Lucas

21 Jesús túuneʼ ka tu líiʼsaj u yicheʼ tu yilaj bix u jalkʼesaʼal taakʼin tumen le ayikʼal máakoʼob teʼ tu nuʼukuliloʼob le taakʼin ku siʼibiloʼ.+ 2 Teʼeloʼ tu yilaj xan juntúul koʼolel óotsil yéetel kimen u yíicham, letiʼeʼ táan kaʼach u jalkʼesik kaʼapʼéel mejen taakʼin jach junpʼíit u tojoloʼobiʼ.*+ 3 Jesús túuneʼ tu yaʼalaj: «Tu jaajil kin waʼalikteʼexeʼ le koʼolel kimen u yíichamaʼ, kex óotsileʼ, maas yaʼab tu tsʼáaj ke le tu jalkʼesaj tuláakal le u maasil máakoʼoboʼ.+ 4 Tumen tuláakal le máakoʼobaʼ tu tsʼáajoʼob chéen le bukaʼaj tu yalabtajtiʼoboʼ, chéen baʼaleʼ le koʼolelaʼ kex jach óotsileʼ tu tsʼáaj tuláakal le bukaʼaj yaantiʼ utiaʼal u kuxtaloʼ».+

5 Ka tsʼoʼokeʼ jujuntúul máakoʼobeʼ káaj u tʼaanoʼob tiʼ bix jatsʼutskíintaʼanil le templo yéetel jatsʼuts tuunichoʼob bey xan yéetel le baʼaloʼob kʼubaʼanoʼob tiʼ Diosoʼ.+ 6 Le oʼolal Jesúseʼ tu yaʼalaj: «Tuláakal le baʼaxoʼob ka wilkeʼexaʼ yaan u kʼuchul u kʼiinil u láaj niʼikil, maʼ kun pʼatbil tuunich tu yóokʼol uláakʼ tuunich».+ 7 Letiʼob túuneʼ tu kʼáatoʼobtiʼ: «J-Kaʼansaj, ¿jach baʼax kʼiin ken úuchuk le baʼaloʼobaʼ, yéetel baʼax kun eʼesik nukaʼaj úuchul tuláakal le baʼaloʼobaʼ?».+ 8 Jesúseʼ tu yaʼalaj: «Kanáantabaʼex utiaʼal maʼ a tuʼusleʼex,+ tumen yaʼab máakoʼob kun taaloʼob tin kʼaabaʼ táan u yaʼalikoʼob: ‹Teen le Cristooʼ›, yéetel: ‹Tsʼoʼok u náatsʼal le kʼiin aʼalaʼanoʼ›. Teʼexeʼ maʼ a bineʼex tu paachoʼob.+ 9 Tsʼoʼoleʼ kéen a wuʼuyeʼex táan u baʼateʼel le kaajoʼob yéetel táan woʼochʼlantáambaloʼobeʼ* maʼ a sajaktaleʼex. Tumen yáax letiʼe baʼaloʼob kun úuchloʼobaʼ, chéen baʼaleʼ u xuul yóokʼol kaabeʼ maʼ tu séebaʼanil kun taaliʼ».+

10 Jesús túuneʼ tu yaʼalajtiʼob: «Junpʼéel kaajeʼ yaan u baʼateʼel tu contra uláakʼ kaaj,+ yéetel junpʼéel reinoeʼ yaan u baʼateʼel tu contra uláakʼ reino.+ 11 Yaan u sen tíitkuba le luʼumoʼ, tiʼ jejeláas tuʼuxoʼobeʼ yaan u yantal kʼaakʼas kʼojaʼaniloʼob yéetel yaan u pʼáatal minaʼan baʼal jaantbil.+ Yaan xan u yúuchul baʼaloʼob ken u beet u sen jaʼakʼal u yóol máak, yéetel yaan u yilaʼal nukuch señaloʼob ku taaloʼob teʼ kaʼanoʼ.

12 Chéen baʼaleʼ táanil tiʼ u yúuchul tuláakal le baʼaloʼobaʼ yaan a chʼaʼpachtaʼaleʼex+ yéetel yaan a maʼachleʼex utiaʼal ka kʼuʼubkeʼex teʼ sinagogaʼob bey xan teʼ cárceloʼoboʼ. Yaan xan a bisaʼaleʼex tu táan reyoʼob yéetel gobernadoroʼob yoʼolal in kʼaabaʼ.+ 13 Lelaʼ yaan u tsʼáaik tuʼux a waʼalikeʼex baʼax ka creerkeʼex. 14 Le oʼolaleʼ chʼaʼtukleʼex ichil a puksiʼikʼaleʼex maʼ ken a ensayarteʼex baʼax ken a waʼaleʼex utiaʼal a defenderkabaʼex,+ 15 tumen teneʼ yaan in tsʼáaikteʼex naʼatil bey xan baʼax ken a waʼaleʼex. Beyoʼ tuláakal le máaxoʼob pʼekmileʼexoʼ maʼ kun páajtal u yaʼalikoʼob wa maʼ jaaj baʼax ka waʼalikeʼexiʼ, mix kun páajtal u baʼateltʼaanoʼob ta wéeteleʼex.+ 16 Tsʼoʼoleʼ yaan tak a kʼuʼubleʼex tumen a taataʼex, a sukuʼuneʼex, a láakʼtsileʼex yéetel tumen a amigoʼex, yéetel jujuntúul tiʼ teʼexeʼ yaan a kíimsaʼaleʼex.+ 17 Yaan xan a pʼektaʼaleʼex tumen tuláakal máak yoʼolal in kʼaabaʼ.+ 18 Kex beyoʼ mix junkúul u tsoʼotsel a pooleʼex ken a perderteʼex.+ 19 Wa ku chúukpajal a wóoleʼexeʼ yaan a salvartik a kuxtaleʼex.+

