你有冇了解事情嘅全貌？
未聽到事實就回應，唔單止愚蠢，而且失禮。——箴言18:13
1,2． （甲）我哋要培養乜嘢重要嘅能力？點解？（乙）呢篇課文會討論乜嘢？
作為基督徒，我哋應該學識辨别資訊嘅真確性，從而作出正確嘅判斷。（箴言3:21-23； 8:4,5）如果我哋冇培養呢種辨識力，我哋嘅思想就好容易會受到撒但同世界嘅影響。（以弗所書5:6；歌羅西書2:8）當然，我哋要了解事實，先可以得出正確嘅結論。正如箴言18:13話：“未聽到事實就回應，唔單止愚蠢，而且失禮。”
2 呢篇課文會分析，有乜嘢因素會妨礙我哋獲知事實同作出正確嘅判斷。同時，我哋會討論一啲有助於我哋提高辨識力嘅聖經原則同事例。
唔好“凡話都信”
3． 點解我哋要將箴言14:15嘅原則應用出嚟？（請睇吓課文開頭嘅圖片）
3 今日係一個信息爆炸嘅時代。互聯網、電視同其他媒體為我哋提供數之不盡嘅資訊。好多人亦都從親友嗰度收到大量嘅電郵同信息。因為好多資訊都含有錯誤嘅内容或者失實嘅報道，我哋的確要保持警惕，對所聽到嘅事要有辨識力。乜嘢聖經原則可以幫到我哋？箴言14:15話：“天真無知嘅人，凡話都信；精明審慎嘅人，步步留心。”
4． 腓立比書4:8,9點樣幫助我哋明智噉選擇閲讀嘅資訊？點解辨别資訊嘅真確性好重要？（另外請睇附欄“獲得可靠資訊嘅幾個途徑”）
4 我哋知道真實嘅情況，先可以作出良好嘅判斷。所以，我哋一定要小心選擇閲讀嘅資訊。（請讀腓立比書4:8,9）我哋唔應該浪費時間去瀏覽可疑嘅互聯網新聞或者閲讀電郵當中未經證實嘅報道，特别要遠離叛道者所設立嘅網站。呢啲網站歪曲事實，詆毁上帝嘅子民。我哋輕信一啲唔可靠嘅信息就會作出錯誤嘅決定。千祈唔好低估誤導人嘅信息對你頭腦同内心造成嘅影響。（提摩太前書6:20,21）
5． 以色列人聽到乜嘢錯誤嘅報告？佢哋受到乜嘢影響？
5 聽信錯誤嘅報道會帶嚟嚴重嘅後果。請睇一個事例。喺摩西嘅日子，被派去偵察應許之地嘅十二個探子當中，有十個人返嚟之後都作出消極嘅報告。（民數記13:25-33）佢哋誇大、失實嘅言詞令耶和華嘅子民灰心喪氣。（民數記14:1-4）點解民衆有噉嘅反應？民衆可能覺得，既然大多數探子都有一致嘅報告，噉佢哋講嘅肯定係啱嘅。就算約書亞同迦勒帶嚟真實、積極嘅報告，民衆都唔願意聽。（民數記14:6-10）民衆冇信賴耶和華，亦都冇辨别報告嘅真確性，反而選擇相信嗰啲消極嘅報告。真係愚蠢！
6． 我哋如果聽到一啲關於耶和華子民嘅荒謬報道，點解唔需要感到震驚？
6 我哋睇到一啲同耶和華子民有關嘅報道嗰時，就要特别小心。我哋要記住，撒但一直喺度指控上帝嘅忠僕。（啟示錄12:10）所以耶穌提醒話，反對者會“用各種邪惡嘅話誣衊”佢嘅門徒。（馬太福音5:11）我哋如果留意呢個提醒，喺聽到一啲有關耶和華子民嘅荒謬言論嗰時，就唔會感到震驚。
7． 我哋發送電郵或者信息之前要考慮乜嘢？
7 你係咪好鍾意發電郵或者信息俾你嘅親友？如果係嘅話，當你睇到一個最新嘅消息或者聽到一個不可思議嘅事件嗰陣，你可能會好興奮，好似一個新聞記者噉想第一時間報道呢件事。不過，喺你發信息之前，請問吓自己：“我係咪肯定呢個消息係真實嘅呢？我有冇了解事情嘅全貌？”如果你未肯定就將信息發咗出去，噉無意中可能就會喺弟兄姊妹之間散播虛假嘅消息。如果你唔肯定消息嘅真偽，就應該删除，而唔係發送。
