马太福音

13 嗰一日，耶稣喺间屋出咗嚟，坐咗喺海边。 2 有一大班人去到耶稣嗰度聚集埋一齐，耶稣就上船坐低，民众全部都企喺海滩。 3 耶稣用比喻教导佢哋好多嘢，佢话：“有一个农夫出去撒种， 4 撒种嘅时候，有啲种子跌咗喺路边，结果俾啲雀仔食咗。 5 有啲跌咗喺泥土唔多嘅岩石地，因为土壤唔系好深，种子就即刻生长。 6 但系太阳一出嚟，幼苗就晒干咗，加上冇扎根*，就枯萎嘞。 7 另外有啲跌咗落荆棘度，荆棘一长高，就阻碍幼苗生长。 8 仲有啲种子撒咗喺好嘅土壤上面，就结出果实，有啲100倍，有啲60倍，有啲30倍。 9 有耳仔嘅，就应该留心听。”

10 门徒嚟问耶稣：“点解你教佢哋嗰阵要用比喻嘅？” 11 耶稣就话：“天上王国嘅神圣秘密，净系你哋先可以明白，但系佢哋就唔明白，因为佢哋冇得到帮助。 12 边个有嘅，就要俾多啲佢，令佢绰绰有余；边个冇嘅，就连佢有嘅，都要攞走埋。 13 佢哋睇咗等于冇睇，听咗等于冇听，亦都唔理解，所以我教导佢哋嗰阵就用比喻嘞。 14 以赛亚嘅预言喺佢哋身上应验紧，预言话：‘你哋听系听咗，睇系睇咗，但系完全唔理解。 15 呢啲人嘅心已经麻木，耳仔听到都冇反应，仲合埋对眼，费事对眼睇到，耳仔听到，内心理解，回头改过，就俾我医返好。’

16 “但系，你哋系有福*㗎，因为你哋对眼睇到，耳仔听到。 17 我可以好肯定噉同你哋讲，好多先知同埋正义嘅人，好想见到你哋而家见到嘅嘢，但系都见唔到，好想听到你哋而家听到嘅嘢，但系都听唔到。

18 “你哋再听吓农夫撒种呢个比喻嘅意思吖。 19 有啲种子跌咗喺路边，就系指有啲人听咗王国嘅信息*但系唔理解，结果撒但*嚟到就将佢心入面嘅种子抢走。 20 有啲种子跌咗喺岩石地，就系指有啲人听咗上帝嘅话语，即刻开开心心噉接受。 21 但系，佢里面冇根，接受都只不过系暂时嘅啫，佢因为上帝嘅话语而遭遇患难迫害，就即刻放弃。 22 有啲种子跌咗喺荆棘入面，就系指人听到上帝嘅话语，不过而家呢个制度*嘅忧虑，仲有财富嘅诱惑*，阻碍咗话语生长，佢就结唔出果实嘞。 23 有啲种子跌咗喺好嘅土壤上面，就系指人听到上帝嘅话语，亦都理解，真系结出果实，有啲得到100倍嘅收成，有啲60倍，有啲30倍。”

24 耶稣同佢哋讲咗另一个比喻，佢话：“天上嘅王国就好似一个人将好嘅种子撒喺田入面。 25 大家瞓觉嘅时候，佢嘅敌人嚟到，喺小麦嘅田入面撒咗啲毒麦嘅种子，然后走咗去。 26 到幼苗生长，麦穗生出嚟，毒麦亦都出现嘞。 27 奴隶走嚟同田地嘅主人讲：‘主人，你喺田嗰度撒嘅唔系好种子咩？点解会有毒麦嘅？’ 28 主人同佢哋讲：‘呢个系敌人做嘅。’奴隶同佢讲：‘噉你想唔想我哋出去掹晒啲毒麦呀？’ 29 主人话：‘唔使，我惊你哋掹走啲毒麦嗰阵，会连小麦都一齐连根拔起呀。 30 喺收割之前，就等小麦、毒麦一齐成长啦。去到收割嘅时期，我会同收割嘅人讲：掹起啲毒麦先，一捆一捆噉扎起，准备烧咗佢，然后先至收集啲小麦，放入谷仓。’”

