马太福音

6 “你哋要小心，唔好为咗引人注意，而喺人哋面前做好事。如果唔系，你哋就唔会得到天父嘅奖赏。 2 所以，你接济穷人嘅时候，唔好咁张扬*，唔好学似嗰啲虚伪嘅人噉，喺会堂同街道噉样做，想人哋赞佢哋。我可以好肯定噉讲，佢哋嘅奖赏就系得咁多嘞。 3 你接济穷人嘅时候，唔好俾左手知道右手做紧啲乜嘢。 4 帮人嘅时候，唔好俾人睇到。噉你睇唔见嘅天父见到，就会奖赏你。

5 “你哋祷告嗰阵，唔好好似嗰啲虚伪嘅人噉。佢哋祷告嘅时候，钟意企喺会堂同埋大街嘅路口，想俾其他人睇到。我可以好肯定噉讲，佢哋嘅奖赏就系得咁多嘞。 6 祷告嗰阵，反而要走入自己间房，闩埋道门之后，私底下向你嘅天父祷告。噉你睇唔见嘅天父*见到，就会奖赏你。 7 祷告嗰阵，唔好好似外族人*噉样，讲嚟讲去都系同样嘅嘢。佢哋以为讲得多，神就会听。 8 所以，唔好好似佢哋噉，其实就算你哋仲未求，天父已经知道你哋需要啲乜嘢嘞。

9 “所以，你哋要噉样祷告：

“‘天上嘅爸爸，我哋祈求你嘅名受到尊重，被视为神圣*。 10 我哋祈求你嘅王国嚟到施行统治，求你嘅旨意喺地上实现，就好似喺天上一样。 11 求你赐我哋今日需要嘅食物俾我哋。 12 求你宽恕我哋嘅罪*，就好似我哋宽恕嗰啲得罪我哋嘅人*一样。 13 面对引诱嗰阵，求你帮助我哋唔好屈服，喺撒但*嗰度拯救我哋出嚟。’

14 “如果人哋做错咗，你哋宽恕佢哋，噉天父都会宽恕你哋； 15 但系如果人哋做错咗，你哋唔肯宽恕，噉天父都唔会宽恕你哋。

16 “你哋禁食嗰阵，唔好好似嗰啲虚伪嘅人噉，扮到好惨。佢哋揦埋口面*，系想俾人知道佢哋禁食紧。我可以好肯定噉讲，佢哋嘅奖赏就系得咁多嘞。 17 你禁食嗰阵，反而要搽油喺个头度*，亦都要洗面。 18 噉你禁食就唔系做俾人睇，而系俾天父*睇。你睇唔见嘅天父见到，就会奖赏你。

19 “你哋唔好再为自己喺地上储储埋埋咁多财宝喇，因为喺地上有虫蛀*，会生锈，亦都有贼入屋嚟偷。 20 相反，要为自己喺天上面累积财宝，喺天上冇虫蛀，唔会生锈，亦都唔会有贼去偷。 21 你嘅财宝喺边度，你嘅心亦都喺边度。

22 “眼睛系身体嘅灯。如果你目光专注喺一样嘢*，全身都会光明； 23 但系，如果你好贪心，目光放喺好多样嘢上面*，你全身都会黑暗，如果你里面嘅光本身就系暗嘅，噉就真系非常之暗嘞！

24 “冇人可以做两个主人嘅奴隶，佢一系憎恨*呢个，钟意嗰个；一系就忠于一个，睇唔起另一个。你哋唔能够做上帝嘅奴隶，又做财富嘅奴隶。

25 “所以我话俾你哋知，唔好再忧虑食啲乜嘢、饮啲乜嘢、着啲乜嘢。生命唔系比食物更加重要咩？身体唔系比衣着更加重要咩？ 26 细心观察天上嘅雀仔吖。佢哋冇撒种，冇收割，亦都冇储食物入去谷仓，不过你哋嘅天父都喂饱佢哋，你哋唔系比雀仔更加宝贵咩？ 27 忧虑可唔可以令你哋嘅寿命延长一啲*吖？ 28 另外，你哋又使乜忧虑着乜嘢呢？你哋要仔细观察野外嘅百合花，睇吓啲花点样生长。啲花唔使日做夜做，唔使纺织； 29 但系我话俾你哋知，就算喺所罗门嘅繁荣盛世，佢所着嘅都唔及呢啲花嘅其中一朵咁靓！ 30 喺野外嘅花草树木，今日仲喺度，听日就俾人攞咗去烧嘞，上帝都赐咁靓嘅衫俾佢哋，更何况你哋？点解要咁冇信心呢？ 31 所以，千祈唔好忧虑，问：‘我哋食乜嘢？’‘饮乜嘢？’‘着乜嘢呀？’ 32 呢一切都系世界嘅人*努力追求㗎。你哋需要呢啲嘢，你哋嘅天父系知道㗎。

33 “要一直将上帝嘅王国同埋上帝视为啱嘅事摆喺第一位，噉所有你哋需要嘅嘢，佢都会赐俾你哋。 34 所以，千祈唔好为听日忧虑，听日有听日嘅忧虑。每一日嘅难题已经够多嘞*。”