马太福音

15 嗰时，有法利赛派嘅人同埋抄经士由耶路撒冷嚟揾耶稣，同佢讲： 2 “你啲门徒点解唔跟住前人嘅传统去做呀？例如话，佢哋食饭前冇洗手*㖞。”

3 耶稣答佢哋：“噉你哋点解守自己嘅传统，但系唔遵从上帝嘅诫命呢？ 4 例如上帝话，‘要孝敬*父母’；又话，‘对父母讲恶毒说话嘅，就要处死’。 5 但系你哋反而话：‘只要同父母讲，“我有嘅嘢，都献俾上帝做礼物嘞，供养唔到你嘞”， 6 噉就完全唔使孝敬父母*。’你哋就系因为自己嘅传统，令上帝嘅话语作废。 7 虚伪嘅人啊，关于你哋，以赛亚嘅预言真系讲得一啲都冇错。佢话： 8 ‘呢个民族口口声声话尊敬我，但系就冇将我放喺心入面。 9 佢哋继续崇拜我都系冇用㗎，因为佢哋将人定嘅规条当成教义去教人。’” 10 于是耶稣叫啲民众过嚟，同佢哋讲：“你哋要听，亦都要理解我讲嘅说话： 11 喺上帝眼中令人不洁嘅，唔系摆入口嘅嘢，而系讲出口嘅嘢。”

12 之后门徒嚟同耶稣讲：“你知唔知，啲法利赛派嘅人听到你讲嘅嘢就好反感*呀？” 13 耶稣答：“只要唔系我天父栽种嘅植物，都会被连根拔起。 14 由得佢哋啦。佢哋都系盲嘅，但系就去为人带路；盲嘅带住盲嘅行，两个都会跌落坑。” 15 彼得问耶稣：“头先嘅比喻究竟系咩意思呢？” 16 耶稣就话：“你哋都仲未明？ 17 唔通你哋唔知道，所有摆入口嘅嘢，食咗落肚，最后都会喺厕所排返出嚟咩？ 18 但系，口讲出嚟嘅嘢就系心入面嘅谂法，喺上帝眼中呢啲嘢先至令你不洁呀。 19 譬如话，各种各样邪恶嘅谂法就系喺心入面出嚟㗎，会导致凶杀、通奸、淫乱*、偷窃、作假见证同埋讲亵渎嘅说话。 20 喺上帝眼中做呢啲事嘅人系不洁嘅；唔洗手*食饭，反而唔会令人不洁。”

21 耶稣离开嗰度，去咗泰尔同埋西顿。 22 有个住喺嗰度嘅腓尼基女人去揾耶稣，大声恳求话：“主啊，大卫嘅子孙，可怜吓我啦！我个女俾邪灵附身，好痛苦呀！” 23 不过耶稣冇应佢。门徒就嚟同耶稣讲：“叫佢走啦，佢系噉喺后面跟住，大声嗌。” 24 耶稣回应话：“上帝净系派我去以色列民族嗰度揾迷失嘅绵羊啫。” 25 嗰个女人就嚟，跪喺耶稣面前话：“主啊，求你帮吓我啦！” 26 耶稣就答：“攞仔女嘅饼去俾啲狗仔食系唔啱㗎。” 27 嗰个女人话：“主啊，你讲得啱，不过狗仔都食主人枱上面跌落嚟嘅饼碎㗎！” 28 于是耶稣话：“你真系一个好有信心嘅女人呀。我就成全你嘅愿望啦。”佢嘅女就喺嗰一刻好返嘞。

29 耶稣离开嗰度，去到加利利海边。佢上咗一座山，喺嗰度坐低。 30 有一大班民众，带住跛嘅、伤残嘅、盲嘅、哑嘅，仲有好多其他病人去耶稣嗰度。佢哋将病人带去耶稣面前，耶稣就医好呢啲人。 31 民众见哑嘅讲到嘢，伤残嘅好返，跛嘅行到路，盲嘅睇到嘢，佢哋都好惊讶，大家就赞美*以色列嘅上帝。

32 耶稣叫啲门徒嚟，同佢哋讲：“我觉得呢班人好可怜，因为佢哋同我一齐喺呢度已经三日，而家冇嘢食嘞。我唔想佢哋饿住噉走，我惊佢哋行行吓会晕低。” 33 不过门徒嚟同耶稣讲：“呢度咁偏僻，我哋去边度揾咁多饼，俾咁多人食呀？” 34 耶稣问佢哋：“噉你哋有几多个饼呀？”佢哋话：“有七个，仲有几条鱼仔。” 35 耶稣就叫大家坐低， 36 然后拎起七个饼同埋几条鱼，多谢上帝之后就搣开，交俾门徒，门徒再分俾民众。 37 大家都食，而且食饱咗。佢哋收拾好净低嘅饼，装满咗七个箩。 38 食嘢嘅人，男人就有4000人，另外仲有女人同埋小朋友。 39 耶稣叫民众离开之后，就上咗船，去到马加丹地区。