马太福音
5 耶稣见到一大班人，就上咗山。佢坐低之后，啲门徒嚟到佢身边， 2 然后，耶稣就开始教导大家，佢话：
3 “意识到自己需要上帝指引嘅人*系有福*嘅，因为天上嘅王国系佢哋㗎。
4 “悲伤难过嘅人系有福嘅，因为佢哋会得到安慰。
6 “好想正义得到伸张嘅人系有福嘅，因为呢个愿望会实现。
7 “表现怜悯嘅人系有福嘅，因为佢哋会得到怜悯。
10 “做上帝视为啱嘅事而受到迫害嘅人系有福嘅，因为天上嘅王国系佢哋㗎。
11 “你哋为咗我俾人侮辱，俾人迫害，俾人用各种邪恶嘅话中伤，噉就有福嘞。 12 以前啲人都系噉样迫害啲先知。所以要欢欣快乐，因为你哋喺天上会得到丰富嘅奖赏。
13 “你哋系世界嘅盐。如果盐冇咗咸味，仲可以变返咸咩？啲盐冇用嘅话，就唯有揼出去，任人践踏嘞。
14 “你哋系世界嘅光。一座起喺山上面嘅城，系隐藏唔到㗎。 15 啲人点完灯，会将佢放喺灯台上面，而唔会用个篮*冚住，噉成间屋嘅人都会照到。 16 你哋发出嘅光要俾人睇到，噉人哋见到你哋嘅好行为，就会荣耀你哋嘅天父。
17 “唔好以为我嚟系要废除法典*同埋先知所写嘅话。我嚟唔系要废除，而系要实现。 18 我可以好肯定噉话俾你哋知，就算天地都消逝，法典上面嘅一点一画*都绝对唔会消逝，反而会完全实现。 19 所以，边个违反咗诫命当中最细嗰条，又教人噉样做，就唔可以进入天上嘅王国*。而边个遵守呢啲诫命，又教人噉样做嘅，就可以进入天上嘅王国*。 20 我同你哋讲，如果你哋嘅正义只不过好似抄经士同埋法利赛派嘅噉，就绝对冇可能进入天上嘅王国。
21 “你哋知道古人都听过呢句说话，就系：‘唔可以杀人。边个杀咗人，就要被带到法庭受审。’ 22 但系我话俾你哋知：边个一路对弟兄怀恨在心，就要被带到法庭受审；边个用难听嘅说话侮辱弟兄，就要被带到最高法庭受审；边个闹人系‘冇用嘅白痴’，就会被揼入烈火熊熊嘅欣嫩谷*。
23 “所以，当你将礼物带去祭坛嘅时候，如果谂起有个弟兄对你不满， 24 就要将礼物留喺祭坛前面，去同个弟兄讲和先，返嚟先至献礼物。
25 “如果有人要告你，你同佢去到法庭之前，就要尽快解决呢件事，唔系嘅话，佢就可能将你交俾审判官，审判官又将你交俾法庭嘅差役，噉你就要坐监嘞。 26 我话俾你知，你一日未还清最后一分钱*，就绝对唔可以离开监狱。
27 “你哋以前都听过‘唔可以通奸。’ 28 不过我话俾你哋知，边个一直眼甘甘望住一个女人，对佢有非分之想，喺心里面就已经同人通奸嘞。 29 如果你嘅右眼令你失足跌倒，就挖出嚟揼咗佢。你冇咗只眼，都好过成个人被揼入欣嫩谷*。 30 如果你嘅右手令你失足跌倒，就斩落嚟揼咗佢。你冇咗只手，点都好过成个人被揼入欣嫩谷。
31 “你哋亦都听过，‘边个同太太离婚，就要俾离婚嘅文件佢。’ 32 不过我话俾你哋知：如果有人要同太太离婚，但系唔系因为太太淫乱*嘅话，就可能导致太太通奸；边个娶咗呢个离婚嘅女人，就系通奸。
33 “你哋亦都知道，古人听过呢句说话，‘唔可以违背誓言，你向耶和华*发咗誓就要去做。’ 34 不过我话俾你哋知，根本就唔好发誓。唔好向天发誓，因为嗰度系上帝嘅宝座； 35 唔好向地发誓，因为呢个系佢嘅脚凳；唔好指向耶路撒冷发誓，因为嗰个系伟大君王嘅城； 36 亦都唔好指向自己嘅头发誓，因为你冇办法令一条头发变白或者变黑。 37 你哋讲说话，系就话‘系’，唔系就话‘唔系’，再讲啲咩多余嘅说话，就系受撒但*影响嘞。
38 “你哋都听过呢句说话，‘以眼还眼，以牙还牙。’ 39 不过我话俾你哋知，如果人哋伤害你，唔好同佢对抗。有人打你右边面，就俾埋左边面佢打。 40 有人想告你，想攞走你件内袍，你就连外袍都俾埋佢。 41 掌权嘅人迫你服役，要你行一里*路，你就同佢行够两里。 42 有人求你，就俾佢啦；有人想问你借钱*，你唔好走咗去。
43 “你哋都听过呢句话，‘要爱你身边嘅人*，憎恨你嘅敌人。’ 44 不过，我话俾你哋知，要爱*你哋嘅敌人，为迫害你哋嘅人祷告*。 45 噉样，你哋就表明自己系天父嘅仔女*；因为佢令太阳照耀好人，亦都照耀坏人，落雨俾好人，亦都俾坏人。 46 如果你哋净系爱嗰啲爱你哋嘅人，会得到咩奖赏呢？收税人都系噉做㗎。 47 你哋净系同自己嘅弟兄打招呼，有咩咁好呢？外族人*都系噉样做㗎。 48 所以，你哋要完美*，就好似你哋嘅天父系完美嘅一样。”