马太福音

2 希律王*在位期间，耶稣喺犹地亚嘅伯利恒出世。后嚟，有啲占星术士从东方*嚟到耶路撒冷。 2 佢哋问：“犹太人嘅王已经出咗世嘞。佢喺边度呀？我哋喺东方见到佢粒星，所以就嚟到呢度，想向佢下拜。” 3 听到佢哋噉样讲，希律王同埋全个耶路撒冷嘅人都觉得好不安。 4 希律王召集人民当中，所有祭司长同埋抄经士，问佢哋究竟嗰个基督*会喺边度出世。 5 佢哋同希律王讲：“系喺犹地亚嘅伯利恒出世㗎。先知都系噉样写㗎： 6 ‘犹大地区嘅伯利恒啊，喺犹大有长官统治嘅城当中，你绝对唔系最渺小嘅*，因为有一位统治者会嚟自你嗰度。佢会牧养我嘅子民以色列。’”

7 于是希律暗中召见嗰啲占星术士，问清楚佢哋嗰粒星出现嘅时间。 8 之后，希律就叫佢哋去伯利恒，佢话：“同我仔细噉揾个细路出嚟吖。你哋揾到之后，返嚟同我汇报，等我都可以去向佢下拜。” 9 听完王噉讲，占星术士就起程。睇吓！佢哋喺东方见到嘅嗰粒星一路带住佢哋，去到嗰个小朋友身处嘅地方。跟住，嗰粒星喺上面停低咗。 10 见粒星停低咗*，佢哋开心到不得了。 11 佢哋入咗间屋，见到个小朋友同埋佢嘅妈妈马利亚，就跪喺地下，向个小朋友下拜。占星术士打开宝箱，拎啲礼物出嚟送俾佢，有黄金、乳香，同埋没药。 12 不过，上帝喺梦入面警告佢哋，唔好返去见希律。佢哋就由另一条路返番去自己嘅地方。

13 占星术士走咗之后，耶和华*嘅天使喺约瑟嘅梦入面出现，同佢讲：“快啲走呀，带埋小朋友同埋佢妈妈去埃及啦，要留喺嗰度，直到我再俾指示你，因为希律要揾个小朋友出嚟，杀死佢呀。” 14 于是，约瑟就起程，漏夜带住小朋友同埋小朋友嘅妈妈去埃及。 15 佢就住喺嗰度，直到希律死咗为止。呢个应验咗耶和华*通过先知所讲嘅说话：“我呼召我嘅仔从埃及出嚟。”

16 希律见自己俾啲占星术士呃咗，就非常之嬲。于是，佢根据之前仔细查问占星术士而知道嘅时间，派人去伯利恒同埋伯利恒周围嘅地区，将所有两岁或以下嘅男仔，全部杀死。 17 呢个应验咗耶利米先知嘅说话： 18 “喺拉玛听到悲伤痛哭嘅声音，系拉结为佢嘅仔女痛哭，佢唔肯接受安慰，因为啲仔女都唔喺度喇。”

19 后嚟，希律死咗。当时，约瑟喺埃及。耶和华*嘅天使喺佢嘅梦入面出现。 20 天使话：“起程啦，带埋个小朋友同埋佢妈妈去以色列。因为之前想杀死个小朋友嘅嗰啲人都死咗嘞。” 21 于是，约瑟就起程，带埋佢哋去以色列。 22 不过，约瑟听讲阿基劳斯接替咗佢爸爸希律统治犹地亚，就唔敢去嗰度嘞。再加上，上帝喺梦入面警告过佢，佢就去咗加利利一带。 23 佢去咗一座城，叫做拿撒勒，住喺嗰度。噉就应验咗先知所讲嘅说话：“佢要叫做拿撒勒人*。”