马可福音

9 耶稣亦都同佢哋讲：“我可以好肯定噉话俾你哋知，呢度在场嘅人当中，有啲仲未经历死亡，就会见到上帝嘅王国统治*嘞。” 2 六日之后，耶稣净系带住彼得、雅各同约翰，一齐上咗一座好高嘅山。耶稣喺佢哋面前改变形貌， 3 佢件衫光洁雪白，闪耀发光，世上冇任何人*可以将件衫漂到咁白。 4 以利亚同摩西都喺佢哋面前出现，同耶稣倾偈。 5 彼得就同耶稣讲：“老师*，我哋喺度真系好呀！等我哋搭三个帐幕，一个俾你，一个俾摩西，一个俾以利亚吖。” 6 其实彼得根本唔知道讲咩先至好，因为佢哋都好惊。 7 之后有一嚿云出现，笼罩住佢哋。有声音喺云入面发出，话：“呢个系我嘅仔，系我深爱㗎。你哋要听从佢。” 8 突然之间，门徒望吓周围，发现除咗耶稣之外，就见唔到其他人嘞。

9 佢哋落山嗰阵，耶稣郑重吩咐佢哋，人子死而复生之前，唔好将佢哋见到嘅，话俾其他人知。 10 门徒将耶稣嘅吩咐紧记在心*，不过就喺度讨论耶稣死而复生究竟系咩意思。 11 佢哋问耶稣：“点解啲抄经士话以利亚一定会早过基督嚟嘅？” 12 耶稣话：“以利亚一定会嚟先，而且会准备好一切，既然系噉，圣经又点解话，人子一定会受好多苦，俾人鄙视呢？ 13 我话俾你哋知，以利亚其实已经嚟咗，不过就好似圣经所讲，啲人任意恶待佢。”

14 耶稣同三个门徒嚟到其他门徒嗰度，见到一大班人围住佢哋，抄经士同佢哋争论紧。 15 嗰班人一见到耶稣，就非常惊讶，跑过去同佢打招呼。 16 耶稣问：“你哋同佢哋争论紧啲乜嘢呢？” 17 人群当中有一个人回答：“老师，我带咗我个仔嚟见你，因为佢俾邪灵附身，邪灵令到佢哑咗呀， 18 每当邪灵袭击佢，都会将佢挞落地，佢就系噉呕白泡，磨牙，成身冇晒力。我试过揾你啲门徒赶邪灵出去，但系佢哋赶唔到呀。” 19 耶稣同民众讲：“呢一代冇信心嘅人啊，我仲要同你哋一齐到几时呢？我要容忍你哋几耐呢？带佢嚟我呢度啦。” 20 于是佢哋带个男仔去耶稣嗰度。邪灵一见到耶稣，就令个男仔猛烈抽搐，跌喺地碌嚟碌去，又呕白泡。 21 耶稣问佢爸爸：“佢有呢个情况几耐嘞？”个爸爸话：“佢自细就系噉㗎喇。 22 邪灵经常将佢掉入火，抛落水，想杀死佢。如果你做到啲乜嘢，就可怜我哋，帮吓我哋啦！” 23 耶稣同佢讲：“点解你要话‘如果你做到’呢？其实人有信心*嘅话，就冇嘢做唔到。” 24 个男仔嘅爸爸即刻大声话：“我有信心㗎！求你令我有更强嘅信心吖！*”

25 耶稣见有一班人跑紧过嚟，就斥责邪灵*，同佢讲：“你呢个令人又聋又哑嘅邪灵，我命令你，喺个男仔身上出嚟，唔好再入返去。” 26 邪灵就大声叫，令到嗰个男仔持续猛烈噉抽搐先至出嚟。之后个男仔好似死咗噉，大多数人都话：“佢死咗呀！” 27 耶稣捉住佢只手，扶佢起身，佢就企起身。 28 耶稣入屋之后，门徒私下问佢：“点解我哋赶唔走嗰个邪灵嘅？” 29 耶稣同佢哋讲：“呢一类邪灵，只有靠祷告先能够赶出去。”

30 佢哋离开嗰度，经过加利利，不过耶稣唔想俾人知道佢喺边度。 31 因为佢想教导门徒。佢同门徒讲：“人子会被出卖，落喺敌人嘅手，俾人杀死。不过，佢死咗之后三日就会复活。” 32 但系佢哋唔明白呢句话，亦都唔敢问耶稣。

33 佢哋去到迦百农，入咗一间屋，耶稣问佢哋：“你哋喺路上争论啲乜嘢呢？” 34 佢哋都冇出声，因为佢哋之前争论紧边个最大。 35 耶稣就坐低，叫十二使徒嚟，同佢哋讲：“边个想做第一，就要做所有人当中最尾嘅嗰个，要成为所有人嘅仆人。” 36 佢带咗个小朋友嚟，叫佢企喺门徒当中，用手搭住佢膊头，同佢哋讲： 37 “边个因为我嘅名而接待一个好似呢个小朋友噉样嘅人，就即系接待我；边个接待我，就唔单止系接待我，亦都系接待派我嚟嘅嗰一位。”

38 约翰同耶稣讲：“老师，我哋见到有个人用你嘅名驱逐邪灵，我哋咪去阻止佢啰，因为佢都冇跟随我哋。” 39 耶稣话：“唔好阻止佢，因为冇人会靠住我嘅名施行完奇迹，然后转个头又咒骂我。 40 唔反对我哋嘅，就系支持我哋嘞。 41 边个因为你哋属于基督就俾一杯水你哋饮，我可以好肯定噉同你哋讲，佢一定会得到奖赏*。 42 呢啲卑微嘅人顺从我，边个令佢哋其中一个失足跌倒*嘅话，噉佢不如挂块大磨石*喺自己条颈度，沉入大海好过嘞。

43 “如果你嘅一只手令你失足跌倒，就斩佢落嚟啦！你伤残但系得到生命，点都好过有两只手但系去到欣嫩谷*，去到唔会熄灭嘅火嗰度。 44 －－－* 45 如果你嘅一只脚令你失足跌倒，就斩佢落嚟啦！你跛脚但系得到生命，点都好过有两只脚但系被揼去欣嫩谷嗰度。 46 －－－* 47 如果你嘅一只眼令你失足跌倒，就揼咗佢啦！你得一只眼但系进入上帝嘅王国，点都好过有两只眼但系就被揼入欣嫩谷。 48 喺嗰度蛆虫系不死㗎，火系不灭㗎。

49 “火会降喺众人身上，好似洒盐一样。 50 盐本身系好㗎，但系如果盐唔再咸嘅话，点样令佢有返咸味呢？你哋当中要有盐，大家和睦相处。”