Jesús: neza, ni dxandíʼ ne guendanabani

¿Cadi dxandíʼ riuuláʼdxiluʼ gunadiágaluʼ noticia galán la? ¿Ñee nannuʼ napa Jehová, Dios ni bizáʼ universu, noticia galán para lii ne familia stiluʼ la?

Zadxélaluʼ ni lu Biblia, ti libru ni biʼniʼ mandar Jehová guicá raca stale iza, ne nuu tapa libru ni ziné lá ca hombre ni bicaa ni, laaca ni nga: Mateo, Marcos, Lucas ne Juan. Ne lu guidapaʼ libru stiʼ Biblia riʼ nga biree libru riʼ.

Stale binni runibiáʼ ca libru riʼ casi guidapaʼ Evangeliu. Diidxaʼ evangeliu riníʼ ni «noticia galán», ne dxandíʼ peʼ zeeda noticia galán ni caníʼ de Jesús lu guidapaʼ libru riʼ. Casi ¿xi laa yaʼ? Biquiiñeʼ Dios Jesús para gulá laanu ne ora maʼ naca Jesús Rey lu Reinu stiʼ Dios ni nuu guibáʼ zedané ndaayaʼ para ca binni ni gapa fe laa (Marcos 10:17, 30; 13:13).

¿XIÑEE NUU TAPA EVANGELIU?

Zándaca guiníʼ íquenu xiñee guníʼ Dios guicá tapa relatu ni cuzeeteʼ ximodo bibani Jesús ne guiráʼ ni bisiidiʼ.

Guizáʼ galán nga guniʼbe guicá guidapaʼ relatu riʼ. Quíxhenu ti ejemplu. Guxuíʼlunu nuu tapa hombre nezalú ti maestru nabé famoso. Zuhuaa ti hombre ni runi cobrar impuestu nezalú maestru riʼ. Ladu derechu stibe zuhuaa ti doctor. Ladu bigaʼ stiʼ maestru riʼ zuhuaa ti pescador ne guizáʼ xhamígube laa. Ne neza déchebe zuhuaa ni jma nahuiiniʼ de guirácabe. Neca riníʼ guidapaʼ hombre riʼ ni dxandíʼ, peru gadxé gadxé ni riguu xizaa laacabe ne gadxé gadxé modo riníʼ íquecabe. Pa cada tobi de laacabe nucaa ti relatu de ni bisiidiʼ ne ni biʼniʼ maestru que, ni jma seguru nga gadxé gadxé detalle nucaa cada tobi laacabe. Ora guidúʼndanu guidapaʼ relatu bicaa ca hombre riʼ, jma ziénenu xi guiráʼ guníʼ maestru que ne xi biʼniʼ, purtiʼ cada tobi de ca hombre riʼ gadxé gadxé modo riníʼ ique. Zaqueca nga guizáʼ galán nápanu guidapaʼ relatu ni caníʼ de modo bibani Jesús, Maestru ni jma nanna gusiidiʼ.

Guni seguirnu né ejemplu que. Guiníʼ íquenu racalaʼdxiʼ hombre ni runi cobrar impuestu que gucaa para ca binni judíu, ngue runi bicaa caadxi de ni bisiidiʼ maestru que para gacané ca binni judíu. Peru doctor que jma guyuulaʼdxiʼ gusiene de modo bianda binni huará ne ca ni nachiitaʼ ñee. Nga runi, qué nucaa xcaadxi detalle ni bizeeteʼ hombre ni runi cobrar impuestu que, o bicaa ni peru gadxé orden. Peru xhamigu maestru que bicaa ca cualidad stiʼ maestru que ne xi guiráʼ biʼniʼ, ne ni jma nahuiiniʼ que, jma huaxiéʼ diidxaʼ biquiiñeʼ para gusiene xi guníʼ maestru que ne xi biʼniʼ. Neca zaqué, jneza guiráʼ ni bicaa ca hombre riʼ. Ngaca nga rizaaca né ca Evangeliu: racané guidapaʼ relatu ca laanu guiene chaahuinu modo bibani Jesús, guiráʼ cosa ni bíʼnibe, ni bisiidibe ne ximodo gúcabe.

