Kuxtal ich jeets’elil ti’ jump’éel túumben yóok’ol kaab

Ken a cha’ant ba’ax bona’an te’ chan ju’una’, ¿bix a wu’uykaba? ¿ma’ wa tu ts’íiboltik a puksi’ik’al le jeets’elil, le ki’imak óolal yéetel le ma’alob kuxtal ku yila’al te’ela’? Bey wale’. Ba’ale’, ¿chéen wa jump’éel jats’uts wayak’ u páa’ta’al u k’uchul u k’iinil u yila’al jump’éel jats’uts kuxtal je’ex lela’?

Óoli’ tuláakal máak bey wal je’el u tuklike’. Ba’ax ku yila’al bejla’e’ leti’e ba’alo’oba’: ba’ateltáambal, u beeta’al ba’ax ma’ ma’alob tu táan leeyi’, wi’ijil, k’oja’anil yéetel ch’íijil, chéen jáan a’albil jujump’éeli’. Chéen ba’ale’, je’el u páajtal u yantalto’on alab óolale’. Le Biibliao’ ku ya’alike’ ma’ tun xáantale’ Dioose’ yaan u ts’áaik túumben ka’ano’ob yéetel jump’éel túumben lu’um tu’ux kun antal justiisia (2 Pedro 3:13; Isaías 65:17).

Le Biibliao’ ku ka’ansike’, le túumben ka’ano’oba’ yéetel le túumben lu’uma’ ma’ leti’e ka’ano’ob k-paktiko’o’ mix xan leti’e Lu’um k-pée’cha’tika’a’. Le Lu’um yéetel le ka’ano’ob k-paktike’exa’ jach ma’alob beeta’anilo’ob, ku ts’o’okole’ le Biibliao’ ku ya’alike’ yaan u p’áatlo’ob utia’al mina’an u xuul (Salmo 89:36, 37; 104:5). Le t’aan túumben lu’umo’ táan u t’aan ti’ utsul máako’ob kun kajtalo’ob way Lu’ume’, yéetel le t’aan túumben ka’ano’obo’, táan u t’aan ti’ jump’éel reeino wa jump’éel jach ma’alob gobieerno tia’an te’ ka’ano’ yéetel yaan u góobernar yóok’ol le Lu’uma’. Ba’ale’, ¿jach wa je’el u páajtal k-páa’tik jump’éel túumben lu’um, wa jump’éel jach ki’ichkelem túumben yóok’ol kaabe’?

Wa ka wojéelte’, lela’ leti’e ba’ax u yáax tukulmaj Dioos utia’al le Lu’uma’. Tu ts’áaj yáax ka’atúul máako’ob te’ páaraiso tu lu’umil Edeno’, yéetel tu ts’áajti’ob jump’éel táaj ma’alob meyaj: “Ya’abchajak a paalale’ex; chupe’ex le yóok’ol kaabo’ [yéetel yanak yáanal a k’abe’ex]” (Génesis 1:28). Jaaj, Dioose’ u k’áat ka’ach ka yanak u paalal le yáax máako’obo’ yéetel ka u suto’ob tuláakal le Lu’uma’ jump’éel páaraiso. Kex ku ts’o’okol tu ye’eso’ob ma’ u náajalmo’ob kuxtal mina’an u xuul úuchik u yéeyko’ob mu yu’ubko’ob u t’aan Dioose’, ba’ax u yáax tukulmaj Dioose’ ma’ k’expaji’. ¡Yaan u béeychajal ti’ jump’éel túumben yóok’ol kaab! (Isaías 55:11.)

Wa ka wojéelte’, ken a payalchi’it le Paadrenuestro yéetel ken a k’áat ka taalak u Reeino Dioose’, táan a k’áatik ka luk’sa’ak tumen U gobieerno yaan te’ ka’ano’, le k’aas ku beeta’al te’ Lu’uma’, yéetel ka u góobernart le túumben yóok’ol kaabo’ (Mateo 6:9, 10). Yéetel je’el u páajtal k-alab óoltike’ Dioose’ yaan u núukik le payalchi’a’, tumen u T’aane’ ku ya’alik: “Le utsil máako’obo’ bíin u tia’alinto’ob le lu’uma’; ti’ bíin kajlako’ob utia’al ja’abo’ob mina’an u xuul[i’]” (Salmo 37:29).

Bix le kuxtal tu túumben yóok’ol kaab Diooso’

U Reeino Dioose’ yaan u taasik táaj ma’alob ba’alo’ob utia’al le yóok’ol kaaba’; bey ken u béeykunt tuláakal uts u yáax tukulmaj Dioos utia’al u ki’iki’ óolt u kaajal way Lu’ume’. Le p’ekbailo’, yéetel u yila’al máak yéetel k’aase’ yaan u xu’ulul, ken mina’anchajak le ba’alo’oba’ tuláakal u kajnáalilo’ob le Lu’uma’ yaan u múul biskuba’ob jach ma’alob. Te’ Biibliao’, Dioose’ ku ya’alik yaan u xu’ulsik le ba’ateltáambalo’ob tak tu xuul yóok’ol Lu’umo’. “Mix jump’éel kaaj bíin u ch’a’a u nu’ukul u ba’ate’el utia’al u bin u ba’ate’elt yaanal kaaj, mix bíin k’a’abéetchajak u yúuchul ka’ambesaj utia’al [ba’ate’el]”. (Salmo 46:9; Isaías 2:4.)

