Primé libru de Reyes

6 Gudiʼdiʼ si tapa gayuaa ochenta iza de biree ca israelita* de Egipto, dxi maʼ ziné Salomón tapa iza de cayuni mandar guidxi Israel, lu beeu ziv* (laani nga guiropa beeu stiʼ ti iza), bizulú Salomón bicuí lidxi Jehová.* 2 Ndiʼ nga ca medida stiʼ yoo ni bicuí rey Salomón para Jehová: ziuulani 60 codo,* xilágani* gande codo ne nasooni 30 codo. 3 Gupa templu que* ti entrada ni rábicabe pórtico, ne xilágani gande codo, biaʼca xilaga yoo que. Maca né pórtico que, guca yoo que chii codo jma ziuulaʼ.

4 Bíʼnibe caadxi ventana stiʼ yoo que, pur dentru la? naroʼbaʼ marcu stícani, peru pur fuera maʼ nahuiinicani. 5 Cueʼ pader stiʼ yoo que, ladu ziuulani, gundísabe sti pader, ne rudiini vuelta yoo que, templu* que ne cuartu ni nuu dede dentru que, ne entre pader stiʼ yoo que ne pader gundísabe que bíʼnibe caadxi división. 6 Ca división nuu xagueteʼ, ladu ziuulaʼ yoo que, xilágacaʼ gaayuʼ codo, ca ni nuu galahuiʼ que xilágacaʼ xhoopaʼ codo ne ca ni nuu luguiáʼ que xilágacaʼ gadxe codo, bíʼnibe ca pader stícani* para ganda gataʼ ca muríu que luguiácani, ti cadi quiidebe ca pader que.

7 Bicuícabe yoo que de guié ni maca bigácabe, ngue runi biaʼ tiempu gurí yoo que, qué nixidxi ruidu stiʼ martiú nin jacha nin ruidu stiʼ xiixa herramienta de guiibaʼ ni riquiiñecabe para gucuinécabe yoo. 8 Ca división ni nuu xagueteʼ, ladu ziuulaʼ yoo que, gúpacani entrada stícani ladu gueteʼ* de yoo que. Raqué nu ti escalera de caracol, ne riquiiñecabe ni para quíbacabe ra nuu ca división ni nuu galahuiʼ que, ne para quíbacabe ra nuu ca división ni nuu luguiácani. 9 Ne ora biluxe bicuí Salomón yoo que, bidxiibabe muríu de cedru ne tabla de cedru íqueni. 10 Guidubi vuelta yoo que, neza ziuulani, bíʼnibe división. Cada tobi de laacani nasoo gaayuʼ codo, ne guiʼdiʼ ca tabla de cedru stiʼ ca división que ca pader stiʼ yoo que.

11 Tiempu que, bidii Jehová mensaje* riʼ Salomón: 12 «Pa gúniluʼ ni ná ca ley stinneʼ, guni respetarluʼ ca decisión* stinneʼ ne chinándaluʼ ca mandamientu stinneʼ ne guibániluʼ casi modo nácani, zuneʼ cumplir ni bineʼ prometer David, bixhózeluʼ, ni bizeeteʼ lube de yoo cucuiluʼ riʼ, 13 ziuaaʼ lade ca israelita ne qué zusaanaʼ diaʼ xquidxeʼ Israel».

14 Ne biʼniʼ Salomón xcaadxi dxiiñaʼ para gunduuxeʼ yoo que. 15 Biʼniʼ forrarbe guidubi ndaaniʼ yoo que né tabla de cedru. Dede layú que ne dede ra nuu ca muríu que biʼniʼ forrarbe de tabla, peru layú que gudíxhebe tabla de enebro para gúnibe pisu stini. 16 Ne bíʼnibe ti cuartu ndaaniʼ yoo que, ziuulani gande codo, ne dede layú que hasta ra nuu ca muríu stiʼ yoo que biʼniʼ forrarbe ni de tabla de cedru. Zaqué nga bíʼnibe ti cuartu ndaaniʼ yoo que dede dentru, ne laani nga Santísimo. 17 Ngue runi ziuulaʼ templu* que —sti ndaa ni biaanaʼ ndaaniʼ yoo que— cuarenta codo. 18 Ne lu guidubi naca ca yaga ni bicaacabe ndaaniʼ yoo que, bizáʼcabe caadxi guitu ne caadxi guieʼ ni maʼ bieleʼ. Guirani de cedru; ne qué rihuinni diʼ nin ti ndaa guié stiʼ ca pader que.