Nabé nga riníʼ binni «Evangeliu stiʼ Mateo», «Evangeliu stiʼ Juan» ne jneza ni, purtiʼ lu guidapaʼ ni zeeda «noticia galán ni caníʼ de Jesucristu» (Marcos 1:1). Peru ti evangeliu si nga nuu, ne zeeda ni lu tapa relatu.

Stale investigador maʼ bichaagacaʼ ne maʼ gudixhe chaahuiʼ ca cosa ni riete lu Evangeliu stiʼ Mateo, Marcos, Lucas ne Juan. Nga peʼ nga ni biʼniʼ ti escritor sirio ni láʼ Taciano, guníʼ hombre riʼ biaʼsi ni cá lu guidapaʼ libru ca ne dxandíʼ peʼ zeeda ni de Dios. Ne biaʼ lu iza 170 bicaabe libru ni láʼ Diatessaron, ni bisiene lu ti relatu si modo bibani Jesús ne modo biʼniʼ xhiiñaʼ Dios.

Zacagá nga zeeda gaca libru riʼ, ni láʼ Jesús: neza, ni dxandíʼ ne guendanabani, peru jma biaʼsi ni cá luni. Gunda guca libru riʼ purtiʼ jma riénenu xi riníʼ ca ejemplu ne comparación ni guníʼ Jesús, zaqueca stale profecía ni guniʼbe. Racané ndiʼ laanu guiene chaahuinu xi biʼniʼ Jesús ne xi guníʼ, ne orden bizaaca ca cosa ca. Laaca racané guiráʼ ni huadxela ca arqueólogo laanu guiénenu xcaadxi detalle ne modo riníʼ ique ca hombre bicaa ca evangeliu. Neca qué zanda chuʼnu seguru xi orden bizaaca ca cosa ca, peru lu libru riʼ nexheʼ chaahuini modo zándaca bizaaca ni.

NEZA, NI DXANDÍʼ NE GUENDANABANI

Ora guidúʼndanu libru riʼ cadi guiaandaʼ laanu xii nga ni jma risaca cusiidini laanu. Guietenaláʼdxinu xi gudxi Jesucristu apóstol Tomás: «Naa nga neza, ni dxandíʼ ne guendanabani. Guirutiʼ zanda cheʼ ra nuu Bixhozeʼ pa cadi pur naa» (Juan 14:6).

Zacané libru riʼ laanu guiénenu xiñee naca Jesús «neza». Pur mediu de laabe zanda guni orarnu Jehová, chuʼnu gaxha de laa ne chuulaʼdxiʼ ni gúninu (Juan 16:23; Romanos 5:8).

Jesús nga «ni dxandíʼ», purtiʼ siempre guniʼbe ni dxandíʼ ne bíʼnibe guiráʼ ni guniʼbe. Ne stale de ca profecía «guca cumplir ni pur Jesús», ndiʼ racané laanu guiénenu pabiáʼ risaca dxiiñaʼ bidii Dios laabe para gaca cumplir ni naguixhe ique guni (2 Corintios 1:20; Juan 1:14; Apocalipsis 19:10).

Ne Jesucristu nga «guendanabani». Pur bidiibe guendanabani perfectu stibe laanu, zanda gápanu oportunidad de guicaanu «guendanabani, ni dxandíʼ guendanabani» o «guendanabani ni qué zaluxe» (1 Timoteo 6:12, 19; Efesios 1:7; 1 Juan 1:7). Laaca zácabe «guendanabani» para millón de binni ni maʼ guti peru zabánicaʼ sti biaje ne zápacaʼ esperanza de guibánicaʼ para siempre ndaaniʼ Paraísu (Juan 5:28, 29).

Guiranu naquiiñeʼ guiénenu ne gusisácanu dxiiñaʼ ni napa Jesús para gaca cumplir ni naguixhe ique Dios. Nabé ziuuláʼdxinu guizíʼdinu de Jesús purtiʼ laa nga «neza, ni dxandíʼ ne guendanabani».