¿Táan wa a páaʼtik u noj kʼiinil Jéeoba?
«¡Tsʼoʼok u náatsʼal u noj kʼiinil Yuumtsil! ¡Tsʼoʼok u náatsʼal, séebaʼan u taal!» (SOFONÍAS 1:14.)
1-3. 1) ¿Baʼax ku yaʼalik le Biblia yoʼolal u noj kʼiinil Jéeobaoʼ? 2) ¿Máakalmáak le «u noj kʼiinil Yuumtsil» tsʼoʼok u náatsʼloʼ?
U NOJ kʼiinil Jéeobaeʼ, maʼ upʼéel kʼiin de veinticuatro horasiʼ, baʼaxeʼ yaan u máan yaʼab jaʼaboʼob táan u yúuchul, tumen tiʼ kun pʼis óoltbil le kʼasaʼan máakoʼoboʼ. Letiʼobeʼ jach yaan baʼax oʼolal u sajaktaloʼob, tumen upʼéel kʼiin chuup yéetel éekʼjochʼeʼenil, kʼuuxil, pʼujaʼanil, yaamyamil yéetel yaj óolal (Isaías 13:9; Amós 5:18-20; Sofonías 1:15). Profeta Joeleʼ ku yaʼalik: «¡Yaj yaniloʼon, táan u náatsʼal u kʼiinil yuumtsil! ¡U kʼiinil sajbeʼentsil, tumen ku taasik xuʼulsajil le máax yaan tuláakal u páajtalileʼ!» (Joel 1:15.) Baʼaleʼ teʼ kʼiin jeʼeloʼ, Jéeobaeʼ yaan u salvartik «le máaxoʼob jaaj yóol u puksiʼikʼaloʼoboʼ» (Salmo 7:10).
2 Teʼ Bibliaoʼ ku meyaj le tʼaan «u noj kʼiinil Yuumtsil» wa u noj kʼiinil Jéeoba, utiaʼal u yúuchul tʼaan tiʼ le jejeláas bix tsʼoʼok u taasik u pʼis óoloʼ. Tu jaʼabil 607 táanil tiʼ u taal Cristoeʼ, u kajnáaliloʼob Jerusaleneʼ tu muʼyajtoʼob «u kʼiinil Yuumtsil» le ka lúuboʼob tu kʼab le babilonioʼoboʼ (Sofonías 1:4-7). Tu jaʼabil 70 teʼ yáax siglooʼ, tiʼ Jéeobaeʼ meyajnaj le romanoʼob utiaʼal u castigartik xan le judíoʼob maʼ tu kʼamoʼob u Hijooʼ (Daniel 9:24-27; Juan 19:15). Baʼaleʼ le Bibliaoʼ ku tʼaan tiʼ uláakʼ «u noj kʼiinil Yuumtsil», tuʼux kun «baʼateʼel tu yéetel [tuláakal] le múuchʼ kaajoʼo[boʼ]» (Zacarías 14:1-3). Jéeobaeʼ tu tsʼáaj u yojéelt apóstol Pabloeʼ u noj kʼiinileʼ yaan yil yéetel u taalbal Cristo, lelaʼ káaj tu jaʼabil 1914 le ka beetaʼab Reyil Jesús teʼ kaʼanoʼ (2 Tesalonicailoʼob 2:1,2). U kʼiinil Jéeobaeʼ jach tsʼoʼok u náatsʼal, le oʼolaleʼ jach maʼalob úuchik u chʼaʼabal u tekstoi u jaʼabil 2007 tu libroi Sofonías 1:14, tuʼux ku yaʼalik: «¡Tsʼoʼok u náatsʼal u noj kʼiinil Yuumtsil!».
3 Tumen tsʼoʼok u náatsʼal u noj kʼiinil Jéeobaeʼ, bejlaʼeʼ jach u kʼiinil a weʼesik wa táan a páaʼtik. ¿Bix jeʼel a beetkeʼ? ¿Yaan wa baʼax kʼaʼabéet a wutskíintik ichil a kuxtal?
