馬太福音

26 耶穌講完呢啲說話，又同門徒講： 2 「你哋都知道過多兩日就係逾越節嘞，到時啲人會將人子交出嚟，喺木柱上面處決佢。」

3 嗰個時候，祭司長同喺人民當中做長老嘅，聚集喺大祭司該亞法屋企中間嘅庭院。 4 佢哋商量用詭計拘捕耶穌，同埋殺死佢。 5 不過佢哋話：「唔好喺人民守節期嘅時候落手，費事引起騷亂。」

6 耶穌喺伯大尼，喺痲瘋病人西門屋企嘅時候， 7 有個女人帶住用雪花石造嘅容器嚟搵耶穌，裡面裝住好貴嘅馨香油。耶穌食緊飯*嗰陣，呢個女人將啲油倒喺耶穌嘅頭上面。 8 啲門徒見到，就好嬲噉話：「做乜咁嘥呀？ 9 如果賣咗啲油，就可以有好多錢分俾窮人啦。」 10 耶穌知道咗，就同佢哋講：「點解要難為呢個女人呢？佢對我做嘅係一件美好嘅事。 11 你哋身邊幾時都有窮人，但係我就唔會一直喺你哋身邊。 12 佢倒馨香油喺我身上，係為咗安葬我而做好準備。 13 我可以好肯定噉話俾你哋知，無論好消息傳到世界邊個地方，都會有人講起呢個女人做嘅呢件事嚟紀念佢。」

14 喺十二使徒當中有一個被稱為加略人猶大。後嚟，佢去見嗰啲祭司長， 15 佢話：「我將佢交俾你哋*，你哋會俾啲咩嘢我先？」佢哋傾好會俾30塊銀幣佢。 16 由嗰陣開始，猶大就一路搵機會出賣耶穌。

17 無酵節嘅第一日，門徒嚟問耶穌：「你想我哋喺邊度準備逾越節嘅晚餐呢？」 18 耶穌話：「你哋入城搵阿邊個邊個，同佢講：『老師話：「我嘅時候就快到嘞，我會喺你屋企同門徒過逾越節。」』」 19 門徒就跟住耶穌嘅吩咐去做，準備好逾越節嘅晚餐。

20 到咗夜晚，耶穌同12個門徒一齊食飯*。 21 食緊嘅時候，耶穌話：「我可以好肯定噉話俾你哋知，你哋當中有一個人會出賣我。」 22 門徒就好唔開心，佢哋逐個逐個問耶穌：「主啊，唔係我吖嘛？」 23 耶穌就話：「同我喺同一個碗度攞嘢食嘅人，就係出賣我嘅人。 24 冇錯，人子係會離開你哋嘅，聖經都係噉樣講，但係出賣人子嘅有禍嘞！嗰個人從來冇出世仲好。」 25 打算出賣耶穌嘅猶大就話：「老師*，唔係我吖嘛？」耶穌話：「你心知肚明啦*。」

26 佢哋仲食緊嘢嘅時候，耶穌拎起一塊餅，禱告之後就將餅分開，遞俾門徒，佢話：「你哋攞去食吖。呢個係象徵我嘅身體。」 27 耶穌拎起隻杯，禱告感謝之後，遞俾佢哋話：「你哋全部都要飲呢杯酒。 28 呢個象徵我嘅血，係『立約之血』，為好多人流出嚟，令佢哋嘅罪得到寬恕。 29 不過我話俾你哋知，將來我會同你哋喺我爸爸嘅王國裡面飲新酒，喺嗰日之前我絕對唔會再飲任何葡萄酒。」 30 最後，佢哋唱咗讚美歌*，然後離開嗰度，去橄欖山。

31 嗰陣時耶穌同佢哋講：「今晚，你哋全部都會因為發生喺我身上嘅事而離棄我*，因為聖經話：『我會打擊牧羊人，羊群就會四散。』 32 不過我復活之後，會早過你哋去加利利，喺嗰度等你哋。」 33 但係彼得就同耶穌講：「就算個個都因為你嘅事而離棄你*，我都一定唔會離棄你㗎！」 34 耶穌同彼得講：「我可以好肯定噉話俾你知，今晚，雞叫之前，你會三次唔肯認我。」 35 彼得同耶穌講：「就算要我同你一齊死，我都絕對唔會唔認你㗎。」其他門徒全部都噉樣講。

36 當時，耶穌同佢哋去到一個叫客西馬尼嘅地方。佢同門徒講：「你哋坐喺呢度，我去嗰邊禱告。」 37 佢帶埋彼得，仲有西庇太嘅兩個仔一齊去。嗰陣耶穌好憂愁，覺得好難過， 38 就同佢哋講：「我真係非常之難受，難受到就嚟要死。你哋留喺度唔好瞓，陪我一齊保持警醒。」 39 耶穌行前幾步，跪喺度下拜，禱告話：「我嘅爸爸啊，如果可以嘅話，求你拎走呢個杯*。不過唔好照我嘅意思去做，照你嘅意思去做吖。」

