马太福音

9 耶稣上咗船，去到对面岸，入咗去自己嘅城。 2 当时有人用担架抬住一个瘫痪嘅人去见耶稣。耶稣见到佢哋咁有信心，就同嗰个瘫痪嘅人讲：“放心啦，阿仔！你嘅罪赦免嘞。” 3 有啲抄经士心谂：“呢个人讲埋晒啲亵渎嘅说话。” 4 耶稣知道佢哋谂紧啲乜嘢，就话：“点解你哋心里面谂住啲咁邪恶嘅嘢呢？ 5 其实讲‘你嘅罪赦免嘞’系好容易㗎。但系有边个可以同呢个人讲‘起身，行啦’，然后佢真系可以起身行到路呢？ 6 不过，为咗令你哋知道人子喺地上有权赦罪——”耶稣就同瘫痪嘅人讲：“起身，拎起你嘅担架，返屋企啦。” 7 嗰个人就起身，返屋企嘞。 8 民众见到呢件事就非常惊叹，赞美*上帝，因为佢俾咗噉样嘅权力人。

9 耶稣离开嗰度之后，喺路上佢见到一个人坐喺收税嘅地方，佢叫做马太，耶稣同佢讲：“嚟跟随我吖。”马太就企起身，跟随佢嘞。 10 后嚟，耶稣喺马太嘅屋企食饭嗰阵，有好多收税人同埋罪人嚟到，同耶稣仲有佢嘅门徒一齐食饭。 11 法利赛派嘅人见到，就同耶稣嘅门徒讲：“乜你哋嘅老师同埋啲收税人仲有罪人一齐食饭㗎？” 12 耶稣听到就话：“健康嘅人唔需要医生，病咗嘅人就需要嘞。 13 经文话‘我想人表现怜悯，而唔系献祭俾我。’你哋谂吓呢句说话嘅意思啦。因为我嚟，唔系想叫啲正义嘅人*悔改，而系想罪人悔改。”

14 约翰嘅门徒嚟问耶稣：“点解我哋同法利赛派嘅人有禁食嘅习惯，但系你嘅门徒就唔禁食呢？” 15 耶稣就同佢哋讲：“当新郎仲同啲朋友一齐嘅时候，新郎嘅朋友冇理由哀悼吖，系咪？但系，时候会到，新郎会俾人带走，离开佢哋，噉到时佢哋就会禁食嘞。 16 冇人会将新嘅布补喺旧嘅衫上面，因为新布一缩水，就会扯烂件衫，噉反而烂得更加犀利， 17 亦都冇人会将新酒装落旧皮袋里面，如果噉做，就会挣爆个皮袋，噉唔单止酒漏出嚟，连个皮袋都唔用得嘞。所以，啲人会将新酒装落去新皮袋入面，噉两样都可以好好保存。”

18 耶稣仲同佢哋讲紧嘢嘅时候，有个会堂主管嚟到，向耶稣下拜，话：“睇怕我个女而家已经死咗。但系，你嚟我屋企，将手放喺佢身上面，佢就会有返生命㗎喇。”

19 于是耶稣就起身跟佢走，门徒亦都跟住去。 20 有个患咗流血病症*12年嘅女人，行去耶稣背后，掂一掂佢外衣嘅穗边。 21 嗰个女人一直喺度谂：“只要我掂吓佢嘅外衣，就可以好返㗎喇。” 22 耶稣拧转身见到佢，就同佢讲：“放心啦，阿女！你嘅信心令你好返。”嗰个时候，个女人就好返嘞。

23 耶稣去到会堂主管嘅屋企，见到有人吹奏紧哀悼嘅音乐*，又有一大班人喊得好大声， 24 耶稣话：“你哋出去啦，个细路女冇死到，只系瞓着咗啫。”啲人听到就笑佢。 25 大家出晒去之后，耶稣就入去，捉住个女仔只手，个女仔就起身嘞。 26 于是，呢个消息传遍嗰一带。

27 耶稣离开嗰度，有两个盲人跟住佢，大声嗌：“大卫嘅子孙，可怜吓我哋吖！” 28 跟住，耶稣入咗一间屋，嗰两个盲人行到佢面前，耶稣问佢哋：“你哋相唔相信我可以医返好你哋呀？”佢哋答：“主啊，我哋信。” 29 于是耶稣摸一摸佢哋对眼，话：“你哋咁有信心，就成全你哋啦。” 30 佢哋就睇到嘢嘞。耶稣郑重噉吩咐佢哋，话：“唔好话俾任何人知呢件事。” 31 但系佢哋出去之后，就将耶稣做嘅事喺嗰一带传开去。

32 佢哋准备走嘅时候，有人将一个哑嘅人带去耶稣面前，呢个人俾邪灵操纵。 33 耶稣将邪灵由佢身上赶出嚟，嗰个人就讲到嘢嘞。周围啲人都好惊讶，话：“喺以色列从来都冇见过噉样嘅事呀。” 34 不过，法利赛派嘅人就话：“佢靠住邪灵嘅首领，先至驱逐到邪灵啫。”

35 耶稣出发周游各城各村，喺会堂入面教导人，传讲王国嘅好消息，医好各种各样嘅病症。 36 耶稣见到啲民众，就好同情佢哋，因为佢哋俾人剥削，无依无靠，好似冇牧人嘅绵羊一样*。 37 于是耶稣同啲门徒讲：“要收割嘅农作物*真系好多，但系工人实在太少嘞。 38 所以，你哋要恳求农作物嘅主人，派工人出去收割佢嘅农作物。”