Maʼ kun xáantal ken xuʼuluk le muʼyajiloʼ
Maʼ xaaneʼ techeʼ tsʼoʼok a tuklik lelaʼ: «¿Baʼaxten sen yaan muʼyajil teʼ yóokʼol kaabaʼ?». Wíinikeʼ jach úuch joʼopʼok u muʼyajtik le talmiloʼob ku taasik le nukuch baʼateloʼoboʼ, le óotsililoʼ, le nukuch loobiloʼoboʼ, le baʼaloʼob kʼaastak ku beetaʼaloʼ, le kʼojaʼaniloʼoboʼ yéetel le kíimiloʼ. Le muʼyajiloʼ tsʼoʼok u maas yaʼabtal teʼ tu tsʼook cien jaʼaboʼobaʼ. ¿Yaan wa u kʼuchul u kʼiinil u xuʼulul?
Yaan, yéetel maʼ kun xáantal ken xuʼuluk. Le Bibliaoʼ ku yaʼalikeʼ maʼ kun xáantaleʼ «yaan u minaʼantal loolob máakoʼob [...]. Baʼaleʼ le j-kabal óoloʼoboʼ bíin u tiaʼalintoʼob le luʼumaʼ, bíin kuxlakoʼob ichil nojoch jéetsʼel óolal». ¿Bukaʼaj kʼiin kun kajtaloʼob way Luʼum ich jeetsʼelileʼ? Le Bibliaoʼ ku yaʼalik: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul» (Salmo 37:10, 11, 29).
Ken xuʼulsaʼak tumen Dios le kʼasaʼanil bey xan le muʼyajiloʼ, le Luʼumaʼ yaan u suut paraísoi yéetel le máakoʼoboʼ yaan u kajtaloʼob ichil kiʼimak óolal yéetel toj óolal. Le Bibliaoʼ ku yaʼalik xaneʼ Dioseʼ yaan u «choʼik tuláakal u jaʼil u yichoʼob, maʼ túun yantal kíimil, mix okʼol, mix yaj óolal, mix kʼiʼinamil» (Apocalipsis 21:4).
Teʼ túumben yóokʼol kaaboʼ tak le kimenoʼob kun kaʼa kuxkíintbiloʼob utiaʼal ka u kʼamoʼob xan le utsiloʼobaʼ. Le Bibliaoʼ ku yaʼalik: «Yaan u kaʼa púut kuxtal le kimenoʼoboʼ, le utstakoʼoboʼ bey xan le kʼasaʼanoʼoboʼ» (Beetaʼanoʼob [Hechos] 24:15). Le oʼolaleʼ, Jesucristoeʼ tu yaʼalaj tiʼ le kʼasaʼan máak chʼuykíintaʼab tu tséeloʼ: «Yaan a wantal tin wéetel teʼ paraísooʼ» (Lucas 23:43; Nuevo Mundo).
¿Baʼaxten yanchaj muʼyajil?
Wa Dios u kʼáat kaʼach ka kuxlak máak ich kiʼimak óolal utiaʼal mantatsʼeʼ, ¿baʼaxten túun tu chaʼaj u yantal le muʼyajiloʼ, yéetel baʼaxten maʼ u xuʼulsiʼ?
Dioseʼ ka tu beetaj Adán yéetel Evaeʼ minaʼan kaʼach kʼeban tu wíinkliloʼob. Tsʼoʼoleʼ tu tsʼáajoʼob xan kajtal tiʼ upʼéel jatsʼuts kúuchil yéetel tu tsʼáajtiʼob upʼéel jatsʼuts meyaj. Le Bibliaoʼ ku yaʼalikeʼ Dioseʼ «tu yilaj tuláakal baʼax tu beetajoʼ sen maʼalob» (Génesis 1:31). Adán yéetel Eva wa ka u yuʼuboʼob u tʼaan Dios kaʼacheʼ, u paalaloʼobeʼ maʼ kun yantal kaʼach kʼeban tu wíinkliloʼob, yéetel le Luʼumaʼ yaan kaʼach u láaj suut paraísoi tuʼux kun kajtal máakoʼob ich kiʼimak óolal yéetel ich jeetsʼelil utiaʼal mantatsʼ.