40 耶穌返番去門徒嗰度，見佢哋瞓著咗，就同彼得講：「你哋就連同我一齊保持警醒一個鐘都唔得？ 41 要保持警醒，不斷禱告，噉先至可以避免喺引誘下屈服。人嘅心好願意做啱嘅事*，不過身體就軟弱嘞。」 42 耶穌第二次去禱告，佢話：「我嘅爸爸啊，如果唔可以拎走呢個杯，一定要我飲嘅話，就照你嘅旨意實現啦。」 43 佢再返嚟門徒嗰度，見到佢哋又瞓著咗，佢哋攰到眼都擘唔大。 44 耶穌就行開，第三次去禱告，講咗同一番說話。 45 跟住，佢返去門徒嗰度，同佢哋講：「到咗呢個時候，你哋仲喺度瞓覺，仲喺度休息！人子俾人出賣嘅時候就嚟到嘞，佢會落喺罪人手上。 46 起身啦，我哋要走喇。出賣我嘅人就快到。」 47 耶穌都仲未講完，突然之間，十二使徒之一嘅猶大嚟到，有一大班人帶住劍同埋棍同佢一齊嚟，佢哋係祭司長同人民嘅長老派嚟嘅。

48 出賣耶穌嗰個人事先同佢哋講好咗個暗號，佢話：「我錫邊個一下，嗰個就係你哋想捉嘅人嘞。你哋拘捕佢啦。」 49 猶大直接行到耶穌面前，佢話：「老師*，你好！」然後溫柔噉親吻佢。 50 耶穌同佢講：「你嚟呢度做乜嘢呀？」於是佢哋行上前，捉住耶穌，拘捕佢。 51 點知，同耶穌一齊嘅人當中，有一個人掹把劍出嚟，斬落去大祭司奴隸嗰度，削咗佢一隻耳仔落嚟。 52 於是耶穌同嗰個門徒講：「收返埋把劍啦！邊個用刀劍，就會死喺刀劍之下。 53 你以為我唔可以求我爸爸，即刻派12個軍團以上嘅天使嚟幫我咩？ 54 如果我噉做，噉聖經話一定會發生嘅事情又點會發生呢？」 55 當時，耶穌同嗰班人講：「唔通我係賊，需要你哋帶埋劍同埋棍嚟捉我咩？我每日都坐喺聖殿裡面教導人，你哋又唔嚟捉我。 56 其實呢一切發生，係要應驗先知寫低嘅說話*。」嗰個時候，門徒全部都揼低耶穌走咗去。

57 拘捕耶穌嘅人帶佢去見大祭司該亞法，抄經士同長老都聚集喺嗰度。 58 不過，彼得就一直離遠噉跟住佢，一路去到大祭司屋企嘅庭院。彼得入咗去，坐喺啲僕人隔籬，想知道耶穌會有咩遭遇。

59 呢個時候，嗰啲祭司長同埋成個公議會都喺度搵人俾假證供指控耶穌，目的係要處死佢。 60 雖然有好多人嚟俾假證供，但係都唔足以用嚟指控耶穌。之後有兩個人走嚟， 61 話：「呢個人話：『我可以拆咗上帝嘅聖殿，三日之內再起返』喎。」 62 大祭司就企起身，問耶穌：「你冇嘢要回應咩？佢哋指控你嘅事，你聽唔到呀？」 63 不過耶穌都係唔出聲。大祭司就同佢講：「我要你喺永活嘅上帝面前發誓，你講，你係唔係上帝嘅仔基督？」 64 耶穌同佢講：「冇錯，我係*。不過我話俾你哋知，從此以後你哋會見到人子坐喺大能嘅上帝右邊，喺天雲當中嚟到。」 65 呢個時候，大祭司撕裂外衣，話：「佢講咗褻瀆嘅話！仲使乜搵證人呀？嗱！你哋都聽到佢點樣褻瀆上帝吖。 66 你哋認為點好吖？」佢哋答：「處死佢啦。」 67 於是佢哋向住佢塊面吐口水，用拳頭打佢，仲有人掌摑佢， 68 話：「你呢個基督，你係先知嘅話，話俾我哋聽，係邊個打你吖？」

69 彼得坐喺外面嘅庭院，有個女僕走埋去同佢講：「你都係同嗰個加利利人耶穌一齊㗎噃！」 70 不過彼得喺所有人面前否認話：「我都唔知你講乜。」 71 佢出咗去，行到庭院嘅門口，又有個女僕留意到佢，就同嗰度啲人講：「呢個人同過拿撒勒人耶穌一齊㗎喎。」 72 彼得又再否認，仲發誓話：「我都唔識嗰個人嘅！」 73 過咗一陣，企喺附近嘅人走埋嚟同彼得講：「你擺明係同嗰班人一齊㗎噃，聽你嘅口音*就知啦。」 74 跟住彼得就發毒誓話：「我唔識得嗰個人哩！」喺嗰一刻雞就叫嘞。 75 彼得諗返起耶穌曾經講過：「雞叫之前，你會三次唔肯認我。」佢就出去，傷心痛哭。