Xi ruchaa lu ti guendaxheelaʼ ora gale ti baʼduhuiiniʼ

Nabé nayecheʼ riuu cani maʼ bichaganáʼ ora gápacaʼ primé xiiñicaʼ, peru laaca raca ni nagana para laacaʼ. Zándaca guidxagayaatu ora gúʼyatu pabiáʼ tiempu ne stipa riquiiñetu para gápatu baʼduhuiiniʼ stitu. Laaca zanda gapa ti guendaxheelaʼ guendanagana purtiʼ qué rizaa xpacaandacaʼ ne purtiʼ ruchaa ca sentimientu sticaʼ. Nga runi, guirópatu naquiiñeʼ quíxhetu xi gúnitu para gúʼyatu xiiñitu ne chuʼtu galán lu xquendaxheelatu. Ximodo zanda gacané ca conseju zeeda lu Biblia laatu para gudxiilutu ca guendanagana riʼ.

1 BIENE ZUCHAA XQUENDANABÁNILUʼ ORA GALE XIIÑILUʼ

NI RUSIIDIʼ BIBLIA: «Pa nadxii lu stobi la? qué zadxiichi né gá lu laa, ne ziá lu laa [...], qué zuyubu para lii siouʼ. Cadi neca gasti si guni lii maca cadxiichi neu laa» (1 Corintios 13:4, 5). Lii, gunaa ni maʼ bichaganáʼ, cumu deruʼ gúpaluʼ primé xiiñuʼ la? nabé zacá íqueluʼ gúʼyaluʼ laa. Peru zándaca pur nga guni sentir xheeluʼ cucaanaluʼ laa, nga runi cadi guiaandaʼ lii laaca caquiiñeʼ gulábiluʼ laa. Gupa paciencia xheeluʼ ne guca nachaʼhuiʼ né laa, purtiʼ zacá zusihuinnuʼ riquiiñuʼ laa ne rusisácaluʼ stipa runi ora racané lii gúʼyatu baʼduhuiiniʼ stitu.

Laatu, ca hombre ni maʼ bichaganáʼ, «lauyubi modo guiene tu xheela tu» (1 Pedro 3:7). Pa lii nga hombre ca ne deruʼ gupa xheeluʼ primé xiiñitu la? naquiiñeʼ guieʼnuʼ jma zabeebe tiempu gúʼyabe baʼduhuiiniʼ stitu yanna ne zándaca gaca estresarbe, guidxágabe o dede gaca deprimirbe pur ca dxiiñaʼ ni cayúnibe ra maʼ nápabe baʼduʼ. Zándaca nuu tiru zadxiichinebe lii, peru cadi gacuʼ naduxhuʼ, purtiʼ «jma risaca ti binni ni rindaa para guidxiichi que ti binni ni napa poder» (Proverbios 16:32). Biene modo nuube ne bidii laabe ni caquiiñebe (Proverbios 14:29).

NI ZANDA GUʼNUʼ:

• Pa lii nga hombre napa xiiñiʼ: Dede né huaxhinni gucané xheeluʼ gúʼyatu xiiñihuiinitu. Cadi tan gunítiluʼ tiempu lu xcaadxi dxiiñaʼ ti gápaluʼ jma tiempu chúʼneluʼ xheeluʼ ne xiiñuʼ

• Pa lii nga gunaa napa xiiñiʼ: Bidii lugar gacané xheeluʼ lii né baʼduhuiiniʼ stitu ora guinábabe ni lii. Pa qué gánnabe gúʼyabe baʼduʼ la? cadi gaʼbuʼ laabe xiñee qué gúnibe ni jneza, bisiidiʼ laabe né diidxaʼ nadóʼ ximodo gúnibe ni

2 BIʼNIʼ STIPA CHUʼ XQUENDAXHEELALUʼ NAGUIDXI

NI RUSIIDIʼ BIBLIA: Napa xidé «gácacabe ti beela si» (Génesis 2:24). Neca maʼ nuu ti baʼduʼ lu familia stitu, cadi guiaandaʼ lii nácatu tobi si, o «ti beela si». Biʼniʼ stipa biaʼ gándatiʼ ti cadi chuʼ xiixa ni guxheleʼ lii de xheeluʼ.

