憂慮時總會得到安慰

呢套書被稱為“彩虹書册”。我開始認真閲讀呢套書嗰陣，書上嘅生動插圖激發咗我嘅想像力，結果，我好細個就開始對呢啲精彩書刊所呈現嘅聖經知識産生咗濃厚嘅興趣。

第二次世界大戰嘅戰火迫近英屬印度嘅時候，我嘅世界亦都發生咗巨變。我嘅父母先係分居，然後離婚。我好唔明白點解兩個我愛嘅人會離開對方。我變得感情麻木，覺得自己俾人遺棄。因為我係獨生子，所以冇其他家人可以俾我所需嘅安慰同支持。

嗰陣時，我同媽媽住喺省會城市卡拉奇。有一日，年長嘅弗雷德·哈達克醫生探訪我哋屋企。佢係一個耶和華見證人，同之前送我哋書刊嘅海外傳道員有同樣嘅信仰。佢建議我媽媽開始一個聖經課程。雖然媽媽拒絶咗，不過話我可能有興趣。第二個星期，我就開始同哈達克弟兄學習。

幾個星期之後，我就參加喺哈達克弟兄嘅醫療診所舉行嘅基督徒聚會。大約十二個年長嘅見證人喺嗰度舉行崇拜。佢哋鼓勵我，照顧我，就好似對待自己嘅仔一樣。我清楚記得佢哋坐喺我旁邊，交談嗰陣同我保持平視，而且將我視為佢哋嘅好朋友。呢啲都係我當時非常需要嘅。

冇幾耐，哈達克弟兄就邀請我同佢一齊做傳道工作。佢教我點樣操作手提式留聲機，向人播放一個簡短嘅聖經演講。雖然有啲住户覺得某啲演講講得好直接就唔想聽，但係我因為可以向人作見證而感到好興奮。我對聖經真理充滿熱情，亦都好鍾意同人分享。

隨住日軍向英屬印度迫近，英國政府對耶和華見證人施加嘅壓力越來越大，後來直接影響到我。我嘅校長係一個聖公會牧師。1943年7月，佢以“品德不良”為理由將我開除。佢同我媽媽講，我同耶和華見證人來往對其他學生造成咗不良嘅影響。媽媽好擔心，就唔准我同見證人來往。之後，佢送我去爸爸所在嘅城市，往北1370公里（850英里）嘅白沙瓦。因為冇繼續吸收靈糧同參加聚會，我嘅靈性就慢慢變得軟弱。

恢復屬靈健康

1947年，我返去卡拉奇揾工。其間，我拜訪咗哈達克醫生嘅診所，並受到佢熱情歡迎。

佢以為我嚟係為咗睇病，就問我：“你邊度唔舒服呀？”

我回答話：“醫生，我身體冇事，不過喺屬靈上病咗。我需要一個聖經課程。”

佢問：“你想幾時開始？”

我話：“如果可以，而家就開始。”

嗰晚我哋好開心一齊討論聖經。我覺得自己好似返到屬靈嘅家噉。媽媽諗盡辦法阻止我同見證人來往，不過今次我下定決心要持守真理。1947年8月31日，我受浸表明自己獻咗身俾耶和華。冇幾耐，我就開始做正規先驅，當時我17歲。

喜樂嘅先驅服務

我第一個先驅委派就係去奎達傳道。呢個城市以前係英軍嘅前哨基地。1947年，英屬印度被劃分為印度同巴基斯坦兩個國家。a呢個事件觸發國民之間激烈嘅宗教衝突，引發歷史上其中一次規模最大嘅難民潮。大約1400萬個難民流離失所。印度嘅穆斯林去巴基斯坦，而巴基斯坦嘅印度教同錫克教教徒就遷移到印度。喺一片混亂中，我喺卡拉奇上咗一列前往奎達嘅火車。因為火車逼滿晒人，所以路途嘅大部分時間我都要喺火車外面，全靠揸實條扶手先唔會跌落車。

喺奎達，我遇到喬治·辛格，一個二十幾歲嘅特别先驅。喬治俾咗一部舊單車我，噉我就可以踩住（或者推住）部單車喺呢個好多山坡嘅地區傳道。大部分時間我都係一個人傳道。不出六個月，我就有17個聖經學生，有啲後來仲受咗浸。其中一個叫做薩迪克·馬西嘅學生係一個軍官，佢幫助喬治同我將一啲聖經書刊翻譯成巴基斯坦嘅官方語言烏爾都語。後來，薩迪克成為一個熱心嘅傳道員。

之後，我返翻去卡拉奇，同兩位啱啱嚟到，分别叫亨利·芬奇同埋哈里·福里斯特嘅基列畢業生一齊服務。佢哋喺屬靈上俾我嘅訓練真係好寶貴！有一次，我同芬奇弟兄一齊去巴基斯坦北部做傳道。喺崇山峻嶺嘅山腳下，我哋揾到好多謙卑、渴求聖經真理嘅村民，佢哋都講烏爾都語。兩年之後，我自己都受到邀請參加基列學校。我返到巴基斯坦後，用部分時間做分區探訪工作。我住喺拉合爾嘅海外傳道員之家，另外有三個特派傳道員弟兄同我一齊住。