Dioseʼ maʼ tu beetaj Adán yéetel Eva bey robotoʼobeʼ, tumen tu tsʼáajtiʼob u páajtalil u chʼaʼatuklikoʼob baʼax u kʼáat u beetoʼob. Baʼaleʼ utiaʼal ka yanak kiʼimak óolal tiʼobeʼ kʼaʼabéet kaʼach u chʼaʼatuklikoʼob u beetkoʼob baʼax u kʼáat Dios. Letiʼeʼ ku yaʼalik: «Teen [Jéeoba a Dios]; teen kaʼanbesik tiʼ teech, tuʼux bejil unaj a bin» (Isaías 48:17). Lelaʼ ku yeʼeskeʼ, wa ku chʼaʼatuklikoʼob kaʼach u beetkoʼob baʼax maʼ utstutʼaan Dioseʼ maʼ kun bin utsil tiʼob, tumen wíinikeʼ maʼ beetaʼab utiaʼal u nuʼuktik u kuxtal tu juunaliʼ. Le Bibliaoʼ ku yaʼalik: «Xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin» u kuxtal (Jeremías 10:23).
Adán yéetel Evaeʼ tu tukloʼobeʼ kex ka u náachkuntubaʼob tiʼ Dioseʼ láayliʼ jeʼel u bin utsil tiʼob kaʼacheʼ. Baʼaleʼ ka tu náachkuntubaʼob tiʼ u nuʼuktaj Dioseʼ kʼebanchajoʼob yéetel xuʼul u yáantaʼaloʼob. Bey úuchik u káajal u chʼíijloʼob yéetel u kíimloʼoboʼ. Toʼoneʼexeʼ, u paalaloʼon Adán yéetel Evaeʼ, tu máansoʼob toʼon le kʼeban yéetel le kíimiloʼ (Romailoʼob 5:12).
Tsʼaʼab naʼatbil maʼ Jéeoba unaj u gobernariʼ
¿Baʼaxten túun Dioseʼ maʼ tu xuʼulsaj tiʼ Adán yéetel Eva ka u beet u jeeloʼob kaʼachiʼ? Tumen tsʼaʼab naʼatbileʼ maʼ letiʼ unaj u gobernariʼ. Lelaʼ letiʼe kʼáatchiʼob anchajoʼobaʼ: ¿máax unaj u gobernar, yéetel máax maas maʼalob u gobernar? ¿Maas wa jeʼel u bin utsil tiʼ wíinikoʼob wa ku náachkuntkuba tiʼ Dioseʼ? Úuchik u tsʼáaik tiempo tiʼ wíinikoʼob utiaʼal u nuʼuktik u kuxtaloʼobeʼ, Dioseʼ tu tsʼáaj tuʼux u yeʼesikoʼob wa maas maʼalob ka gobernartaʼakoʼob tumen letiʼ wa maas maʼalob ka u gobernartubaʼob tu juunaloʼob. Utiaʼal lelaʼ Dioseʼ tu tsʼáaj yaʼab tiempo tiʼ wíinikoʼob utiaʼal u kaxkoʼob u jejeláasil gobiernoʼob, u jejeláasil bix u jeʼel jóoʼloʼob táanileʼ, u jejeláasil religionoʼob yéetel u jejeláasil bix jeʼel u nuʼuktikoʼob u kuxtaloʼob tu juunaloʼobeʼ.
¿Tsʼoʼok wa túun u bin utsil tiʼob? Ichil le yaʼab jaʼaboʼob tsʼoʼok u máanoʼ chéen sen muʼyajiloʼob tsʼoʼok u yilaʼal. Teʼ tu tsʼook cien jaʼabaʼ, kíim cien millones máakoʼob tiʼ nojoch baʼateloʼob, ichil leloʼobaʼ táakaʼan le yaʼabach máakoʼob kíimoʼob teʼ tu kaʼapʼéel nojoch baʼateloʼ. Teʼ kʼiinoʼob xanaʼ, maas jach yaan ookolil yéetel jach yaʼab u beetaʼal loob. Tsʼoʼoleʼ jach yaʼab máakoʼob ku drogarkubaʼob. Yéetel jach yaan kʼaakʼas kʼojaʼaniloʼob ku páakʼal yoʼolal le núup chital wa le kʼaakʼas kuxtaliloʼ. Cada jaʼabeʼ jach yaʼab máakoʼob ku kíimloʼob yoʼolal wiʼijil yéetel yoʼolal kʼojaʼaniloʼob. Tuláakal tuʼux tsʼoʼok xan u kʼastal bix kuxlik wíinikoʼob. Tuláakal lelaʼ ku yeʼeskeʼ u gobierno wíinikoʼobeʼ maʼatan u páajtal u luʼsik le talamiloʼobaʼ. Mix baʼal xan jeʼel u páajtal u beetkoʼob utiaʼal u luʼskoʼob le chʼíijiloʼ, le kʼojaʼaniloʼ yéetel le kíimiloʼ.
