Capítulo 21
Guizáʼ galán chigaca ni gudixhe ique Jiobá
1, 2. 1) Ximodo nga naguixhe ique Jiobá chuʼ guiráʼ xixé ángel ne binni. 2) Tuu nga cani biʼniʼ adorar Jiobá casi ti familia si.
NI NAGUIXHE ique Jiobá nga chuʼ guiráʼ xixé binni ne ca ángel ni bizaʼbe ca tobi si para guni adorarcaʼ laabe casi tobi lucha Dios ni dxandíʼ, nga nga ni racaláʼdxibe purtiʼ nadxiibe laacaʼ, ne cumu xiiñibe laacaʼ la? laaca racaláʼdxibe guibánicaʼ galán. Ne ngaca nga ni racalaʼdxiʼ binni ni riuulaʼdxiʼ guni ni jneza.
2 Jiobá bizulú biʼniʼ ni gudixhe ique ora bizulú bizáʼ guiráʼ cosa. Ni bizaʼbe primé nga Xiiñibe, ne despué de biasa lade ca gueʼtuʼ bihuinni «biaʼca nandxóʼ be nandxóʼ Xiiñi be, ne casi laabe Xiiñi be» (Hebreos 1:1-3). Gástiruʼ stobi casi Xiiñibe ca, purtiʼ laasibe bizaʼbe laa. Ne laa nga biquiiñebe para guyáʼ ca ángel ca guibáʼ ne despué guyáʼ binni lu Guidxilayú riʼ (Job 38:7; Lucas 3:38). Guiráʼ cani nuu guibáʼ ne ni nuu lu Guidxilayú riʼ beeda gácacaʼ ti familia si. Para laacabe Jiobá nga Dios ni runi mandar guidubi naca guibáʼ ne Guidxilayú ne laabe nga Bixhózecabe ni nadxii laacabe.
3. 1) Xi bisaanané Adán ne Eva laanu. 2) Pur nachaʼhuiʼ Jiobá, xi bidiibe para ca xiiñiʼ Adán.
3 Dxi bichee primé bixhózenu Adán ne jñaanu Eva purtiʼ gucaláʼdxicaʼ la? gudxi Dios laacabe záticabe, ne gulee laacabe de ndaaniʼ jardín ni guyuu Edén que ne maʼ qué ninádibe ñácacaʼ xiiñibe, ngue runi bireecabe lade xfamíliabe (Génesis 3:22-24; Deuteronomio 32:4, 5). Cumu xiiñicabe laanu la? guiranu ralenenu donda. Peru Jiobá nanna lade ca xiiñiʼ Adán ne Eva ziuu tu ziuulaʼdxiʼ guni ni jneza, ngue runi pur nacháʼhuibe la? bidiibe ni caquiiñeʼ para ganda guibánicaʼ galán casi nuu ca xiiñiʼ Dios (Romanos 8:20, 21).
Maʼ qué ñaca Israel xquidxi Jiobá
4. Tu beeda gaca ca israelita que para Jiobá.
4 Raca biaʼ chupa mil gaayuʼ gayuaa iza de bizáʼ Jiobá Adán guyuuláʼdxibe guidxiña binni laabe. Gulibe ca israelita ni guyuu dxiqué para gácacaʼ xquídxibe ne bidiibe laacaʼ Ley stibe (Génesis 12:1, 2). Biʼniʼ si Jiobá laacabe ti guidxi roʼ la? biquiiñeʼ laacabe para guni ni maca naguixhe ique (Deuteronomio 14:1, 2; Isaías 43:1). Peru bicheerucabeʼ ne gúticabe, ngue runi qué nibánicabe casi bibani Adán ne Eva dxi nacubi guyaʼcaʼ.
5. Xiñee maʼ qué ñaca ca israelita que xquidxi Dios.
5 Neca zacá ca israelita que la? bilaselaʼdxiʼ Dios laacabe. Peru gúpacabe xidé biʼniʼ respetárcabe laabe casi Bixhózecabe ne bíʼnicabe ni nabe para gaca ni naguixhe íquebe. Jesús gudxi laacabe pabiáʼ nga naquiiñeʼ gúnicabe ni na Dios (Mateo 5:43-48). Peru ni jma triste nga qué ñunidícabe ni. Neca guníʼ ca judíu que «Dios nga Bixhoze[caʼ]» la? Jesús gudxi laacabe qué rihuinni diʼ pa zacá ni lu cani rúnicabe ne modo xpiáʼcabe (Juan 8:41, 44, 47). Lu iza 33 despué de beeda Jesús que bichiá Jiobá ley ni bidii laacabe, ne maʼ qué ñápadibe laacaʼ casi xiiñibe. Ñee riníʼ nga maʼ guirutiʼ tu zanda chuʼ galán ne Dios la?
