马太福音

12 有一次，耶稣喺安息日经过麦田。佢嘅门徒肚饿嘞，就摘啲麦穗嚟食。 2 法利赛派嘅人见到，就同佢讲：“你睇！你啲门徒喺安息日噉样做，唔合法㗎㖞！” 3 耶稣同佢哋讲：“有次大卫同跟随佢嘅人觉得肚饿，跟住佢点样做，你哋冇读过咩？ 4 佢入咗上帝嘅居所*，佢同啲手下都食咗呈献嘅饼*。按照法律，呢种饼佢哋系唔可以食㗎，净系得祭司先可以食。 5 另外，你哋喺法典冇读过咩？安息日嘅时候，祭司喺圣殿工作都系冇罪㗎噃。 6 但系我话俾你哋知，有个比圣殿更重要嘅人喺呢度。 7 ‘我想人表现怜悯，而唔系献祭俾我。’如果你哋明白呢句话嘅意思，就唔会定冇罪嘅人有罪嘞， 8 因为人子就系安息日嘅主。”

9 耶稣离开嗰度，入咗会堂。 10 嗰度有个人，佢只手萎缩*咗。有啲人想揾耶稣嘅把柄指控佢，就问佢：“喺安息日医病合唔合法㗎？” 11 耶稣同佢哋讲：“如果你唯一嘅绵羊喺安息日跌咗落个坑度，你哋有边个唔会去捉住佢，拉返佢上嚟呢？ 12 人贵重过绵羊好多！所以，喺安息日做好事系合法㗎。” 13 于是耶稣同嗰个人讲：“伸只手出嚟吖。”佢一伸只手出嚟，只手就即刻好返，咩事都冇嘞。 14 法利赛派嘅人离开嗰度，密谋要对付耶稣，杀死佢。 15 耶稣知道咗，就离开嗰个地方。有好多人跟住佢，耶稣医好晒当中患病嘅人。 16 不过，佢郑重噉吩咐佢哋，唔好将佢嘅事周围同人讲。 17 噉系要实现以赛亚先知讲过嘅话，佢话：

18 “睇吓！呢个系我拣选嘅仆人，系我深爱嘅，系我认可嘅！我会将我嘅神圣力量降喺佢身上，佢会令世界嘅人清楚知道乜嘢系公正。 19 佢唔会同人争拗，唔会大吵大闹，冇人会喺大街嗰度听到佢嘅声音。 20 压伤嘅芦苇，佢唔会折断，就快熄嘅灯火，佢唔会整熄。佢会一直噉样做，直到佢为全世界带嚟公正。 21 佢嘅名会为世界嘅人带嚟希望。”

22 嗰个时候，有人带一个受邪灵操纵、又盲又哑嘅人嚟见耶稣。耶稣医好咗佢，令呢个哑嘅人可以讲到嘢，睇到嘢。 23 所有人都好惊讶，就话：“唔通呢个人就系大卫嘅子孙*？” 24 法利赛派嘅人听到就话：“呢个人系靠住邪灵嘅首领魔鬼*去驱逐邪灵啫。” 25 耶稣知道佢哋嘅谂法，就同佢哋讲：“一个国家分裂内讧，就会灭亡；一个城市、一个家庭分裂内讧，就冇办法存留嘞。 26 同样，如果撒但驱逐撒但，即系自己分裂内讧，佢嘅国家又点能够继续存在呢？ 27 再讲吖，如果我驱逐邪灵系靠住魔鬼*，噉你哋嘅门徒驱逐邪灵又系靠住边个呀？所以，你哋嘅门徒会证明你哋系错嘅*。 28 相反，我驱逐邪灵如果系靠住上帝嘅神圣力量，噉即系话上帝嘅王国喺你哋冇谂到嘅时候已经嚟到嘞。 29 一个人想打劫一个强壮嘅人，如果唔绑起佢先，又点会入到佢屋企，抢得走佢啲财物呢？ 30 唔企喺我呢边嘅，即系反对我；唔同我一齐将人聚集到我呢度嘅，就系将人驱散嘞。

31 “所以我话俾你哋知，人犯乜嘢罪都好，亵渎乜嘢都好，都会得到宽恕，但系，亵渎神圣力量嘅，就唔会得到宽恕。 32 譬如话，边个讲说话得罪人子，都会得到宽恕；但系边个讲说话得罪神圣力量，喺而家定系将来嘅制度*，都唔会得到宽恕。

33 “你哋一系种好嘅树结好嘅果实，一系种坏嘅树结坏嘅果实。睇啲果实就知道棵树系点样嘞。 34 毒蛇嘅子孙，你哋系邪恶㗎，点会讲得出良善嘅说话吖？心入面充满啲乜嘢，口就会讲出嚟嘞。 35 良善嘅人内心充满良善，就讲出良善嘅话；邪恶嘅人内心充满邪恶，就讲出邪恶嘅话。 36 我话俾你哋知，喺审判日，人要为自己讲过每一句有害无益嘅话负责。 37 凭住你讲嘅说话上帝会将你定为正义或者有罪。”

38 嗰时有啲抄经士同埋法利赛派嘅人话：“老师，俾个神迹*我哋睇吓吖。” 39 耶稣回答佢哋话：“呢一代邪恶不忠*嘅人成日都想睇神迹*，但系除咗先知约拿嘅神迹，佢哋就唔会睇到其他神迹嘞。 40 正如约拿喺大鱼嘅肚入面三日三夜，人子都会喺坟墓里面三日三夜。 41 审判嘅时候，尼尼微人会同呢一代人一齐复活，而且会表明呢一代人有罪，因为尼尼微人听咗约拿传讲嘅信息就悔改。但系而家，有个比约拿更重要嘅人喺度。 42 审判嘅时候，南方女王会同呢一代人一齐复活，而且会表明呢一代人有罪，因为佢曾经从遥远嘅地方*嚟到，为咗听所罗门嘅智慧之言。但系而家，有个比所罗门更重要嘅人喺度。

43 “有个邪灵*从一个人身上出嚟，去匀晒干旱嘅地方，想揾个地方休息，但系揾唔到。 44 于是佢话：‘我要搬返去之前嗰间屋。’佢去到之后，发现入面打扫干净，装饰好晒，不过丢空咗， 45 就带埋七个比自己更邪恶嘅灵体入去，住喺里面。噉最终呢个人嘅情况就比之前更加差嘞。呢一代邪恶嘅人都会系噉。”

46 耶稣同啲民众讲紧嘢嘅时候，佢嘅妈妈同埋啲细佬企喺出面，想同佢讲啲嘢。 47 有人同耶稣讲：“<u8BF6>！你嘅妈妈同埋啲细佬企喺出面，有嘢想同你讲㖞。” 48 佢就同嗰个人讲：“边个系我嘅妈妈，系我啲兄弟呢？” 49 佢向门徒伸出佢嘅手话：“睇吓！佢哋就系我啲兄弟、我嘅妈妈嘞！ 50 边个照我天父嘅旨意去做，边个就系我嘅兄弟、姊妹、妈妈。”