路加福音

12 嗰時，有成千上萬嘅民眾聚集，佢哋都逼埋一齊，甚至踩到其他人。耶穌同啲門徒講：「要提防法利賽派嘅酵，即係虛偽。 2 小心掩蓋嘅事一定會顯露出嚟，祕密亦都一定會俾人知道。 3 所以你哋私下講嘅，會公開俾人聽到；你哋喺自己間房細細聲講嘅，會喺屋頂廣傳開去。 4 朋友，我話俾你哋聽，嗰啲只能夠殺死你，但係唔能夠再對你做啲咩嘅，唔使驚佢哋。 5 我要話俾你哋知應該畏懼邊個，就係有權殺死你之後，仲有權將你揼入欣嫩谷*嘅。我話俾你哋聽，應該敬畏佢。 6 五隻麻雀唔係賣兩個小錢*咋咩？但係上帝連一隻都唔會遺忘*。 7 其實佢連你哋嘅頭髮都全部數過晒。唔使驚，你哋比好多麻雀貴重得多！

8 「我話俾你哋聽，邊個喺人哋面前承認係我嘅門徒，人子喺上帝嘅天使面前都會認佢。 9 但係邊個喺人哋面前唔認我，人子喺上帝嘅天使面前都唔會認佢。 10 邊個講說話冒犯人子，都可以得到寬恕；但係邊個褻瀆神聖力量，就唔會得到寬恕。 11 人哋帶你哋去公開審訊*，或者帶你哋去政府官員同掌權嘅人面前嗰陣，唔使擔心點樣辯護，或者講啲乜嘢， 12 因為喺嗰個時候，神聖力量會教你哋講應該講嘅說話。」

13 人群當中有一個人同耶穌講：「老師，請你吩咐我嘅兄弟同我分家產啦。」 14 耶穌同佢講：「朋友，邊個委任我做你哋兩個人嘅審判官或者仲裁人呢？」 15 然後耶穌同民眾講：「要小心提防各種各樣嘅貪婪，因為人就算幾咁有錢，佢擁有嘅嘢都唔能夠令佢有生命。」 16 耶穌就同佢哋講咗個比喻：「有個富翁，佢嘅田地出產好豐富， 17 就心諗：『我啲收成冇地方儲存嘞，點算呢？』 18 佢話：『噉啦，我拆晒啲倉，起過啲大啲嘅。我要將我啲穀物同埋財物放晒入去。 19 然後我會同自己講：「我儲咗咁多財物，可以享用好多年，即管輕輕鬆鬆，飲飲食食，慢慢享受啦！」』 20 但係上帝同佢講：『不明事理嘅人呀，今晚你就會冇咗條命，你儲嘅嘢要俾邊個呢？』 21 其實，邊個為自己積存財寶，但係喺上帝眼中唔富足嘅，都係一樣。」

22 耶穌又同門徒講：「所以我話俾你哋知，唔好再為生命憂慮食啲乜嘢，為身體憂慮著啲乜嘢。 23 生命比食物更加寶貴，身體亦都比著嘅衫更加寶貴。 24 試諗吓，渡鴉冇撒種亦都冇收割，冇糧倉亦都冇庫房，但係上帝都養活佢哋。你哋唔係比飛鳥寶貴得多咩？ 25 邊個可以因為憂慮而令壽命延長一啲*呢？ 26 你哋連延長少少*都做唔到，點解仲要憂慮其餘嘅事呢？ 27 你哋諗吓百合花點樣生長吖。百合花唔使辛苦工作，唔使紡織，但係我話俾你哋聽，就算喺所羅門嘅繁榮盛世，佢所著嘅都比唔上呢啲花嘅其中一朵呀！ 28 點解你哋咁冇信心呢？野外嘅花草，今日仲喺度，聽日就揼入火爐入面燒嘞，但係上帝都賜咁靚嘅衫俾佢哋，更何況你哋呢？ 29 你哋唔好成日諗住食乜嘢、飲乜嘢，亦都唔好再為呢啲事過度擔心。 30 呢一切都係世人*努力追求㗎，你哋需要呢啲嘢，你哋嘅天父係知道嘅。 31 只要你哋一直將上帝嘅王國放喺生活嘅第一位，噉呢啲嘢就會賜俾你哋嘞。

