马可福音

15 天一光，嗰啲祭司长、长老同埋抄经士，亦即系成个公议会，就聚集埋一齐商量点样对付耶稣。佢哋绑起耶稣，押去交俾彼拉多。 2 彼拉多问佢：“你系咪犹太人嘅王呀？”耶稣回答：“系，我系*。” 3 嗰啲祭司长向佢作出好多指控。 4 彼拉多再一次问佢：“佢哋指控你咁多嘢，你冇嘢要回应咩？” 5 耶稣冇再答佢，彼拉多就好惊讶。

6 每逢节期，彼拉多都会释放一个囚犯，而呢个囚犯系民众要求释放㗎。 7 当时有个人叫做巴拉巴，同煽动叛乱嘅人韫埋一齐，呢啲人都喺叛乱期间杀过人。 8 民众按照惯例去彼拉多嗰度，向佢提出请求。 9 彼拉多回应佢哋话：“你哋想唔想我释放犹太人嘅王啊？” 10 其实彼拉多知道，祭司长系因为妒忌先至将耶稣交俾佢。 11 但系嗰啲祭司长煽动民众，要彼拉多释放巴拉巴而唔系耶稣。 12 彼拉多又再同佢哋讲：“噉你哋叫做犹太人嘅王嘅嗰个人，我应该点样处置佢呢？” 13 佢哋再次大声嗌，话：“喺木柱度处死佢！” 14 彼拉多再问佢哋：“点解呀？佢做咗啲咩坏事呢？”不过民众嗌得更加大声，佢哋话：“喺木柱度处死佢！” 15 彼拉多想讨好民众，就释放巴拉巴俾佢哋，又叫人鞭打耶稣，再将佢交俾士兵喺木柱度处决佢。

16 士兵将耶稣带入去总督府嘅庭院，又召集全体士兵。 17 佢哋披咗件紫色嘅袍喺耶稣身上，用荆棘整咗个王冠俾佢戴， 18 又好大声噉同佢讲：“犹太人嘅王啊，万岁！*” 19 佢哋仲用芦苇打佢嘅头，向佢吐口水，又跪低向佢下拜。 20 士兵嘲笑完佢，就同佢除低嗰件紫色嘅袍，着返原本嘅外衣，押佢去钉喺木柱度。 21 有个昔兰尼人叫做西门，佢系亚历山大同埋鲁孚嘅爸爸。佢咁啱喺城外嚟到，经过嗰度，士兵就迫佢服役，要佢孭起耶稣嘅苦刑柱。

22 佢哋带耶稣去一个地方，叫做各各他，翻译出嚟嘅意思系“骷髅头”。 23 佢哋将沟咗没药嘅酒*递俾耶稣，不过耶稣唔肯饮。 24 佢哋将佢钉喺木柱，仲抽签分佢嘅外衣，睇下各自得到乜嘢。 25 上昼9点*，佢哋将耶稣钉喺木柱， 26 又喺上面写明佢嘅罪状系：“犹太人嘅王。” 27 喺佢侧边木柱上面有两个强盗，一个喺佢右边，一个喺佢左边。 28 －－－* 29 路过嘅人就拧拧头，羞辱佢，话：“哼！你话要拆咗圣殿，三日之内再起返吖嘛， 30 噉你救吓自己，喺苦刑柱度落嚟啦！” 31 嗰啲祭司长同埋抄经士都系噉样嘲笑佢，话：“佢救到人哋，但系救唔到自己㖞！ 32 等以色列嘅王基督而家喺苦刑柱度落嚟，我哋见到咪信佢啰！”就连喺耶稣两边木柱上面嘅人都侮辱佢。

33 中午12点*，黑暗笼罩成个地区，直到下昼3点*。 34 下昼3点嘅时候，耶稣大声噉话：“以利，以利，拉马·萨巴克塔尼？”翻译出嚟，意思就系：“我嘅上帝，我嘅上帝，你点解离弃我？” 35 有啲企喺附近嘅人听到，就话：“听唔听到呀，佢嗌紧以利亚！” 36 有个人跑去攞海绵浸喺啲酸酒度，再绑喺芦苇秆上面，递俾耶稣饮，佢话：“我哋等吓！睇睇以利亚会唔会嚟救佢啰。” 37 耶稣大声呼喊，跟住就断咗气。 38 圣殿嘅帷幔*由上而下裂开两边。 39 有个军官企喺度面向住耶稣，见到佢断气嗰阵嘅情形，就话：“呢个人真系上帝嘅仔。”

40 嗰度仲有啲妇女离远睇住呢啲事发生，当中有末大拉人马利亚，同埋另一个马利亚，佢系较年轻嘅雅各同埋约西嘅妈妈，仲有撒罗米。 41 耶稣喺加利利嘅时候，佢哋一直跟随耶稣，服侍佢。另外仲有好多同耶稣一齐上去耶路撒冷嘅妇女在场。

42 由于当日系预备日，即系安息日嘅前一日，到咗傍晚， 43 亚利马太嘅约瑟鼓起勇气去见彼拉多，请求领取耶稣嘅遗体。佢系公议会嘅成员，好有名望，一直等待上帝嘅王国。 44 彼拉多想知道耶稣系咪真系死咗，就召见军官，问佢耶稣系咪已经死咗。 45 彼拉多向军官查证之后，就将尸体俾咗约瑟。 46 约瑟买咗上等细麻布，将耶稣嘅尸体攞落嚟之后，就用上等细麻布包好，安放喺一个由岩石凿出嚟嘅墓穴，然后将一块石头移过嚟，封住墓穴嘅门口。 47 末大拉人马利亚同埋约西嘅妈妈马利亚都一直望住安放耶稣遗体嘅地方。