馬太福音

3 後嚟，施浸者約翰去到猶地亞嘅曠野傳道， 2 佢話：「你哋要悔改，因為天上嘅王國就快到嘞。」 3 其實，約翰就係以賽亞先知喺預言入面提到嘅嗰一位。以賽亞話：「喺曠野有人大聲話：『要為耶和華*預備道路，喺佢前面為佢開路！』」 4 約翰著住駱駝毛造嘅衫，纜住皮帶，佢食嘅係蝗蟲同埋野生蜂蜜。 5 耶路撒冷、全猶地亞同埋約旦河周圍地區嘅人都嚟搵佢， 6 喺約旦河接受佢施行嘅浸禮*，公開承認自己嘅罪。

7 有好多法利賽派*同埋撒都該派*嘅人嚟到佢施浸嘅地方。約翰見到佢哋，就對佢哋話：「你哋呢啲毒蛇嘅子孫！上帝嘅憤怒就快到嘞！邊個同你哋講你哋可以逃避到㗎？ 8 所以，你哋嘅行為*應該表明你哋真心悔改。 9 唔好自以為是，心諗『亞伯拉罕係我哋嘅祖先*呀。』我同你哋講，上帝其實可以令呢啲石頭生亞伯拉罕啲子孫出嚟呀。 10 斧頭已經放咗喺樹下面嘞。所有唔結好果實嘅樹都會斬落嚟，揼入火裡面。 11 但係由於你哋悔改，我用水為你哋施浸。至於喺我之後嚟嘅嗰一位，佢嘅能力比我大，我連幫佢除鞋都唔配。佢會用神聖力量同埋火為你哋施浸。 12 佢拎住用嚟揚起啲穀嘅鏟，佢會將脫穀場清理乾淨，將小麥收入穀倉，然後用永遠都唔會熄嘅火將啲穀糠燒乾燒淨。」

13 後嚟，耶穌由加利利去到約旦河搵約翰，請約翰為佢施浸。 14 不過約翰想阻止佢，就話：「應該我嚟搵你幫我施浸先係吖，點會係你嚟搵我呢？」 15 耶穌同佢講：「呢一次你就幫我啦，上帝想我哋去做嘅嘢，我哋就應該去做。」於是，約翰就冇再阻止耶穌嘞。 16 耶穌受完浸，就即刻上水嘞。睇吓！個天打開咗，佢*見到上帝嘅神聖力量*好似隻鴿噉降喺耶穌身上。 17 就喺呢個時候，天上面有把聲噉樣講：「呢個係我深愛嘅仔，係我認可*嘅。」