Eʼes táan a páaʼtik u noj kʼiinil Jéeoba
4. ¿Baʼax kʼiinil ku páaʼtik kaʼach Jesús u kʼuchul?
4 Le ka tʼaanaj tiʼ baʼaxoʼob kun úuchul ken xuʼulsaʼak tiʼ le kʼasaʼan yóokʼol kaabaʼ, Jesucristoeʼ tu yaʼalaj tiʼ u disipuloʼob: «Maʼ u náayal a wóoleʼex» (Mateo 24:44, LTN). Ka tu yaʼalaj le tʼaanoʼobaʼ, Jesuseʼ táan kaʼach u páaʼtik xan u kʼuchul u kʼiinil u kʼubik u kuxtal t-oʼolal (Mateo 20:28). ¿Baʼax tu beetaj Jesús utiaʼal maʼ u náayal u yóol, yéetel baʼax ku kaʼansiktoʼon le baʼax tu beetoʼ?
5, 6. 1) K-yaabilaj tiʼ Dios yéetel tiʼ k-éet máakileʼ, ¿bix u yáantkoʼon k-páaʼt u noj kʼiinil Jéeoba? 2) ¿Bix úuchik u kaʼansiktoʼon Jesús k-yaabilt k-éet máakil?
5 Jesuseʼ jach u yaabiltmaj Jéeoba bey xan u leyoʼob. Hebreob 1:9 ku yaʼalik yoʼolal Jesús: «Tsʼoʼok a yaabiltik le baʼax tojoʼ yéetel tsʼoʼok a pʼektik le baʼax kʼaasoʼ. Le oʼolaleʼ tu yéeyajech [...] Jajal Dios, a Jajal Dios, tu wekaj ta wóokʼoleʼ [maas] yaʼab kiʼimak óolal tiʼ le tu wekaj tu yóokʼol le a láakʼinajoʼoboʼ». Tumen jach u yaabiltmaj u Taataeʼ, Jesuseʼ chúukpaj u yóol u meyajteʼ. Wa k-yaabilmaj xan Jéeoba yéetel k-kuxtal jeʼex utstutʼaaneʼ, letiʼeʼ yaan u kanáantkoʼon (Salmo 31:23). Le yaabilaj k-uʼuyik yoʼolal Jéeoba yéetel k-beetik baʼax ku yaʼalikoʼ, yaan u yáantkoʼon k-páaʼt le u noj kʼiiniloʼ.
6 Jesuseʼ jach tu yaabiltaj xan tuláakal máak. Lelaʼ tu yeʼesaj le ka «tu chʼaʼaj óotsilil tiʼob tumen yajtak u yóoloʼob yéetel lubaʼantak u yóoloʼob jeʼel bix tamanoʼob minaʼan máax kanáantikoʼo[beʼ]» (Mateo 9:36). Le oʼolal xan tu kʼaʼaytajtiʼob le maʼalob péektsiloʼ. Toʼon xaneʼ k-yaabilaj tiʼ k-éet máakileʼ ku péekskoʼon k-kʼaʼayttiʼob u maʼalob péektsilil le Reinooʼ. K-yaabilaj tiʼ Dios yéetel tiʼ k-éet máakileʼ, ku yáantkoʼon utiaʼal ka chúukpajak k-óol kʼaʼaytaj bey xan ka k-páaʼt u noj kʼiinil Jéeoba (Mateo 22:37-39).
7. Le maʼ taalak u noj kʼiinil Jéeobaoʼ, ¿baʼax unaj k-beetik utiaʼal u yantaltoʼon kiʼimak óolal?
7 Jach ku taasik kaʼach kiʼimak óolal tiʼ Jesús u beetik baʼax u kʼáat Jéeoba (Salmo 40:8). Wa k-tsʼoʼokbesik u tʼaan Jéeoba yéetel k-áantik le máakoʼob jeʼex tu beetil Cristoeʼ, yaan xan u yantaltoʼon kiʼimak óolal ikil k-meyajtik Dios (Beetaʼanoʼob [Hechos] 20:35). Jach beyoʼ, «u kiʼimak óolal [Jéeobaeʼ] letiʼ k-muukʼ», letiʼ kanáantkoʼon yéetel áantkoʼon k-páaʼt le u noj kʼiiniloʼ (Nehemías 8:10).