20 Tsʼoʼoleʼ kéen a wileʼex jelekbal le soldadoʼob tu baʼpach Jerusalénoʼ+ ojéelteʼex tsʼoʼok u náatsʼal u kʼiinil u xuʼulsaʼaltiʼ.+ 21 Le máaxoʼob túun yanoʼob Judeaoʼ púutsʼkoʼob utiaʼal ka xiʼikoʼob teʼ montañaʼoboʼ,+ le máaxoʼob yanoʼob chúumuk Jerusaléneʼ lukʼkoʼobiʼ, yéetel le máaxoʼob yanoʼob naatsʼ tiʼ le kaajoʼ maʼ u yookloʼobiʼ. 22 Tumen leloʼobaʼ u kʼiiniloʼob u beetaʼal justicia utiaʼal ka béeychajak tuláakal le baʼaxoʼob tsʼíibtaʼanoʼ. 23 ¡Óotsil le koʼoleloʼob embarazadaʼoboʼ bey xan le táan u tsʼaa chuʼuchoʼob teʼ kʼiinoʼob jeʼeloʼ!+ Tumen yaan u sen muʼyaj máak* yéetel Dioseʼ yaan u castigartik le kaajaʼ. 24 Yaan u kíimsaʼaloʼob yéetel espada, yéetel yanoʼobeʼ yaan u bisaʼaloʼob táanxel luʼumiloʼob+ utiaʼal ka pʼáatkoʼob bey esclavoʼobeʼ. Jerusaléneʼ yaan u pepeʼchaʼataʼal tumen le kaajoʼoboʼ* tak ken tsʼoʼokok le kʼiinoʼob tsʼaʼan tiʼ le kaajoʼoboʼ.*+

25 Yaan xan u yilaʼal señaloʼob tiʼ le Kʼiin yéetel tiʼ le Lunaoʼ bey xan tiʼ le estrellaʼoboʼ.+ Tsʼoʼoleʼ u kajnáaliloʼob le kaajoʼoboʼ yaan u muʼyajoʼob tumen maʼ ken u yojéeltoʼob bix jeʼel u púutsʼloʼob le kéen juumnak yéetel le kéen pʼuʼujuk le kʼáaʼnáaboʼ. 26 Le máakoʼoboʼ yaan u desmayaroʼob tumen jach saajkoʼob yoʼolal le baʼaloʼob ku taal u kʼiinil u yúuchul way luʼumeʼ, tumen tak le nukuch baʼaloʼob yanoʼob teʼ kaʼanoʼ yaan u tíitaʼaloʼob. 27 Letiʼ túun ken ilaʼak u taal u Paal máak+ ichil junpʼéel múuyal yéetel u páajtalil bey xan yéetel u kiʼichkelmil.+ 28 Chéen baʼaleʼ kéen káajak u yúuchul le baʼaloʼobaʼ toj waʼaleneʼex yéetel líiʼs a pooleʼex, tumen tsʼoʼok u náatsʼal u kʼiinil a jáalkʼabtaʼaleʼex».

29 Ka tsʼoʼokeʼ tu tsikbaltajtiʼob lelaʼ: «Ilawileʼex le higuera yéetel le u maasil cheʼoboʼ.+ 30 Kéen a wileʼex táan u loolankiloʼobeʼ teʼexeʼ a wojleʼex tsʼoʼok u náatsʼal u kʼiinil u yichankiloʼob. 31 Bey túun xanoʼ kéen a wileʼex u yúuchul le baʼaloʼobaʼ ojéelteʼexeʼ naatsʼ yanik u Reino Dios. 32 Tu jaajil kin waʼalikteʼexeʼ le generaciónaʼ junpuliʼ maʼ kun xuʼulul wa maʼ úuchuk tuláakal le baʼaloʼobaʼ.+ 33 Tumen maas jeʼel u xuʼulul tiʼ le kaʼan yéetel tiʼ le luʼum ke ka pʼáatak maʼ u béeytal le baʼaxoʼob tsʼoʼok in waʼalikoʼ.+

34 Chéen baʼaleʼ jach kanáantabaʼex utiaʼal maʼ u sen chuʼupul a puksiʼikʼaleʼex ikil u píitmáan a janaleʼex, ikil u píitmáan a wukʼuleʼex,+ bey xan yoʼolal u chiʼichnakiloʼob le kuxtalaʼ.+ Beyoʼ maʼ kun jaʼakʼal a wóoleʼex le kéen téek taalak le kʼiin ta wóokʼoleʼex ichil u chan súutukoʼ. 35 Tumen yaan u pʼáatal bey junpʼéel léech le kéen taalakeʼ,+ yéetel yaan u taal yóokʼol tuláakal u kajnáaliloʼob yóokʼol kaab. 36 Le oʼolaleʼ maʼ a weenleʼex,+ baʼaxeʼ kʼáat óolneneʼex tuláakal súutukil,+ beyoʼ yaan u béeytal a púutsʼleʼex tiʼ tuláakal le baʼaxoʼob aʼalaʼan kun úuchlaʼ yéetel yaan a pʼáatleʼex waʼatal tu táan u Paal máak».+

37 De kʼiineʼ Jesúseʼ ku kaʼansaj kaʼach teʼ templooʼ, chéen baʼaleʼ de áakʼabeʼ ku jóokʼoleʼ ku bin u kʼubéentuba* teʼ montaña ku kʼaabaʼtik u Montañail le Olivoʼoboʼ. 38 Jaʼatskab túuneʼ tuláakal u kajnáaliloʼob le kaajoʼ ku binoʼob kaʼach teʼ templo u yuʼuboʼob u tsikbaloʼ.