马太福音
1 耶稣基督*系亚伯拉罕嘅子孙，大卫嘅子孙。以下系佢嘅族谱*：
2 亚伯拉罕系以撒嘅爸爸，
以撒系雅各嘅爸爸，
雅各系犹大同埋佢啲兄弟嘅爸爸，
3 犹大系法勒斯同谢拉嘅爸爸，
而妈妈就系塔玛。
法勒斯系希斯伦嘅爸爸，
希斯伦系兰嘅爸爸，
4 兰系亚米拿达嘅爸爸，
亚米拿达系拿顺嘅爸爸，
拿顺系撒门嘅爸爸，
5 撒门系波阿斯嘅爸爸，
而妈妈就系喇合，
波阿斯系俄备得嘅爸爸，
而妈妈就系路得。
俄备得系耶西嘅爸爸，
6 耶西系大卫王嘅爸爸。
大卫系所罗门嘅爸爸，
所罗门嘅妈妈系乌利亚嘅妻子*，
7 所罗门系罗波安嘅爸爸，
罗波安系亚比雅嘅爸爸，
亚比雅系亚撒嘅爸爸，
8 亚撒系约沙法嘅爸爸，
约沙法系约兰嘅爸爸，
约兰系乌西雅嘅爸爸*，
9 乌西雅系约坦嘅爸爸，
约坦系亚哈斯嘅爸爸，
亚哈斯系希西家嘅爸爸，
10 希西家系玛拿西嘅爸爸，
玛拿西系亚们嘅爸爸，
亚们系约西亚嘅爸爸，
耶哥尼雅同埋佢啲兄弟系喺犹太人被驱逐去
巴比伦嗰段时间出世㗎。
12 耶哥尼雅系撒拉铁嘅爸爸，
撒拉铁系喺犹太人被驱逐到巴比伦之后出世㗎；
撒拉铁系所罗巴伯嘅爸爸，
13 所罗巴伯系亚比育嘅爸爸，
亚比育系以利亚敬嘅爸爸，
以利亚敬系亚所嘅爸爸，
14 亚所系撒督嘅爸爸，
撒督系亚金嘅爸爸，
亚金系以律嘅爸爸，
15 以律系以利亚撒嘅爸爸，
以利亚撒系马但嘅爸爸，
马但系雅各嘅爸爸，
16 雅各系约瑟嘅爸爸，
约瑟就系马利亚嘅丈夫；
马利亚生咗耶稣。耶稣称为基督。
17 所以，由亚伯拉罕到大卫，一共14代；由大卫到犹太人被驱逐到巴比伦嘅嗰个时候，一共14代；由犹太人被驱逐到巴比伦嗰个时候到基督，一共14代。
18 跟住就系耶稣基督出世嘅经过。佢嘅妈妈马利亚同约瑟订咗婚。但系，喺佢哋结婚之前，神圣力量令马利亚怀孕。 19 不过，佢未婚夫*约瑟系个正义嘅人，所以佢唔想公开呢件事，令马利亚受到羞辱，于是就打算私下同佢解除婚约。 20 当佢仲好认真噉谂紧呢啲事嘅时候，耶和华*嘅天使就喺佢梦入面出现。天使话：“大卫嘅子孙约瑟，娶你嘅未婚妻*马利亚返屋企啦，唔使惊，因为系神圣力量令佢怀孕㗎。 21 佢会生一个仔，你要帮个仔改名做耶稣*，因为佢会拯救自己嘅子民摆脱佢哋嘅罪。” 22 其实发生呢啲事，系要应验耶和华*通过先知所讲嘅，就系： 23 “有个处女会怀孕，生一个仔。啲人会叫佢做以马内利。”呢个名翻译出嚟嘅意思系“上帝同我哋同在”。
24 约瑟瞓醒之后，就照住耶和华*嘅天使所讲嘅去做，接未婚妻*返屋企。 25 不过，喺马利亚生个仔出嚟之前，约瑟都冇同佢发生关系。约瑟帮个仔改名叫做耶稣。