8. ¿Baʼaxten kʼaʼabéet k-maas natsʼikba tiʼ Jéeoba ich payalchiʼ?
8 Le payalchiʼob tu beetaj Jesús tiʼ Dios yéetel u jaajil u yóoloʼ, le áant u aktáant le talamiloʼob taal tu yóokʼoloʼ. Le ka tsʼaʼab u yokjaʼ tumen Juaneʼ Jesuseʼ táan kaʼach u payalchiʼ, yéetel táanil tiʼ u yéeyik u apostoloʼobeʼ bul áakʼab payalchiʼinaj tiʼ u Taata (Lucas 6:12-16). ¿Máasaʼ jach ku péek k-óol ken k-xok teʼ Biblia le payalchiʼob tu beetaj Jesús yéetel u jaajil u yóol le áakʼab táanil tiʼ u kíimsaʼaloʼ? (Marcos 14:32-42; Juan 17:1-26.) Kux túun teech, ¿ka payalchiʼ wa xan mantatsʼ? Maʼalob ka payalchiʼinakech mantatsʼ tiʼ Jéeoba yéetel ka a beet le bukaʼaj súutukil ka tuklik kʼaʼabéeteʼ. Kʼáat xan u kiliʼich muukʼ yéetel ken u tsʼáatecheʼ, nuʼukt a kuxtal tu yéetel. U jach biskuba máak yéetel Dioseʼ upʼéel baʼal jach kʼaʼanan teʼ talam kʼiinoʼobaʼ tumen tsʼoʼok u jach náatsʼal u noj kʼiinil Jéeoba. Le oʼolaleʼ koʼox ilik maas natsʼikba tiʼ Jéeoba ich payalchiʼ (Santiago 4:8).
9. ¿Baʼaxten unaj k-tsʼíiboltik ka kiliʼichkúuntaʼak u kʼaabaʼ Jéeoba?
9 Uláakʼ baʼax áant Jesús utiaʼal ka chúukpajak u yóol u aktáant le muʼyajiloʼoboʼ, letiʼe u yilik ka kiliʼichkúuntaʼak u kʼaabaʼ Jéeobaoʼ. Tu kaʼansaj xan u disipuloʼob u kʼáatoʼob ka kiliʼichkúuntaʼak u kʼaabaʼ u Taata (Mateo 6:9). Wa jach tu jaajil xan k-tsʼíiboltik ka kiliʼichkúuntaʼak u kʼaabaʼ Dioseʼ, yaan k-ilik maʼ k-taasik subtsilil tiʼ. Beyoʼ yaan k-eʼesik jach táan k-páaʼtik u noj kʼiinil Jéeoba.
¿Yaan wa baʼax kʼaʼabéet a wutskíintik ichil a kuxtal?
10. ¿Baʼaxten maʼalob ka k-il baʼax k-beetik ichil k-kuxtal?
10 Wa sáamal ka taalak u noj kʼiinil Jéeobaeʼ, ¿yaan wa u yilaʼal jach tu jaajil táan a páaʼtik? Tuláakloʼon unaj k-jach ilik baʼax k-beetik ichil k-kuxtal utiaʼal k-ilik wa kʼaʼabéet k-utskíintik k-tuukul bey xan uláakʼ baʼaxoʼob ichil k-kuxtal. Tsʼoʼoleʼ tumen maʼ tu xáantal k-kuxtal yéetel maʼ k-ojel baʼax kʼiin ken kíimkoʼoneʼ, sáamsamal kʼaʼabéet k-ilik maas bisikba yéetel Jéeoba (Eclesiastés 9:11, 12; Santiago 4:13-15). Utiaʼal k-beetik lelaʼ, koʼox xakʼaltik jujumpʼéel baʼaloʼob jeʼel u yáantkoʼoneʼ.