8． 某啲地區嘅反對者會點樣做？我哋點樣做，就可能無意中協助咗反對者？
8 將未經證實嘅電郵同信息轉發出去係好危險嘅。我哋嘅工作喺某啲地區受到限制或禁止。呢啲地區嘅反對者可能不懷好意噉利用一啲虛假消息，使我哋産生恐懼或者彼此猜疑。請睇吓喺前蘇聯發生過嘅事。國安會嘅秘密警察散播謠言話，好多帶頭嘅弟兄出賣咗耶和華嘅子民。a 好多人都信以為真，結果離開耶和華嘅組織。慶幸嘅係，好多人後來都返翻會衆。不過，有啲人就信心盡毁，唔再支持正確嘅崇拜。（提摩太前書1:19）我哋可以點樣避免有咁可悲嘅後果？就係唔好散播負面或者未經證實嘅消息，唔好乜嘢事都輕易相信，要確保自己已經了解事情嘅全貌。
片面嘅信息
9． 另一個使我哋唔容易作出正確判斷嘅原因係乜嘢？
9 半真半假嘅話或者片面嘅信息係令我哋好難作出正確判斷嘅另一個原因。如果一個信息只有一部分係啱嘅，就好容易會誤導人。我哋可以點樣避免俾呢啲信息呃到？（以弗所書4:14）
10． 點解以色列人差啲就互相殘殺？呢件事點樣解決？
10 請睇吓喺約書亞嘅日子，住喺約旦河東西兩岸嘅以色列人之間所發生嘅事。（約書亞記22:9-34）西岸嘅以色列人聽到一個消息話，東岸嘅以色列人，即係呂便人、迦得人同瑪拿西半個部族嘅人，喺約旦河邊起咗一座又大又壯觀嘅壇。呢個消息的確係真實嘅，但並唔全面。西岸嘅以色列人一聽到呢個消息，就以為東岸嘅同胞背叛咗耶和華，於是聚集埋一齊，準備攻打佢哋嘅弟兄。（請讀約書亞記22:9-12）慶幸嘅係，佢哋發動攻擊之前，派出一啲可靠嘅男子做代表，去全面了解呢件事。實情係點嘅呢？嚟自呂便、迦得同瑪拿西半個部族嘅以色列人唔係為咗獻祭而起嗰座壇嘅。佢哋只係想用呢個壇作為憑證，使後人知道佢哋都係崇拜耶和華嘅人。好在西岸嘅以色列人用咗啲時間去了解事實，如果唔係，佢哋就會因為一個片面嘅消息就手足相殘。
11． （甲）米非波設點樣受到唔公正嘅對待？（乙）大衛點樣做，就可以避免犯呢個錯？
11 你可能因為一啲同自己有關嘅半真半假或者片面嘅信息而受到唔公正嘅對待。請睇吓大衛王同米非波設嘅事例。大衛慷慨、仁慈噉對待米非波設，將屬於佢爺爺掃羅嘅土地都歸還俾佢。（撒母耳記下9:6,7）不過後來，大衛聽到一啲關於米非波設嘅負面消息。大衛冇證實消息，就決定奪去米非波設嘅所有産業。（撒母耳記下16:1-4）最終大衛有機會向米非波設了解情況，知道自己誤會咗佢，就將部分財産俾翻佢。（撒母耳記下19:24-29）但係，如果大衛先查明實情，而唔係根據片面之詞魯莽行事，就唔會發生呢件唔公正嘅事。
12,13． （甲）耶穌遭受詆毁嗰時點樣做呢？（乙）如果有人散播同我哋有關嘅謠言，我哋可以點樣做？
12 你有冇試過俾人詆毁？耶穌同施浸者約翰都有過噉樣嘅經歷。（請讀馬太福音11:18,19）耶穌點樣做呢？佢冇將所有時間同精力都用嚟為自己辯護，反而鼓勵民衆睇清事實，留意佢嘅言行同教導。正如耶穌所講，“智慧係由行為嚟證實嘅”。（馬太福音11:19）
13 我哋可以從耶穌身上學到寶貴嘅一課。有時，其他人可能會無理噉指責或者批評我哋，甚至詆毁我哋，使我哋名聲受損。我哋可以點做呢？如果有人散播同我哋有關嘅謠言，我哋就要用自己嘅生活方式證明佢哋所講嘅唔係事實。的確，就好似耶穌立下嘅榜樣噉，如果我哋為人正直，嗰啲半真半假嘅話同錯誤嘅指控就會不攻自破。
