Mateo

7 Xuʼuluk a juzgareʼex+ utiaʼal maʼ a juzgartaʼaleʼex, 2 tumen jeʼex a juzgareʼexeʼ bey xan kan juzgarbileʼexoʼ,+ yéetel jeʼex a pʼiiseʼexeʼ bey xan kan pʼisbileʼexoʼ.+ 3 ¿Baʼaxten túun ka wilik le sojol yaan tu yich a sukuʼunoʼ, chéen baʼaleʼ maʼ ta wilik le nuxiʼ cheʼ kʼatakbal ta wichoʼ?+ 4 ¿Bix u páajtal a waʼalik tiʼ a sukuʼun: ‹Chaʼa in jóoʼsik le sojol yaan ta wichoʼ›? Si ta wich techeʼ yaan junpʼéel nuxiʼ cheʼiʼ. 5 ¡J-kaʼapʼéel ich! Yáaxeʼ jóoʼs le nuxiʼ cheʼ kʼatakbal ta wichoʼ, beyoʼ yaan u páajtal a wilik tubeel bix jeʼel a jóoʼsik le sojol yaan tu yich a sukuʼunoʼ.

6 Maʼ a tsʼáaikeʼex le baʼaloʼob santotak tiʼ le peekʼoʼoboʼ, mix a pulkeʼex a perlaʼex tu táan kʼéekʼenoʼob+ utiaʼal maʼ u pepeʼchaʼatikoʼob, yéetel utiaʼal maʼ u sutkubaʼob u xeʼexetʼeʼexoʼob.

7 Maʼ u xuʼulul a kʼáatkeʼex baʼax kʼaʼabéetteʼex, tumen yaan u tsʼaʼabalteʼex;+ maʼ u xuʼulul a kaaxaneʼex, tumen yaan a kaxtikeʼex; maʼ u xuʼulul a kʼoopeʼex, tumen yaan u jeʼebelteʼex joonaj.+ 8 Tumen tuláakal máax ku kʼáatik baʼax kʼaʼabéettiʼeʼ ku tsʼaʼabaltiʼ,+ tuláakal máax ku kaaxaneʼ ku kaxtik baʼax ku máan u kaxte yéetel tuláakal máax ku kʼoopeʼ ku jeʼebel joonaj tiʼ. 9 U jaajileʼ, ¿máax tiʼ teʼex jeʼel u tsʼáaik junpʼéel tuunich tiʼ u paal le kéen u kʼáat waajeʼ? 10 Wa ku kʼáatik xan juntúul kayeʼ, ¿máasaʼ maʼ tu tsʼáaik juntúul kaan tiʼ? 11 Le oʼolaleʼ wa teʼex kex kʼasaʼaneʼex a wojel a tsʼáaʼex maʼalob baʼaloʼob tiʼ a paalaleʼexeʼ, kux túun a Taataʼex yaan teʼ kaʼanoʼ, ¿maʼ wa maas jeʼel u tsʼáaik maʼalob baʼaloʼob+ tiʼ le máaxoʼob kʼáatiktiʼoʼ?+

12 Le oʼolaleʼ tuláakal le baʼaxoʼob a kʼáateʼex ka beetaʼakteʼex tumen le máakoʼoboʼ, teʼexeʼ bey xan unaj a beetkeʼextiʼoboʼ.+ Leloʼ letiʼe baʼax ku kaʼansik le Ley yéetel le Profetaʼoboʼ.+

13 Ookeneʼex tiʼ le nuʼunutʼ joonajoʼ,+ tumen kóoch u bejil le xuʼulsajiloʼ yéetel nojoch u joonajil, le oʼolal yaʼab máakoʼob ku yookloʼobiʼ. 14 Chéen baʼaleʼ u bejil le kuxtaloʼ nuʼutʼ yéetel nuʼutʼ xan u joonajil, le oʼolal maʼ yaʼab máaxoʼob kaxtikiʼ.+