11. ¿Baʼax tsʼoʼok a chʼaʼatuklik a beetik utiaʼal a xokik le Bibliaoʼ?
11 Le «palitsil chúukpajaʼan u [yóoloʼ]» ku yaʼaliktoʼon jach kʼaʼanan k-xokik le Biblia sáamsamaloʼ (Mateo 24:45). Maʼ xaaneʼ jeʼel u páajtal a chʼaʼatuklik a xokik tuláakal le Biblia ichil upʼéel jaʼab yéetel a jóoʼsik u súutukil utiaʼal a tuukul tiʼ le baʼax ku yaʼalikoʼ. Wa ka xokik tak kampʼéel capituloʼob sáamsamaleʼ, ichil upʼéel jaʼabeʼ yaan a xokik tuláakal le 1,189 capituloʼob ku taaskoʼ. U reyiloʼob Israeleʼ unaj kaʼach u xokkoʼob u Ley Jéeoba ichil tuláakal «u kʼiiniloʼob u kuxta[loʼob]», maʼ xaaneʼ Josueeʼ bey xan tu beetiloʼ (Deuteronomio 17:14-20; Josué 1:7, 8). Le ancianoʼob xanoʼ jach kʼaʼanan u xokikoʼob le Biblia sáamsamaloʼ. Lelaʼ yaan u yáantaj utiaʼal ka u tsʼaʼob «le maʼalob kaʼansajoʼ» (Tito 2:1).
12. ¿Baʼax unaj a beetik tumen jach tsʼoʼok u náatsʼal u noj kʼiinil Jéeoba?
12 A wojéeltik jach tsʼoʼok u náatsʼal u noj kʼiinil Jéeobaeʼ unaj u péekskech utiaʼal ka xiʼikech tiʼ tuláakal le muchʼtáambaloʼoboʼ yéetel a wilik a táakpajliʼ (Hebreob 10:24, 25). Lelaʼ yaan u yáantkech a maas maʼalobkíint bix a kʼaʼaytik le maʼalob péektsil utiaʼal a kaxtik le máaxoʼob uts u puksiʼikʼaloʼoboʼ (Beetaʼanoʼob 13:48). Maʼ xaaneʼ techeʼ a kʼáat maas áantaj xan teʼ múuchʼuliloʼ, jeʼex ka a wáant le máaxoʼob tsʼoʼok u chan yantal u jaʼabiloʼoboʼ yéetel ka a líiʼs u yóol le táankelmoʼoboʼ. A beetik lelaʼ jach yaan u taasiktech kiʼimak óolal.
Le bix a bisikaba yéetel u maasiloʼ
13. ¿Baʼax kʼáatchiʼiloʼob jeʼel u páajtal k-beetik utiaʼal k-ilik wa tsʼoʼok k-búukbesikba yéetel le túumben kuxtaloʼ?
13 Tumen tsʼoʼok u jach náatsʼal u noj kʼiinil Jéeobaeʼ, maʼ xaaneʼ techeʼ unaj a beetik tuláakal le ku páajtal utiaʼal a búukintik «le túumben [wíinik] beetaʼan jeʼel bix u kʼáat Jajal Dioseʼ yéetel ku chíikbesaʼal yéetel jumpʼéel kuxtal tu jaajil toj yéetel kiliʼich» (Efesoiloʼob 4:20-24). Jeʼex u bin u yantaltech le jatsʼuts modosoʼoboʼ, le máakoʼoboʼ yaan u yilkoʼob táan a nuʼuktik a kuxtal yéetel le kiliʼich muukʼoʼ (Galaciailoʼob 5:16, 22-25). ¿Jeʼel wa u páajtal a waʼalik upʼéel baʼax eʼesik, teech yéetel a familiaeʼ «tsʼoʼok a búukbeskabaʼex yéetel le túumben kuxtaloʼ»? (Colosailoʼob 3:9, 10.) Le sukuʼunoʼob yéetel u maasil máakoʼoboʼ, ¿u kʼaj óolechoʼob wa yoʼolal le utsil ka weʼesik tiʼ tuláakaloʼ? (Galaciailoʼob 6:10.) A xokik le Biblia sáamsamaloʼ yaan u yáantaj utiaʼal ka yanaktech le jatsʼuts modosoʼobaʼ yéetel yaan xan u yáantkech a páaʼt u noj kʼiinil Jéeoba.