Cadopa guiráʼ ni chichuu guibáʼ
6. Xi para na Pablu gudixhe Dios gaca caadxi cosa casi cá lu Efesios 1:9, 10.
6 Apóstol Pablu guníʼ nuu caadxi hombre ne gunaa ni zanda chuʼcaʼ galán ne Dios. Cásixa ora bizeetebe de ni bidii Jiobá para chuʼ ca binni gapa fe lade xfamilia Jiobá la? sicaríʼ bicaabe: «[Dios nga gucané] guiene nu ni qué ñene binni chiqué. Ne ndi nga ni gudixhe be gacaʼ: chuʼ irá ni nuu ibáʼ ne irá ni nuu ndaani guidxilayú tobi si, ne gaca Cristu xaíque sti irá xixé. Ne zaca ni, ganda si xhi ni» (Efesios 1:9, 10). Ne Jesucristu nga ni jma risaca lade cani «gudixhe be gaca». Pur laabe zanda chuʼ binni galán nezalú Dios: caadxi de laacaʼ checaʼ guibáʼ, ne jma stale de laacaʼ zabani lu Guidxilayú riʼ sin qué chuʼ dxi gáticaʼ.
7. Tuu nga «irá ni [chichuu] ibáʼ».
7 Primé la? lu Pentecostés stiʼ iza 33 despué de beeda Jesús que bizulú bidopa «irá ni [chichuu] ibáʼ», nga nga cani chiguni mandarné Cristu guibáʼ lu Reinu stiʼ. Pur fe ni nápacabe lu rini ni bixhii Jesús para gulá laanu ca, maʼ bixhá Dios stóndacabe (Romanos 5:1, 2). Despué maʼ cadi ca judíu si guyuu lu grupu ca, sínuque ne binni ni cadi judíu dede ra bizaa 144,000 binni «ni [chichuu] ibáʼ» (Gálatas 3:26-29; Apocalipsis 14:1). Yanna riʼ maʼ xcaadxi si de laacabe nuu lu Guidxilayú riʼ.
Cadopa «irá ni nuu ndaani guidxilayú»
8. Tuu nga «irá ni nuu ndaani guidxilayú» riʼ, ne ximodo nuunécabe Jiobá.
8 Laaca pur modo naguixhe Jiobá gaca ni na nga cadopa «irá ni nuu ndaani guidxilayú» riʼ, nga nga ca binni ni cabézacaʼ guibánicaʼ lu Guidxilayú sin qué chuʼ dxi gáticaʼ, ne maʼ nuu millón de laacabe. Laacabe ne xcaadxi de cani chiguni mandar lu Reinu stiʼ Dios ni nuurucaʼ lu Guidxilayú riʼ, tobi si nuucabe cusisácabe lá Jiobá ne cayuni adorárcabe laabe (Isaías 2:2, 3; Sofonías 3:9). Laaca nácabe Bixhózecabe nga Jiobá purtiʼ nánnacabe dxandíʼ laabe nga rudiibe guendanabani. Ne galán nuucabe nezalube purtiʼ nápacabe fe lu rini ni bixhii Jesús (Apocalipsis 7:9, 14). Peru cumu binni rucheeruʼ laacabe la? caʼruʼ diʼ gacapécabe xiiñiʼ Dios.
9. Xii nga na Romanos 8:21 chigaca para binni.
9 Ca binni ni chiguibani lu Guidxilayú riʼ maʼ racaláʼdxicabe guedandá dxi guiree binni de «lu ná enda nayuudxuʼ» (Romanos 8:21). Maʼ qué ziuu ca cosa malu ca ora guiluxe ca dxi ni nabé naná ca, zácani dxi gueeda Cristu ne ca xpinni ni nuu guibáʼ para tíndecaʼ lu Armagedón. Dxi ca zanitilú guiráʼ xixé cosa malu stiʼ Binidxabaʼ, ne gaca si nga maʼ zedané Cristu ndaayaʼ raríʼ ora guni mandarbe lu ti mil iza (Apocalipsis 19:17-21; 20:6).