Tu ts’ooke’, tuláakal le Lu’uma’ yaan u suut jump’éel páaraiso wa jump’éel jáardin. Le Biibliao’ ku ya’alik: “Ki’imakchajak u yóol le x-tokoyo’, lu’um tikin; sen ki’imakchajak u yóol ka loolnak. [...] Te’ [tikin] x-tokoy lu’umo’ bíin yanak ya’abkach ja’i’. Le x-tokoy lu’umo’ bíin suunak xéel ja’il, le [tikin] lu’umo’ bíin chu’upuk yéetel sayab ja’ob” (Isaías 35:1, 6, 7).

Te’ Lu’um suunaja’an jump’éel páaraisoo’ jach yaan u ki’imaktal yóol máaki’. Mix bik’in kun ka’a mu’yajtbil wi’ijil tio’olal mina’an ba’al jaantbil. “Le lu’uma’ ts’o’ok u ts’áaik [...] u yich”, bey u ya’alik le Biibliao’ (Salmo 67:6; 72:16). Tuláakal máak kun ilik u yich u meyaj, je’ex u ya’alik le Máax beetmailo’ono’: “Máaxo’ob ku beetiko’ob u yotocho’obe’ bíin kajlako’ob ichilo’ob, máaxo’ob pak’ik uuba’obe’ bíin u jaanto’ob u yich. Ma’ bíin [...] jaanta’ak yich u pak’al uuba tumen yaanal [máaki’]” (Isaías 65:21, 22).

Tu túumben yóok’ol kaab Dioose’ le máako’obo’ ts’o’ok ma’ tun kajtalo’ob ts’apakbalo’ob ti’ jump’éel naj mix ti’ baarrio’ob jach óotsiltak, tumen Dioose’ ts’o’ok u ya’alik: “Máaxo’ob ku beetiko’ob u yotocho’obe’ bíin kajlako’ob ichil [...]. Ma’ bíin kajlak yaanal máak[i’]”. Le Biibliao’ ku ya’alik xan: “Ma’ bíin meyajnakech chéen kuneli’” (Isaías 65:21-23). Lela’ ku ye’esike’ le máako’obo’ yaan u yilik u yich u meyajo’ob, lela’ yaan u taasik ki’imak óolal ti’ob. Le kuxtal kun ilbilo’ ma’ nak óoli’.

Ken máanak k’iine’, u Reeino Dioose’ yaan tak u ka’a beetik u yantal jeets’elil ichil ba’alche’ob yéetel wíiniko’ob je’ex le anchaj tu jáardinil Edeno’. Le Biibliao’ ku ya’alik: “Loobo yéetel j-tamane’, bíin [u bisuba’ob], chakmo’ol yéetel chan j-yuuke’, bíin múul je’eleko’ob, chan wakax yéetel léeone’, bíin nuukchajko’ob pa’te’, bíin u cha’ob u bisa’alo’ob tumen juntúul chan j-xi’ipal” (Isaías 11:6-9; Oseas 2:18).

Chéen tukult lela’, te’ Lu’um suunaja’an jump’éel páaraisoo’, ¡yaan xan u ts’a’akal tuláakal k’oja’anil yéetel tuláakal talamilo’ob yaan tu wíinklil máak! U t’aan Dioose’ ku jaajkúuntikto’on: “Mix juntúul kajnáal bíin u ya’al: «K’oja’anen»” (Isaías 33:24). “[Dioos] kun cho’ik tuláakal u ja’il u yicho’ob, ma’ tun yantal kíimil, mix ok’ol, mix yaj óolal, mix k’i’inamil, tumen tuláakal ba’ax yaan ka’ache’ ts’o’ok u máan.” (Apocalipsis 21:4.)

Bix je’el u páajtal a tia’alintke’

Jach ts’o’ok wal u péek yóol a puksi’ik’al yo’olal le ba’axo’ob yaan yil yéetel le kuxtal u ya’almaj Dioos u ts’áaik tu túumben yóok’ol kaab tu’ux kun antal justiisiao’. Kex yaan máaxo’ob ku tukliko’ob jach táaj ma’alobtak le ba’alo’ob utia’al ka béeyaka’, ba’ale’ utia’al Máax beetmailo’on yéetel u yaabiltmo’one’ ma’ talam u béeykunski’ (Salmo 145:16; Miqueas 4:4).

Ba’ale’, wa k-k’áat kuxtal utia’al mina’an u xuul te’ páaraiso nats’a’an u k’iin yantal way Lu’ume’, yaan ba’axo’ob k’a’abéet k-meentik. Jesuse’ tu ye’esaj jump’éel ba’ax jach k’a’abéet k-beetik le ka tu ya’alaj ich payalchi’ ti’ Dioos: “Le kuxtal mina’an u xuulo’ leti’ lela’: ka u k’aj óolto’ob teech chéen juntúulili’ [Jaajil Dioos], yéetel ka u k’aj óolto’ob Jéesukriisto le máax ta túuxtajo’” (Juan 17:3).

Le o’olale’, wa jach tu jaajil k-k’áat kuxtal tu túumben yóok’ol kaab Dioose’, táanil k’a’abéet k-kanik ba’ax ku k’áatik ti’ to’on, ku ts’o’okole’ ka k-beete, tumen jach u jaajile’ “le yóok’ol kaab[a’] táan u bin u xu’ulul yéetel tuláakal le k’aak’as ts’íibolalo’ob yaan tu yóok’olo’; ba’ale’ le máax ku beetik ba’ax u káat [Dioose’] ku p’áatal utia’al k’iino’ob mina’an u xuul”. Wa k-beetik beya’, yaan k-ki’iki’ óoltik utia’al mina’an u xuul le ya’abkach utsul ba’alo’ob ken u ts’áa Diooso’, le Máax beetmailo’on yéetel jach u yaabiltmo’ono’ (1 Juan 2:17).

Wa ma’ tu ya’ala’al yaanal ba’ale’ le teekstoso’ ch’a’aba’an ti’ Quili’ich Biblia (túumben ts’íib).