14. Wa k-tsʼáaik cuenta kʼaʼabéet k-kanik controlartbaeʼ, ¿baʼaxten kʼaʼabéet k-kʼáatik u kiliʼich muukʼ Dios?
14¿Baʼax jeʼel u páajtal a beetik wa jach séeb a tsʼíikil yéetel ka tsʼáaik cuenta kʼaʼabéet a kanik a controlartabaeʼ? U kanik máak u controlartubaeʼ táakaʼan ichil le jatsʼuts modosoʼob ku taal tiʼ le kiliʼich muukʼoʼ. Le oʼolaleʼ maʼalob ka a kʼáat tiʼ Jéeoba ka u tsʼáatech u kiliʼich muukʼ. Kʼaʼajaktecheʼ Jesuseʼ tu yaʼalaj: «Kʼáatneneʼex, bíin tsʼaʼabakteʼex tumen Jajal Dios; kaxaneneʼex, bíin a nuptáanteʼex; kʼoopneneʼex, bíin jeʼebekteʼex jool naj. [...] Wa teʼex, kex kʼaakʼas máakeʼex, a wojel a tsʼaʼex maʼalob baʼaloʼob tiʼ a paalaleʼexeʼ, jach tu jaajil a Taataʼex yaan teʼ kaʼanoʼ bíin u tsʼáa le Kiliʼich [muukʼ] tiʼ le máaxoʼob kʼáatik tiʼeʼ» (Lucas 11:9-13).
15. ¿Baʼax ku páaʼtaʼal ka k-beet wa yantoʼon upʼéel talamil yéetel utúul sukuʼun?
15 Wa yantech upʼéel talamil yéetel utúul sukuʼuneʼ unaj a beetik tuláakal le ku páajtal utiaʼal a wutskíintik, lelaʼ yaan u yáantaj utiaʼal ka yanak jeetsʼelil teʼ múuchʼuliloʼ (Salmo 133:1-3). Utiaʼal lelaʼ jeʼel u páajtal a beetik jeʼex u yaʼalik Jesús tu Evangelioi Mateo 5:23, 24 wa Mateo 18:15-17. Wa tsʼoʼok u yáakʼabtal láayliʼ kʼuuxech yéetel a sukuʼuneʼ, maʼ a páaʼtik tak sáamal utiaʼal a wutskíintik le talamiloʼ. Yaan kʼiineʼ chéen kʼaʼabéet u saʼatsik máak baʼax beetaʼantiʼ. Pabloeʼ tu yaʼalaj: «Yanakteʼex yaakunaj yéetel chʼaʼa óotsilil ta baatsileʼex, yéetel saʼatsabaʼex ta baatsileʼex jeʼel bix Jajal Dios tu saʼasajeʼex tiʼ Cristoeʼ» (Efesoiloʼob 4:25, 26, 32).