從痛苦中復原

1954年，拉合爾嘅特派傳道員之間因為性格差異而發生嚴重矛盾，所以分部要調整委派。因為我唔明智噉支持其中一方，結果受到嚴厲嘅責備。我深受打擊，覺得自己好失敗。我搬返去卡拉奇，之後去咗英國倫敦，希望喺屬靈上可以有個新嘅開始。

喺倫敦，我嘅會衆有好多伯特利成員。普賴斯·休斯係個仁慈嘅分部僕人，佢特别關心我。有一日，佢話俾我知，佢曾經受到當時負責全球傳道工作嘅約瑟夫·盧述福嘅嚴厲勸告。當休斯弟兄想為自己辯護嗰陣，盧述福弟兄嚴厲噉責備佢。我好驚訝休斯弟兄可以微笑住講述呢段往事。佢話，佢最初好唔開心，不過後來意識到，自己確實需要噉樣嘅勸告，而且呢個係耶和華向佢表達愛嘅一種方式。（希伯來書12:6）佢嘅話深深打動咗我，幫助我喺屬靈上重新取得平衡。

大約呢個時候，我媽媽搬到倫敦，而且接受咗後來成為中央長老團成員嘅約翰·巴爾弟兄嘅提議，同意學習聖經。佢喺屬靈上不斷進步，喺1957年受浸。後來我得知，原來爸爸去世之前，都同耶和華見證人學習過聖經。

1958年，我同一位喺倫敦定居嘅丹麥姊妹萊娜結婚。第二年，我哋好開心生咗個女，同佢起名叫做簡。佢係我哋五個仔女中最大嘅。當時我喺富勒姆會衆有好多服務機會。但係後來，因為萊娜嘅身體唔好，我哋要搬去氣候温暖嘅地方。1967年，我哋移居到澳大利亞嘅阿德萊德。

一生中最痛苦嘅事

我哋喺阿德萊德嘅會衆有12位年長嘅受膏基督徒。佢哋熱心帶頭傳道。我哋一家好快就安定落嚟，繼續保持良好嘅屬靈常規。

1979年，我同萊娜迎嚟咗我哋第五個細路丹尼爾。佢患有嚴重嘅唐氏綜合症b，預計壽命唔長。即使而家我講翻起當時嘅情況，我嘅心依然好痛。我哋竭盡全力照顧佢，同時冇忽略另外四個仔女嘅需要。丹尼爾因為心臟穿咗兩個窿，有時會缺氧而面色發紫。遇到噉嘅情況，我哋就要即刻送佢去醫院。雖然佢健康狀況好差，不過佢好聰明，好有愛心，亦都好愛耶和華。我哋全家食飯前禱告嗰陣，佢會扣實佢對手仔，點吓頭，衷心噉講“阿們！”。做晒呢啲之後，佢先至食飯。

丹尼爾四歲嗰時，患上急性白血病。我同萊娜無論身體上定係感情上都精疲力盡。我覺得自己就快精神崩潰。不過有一日，喺我哋最低落嘅時候，分區監督内維爾·布朗域嚟探我哋。嗰晚，佢攬實我哋，同我哋一齊喊。佢仁慈體貼嘅安慰令我哋深受感動。佢大約凌晨一點先至離開。冇幾耐，丹尼爾死咗。失去佢，係我哋一生最痛苦嘅事。不過，我哋喺悲痛中保持忍耐，深信任何嘢，甚至係死亡，都唔能够隔斷耶和華對丹尼爾嘅愛。（羅馬書8:38,39）將來丹尼爾會喺上帝嘅新世界復活，我哋非常期待到時可以同佢喺一齊！（約翰福音5:28,29）

幫助其他人而得到喜樂

我有兩次嚴重中風，不過而家仍然以長老嘅身份喺會衆服務。我嘅經歷使我更加識得同情、憐憫其他人，特别係面對緊難題嘅人。我唔會去妄斷佢哋，反而會諗：“佢哋嘅成長背景點樣影響佢哋嘅情感同諗法？我可以點樣關心佢哋？我可以點樣鼓勵佢哋用耶和華嘅方式嚟解決問題？”我真係好鍾意牧養會衆嘅弟兄姊妹！當我安慰其他人，使佢哋喺屬靈上重新得力嘅時候，我自己都得到安慰同强化。

詩篇執筆者嘅話表達咗我嘅心聲，佢話：“每當我心裏多憂多慮，［耶和華］都安慰我，使我安心。”（詩篇94:19）面對家庭難題、信仰受到家人反對、對自己失望同感到沮喪嘅時候，耶和華都扶持我。耶和華的確係我真正嘅父親！