你點樣睇自己？
14,15． 點解我哋唔應該過度自信？
14 我哋每個人都唔完美，同埋唔容易得到可靠嘅資訊，呢啲因素都使我哋好難作出正確嘅判斷。如果我哋已經忠貞事奉耶和華好多年，係咪就可以信靠自己嘅經驗呢？我哋可能已經培養咗良好嘅思考力同辨識力，亦都可能因為有良好嘅判斷力而受人敬重。但係，呢啲優點會唔會成為我哋嘅絆腳石呢？
15 事實上，如果我哋變得過度自信，我哋嘅情感同個人諗法可能就會影響我哋嘅思維模式。可能我哋未了解事情嘅全貌，就以為自己已經明白一切。噉樣做的確好危險！聖經清楚提醒我哋，唔好依靠自己嘅聰明。（箴言3:5,6； 28:26）
16． 喺以上假設嘅事例中，發生乜嘢事？湯姆當時作咗乜嘢結論？
16 請想像以下嘅情況。湯姆係一個有經驗嘅長老。有一晚，佢喺一個餐廳見到另一個長老約翰同一個女子一齊食飯。湯姆見佢哋有講有笑，又擁抱，睇起嚟好親密，就覺得好愕然。佢心諗：“如果俾約翰嘅太太知道，會點樣呢？佢哋會唔會離婚？佢哋嘅仔女點算呢？” 湯姆曾經見過類似嘅事情發生，結果都係妻離子散，所以佢越諗就越唔安樂。如果換轉係你，又會點諗呢？
17． 湯姆後來知道乜嘢事實？我哋從中學到乜嘢？
17 不過要先諗吓，湯姆咁快就斷定約翰對太太不忠，佢係咪已經全面了解事實？就喺當晚，湯姆打電話俾約翰問清楚呢件事。原來嗰個女子係約翰嘅親妹，兩兄妹已經好耐冇見過面。因為妹妹住喺另一個城市，今次啱啱好經過呢度，只會逗留幾個鐘，所以約翰只可以同佢見吓面，簡單食餐飯。不過由於某啲原因，約翰嘅太太冇辦法同佢哋一齊。湯姆知道真相之後覺得好安心，亦都慶幸自己冇將内心嘅猜測同其他人講。我哋從中學到乜嘢？就算我哋成為基督徒已經好多年，都唔能够單憑經驗行事，因為我哋嘅經驗代替唔到事實。
18． 我哋同其他人喺性格上有衝突，可能會點樣影響我哋嘅判斷力？
18 我哋同弟兄姊妹喺性格上有衝突，可能會妨礙我哋對事情作出正確嘅判斷。如果我哋只係一味留意彼此嘅差異，就會用懷疑嘅眼光嚟睇弟兄姊妹。噉樣，我哋可能會輕信嗰啲關於弟兄姊妹嘅負面消息。從呢一點我哋學到乜嘢呢？如果我哋對弟兄姊妹心懷怨恨，可能未了解事情嘅全貌就對佢哋妄加判斷。（提摩太前書6:4,5）我哋要小心，唔好俾嫉妒控制我哋嘅頭腦，以致失去判斷力。願我哋時刻緊記，耶和華希望我哋關愛弟兄姊妹，並甘心寬恕佢哋。（請讀歌羅西書3:12-14）
運用聖經原則嚟保護自己
19,20． （甲）乜嘢聖經原則有助於我哋辨别資訊嘅真確性？（乙）你決心點樣做？
19 今日，呢個世界充斥住好多劣質同失實嘅報道，加上我哋都唔完美，所以我哋想獲取可靠嘅信息並作出正確嘅判斷，一啲都唔容易。乜嘢可以幫助我哋？就係要明白並實踐聖經原則。其中嘅原則包括：未全面了解事實就下定論係自招羞辱嘅愚蠢行為；（箴言18:13）凡事都唔好未經查證就信以為真；（箴言14:15）無論我哋事奉耶和華幾長時間，都唔應該依靠自己嘅聰明。（箴言3:5,6）如果我哋通過可靠嘅渠道嚟獲取資訊，然後以此作出良好嘅判斷同明智嘅決定，噉我哋就係運用聖經原則嚟保護自己嘞。
20 但係，仲有一個因素令我哋好難睇清事實，就係我哋好容易只憑眼見就作判斷。下一篇課文會分析，我哋喺邊啲方面可能會犯呢個錯誤，同埋可以點樣避免。