Le bix kuxlik wíinikoʼob teʼ kʼiinoʼobaʼ bey aʼalaʼanik kun ilbiloʼ. Le Bibliaoʼ ku yaʼalikeʼ tiʼ yanoʼon tu «tsʼook jaʼaboʼobeʼ», yéetel ku yaʼalik xaneʼ yaan u yilaʼal «talam kʼiinoʼob» bejlaʼeʼ. Tsʼoʼoleʼ táan xan u béeytal le baʼax u yaʼalmaj le Bibliaaʼ: «Le máaxoʼob kʼasaʼanoʼoboʼ yéetel le ku tuusoʼoboʼ bíin xiʼikoʼob tiʼ kʼaas tak tu maas kʼaasil» (2 Timoteo 3:1-5, 13).
Maʼ kun xáantal ken xuʼuluk le muʼyajiloʼ
Tuláakal le baʼaxoʼob ku yúuchuloʼ ku yeʼesik jach taʼaytak u xuʼulsaʼal le talmiloʼob ku taal tiʼ u náachkuntkuba máak tiʼ Diosoʼ. Tsʼoʼok u yilaʼaleʼ u gobernarkuba wíinik tu juunaleʼ maʼatech u taasik utsil, yéetel chéen u gobierno Dios jeʼel u taasiktoʼon jeetsʼelileʼ, kiʼimak óolal, toj óolal yéetel kuxtal minaʼan xuul. Bey túunoʼ, Jéeobaeʼ jach taʼaytak u xuʼulsik le muʼyajil yéetel le baʼaloʼob kʼaastakoʼ. Maʼ kun xáantaleʼ, Dioseʼ yaan u xuʼulsik u gobierno wíinikoʼob yéetel yaan u xuʼulsik le baʼaloʼob kʼaastak ku beetaʼaloʼ.
Le Bibliaoʼ ku yaʼalik: «Tu kʼiiniloʼob u méekʼtáanoʼob le [gobiernoʼob yanoʼob teʼ kʼiinoʼobaʼ], u [Diosil] kaʼaneʼ bíin u líikʼes jumpʼéel [reino teʼ kaʼanoʼ] mix bikʼin bíin xuʼulsaʼakiʼ, bíin pʼáatak utiaʼal minaʼan u xuul, [...] yaan u xuʼulsik jumpuliʼ tuláakal le uláakʼ [reinoʼob]» yanoʼob teʼ kʼiinoʼobaʼ (Daniel 2:44). Le bix kun kaʼa sutbil tsiikil tumen le Reino tiʼ u noj jalaʼachil Diosoʼ letiʼeʼ maas nojoch kaʼansaj yaan teʼ Bibliaoʼ. Jesuseʼ tu yaʼalaj baʼax kun chíikbesik u «tsʼook jaʼaboʼob», le ka tu yaʼalaj: «U maʼalob péektsil le [reinooʼ] bíin [tsikbaltaʼak] tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mateo 24:14).
Ken xuʼulsaʼak le baʼaloʼob kʼaastakoʼ, ¿máaxoʼob kun pʼáatloʼob? Le Bibliaoʼ ku yaʼalik: «Le máaxoʼob [toj] u kuxtaloʼob yéetel x-maʼ siʼipileʼ bíin [kuxlakoʼob] jumpuliʼ teʼ j-luʼumaʼ baʼaleʼ le loolob máakoʼob yéetel le j-kaʼapʼéel ichoʼoboʼ bíin jóokʼesaʼakoʼob, bíin tojolchʼintaʼakoʼob xan» (Proverbios 2:21, 22). Le máaxoʼob toj u kuxtaloʼoboʼ ku kankoʼob yéetel ku beetkoʼob baʼax u kʼáat Jéeoba. Jesucristoeʼ tu yaʼalaj: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3). Bey túunoʼ, «le yóokʼol kaaboʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ; baʼaleʼ le máax ku beetik baʼax u kʼáat Jajal Dioseʼ ku pʼáatal utiaʼal kʼiinoʼob minaʼan u xuul» (1 Juan 2:17).