马太福音

3 后嚟，施浸者约翰去到犹地亚嘅旷野传道， 2 佢话：“你哋要悔改，因为天上嘅王国就快到嘞。” 3 其实，约翰就系以赛亚先知喺预言入面提到嘅嗰一位。以赛亚话：“喺旷野有人大声话：‘要为耶和华*预备道路，喺佢前面为佢开路！’” 4 约翰着住骆驼毛造嘅衫，缆住皮带，佢食嘅系蝗虫同埋野生蜂蜜。 5 耶路撒冷、全犹地亚同埋约旦河周围地区嘅人都嚟揾佢， 6 喺约旦河接受佢施行嘅浸礼*，公开承认自己嘅罪。

7 有好多法利赛派*同埋撒都该派*嘅人嚟到佢施浸嘅地方。约翰见到佢哋，就对佢哋话：“你哋呢啲毒蛇嘅子孙！上帝嘅愤怒就快到嘞！边个同你哋讲你哋可以逃避到㗎？ 8 所以，你哋嘅行为*应该表明你哋真心悔改。 9 唔好自以为是，心谂‘亚伯拉罕系我哋嘅祖先*呀。’我同你哋讲，上帝其实可以令呢啲石头生亚伯拉罕啲子孙出嚟呀。 10 斧头已经放咗喺树下面嘞。所有唔结好果实嘅树都会斩落嚟，揼入火里面。 11 但系由于你哋悔改，我用水为你哋施浸。至于喺我之后嚟嘅嗰一位，佢嘅能力比我大，我连帮佢除鞋都唔配。佢会用神圣力量同埋火为你哋施浸。 12 佢拎住用嚟扬起啲谷嘅铲，佢会将脱谷场清理干净，将小麦收入谷仓，然后用永远都唔会熄嘅火将啲谷糠烧干烧净。”

13 后嚟，耶稣由加利利去到约旦河揾约翰，请约翰为佢施浸。 14 不过约翰想阻止佢，就话：“应该我嚟揾你帮我施浸先系吖，点会系你嚟揾我呢？” 15 耶稣同佢讲：“呢一次你就帮我啦，上帝想我哋去做嘅嘢，我哋就应该去做。”于是，约翰就冇再阻止耶稣嘞。 16 耶稣受完浸，就即刻上水嘞。睇吓！个天打开咗，佢*见到上帝嘅神圣力量*好似只鸽噉降喺耶稣身上。 17 就喺呢个时候，天上面有把声噉样讲：“呢个系我深爱嘅仔，系我认可*嘅。”