10. Xii nga chiguunda ca xpinni Jiobá para gusisácacaʼ laabe.
10 Dxandíʼ nabé ziuu guendanayecheʼ ora guʼndaʼ ca xpinni Jiobá ni nuucaʼ lu Guidxilayú riʼ cásica ruundaʼ ca xpínnibe ni nuu guibáʼ, nacaʼ: «Naroʼba ne de enda ridxagayaa irá ni runi luʼ, Señor Dios ni jma nandxóʼ. Jneza ne sicarú irá ni riguixhe luʼ, lii ni runi mandar irá guidxi. Tuu nga qué idxibi lii ne usisaca lii yaʼ, Señor, purti iruti ru casi lii. Ne zeda uzuxibi irá binni xa ñee luʼ purti ma bihuinni jneza ni runi luʼ» (Apocalipsis 15:3, 4). Dxandipeʼ guiráʼ ca xpinni Jiobá ziuucaʼ tobi si para guni adorarcaʼ tobi lucha Dios ni dxandíʼ ca. Dede ziasa ca gueʼtuʼ ca, ne pa nácabe la? laaca zanda gusisácabe Jiobá (Hechos 24:15).
Guizáʼ sicarú modo chiguibani binni
11. Ximodo ndiʼ chiguibani ca binni ni guilá lu ca dxi ni nabé naná ca despué.
11 Ca dxi ni nabé naná riʼ zalúxecani ora gueeda Armagedón, ne guiropaʼ ni chigaca riʼ chindeecani guiráʼ ca guendaquéiquiiñeʼ nuu lu Guidxilayú riʼ, ne óraca maʼ qué zaca diʼ Binidxabaʼ «xaíque sti guidxilayú riʼ». Ca binni ni runi adorar Jiobá maʼ qué zudxiilurucaʼ guiráʼ cosa malu ni riquiiñeʼ Binidxabaʼ para uquiinde laanu (Juan 14:30; Apocalipsis 20:1, 2). Religión ni cadi dxandíʼ ca maʼ qué zucaadini binni gacananaláʼdxisaa ne maʼ qué zusiidini ni cadi dxandíʼ de Jiobá. Maʼ qué ziuuruʼ dxi guniná gobiernu ca xpinni Dios ne maʼ qué zuquiichinádicabe laacaʼ. ¡Guizáʼ sicarú modo chiguibani binni dxi ca!
12. Ximodo nga maʼ qué zuni mandar pecadu binni, ne ximodo nga maʼ qué zuninani laacabe.
12 Jesús, «dendxu huiini sti Dios ni ribee xpecadu binni guidxilayú», zuxhabe stonda guiráʼ binni pur rini nabé risaca ni bixhiibe que (Juan 1:29). Dxi guyuube lu Guidxilayú riʼ bisiándabe binni huará ti guihuinni maʼ bitiidiláʼdxibe stóndacaʼ (Mateo 9:1-7; 15:30, 31). Ne yanna ra maʼ nácabe Rey lu Reinu stiʼ Dios guibáʼ ca laaca zúnibe milagru, zusiándabe cani nacheepaʼ lú, cani qué riníʼ, cani qué rizá, cani huará xquendabiaanicaʼ ne cani napa intiica si guendahuará (Apocalipsis 21:3, 4). Guiráʼ binni ni guzuubaʼ diidxaʼ maʼ qué zuni mandar pecadu laacaʼ, ne maʼ zaníʼ íquecabe ne zúnicabe ni gusiecheʼ laacabe ne ni gusiecheʼ Dios (Romanos 7:21-23). Ora maʼ guiluxe ti mil iza ca la? maʼ gastiʼ donda luguiácabe, ne zácacabe casi tobi lucha Dios ni dxandíʼ ca (Génesis 1:26).
