點樣從聖經研讀得到更多益處同喜樂

約書亞接受咗一個艱巨嘅任務，就係要帶領以色列人進入應許之地。雖然佢面對重重困難，不過耶和華保證佢會成功，亦都鼓勵佢話：“你務要鼓起勇氣，堅强不屈，切實遵守我……嘅一切律法，……你要日夜低聲細讀，使你謹慎遵行書上所寫嘅一切話。噉樣，你嘅道路就一定亨通，你一定能够明智行事。”（約書亞記1:7,8）

喺呢個“難以應付嘅非常時期”，我哋同樣都要面對好多困難。（提摩太後書3:1）我哋聽從耶和華俾約書亞嘅吩咐，就可以好似約書亞噉取得成功。我哋要經常研讀聖經，實踐當中嘅原則嚟應付各種考驗。

研讀聖經好重要。如果你唔知點樣研讀或者唔係咁鍾意研讀，請睇吓附欄“試吓呢啲建議”。當中有一啲好嘅方法，可以幫助你從研讀得到更多益處同喜樂。

詩篇執筆者話：“求你使我踏上你誡命所定嘅路，因為呢個係我所喜歡嘅。”（詩篇119:35）沉思上帝嘅話語可以令你得到好大嘅喜樂。只要你努力挖掘，就可以從呢啲屬靈寶藏當中挖出寶石。

雖然你唔使好似約書亞噉帶領一個國族，不過你都要面對自己嘅難題。所以，要效法約書亞努力研讀並遵從上帝嘅話語。噉樣，你就可以明智行事，得到成功。