntúul toro de tres años, junpʼéel efá* maʼalob harina yéetel junpʼéel tinaja vino,+ ka kʼuch tu yotoch Jéeoba teʼ Silóoʼ.+ Tu bisaj xan le chan xiʼipaloʼ. 25 Teʼeloʼ kíimsaʼab túun le torooʼ ka bisaʼab le chan xiʼipal tu táan Elíoʼ. 26 Ana túuneʼ tu yaʼalaj: «¡Perdonarteniʼ in yuum! Jach tu jaajil teen le koʼolel yanchaj ta táan baʼax kʼiinjeak utiaʼal u orar tiʼ Jéeoba teʼ lugaraʼ.+ 27 Teneʼ orarnajen tiʼ Jéeoba utiaʼal u tsʼáaikten juntúul chan xiʼipal, yéetel letiʼeʼ tu tsʼáajten le baʼax tin kʼáatajtiʼoʼ.+ 28 Beora túunaʼ táan in kʼubik* tiʼ Jéeoba. U tiaʼal* Jéeoba tuláakal u kʼiiniloʼob u kuxtal».
Elkaná túuneʼ chinlaj tu táan Jéeoba.