16. Le máaxoʼob tsʼokaʼan u beeloʼoboʼ, ¿tiʼ baʼaxoʼob ichil u kuxtaloʼob unaj u paklan eʼeskoʼob «chʼaʼa óotsilil»?
16 Le máaxoʼob tsʼokaʼan u beeloʼoboʼ unaj u yeʼesikoʼob «chʼaʼa óotsilil» tu baatsiloʼob yéetel u saʼatsikubaʼob ken kʼaʼabéetchajak. Wa kʼaʼabéet a maas eʼesik yaabilaj yéetel chʼaʼa óotsilal tiʼ a núupeʼ, ilawil a beetik jeʼex u yaʼalik le Bibliaoʼ. ¿Yaan wa upʼéel baʼax ku yaʼalik 1 Corintoiloʼob 7:1-5 kʼaʼanan a tsʼoʼokbesik utiaʼal a biskaba maas maʼalob yéetel a núup yéetel utiaʼal maʼ a tusik yéetel yaanal? Le baʼax ku yaʼalik le tekstoaʼ letiʼe baʼax jach unaj u chʼaʼik en cuenta le tsʼokaʼan u beeloʼob utiaʼal u yeʼeskoʼob «chʼaʼa óotsilil» tu baatsiloʼoboʼ.
17. ¿Baʼaxoʼob unaj u beetik utúul máak wa tsʼoʼok u lúubul tiʼ upʼéel nojoch kʼeban?
17 ¿Baʼax unaj a beetik wa tsʼoʼok a lúubul tiʼ upʼéel nojoch kʼeban? Unaj a séeb kʼáatik áantaj tiʼ le ancianoʼoboʼ, tumen le payalchiʼob ku beetkoʼob yéetel le tsolnuʼukoʼob ku tsʼáaikoʼoboʼ jeʼel u yáantkechoʼob utiaʼal a kaʼa natsʼkaba tiʼ Dioseʼ (Santiago 5:13-16). Unaj xan a payalchiʼ tiʼ Jéeoba yéetel a weʼesik tsʼoʼok a arrepentir, wa maʼeʼ maʼ ken a wuʼuyaba maʼalobil yéetel mantatsʼ kan chiʼichnaktal. Davideʼ bey tu yuʼubiluba kaʼachoʼ; baʼaleʼ, jach tu yuʼububa maʼalob ka tsʼoʼok u yaʼalik tiʼ Jéeoba le baʼax tu beetoʼ. Letiʼeʼ tu yaʼalaj: «Kiʼ u yóol le máax saʼatsaʼan u siʼipiloʼoboʼ; le máax lukʼsaʼan tuláakal u kʼebanoʼoboʼ. Kiʼ u yóol le máax minaʼan mix baʼal kʼaas tu tuukuleʼ mix tu taʼakal u pool tumen [Jéeoba]» (Salmo 32:1-5). Jach beyoʼ, Jéeobaeʼ ku saʼatsik le máaxoʼob jach tu jaajil u yóoloʼob ku arrepentiroʼoboʼ (Salmo 103:8-14; Proverbios 28:13).
Maʼ a táakpajal tiʼ u baʼalubaʼob le yóokʼol kaabaʼ
18. ¿Bix unaj a wilik le yóokʼol kaaboʼ?
18 Maʼ xaaneʼ techeʼ ka tsʼíiboltik a kuxtal teʼ Paraíso u yaʼalmaj Dios u tsʼáaikoʼ. Baʼaleʼ ¿bix a wilik le baʼaxoʼob ku beetik le máaxoʼob u náachkuntmubaʼob tiʼ Diosoʼ? Satanás, «le máax ku tusbel way yóokʼol kaabeʼ» maʼ béeychaj u táabsik Jesucristoiʼ (Juan 12:31; 14:30). ¿Máasaʼ techeʼ maʼ a kʼáat xan ka u táabsech Satanás mix ka u táabsech u kʼasaʼan yóokʼol kaabiʼ? Le oʼolaleʼ jach maʼalob ka tuukulnakech tiʼ baʼax ku yaʼalik apóstol Juan: «Maʼ a yaabiltikeʼex yóokʼol kaab, mix le baʼaloʼob yaan yóokʼol kaaboʼ». Lelaʼ letiʼe baʼax jach unaj a beetkoʼ, tumen «le yóokʼol kaaboʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ; baʼaleʼ le máax ku beetik baʼax u kʼáat Jajal Dioseʼ ku pʼáatal utiaʼal kʼiinoʼob minaʼan u xuul» (1 Juan 2:15-17).