32 「小群羊啊，唔使驚，你哋嘅天父好樂意將王國賜俾你哋。 33 要賣咗你哋嘅財物，去接濟窮人。要為自己預備永不破損嘅錢袋，喺天上積存取之不盡嘅財寶。喺嗰度嘅財寶，賊接近唔到，亦都唔會有蟲*蛀蝕。 34 你哋嘅財寶喺邊度，你哋嘅心亦都喺邊度。

35 「你哋要準備好，束緊腰帶*，點埋燈， 36 就好似奴隸等主人參加完婚禮返嚟一樣。主人嚟到敲門，佢哋就即刻開門俾佢。 37 主人嚟到，見到奴隸警醒守望，嗰啲奴隸就有福嘞*！我好肯定噉同你哋講，主人會束好腰帶*，叫奴隸坐低食飯，仲會喺旁邊服侍佢哋。 38 主人如果喺第二更*，甚至第三更*先至嚟到，見到奴隸準備好，噉佢哋就有福嘞！ 39 你哋要記得，一個家主如果一早知道賊幾時會嚟，就唔會由得個賊偷偷入屋嘞。 40 你哋都要隨時準備好，因為喺你哋認為冇乜可能嘅時刻，人子就嚟嘞。」

41 彼得話：「主啊，你呢個比喻係咪淨係同我哋講㗎？定係都同其他人講嘅呢？」 42 主話：「邊個係忠信睿智嘅管家，受主人委派管理全體家僕，喺適當嘅時候將需要嘅食物分配俾大家呢？ 43 佢嘅主人嚟到，見到奴隸就係噉樣做，奴隸就有福嘞！ 44 我可以肯定噉同你哋講，主人會委派佢管理所有財物。 45 但係如果奴隸心諗，『主人唔會咁快返嘅』，仲郁手打其他奴僕，而且飲飲食食，仲飲醉酒， 46 奴隸嘅主人就會喺佢冇諗過嘅日子，喺佢唔知道嘅時刻嚟到，對佢施行最嚴厲嘅懲罰，令佢同不忠嘅人有同樣嘅下場。 47 奴隸明白主人嘅意思，但係唔去準備，亦都冇照佢嘅意思去做，受到嘅責打就會多啲嘞。 48 而唔明白主人意思嘅，就算做咗應該受責打嘅事，受到嘅責打都會少啲。所以，俾邊個多啲，就向邊個攞多啲；交託多啲俾邊個，就向邊個額外攞多啲*。

49 「我嚟係要喺地上點火。火已經點著嘞，我仲求乜嘢呢？ 50 我將會經歷一個浸禮，喺呢個浸禮完成之前，我係好痛苦㗎！ 51 你哋以為我嚟係要為地上帶嚟和睦*咩？我話俾你哋知，唔係和睦，而係分裂。 52 從今以後，一家五口要分裂，三個對抗兩個，兩個對抗三個。 53 佢哋會分裂，阿爸對抗阿仔，阿仔對抗阿爸；阿媽對抗阿女，阿女對抗阿媽；奶奶對抗心抱，心抱對抗奶奶。」

54 耶穌亦都同民眾講：「你哋見到西邊有雲升起，就會即刻講『暴風雨嚟緊嘞』，結果真係噉。 55 你哋見到吹起南風，就講『熱浪嚟緊嘞』，而結果真係噉。 56 虛偽嘅人，你哋識得觀察天地氣象，點解唔識得觀察呢個時代發生嘅事呢？ 57 點解你哋唔自己判斷一下，點樣做先至係啱嘅呢？ 58 舉個例，你同控告你嘅人一齊去見地方官，就應該趁仲未去到，盡力同佢和解。如果唔係，佢將你帶去審判官面前，審判官將你交俾法庭嘅差役，差役就將你韞入監獄嘞。 59 我話俾你知，你唔還清最後一分錢*，就唔使指意放監。」