Lii, gunaa ni maʼ bichaganáʼ, bidii xquíxepeʼ xheeluʼ saca racané lii ne saca riguu gana lii. Ca diidxaʼ guiniuʼ para gudiiluʼ xquíxepeʼ laabe zanda gácacani casi ti remediu (Proverbios 12:18). Lii, hombre ni maʼ bichaganáʼ, gudxi xheeluʼ pabiáʼ nadxiiluʼ laa ne pabiáʼ rusisácaluʼ laa, ne gudxi laa pabiáʼ rusisácaluʼ ni runi pur familia stitu (Proverbios 31:10, 28).

«Naquiiñe uyubi nu acané nu stobi ne cadi uyubi nu para laasi nu.» (1 Corintios 10:24.) Cadi gusaana de guʼnuʼ ni chuulaʼdxiʼ xheeluʼ ne bisisaca stipa runi. Lacuee tiempu güitu diidxaʼ ne bicaadiaga ora maʼ caniʼbe. Cadi ora si gacalaʼdxuʼ gapaneluʼ xheeluʼ relación sexual. Laaca naquiiñeʼ gannuʼ xi nabe ne ximodo nuube. Biblia na: «Cadi na tu qué gasi né tu xheela tu» pa caʼruʼ guiaanatu gúnitu ni (1 Corintios 7:3-5). Laguiníʼ xi riníʼ íquetu de laani. Pa gápaluʼ paciencia ne guieʼnuʼ laabe la? ziuu xquendaxheelatu jma naguidxi.

NI ZANDA GUʼNUʼ:

• Cadi guiaandaʼ lii cueeluʼ tiempu chúʼneluʼ xheeluʼ stúbitu

• Biquiiñeʼ xiixa cosahuiiniʼ para gusihuinnuʼ nadxiiluʼ xheeluʼ, casi gudiiluʼ laa ti nota o gusigáʼdeluʼ laa xiixa

3 BISIIDIʼ BAʼDUHUIINIʼ STIUʼ

NI RUSIIDIʼ BIBLIA: «Dede dxi nahuiini lu biziidi lu ni cá lu Xquiʼchi Dios ni zanda usiene lii ximodo ilá binni» (2 Timoteo 3:15). Dede ante naquiiñeʼ quíxheluʼ ximodo gusiiduʼ xiiñuʼ. Cadi guiaandaʼ lii, neca caʼruʼ gálebe maʼ zanda guiziidibe stale cosa. Casi gunibiaʼbe stídxiluʼ ne gánnabe ximodo nuuluʼ neca caʼruʼ gálebe. Dede nahuiinibe biindané laabe xiixa guiʼchiʼ, neca qué guiénebe ni, ti chuuláʼdxibe gúʼndabe ora maʼ guiniisibe.

Cadi guiníʼ íqueluʼ nahuiiniruʼ baʼduhuiiniʼ stiuʼ para gusiiduʼ laa de Dios. Biʼniʼ orar Jiobá nezalube (Deuteronomio 11:19). Ora quiteneuʼ xiiñuʼ byuiʼné laa xi guiráʼ bizáʼ Dios (Salmo 78:3, 4). Ra guiniisi xiiñuʼ, zudii cuenta pabiáʼ nadxiiluʼ Jiobá ne laaca zaziidiʼ gannaxhii laabe.

NI ZANDA GUʼNUʼ:

• Gunabaʼ Dios gudii lii guendabiaaniʼ para gusiiduʼ xiiñuʼ

• Gatigá gudxi baʼduhuiiniʼ stiuʼ xiixa diidxaʼ ni jma caquiiñeʼ guiziidiʼ nagueenda