19. ¿Baʼaxoʼob kʼaʼabéet k-áantik u beet le táankelem paalaloʼoboʼ?
19 Taatatsileʼex, ¿táan wa a wáantik a paalaleʼex utiaʼal «maʼ u kʼóokʼolkintiku[baʼob] [...] yéetel u kʼaakʼas baʼaloʼobil le yóokʼol kaabaʼ»? (Santiago 1:27.) Jeʼex utúul máak ku kóolik tu yiknal le kay tsʼoʼok u chukikoʼ, Satanaseʼ u kʼáat xan u kóol a paalal tu yiknal, utiaʼal lelaʼ ku meyaj jejeláas baʼaloʼob tiʼ. Bejlaʼeʼ yaan yaʼab organizacionoʼob yéetel uláakʼ baʼaloʼob jeʼel u beetik u jach táakpajal le táankelem paalaloʼob tu yóokʼol kaab Satanasoʼ. Baʼaleʼ, toʼoneʼ tiaʼanoʼon ichil upʼéel organización maʼ kun xuʼulsbil tiʼ ken xuʼulsaʼak tiʼ le kʼasaʼan yóokʼol kaabaʼ. Le oʼolaleʼ tuláakloʼon unaj k-áantik le táankelem paalal utiaʼal ka u tsʼáa u yóoloʼob «mantatsʼ tiʼ u meeyjul Yuumtsil» Jéeobaoʼ (1 Corintoiloʼob 15:58). Le taatatsiloʼob xanoʼ, jach kʼaʼabéet u yáantik u paalaloʼob u chʼaʼatukult u beetkoʼob baʼaloʼob jeʼel u yáantkoʼob u páaʼtoʼob u noj kʼiinil Jéeobaeʼ. Chéen bey jeʼel u yantaltiʼob kiʼimak óolal yéetel u taaskoʼob nojbeʼenil tiʼ Diosoʼ.
Tuukulnen tiʼ le utsiloʼob ken u taas u noj kʼiinil Jéeobaoʼ
20. ¿Baʼaxten unaj k-tuukul mantatsʼ tiʼ le kuxtal minaʼan u xuuloʼ?
20 Wa mantatsʼ ka tuukul tiʼ le kuxtal minaʼan u xuul kun yantal teʼ Paraísooʼ, yaan u chúukpajal a wóol a páaʼt u taal u noj kʼiinil Jéeoba (Judas 20, 21). Maʼ xaaneʼ techeʼ jach a kʼáat kuxtal teʼ Paraíso tuʼux yaan a kaʼa táankelemtal yéetel yaan a kuxtal minaʼan u xuul utiaʼal a maas kʼaj óoltik yéetel a nojbeʼenkúuntik Jéeoba. U jaajileʼ, teʼ Paraísooʼ yaan u páajtal k-maas kaambal tiʼ Jéeoba, tumen bejlaʼeʼ «chéen jumpʼíit le baʼaloʼob tsʼoʼok k-uʼuyik» tiʼ letiʼoʼ (Job 26:14). ¿Máasaʼ jach jatsʼuts le kuxtal k-páaʼtikoʼ?
21, 22. Le máakoʼob kun kaʼa kuxkíintbiloʼoboʼ, ¿baʼax ken u tsikbaltoʼobtoʼon, yéetel baʼax xan ken k-kaʼanstiʼob?