19 Ne guluube listu cuartu* ni nuu dede dentru de ndaaniʼ yoo que para chuʼ arca stiʼ acuerdu* stiʼ Jehová. 20 Cuartu ni bíʼnibe dede dentru que, ziuulani gande codo, xilágani gande codo ne nasooni gande codo ne biʼniʼ forrarbe ndaanini de oro puru. Ne altar que la? biʼniʼ forrarbe laa de yaga cedru. 21 Guidubi naca ndaaniʼ yoo que biʼniʼ forrar Salomón ni de oro puru, ne guluube cadena de oro frente de ra cuartu ni nuu dede dentru que, ne laaca nuu cuartu riʼ forradu de oro. 22 Guidubi naca ndaaniʼ yoo que biʼniʼ forrarbe de oro. Laaca biʼniʼ forrarbe de oro altar ni nuu gaxha de ra cuartu ni nuu dede dentru que.

23 Ne ndaaniʼ cuartu ni nuu dede dentru que, bizaʼbe chupa querubín de yaga pinu.* Cada tobi de laacani nasoo chii codo. 24 Ti xhiaa si querubín que ziuulaʼ gaayuʼ codo ne sti xhiaa que laaca ziuulaʼ gaayuʼ codo. Ngue runi, dede punta stiʼ ti xhiaa que hasta sti punta stiʼ sti xhiaa que ziuulaʼ chii codo. 25 Ne laaca chii codo ziuulaʼ xhiaa guiropa querubín que. Biáʼqueca guiropaʼ querubín que ne ngueca forma nápacani. 26 Ti querubín que nasoo chii codo ne biáʼqueca nasoo stobi que. 27 De raqué guluube ca querubín que ndaaniʼ cuartu ni nuu dede dentru ndaaniʼ yoo que.* Nuchiaa xhiaa ca querubín que, guiʼdiʼ xhiaa ti querubín que guriá yoo ne xhiaa sti querubín que guiʼdiʼ sti guriá yoo que. Sti xhiaa cada tobi de ca querubín que biaʼsi riaanacani galahuiʼ yoo que ne guíʼdicani. 28 Laaca biʼniʼ forrarbe guiropaʼ querubín que de oro.

29 Ne guiráʼ ca pader stiʼ yoo que, ca pader stiʼ cuartu ni nuu dede dentru que ne ca pader stiʼ sti cuartu que,* bizaʼbe caadxi querubín lúcani, ne caadxi palmera ne caadxi guieʼ ni maʼ bieleʼ. 30 Guidubi naca ndaaniʼ yoo que gudíxhebe oro, ndaaniʼ cuartu ni nuu de dentru que ne ndaaniʼ sti cuartu que. 31 Ne ca puertaʼ stiʼ cuartu ni nuu de dentru que, bíʼnibe cani de yaga pinu, laaca bíʼnibe columna ne poste stiʼ ca puertaʼ que, ne bíʼnibe entrada stini lu tobi de ca gaayuʼ sección stiʼ pader que.* 32 Guiropaʼ puertaʼ que bíʼnibe cani de yaga pinu ne lúcani bizaʼbe caadxi querubín, yaga palmera ne guieʼ ni maʼ bieleʼ. Bigázebe cani de oro ne biʼniʼ forrarbe de oro ca querubín ne ca yaga palmera que. 33 Laaca de yaga pinu bíʼnibe ca poste para entrada stiʼ templu* que, ne bíʼnibe entrada stini lu tobi de ca tapa sección stiʼ pader que.* 34 Bíʼnibe guiropaʼ puertaʼ stini de yaga enebro. Cada puertaʼ que napa chupa ndaga ne nápacani eje* para ganda guidópacani ne guixélecani. 35 Lúcani bizaʼbe caadxi querubín, yaga palmera ne caadxi guieʼ ni maʼ bieleʼ, ne biʼniʼ forrarbe cani né lámina de oro.

36 Gundísabe muru stiʼ patiu ni nuu dentru que né chonna elada guié ni maca bigá ne gudíxhebe ti línea muríu de cedru luni.

37 Dxi maʼ ziné Salomón tapa iza de cayuni mandar, lu beeu ziv,* gudíxhecabe base stiʼ lidxi Jehová; 38 ne dxi maʼ zinebe 11 iza de cayuni mandarbe, lu beeu bul* (laani nga beeu xhono stiʼ ti iza), biluxe guca guiráʼ detalle stiʼ yoo que casi zeedani lú ca planu que. Gudiʼdiʼ gadxe iza para biluxe gurini.