15 Kanáantabaʼex tiʼ le maʼ jaajil profetaʼob+ ku taaloʼob ta wiknaleʼex bey tamanoʼoboʼ,+ tumen u jaajileʼ loboʼob maʼatech u yuʼubik u naʼajtaloʼob.+ 16 Tu yoʼolal le ich ku tsʼáaikoʼoboʼ* tiʼ ken a kʼaj óolteʼex máaxoʼobiʼ. ¿Máasaʼ maʼatech u tʼoʼokol uvaʼob mix higoʼob tiʼ kʼiʼixoʼob?+ 17 Tuláakal xan maʼalob cheʼeʼ ku tsʼáaik maʼalob ich, chéen baʼaleʼ tuláakal cheʼ maʼ pataleʼ maʼ patal xan le ich ku tsʼáaikoʼ.+ 18 Junkúul maʼalob cheʼeʼ maʼ tu páajtal u tsʼáaik u yich maʼ pataliʼ; junkúul cheʼ maʼ pataleʼ maʼ xan tu páajtal u tsʼáaik maʼalob ich.+ 19 Tuláakal cheʼ maʼ tu tsʼáaik maʼalob icheʼ ku kúulchʼaktaʼaleʼ ku puʼulul ich kʼáakʼ.+ 20 U jaajileʼ le máakoʼob jeʼeloʼ yaan a kʼaj óoltikeʼexoʼob tu yoʼolal le ich ku tsʼáaikoʼoboʼ.+

21 Maʼ tuláakal le máaxoʼob aʼalikten ‹Yuumtsil, Yuumtsil› kun ookloʼob tu Reinoil le kaʼanoʼ, baʼaxeʼ chéen le máaxoʼob ku beetkoʼob baʼax u kʼáat in Taata yaan teʼ kaʼanoʼ.+ 22 Teʼ kʼiin jeʼeloʼ yaʼab máakoʼob ken u yaʼaloʼobten: ‹Yuumtsil, Yuumtsil,+ ¿maʼ wa profetizarnajoʼon ta kʼaabaʼiʼ? ¿Maʼ wa t-jóoʼsaj demonioʼob yéetel t-beetaj yaʼab milagroʼob* ta kʼaabaʼiʼ?›.+ 23 Teen túuneʼ yaan in waʼaliktiʼob: kʼasaʼan máakeʼex, ¡junpuliʼ maʼ in kʼaj óoleʼexiʼ! ¡Náachkuntabaʼex tiʼ teen!+

24 Tuláakal máax ku chʼenxikintik yéetel ku beetik le baʼaxoʼob tsʼoʼok in waʼalikaʼ, chíikaʼan tiʼ juntúul máak jach yaan u naʼat tu beetaj u yotoch yóoʼ cháaltun.+ 25 Le najaʼ tumen yóoʼ cháaltun beetaʼabeʼ maʼ lúub kex sen kʼáax jaʼ tu yóokʼol, kex kaʼanchaj u jaʼil yéetel kex sen jaʼatsʼ tumen kʼaʼamkach iikʼiʼ. 26 Chéen baʼaleʼ tuláakal máax ku chʼenxikintik le baʼaxoʼob tsʼoʼok in waʼalik pero maʼ tu beetkeʼ, chíikaʼan tiʼ juntúul máak jach minaʼan u naʼat tu beetaj u yotoch yóoʼ arena.+ 27 Chéen baʼaleʼ le najaʼ lúubi tumen sen kʼáax jaʼ tu yóokʼol, kaʼanchaj u jaʼil yéetel jaʼajatsʼaʼab tumen kʼaʼamkach iikʼ,+ bey túun úuchik u tsʼoʼokoltiʼoʼ».

28 Ka tsʼoʼok u yaʼalik Jesús le baʼaloʼobaʼ, tuláakal le yaʼabkach máakoʼob chʼenxikintikoʼ pʼáat jaajap u chiʼob yoʼolal bix u kaʼansaj,+ 29 tumen letiʼeʼ ku kaʼansaj jeʼex juntúul máak tsʼaʼan autoridad tiʼeʼ,+ maʼ jeʼex u beetik le escribaʼoboʼ.