Primé libru de Reyes

3 Biʼniʼ Salomón ti tratu né faraón rey stiʼ Egipto para guichaganabe xiiñidxaapaʼ. Ngue runi bichaganabe* xiiñiʼ Faraón ne yenebe baʼdudxaapaʼ riʼ Xquidxi David laga guiluxe si lídxibe, lidxi Jehová ne muru ni chichuu guidubi vuelta de Jerusalén. 2 Tiempu que rieruʼ binni de guidxi que ca lugar ra nasoo* para gudiicaʼ sacrificiu, purtiʼ caʼruʼ cuíʼ ti yoo para guisaca lá Jehová. 3 Bisihuinni Salomón nadxii Jehová purtiʼ yenándabe ca ley bisaanané bixhózebe David laabe. Xi si la? ca lugar ra nasoo que nga rúnibe sacrificiu ne ruzaaquibe ca ofrenda que para guiasa guʼxhuʼ.

4 Ngue runi ti dxi guyé rey que Gabaón para gudii sacrificiu raqué, purtiʼ ngue nga lugar ra nasoo ni jma runibiáʼcabe. Bidii Salomón ti mil sacrificiu ni riaʼquiʼ lu altar que. 5 Ti gueelaʼ, dxi nuu Salomón Gabaón, guniʼné Jehová laabe lu ti bacaandaʼ ne ná rabi laabe: «Gunabaʼ naa intiica si gacaláʼdxiluʼ». 6 Para bicabi Salomón laabe: «Qué nusaana de nusihuínniluʼ pabiáʼ nadxiiluʼ David bixhozeʼ, purtiʼ qué nixélebe de ca neza stiluʼ, bíʼnibe ni jneza ne bíʼnibe ni naluʼ de guidubi ladxidoʼbe. Ne dede yanna cusihuínniluʼ pabiáʼ nadxiiluʼ laabe, purtiʼ maʼ bidiiluʼ laabe ti xiiñibe para cuiʼ lu trono stibe. 7 Ne yanna Jehová, Dios stinneʼ, maʼ bíʼniluʼ naa rey lugar stiʼ David bixhozeʼ neca nahuiineruaʼ ne huaxiéʼ nannaʼ. 8 Nuaaʼ ndaaniʼ ti guidxi ni maʼ guliluʼ, ti guidxi naroʼbaʼ ni qué zanda ugábacabe. 9 Bidii naa ti ladxidóʼ ni ruzuubaʼ diidxaʼ para ganda guneʼ juzgar xquídxiluʼ, para guieneʼ xii nga ni jneza ne ni cadi jneza, purtiʼ ¿tuu ndiʼ zanda guni juzgar ti guidxi naroʼbaʼ* casi xquídxiluʼ yaʼ?».

10 Guyuulaʼdxiʼ Jehová ni gunabaʼ Salomón laa. 11 Ngue runi ná Dios rabi laabe: «Cumu qué ninábaluʼ naa guibániluʼ xadxí,* gápaluʼ cosa risaca o gatiʼ ca enemigu stiluʼ, sínuque gunábaluʼ naa gácaluʼ ti binni ni riene para ganda guni juzgarluʼ jneza la? 12 zudieeʼ lii ni canábaluʼ naa. Zuneʼ lii ti binni nuu xpiaaniʼ ne ni riene. Qué huayuu dxi ne qué ziuu dxi chuʼ sti binni casi lii. 13 Ne zudieeʼ lii dede ni qué ninábaluʼ naa, zudieeʼ lii stale cosa risaca ne nabé zunibiáʼ binni lii. Biaʼ dxi guibániluʼ, qué ziuu sti rey casi lii. 14 Ne pa saluʼ lu ca neza stinneʼ, chinándaluʼ ca regla ne ca mandamientu stinneʼ —casi biʼniʼ bixhózeluʼ David— la? zabániluʼ jma xadxí».

15 Ora bibani Salomón bidii cuenta ti bacaandaʼ ngue gupa. Para bireebe zebe Jerusalén ne guyebe nezalú arca stiʼ acuerdu* stiʼ Jehová ne bidiibe sacrificiu ni riaʼquiʼ ne ofrenda de paz. Laaca bíʼnibe ti guendaró para guiráʼ ca mozo stibe.

16 Tiempu que guyé chupa prostituta* ra nuu rey que. 17 Primé gunaa que rabi laabe: «Señor stinneʼ, ndaaniʼ tobi si yoo nabezaniáʼ gunaa riʼ, ne nuube ndaaniʼ yoo que ora gupaʼ baʼduʼ stinneʼ.* 18 Lu guionna gubidxa de gupaʼ baʼduʼ laaca gúpabe baʼduʼ. Guirópasidu nuudu raqué, guirútiruʼ nuu ndaaniʼ yoo que. 19 Huaxhinni que guti xiiñiʼ gunaa riʼ purtiʼ guunibe laa. 20 Ngue runi biásabe galaa gueelaʼ yetíxhebe xiiñibe ni maʼ guti que ndaaniʼ nayaʼ ne gucuaabe xiiñeʼ gudíxhebe laa ndaaniʼ nabe.* 21 Siadóʼ, ora biasaʼ para ugadxeʼ xiiñeʼ, biiyaʼ maʼ gútibe. Peru ora biiyaʼ chaahueʼ ba’duhuiini’ que, bidieeʼ cuenta cadi xiiñeʼ diaʼ laabe». 22 Óraque ná sti gunaa que: «¡Cadi dxandíʼ diʼ, xiiñeʼ nabani, xiiñiluʼ nga gutiʼ!». Peru primé gunaa que ná: «Coʼ, xiiñiluʼ nga gutiʼ, xiiñeʼ nga ni nabani ca». Zaqué cadíndecabe nezalú rey que.

23 Últimu ná rey que: «Gunaa riʼ caníʼ “¡Xiiñeʼ nabani, xiiñiluʼ nga gutiʼ!”, ne sti gunaa riʼ ná “¡Coʼ, xiiñiluʼ nga gutiʼ, xiiñeʼ nga ni nabani ca!”». 24 Óraque ná rey que: «Latané naa ti espada». Ne bitiidicabe laabe ti espada. 25 Óraque biʼniʼ mandar rey que: «Laugá baʼduhuiiniʼ ca chupa ndaa, lagudii ti ndaa ca gunaa riʼ ne sti ndaa ca lagudii ni sti gunaa ca». 26 Ora binadiaga jñaa baʼduhuiiniʼ ni nabani que ni guniʼbe, bia xiiñiʼ ne oraqueca gúdxibe rey que: «¡Coʼ, señor stinneʼ! Zaa lagudii baʼduhuiiniʼ ca laabe. ¡Peru cadi guutitu baʼduhuiiniʼ ca!». Peru sti gunaa que ná: «¡Nin lii, nin naa! ¡Zaa ugácabe laabe chupa ndaa!». 27 Ora binadiaga rey que laacabe guníʼ: «¡Lagudii baʼduhuiiniʼ ca primé gunaa ca! Cadi guutitu laabe; laabe nga jñaa baʼduhuiiniʼ ca».

28 Guidubi guidxi Israel gunna juiciu biʼniʼ rey que ne guizáʼ bidxagayaacaʼ* laabe, purtiʼ biiyacaʼ Dios nga bidii laabe guendabiaaniʼ para gúnibe justicia.