13. Xi chiguni Jesús dxi guni mandar lu ti mil iza ca, ne xi zúnibe ora guilúxeni.
13 Ora maʼ gulee Cristu donda luguiáʼ binni la? zudxiguétabe Bixhózebe derechu ni bidii laabe para gúnibe dxiiñaʼ ca: «Ra quixhe dxí Cristu irá xixé ni runi mandar ndaani guidxilayú, purti zunitilú be irá ni cadi jneza ni nuu lu guidxilayú, ne óraque ma zudii be ca xpinni be Dios Bixhoze be para guni mandar. Purti napa be xidé guni mandar be dede cuaqui dxí Dios irá cani cadi nuu né laabe tobi si» (1 Corintios 15:24, 25). Lu ti mil iza guni mandar Cristu lu Reinu ca zúnibe guiráʼ ni maca nexheʼ gaca, nga runi maʼ qué zaquiiñeruʼ chuʼ Reinu ca para guidxíñanu Jiobá. Ne cumu zaree donda luguiáʼ binni ne maʼ qué ziuu guendaguti ne maʼ bilá guiráʼ binni dxi ca la? maʼ qué zaquiiñeruʼ dxiiñaʼ ni biʼniʼ Jesús para gulabe binni que. Sicaríʼ cusiene Biblia de Jesús: «Laca zuni mandar Bixhoze be laabe, ti laa aca xaíque sti irá ni» (1 Corintios 15:28).
14. Xi lu chitiidiʼ guiráʼ ca binni ni maʼ biree donda luguiáʼ ca, ne xiñee.
14 Gaca si nga la? guiráʼ binni ni maʼ biree donda luguiáʼ zusihuínnicaʼ qué racaláʼdxicaʼ gusaanacaʼ de gúnicaʼ ni na Dios ni dxandíʼ ca. Nga runi ante guicaa Jiobá laacabe casi xiiñipeʼ la? zudiibe lugar tiidicaʼ lu últimu guendanagana ni chigaca ti gusihuínnicaʼ pa dxandíʼ zúnicaʼ ni nabe. Zaree Binidxabaʼ ne ca demonio de ra deguyoocaʼ. Ne neca guniná Binidxabaʼ cani nadxii Jiobá de guidubi ladxidóʼ la? zanda cuee Jiobá guiráʼ yuubaʼ gápacabe. Peru cani gusaana Jiobá ne gudiicaʼ lugar gucaa stobi laacaʼ cadi guzuubacaʼ stiidxabe la? zanitilunecaʼ Binidxabaʼ ni bicaalú Dios primé que ne ca demonio stiʼ ne maʼ qué ziuuruʼ dxi guibánicaʼ (Apocalipsis 20:7-10).
15. Ximodo chichuu guiráʼ ca ángel ne ca binni ni bizáʼ Jiobá ca sti biaje yaʼ.
15 Jiobá zacaa casi xiiñiʼ guiráʼ ca binni ni maʼ qué gápacaʼ donda, ne gusihuínnicaʼ nuucaʼ pur derechu ni nápabe de guni mandarbe ora tiidicaʼ lu últimu guendanagana ni chigaca ca. Oracaruʼ maʼ qué zacácabe yaga lu náʼ guendaruchee ne ziuucabe galán casi nuu ca xiiñiʼ Dios guibáʼ ne maʼ zácacabe xfamilia Jiobá ni nuucaʼ guibáʼ ne lu Guidxilayú. Ne maʼ ziuucabe tobi si sti biaje para guni adorárcabe tobi lucha Dios ni dxandíʼ, ne zacá nga chiguihuinni guizáʼ galán modo chigaca ni gudixhe ique Jiobá que. Guizáʼ nayecheʼ ziuu xfamilia Dios ni chichuu guibáʼ ne lu Guidxilayú riʼ, ne zabánicabe sin qué chuʼ dxi gáticabe. Ñuuláʼdxiluʼ ñuuluʼ ládecabe la? Pa riuuláʼdxiluʼ la? galán guʼnuʼ ni na ca diidxaʼ ni cá ndaaniʼ Biblia lu 1 Juan 2:17: «Canitilú guidxilayú ne irá ni nuu ndaani ni que, peru qué ziuu dxi initilú ni guni ni na Dios».
Ni guietenaláʼdxinu
• Guiráʼ cani runi adorar Jiobá que, ximodo guyuunécabe laabe ante gucaalúcabe laabe ndaaniʼ jardín stiʼ Edén que.
• Xi naquiiñeʼ guni ca xpinni Dios.
• Tuu nga cani chigaca xiiñiʼ Dios, ne ximodo racané nga guni adorárcabe laabe tobi si para gaca ni naguixhe íquebe.
[Dibuju/foto ni zeeda lu yaza 190]
Ca binni ni guzuubaʼ diidxaʼ zabánicaʼ nayecheʼ ndaaniʼ ti paraísu ni chichuu lu guidubi naca Guidxilayú