马太福音

25 “到时，天上嘅王国就好似有十个处女，拎住灯出去迎接新郎。 2 佢哋五个系愚蠢嘅，五个系睿智嘅。 3 愚蠢嘅拎住灯，但系冇带额外嘅油； 4 而睿智嘅唔单止拎住灯，仲用器皿装住额外嘅油带埋去。 5 新郎迟迟都未到*，佢哋越嚟越眼瞓，最后瞓着咗。 6 去到半夜，有人大声话：‘新郎到喇！快啲出嚟迎接佢啦。’ 7 于是所有处女都起身，准备佢哋嘅灯。 8 愚蠢嘅同睿智嘅讲：‘分啲油俾我哋吖，我哋嘅灯就快熄喇。’ 9 睿智嘅处女话：‘睇怕啲油唔够我哋所有人一齐用㖞。不如你哋自己出去买啦。’ 10 就喺佢哋去买油嘅时候，新郎嚟到，嗰啲做好准备嘅处女同佢入去参加婚宴，门就闩埋嘞。 11 后嚟，去咗买油嗰五个处女返嚟嘞，佢哋话：‘先生，先生，开门俾我哋吖！’ 12 新郎答：‘我老实同你哋讲，我唔识你哋。’

13 “所以，要不断守望，因为你哋唔知几时系嗰个日子、嗰个时刻。

14 “天上嘅王国又好似一个人就快出国，就叫啲奴隶嚟，交自己嘅财物俾佢哋管理。 15 佢按照奴隶各自嘅才能分配银元，一个俾咗五袋银元*，一个俾咗两袋银元*，一个俾咗一袋银元*，然后就出国嘞。 16 攞咗五袋银元嘅，即刻用呢笔钱去做生意，赚多咗五袋。 17 而攞咗两袋银元嘅，亦都赚多咗两袋。 18 不过攞咗一袋银元嘅，就出去喺地下挖咗个窿，收埋主人呢啲钱。

19 “过咗好耐，奴隶嘅主人嚟同佢哋结算账目。 20 攞咗五袋银元嘅奴隶，带埋赚咗嗰五袋行上前，佢话：‘主人，你交咗五袋银元俾我管理，你睇，我赚多咗五袋呀。’ 21 主人同佢讲：‘做得好呀！你系又良善又忠信嘅奴隶，我交一啲事俾你处理，你表现忠信。我要委派你管理更多嘅事。嚟分享你主人嘅喜悦啦。’ 22 跟住，攞咗两袋银元嘅奴隶行上前话：‘主人，你交咗两袋银元俾我管理，你睇，我赚多咗两袋呀。’ 23 主人同佢讲：‘做得好呀！你系又良善又忠信嘅奴隶，我交一啲事俾你处理，你表现忠信。我要委派你管理更多嘅事。嚟分享你主人嘅喜悦啦。’

24 “最后，攞咗一袋银元嘅奴隶上前话：‘主人，我知道你系个要求好高嘅人，冇撒种嘅地方都要收割，冇扬谷都要收集谷物。 25 所以我好惊呀，于是就将你啲银元埋喺地底啰。嗱，还返晒俾你嘞。’ 26 主人就同佢讲：‘你呢个又邪恶又懒散嘅奴隶，你头先话我喺冇撒种嘅地方都要收割，冇扬谷都要收集谷物，系咪？ 27 噉点解你唔将我啲钱存入银行，等我返嚟嗰阵，我可以连本带利噉收返呢？’

28 “跟住，主人话：‘你哋拎走佢啲银元，俾埋嗰个有十袋银元嘅奴隶啦。 29 因为边个有，就要俾多啲佢，令佢丰足有余；边个冇，就连佢有嘅，都要攞走埋。 30 将呢个冇用嘅奴隶揼去出面嘅黑暗之中啦。喺嗰度，佢会痛哭流泪，咬牙切齿。’

31 “人子带住佢嘅荣耀同所有天使一齐嚟到嗰阵，会坐喺佢荣耀嘅宝座。 32 所有国族嘅人都会被聚集到佢面前，佢会分开佢哋，就好似牧人分开绵羊山羊一样。 33 佢会将绵羊放喺右边，山羊放喺左边。

34 “到时王会同右边嘅讲：‘你哋呢啲得到我爸爸赐福嘅，嚟领受由世界奠基以嚟为你哋准备好嘅王国啦。 35 因为我肚饿，你哋俾嘢我食；我口渴，你哋俾嘢我饮；我流落异乡*，你哋款待我； 36 我唔够衫着*，你哋俾衫我着；我病咗，你哋照顾我；我喺监狱入面，你哋嚟探我。’ 37 到时，呢啲正义嘅人会同佢讲：‘主啊，我哋几时有见你肚饿，就俾嘢你食；见你口渴，就俾嘢你饮呢？ 38 我哋几时有见你流落异乡，就款待你，见你唔够衫着，就俾衫你着呢？ 39 我哋几时有见你病咗，或者喺监狱入面，就去探你呢？’ 40 王会回答佢哋：‘我好肯定噉话俾你哋知，只要你哋善待我呢啲弟兄，就算系最渺小嘅一个，都等于善待我。’

41 “到时佢会同左边嘅讲：‘走开！你哋呢啲受咀咒嘅，去到永恒嘅火*嗰度啦，嗰度系为魔鬼同埋佢嘅天使准备好㗎。 42 因为我肚饿，你哋冇俾嘢我食；我口渴，你哋冇俾嘢我饮； 43 我流落异乡，你哋冇款待我；我唔够衫着，你哋冇俾衫我着；我病咗，喺监狱入面，你哋冇照顾我。’ 44 到时，佢哋亦都会话：‘主啊，我哋几时有见你肚饿，口渴，流落异乡，唔够衫着，病咗，或者喺监狱入面，而冇帮你呢？’ 45 到时王会回答佢哋：‘我好肯定噉同你哋讲，你哋冇善待我呢啲弟兄，包括最渺小嘅一个，就等于冇善待我。’ 46 呢啲人会遭受永远嘅毁灭*，而正义嘅人就会得到永远嘅生命。”