Guiropa libru de Crónicas
5 Biluxe Salomón guiráʼ ca dxiiñaʼ ni naquiiñeʼ gaca para lidxi Jehová. De raqué bedanebe guiráʼ ca cosa ni guleechú* David bixhózebe ne guluu chaahuibe guiráʼ plata, oro ne guiráʼ ca cosa que ndaaniʼ ca cuartu ra riaapaʼ tesoro ni nuu ra lidxi Dios ni dxandíʼ. 2 Ca dxi que, bisendacaa Salomón guiráʼ ca hombre huaniisi* de guidxi Israel: guiráʼ ca xaíque stiʼ ca tribu ne guiráʼ xaíque familia neza bixhózecabe de guidxi Israel. Beedacabe Jerusalén para chécabe Xquidxi David, laca laani nga Sion, para chicaacabe arca stiʼ acuerdu* stiʼ Jehová. 3 Guiráʼ ca hombre de Israel bidxíñacaʼ nezalú rey que ca dxi cayaca saa* ni raca lu beeu gadxe.
4 Ngue runi beeda guiráʼ ca hombre huaniisi de Israel, ne gundisaʼ ca levita Arca que. 5 Yenécabe Arca ne tabernáculo que ne guiráʼ ca herramienta ni riquiiñecabe ndaanini para gúnicabe xhiiñaʼ Dios. Ca sacerdote ne ca levita* que nga guyuaʼcaʼ* guirácani para bidxiibacaʼ* cani. 6 Para bizuhuaa rey Salomón nezalú Arca que, ne guiráʼ ca binni de Israel ni bisendacaabe. De tantu stale dendxuʼ ne yuze cudiicabe casi sacrificiu dede guirutiʼ ñanda nugabaʼ laacame. 7 Para yesaana ca sacerdote que arca stiʼ acuerdu stiʼ Jehová ra chiguiaanani, ndaaniʼ Santísimo, cuartu ni nuu dede dentru ndaaniʼ yoo que, xaʼnaʼ xhiaa ca querubín que. 8 Dede luguiáʼ nuchiaa xhiaa ca querubín que ra zuhuaa Arca que, ne biaʼsi nuchii ca querubín que Arca que ne ca vara stini. 9 Guizáʼ ziuulaʼ ca vara que dede rihuinni punta stícani ndaaniʼ Santo, cuartu ni nuu frente de Santísimo que, peru qué zanda diʼ gúʼyacabe ni dede fuera. Ne dede yanna raqué nuucani. 10 Ni nuu si ndaaniʼ Arca que nga guiropaʼ tabla ni guluu Moisés ndaanini dxi nuu lu layú stiʼ Horeb, dxi biʼniné Jehová ti acuerdu guidxi Israel bireesicaʼ de Egipto.
11 Ora biree ca sacerdote que de ndaaniʼ lugar santo que (purtiʼ guiráʼ ca sacerdote ni nuu raqué maʼ bisiacaʼ laacaʼ, gastiʼ naca xi grupu laacaʼ), 12 guiráʼ ca levita ni ruundaʼ de lade ca xpinni Asaf, Hemán, Jedutún ne ca xiiñicabe ne ca bíʼchicabe nácucaʼ lari de ni jma galán ne naazecaʼ címbalo,* instrumentu ni napa cuerda ne arpa; zuhuaacaʼ ra nuu altar que, ladu rindani gubidxa, ne laaca raqué zuhuaa ti gayuaa gande sacerdote ni cuxhidxi trompeta. 13 Ca ni cuxhidxi trompeta ne ca ni cayuundaʼ que, juntu cusisácacaʼ ne cudiicaʼ xquixe peʼ Jehová. Ne laga cuxhídxicabe ca trompeta que, ca címbalo ne xcaadxi instrumentu que, cusisácacabe Jehová né ca diidxaʼ riʼ: «Purtiʼ nacháʼhuibe; qué ziuu dxi gusaana de gannaxhiibe».* Óraque, bidxá ti za ndaaniʼ yoo que, ndaaniʼ lidxi Jehová. 14 Ne pur za que maʼ qué ñanda ñaana ca sacerdote que raqué para ñúnicaʼ xhiiñacaʼ, purtiʼ bidxá guendanandxóʼ* stiʼ Jehová ndaaniʼ lidxi Dios ni dxandíʼ.