21 Le máaxoʼob kun kaʼa kuxtaloʼob teʼ Paraísooʼ, yaan u páajtal u tsikbaltikoʼobtoʼon yaʼab baʼaloʼob maʼ k-kʼaj óol bejlaʼeʼ. Teʼeloʼ yaan u kaʼa kuxtal Enoquiʼ, letiʼeʼ yaan u tsoliktoʼon baʼax áant utiaʼal maʼ u chʼaʼik saajkil u yaʼal tiʼ le kʼasaʼan máakoʼob yaan u xuʼulsaʼaltiʼoboʼ (Judas 14, 15). Noeeʼ yaan u tsoliktoʼon tuláakal le talmiloʼob tu aktáantaj utiaʼal u beetik le arcaoʼ. Abraham yéetel Saraeʼ yaan u yaʼalikoʼobtoʼon bix tu yuʼubilubaʼob ka jóokʼoʼob Ur utiaʼal u binoʼob kajtal tiʼ pasel najoʼob. Estereʼ maʼ xaaneʼ yaan u tsikbaltiktoʼon jach bix úuchik u yáantik u kaajal yéetel bix úuchik u beetik maʼ u jóokʼol Amán yéetel baʼax u tukulmaj kaʼachi (Ester 7:1-6). Jonaseʼ maʼ xaaneʼ yaan u tsikbaltiktoʼon le óoxpʼéel kʼiin tu máansaj ichil u jobnel le nojoch kayoʼ; Juan Bautistaeʼ yaan u tsikbaltiktoʼon bix tu yuʼubiluba le ka tu tsʼáa u yokjaʼ Jesusoʼ (Lucas 3:21, 22; 7:28). ¡Chéen tukult bukaʼaj baʼaxoʼob ken k-kʼuchul ojéelte!
22 Ichil le Mil Jaʼaboʼob kun Reinar Cristooʼ, maʼ xaaneʼ techeʼ yaan a kaʼansik tiʼ le máaxoʼob kun kaʼa kuxtaloʼob jach «baʼax u kʼáat u yaʼal u kʼaj óoltaʼal [Diosoʼ]» (Proverbios 2:1-6). Bejlaʼeʼ jach ku kiʼimaktal k-óol ilik yaʼab máakoʼobeʼ táan u kʼaj óoltkoʼob Dios yéetel táan u tsʼáaikoʼob ichil u kuxtaloʼob le baʼax ku kankoʼoboʼ. Baʼaleʼ tukult bukaʼaj kun kiʼimaktal a wóol ken a wil Jéeobaeʼ táan u péeksik le máakoʼob tsʼoʼok u kaʼa kuxtaloʼob utiaʼal ka u kʼamoʼob yéetel kiʼimak óolal le baʼax ka kaʼansiktiʼoboʼ.
23. ¿Baʼax unaj k-chʼaʼatuklik beetik?
23 Le utsiloʼob tsʼoʼok u tsʼáaiktoʼon Diosoʼ jach táaj yaʼab, maʼ tu páajtal k-láaj kʼaʼajsikoʼob mix k-láaj naʼatikoʼob tumen kʼeban máakoʼon (Salmo 40:5). Jach k-tsʼáaik u nib óolalil tiʼ Jéeoba yoʼolal tuláakal le baʼaxoʼob u tsʼaamajtoʼon utiaʼal k-kʼaj óoltikoʼ (Isaías 48:17, 18). Le oʼolaleʼ, jeʼel baʼalak talamil ka k-aktáanteʼ, unaj u jach chúukpajal k-óol meyajt Dios le táan k-páaʼtik u kʼuchul u noj kʼiiniloʼ.
¿Baʼax jeʼel a núukikeʼ?
• ¿Baʼax le «u noj kʼiinil Yuumtsi[loʼ]»?
• ¿Bix jeʼel a weʼesik táan a páaʼtik u noj kʼiinil Jéeobaeʼ?
• Tumen jach natsʼaʼan u noj kʼiinil Jéeobaeʼ, ¿baʼax kʼeexiloʼob yaan u kʼaʼabéettal k-beetik?
• ¿Baʼax ka tsʼíiboltik a beetik ken tsʼoʼokok u noj kʼiinil Jéeoba?
[U tsolajil le oochel teʼ táan juʼun 14]
Jesuseʼ tu yeʼesaj táan u páaʼtik le talamiloʼob taal tu yóokʼoloʼ
[U tsolajil le oochel teʼ táan juʼun 17]
Yaan u taasiktoʼon kiʼimak óolal k-áantik u kʼaj óoltoʼob Jéeoba le máaxoʼob kun kaʼa kuxkíintbiloʼoboʼ