31 耶稣讲咗另一个比喻俾佢哋听，佢话：“天上嘅王国好似一粒芥菜嘅种子*，一个人拎去种喺自己块田度。 32 虽然芥菜种子喺所有种子当中系最细嘅，但系种出嚟嘅就系蔬菜之中最大嘅，仲可以生长成一棵树，连天上嘅雀仔都喺佢嘅树枝上面栖息。”

33 耶稣又讲咗另一个比喻，佢话：“天上嘅王国好似酵，一个女人拎啲酵去同三大份*面粉捞埋一齐，等成个面团都发酵。”

34 耶稣就系噉样运用比喻教导民众㗎嘞。佢同佢哋讲嘢嘅时候一定会用比喻。 35 噉系要实现先知所讲嘅话：“我要开口讲比喻，我要将最初*就隐藏嘅事宣扬出去。”

36 耶稣等民众走晒之后，就入咗间屋。佢啲门徒嚟同佢讲：“可唔可以解释俾我哋知毒麦嗰个比喻系咩意思呀？” 37 耶稣解释话：“撒好种子嘅农夫就系人子， 38 田地就系呢个世界，好种子就系王国之子*，毒麦就系恶者之子*， 39 撒毒麦种子嘅敌人就系魔鬼，收割嘅时期就系呢个制度嘅末期，收割嘅人就系天使。 40 毒麦会被掹晒出嚟用火烧咗佢，到咗制度嘅末期都会系噉。 41 人子会派佢嘅天使，将所有令人失足犯罪嘅嘢同埋唔守上帝法律嘅人，从佢嘅王国嗰度拣晒出嚟， 42 揼去火炉。喺嗰度，佢哋会痛哭流泪，咬牙切齿*。 43 到时，上帝认可嘅人会喺佢哋天父嘅王国发出亮光，好似太阳咁光。有耳仔嘅，就应该留心听。

44 “天上嘅王国就好似埋喺地底嘅宝物，有人发现咗，就收埋佢。佢好开心，就卖晒自己所有嘢，然后买咗嗰块地。

45 “天上嘅王国又好似一个商人周围去揾上等嘅珍珠。 46 佢揾到一粒好贵重嘅珍珠，就即刻卖晒佢所有嘢，然后买咗嗰粒珍珠。

47 “天上嘅王国亦都好似渔夫将好大嘅渔网*撒落海，捉到各种各样嘅鱼。 48 渔网满咗嘞，佢哋就拖上海滩，坐低，将好嘅鱼放喺篮入面，唔可以食嘅就揼咗佢。 49 喺呢个制度嘅末期都会系噉。天使会嚟，将邪恶嘅人同正义嘅人分开， 50 邪恶嘅人会被揼入火炉。喺嗰度，佢哋就会痛哭流泪，咬牙切齿*嘞。”

51 耶稣问门徒：“头先讲嘅你哋系咪都理解呢？”门徒话：“系呀。” 52 耶稣同佢哋讲：“既然你哋明白，噉任何受过教导，认识天上王国嘅导师*就会好似一个家主，将自己宝库入面新嘅旧嘅宝物都攞晒出嚟。”

53 耶稣讲完呢啲比喻，就离开嗰个地方。 54 佢去到自己长大嘅地方，喺会堂入面教导人，大家都好惊讶，话：“佢嘅智慧同施行奇迹嘅能力喺边度嚟㗎？ 55 佢唔系嗰个木匠嘅仔咩？佢嘅妈妈，咪系马利亚啰？佢啲细佬，就系雅各、约瑟、西门、犹大吖嘛？ 56 佢啲妹全部都住喺度㗎？噉佢嘅智慧同能力边度嚟㗎？” 57 佢哋唔肯相信耶稣*。耶稣同佢哋讲：“先知通常都受人尊重嘅，但系喺自己嘅地方就得唔到尊重嘞。” 58 由于佢哋缺乏信心，耶稣喺嗰度只系施行咗好少奇迹。