Biiyacabe gloria stiʼ Cristu lu ti visión

Cusiidiʼ Jesús lu región stiʼ Cesarea de Filipo, ni riaana 25 kilómetru de dani Hermón, ora gúdxibe ca apóstol stibe: «Gábecaʼ laatu nuu chupa chonna de ca ni nuu raríʼ, qué záticaʼ dede qué gúʼyacaʼ zeeda Xiiñiʼ Hombre lu Reinu stiʼ» (Mateo 16:28).

Zándaca caníʼ ique ca apóstol que xii ngue nuu Jesús guiníʼ. Gudiʼdiʼ si biaʼ ti semana, yené Jesús chonna apóstol stiʼ —Pedro, Santiago ne Juan— lu ti dani nasoo. Zándaca maʼ huaxhinni ngue, purtiʼ guiónnacabe daʼ bacaandaʼ lúcabe. Laga cayuni orar Jesús, bidxaa modo bihuinni nezalúcabe. Óraque biiyaʼ ca apóstol que bizaaniʼ lú Jesús casi Gubidxa ne bizaaniʼ xhaba casi biaaniʼ, naquichibé bihuinni xhábabe.

Málasi bihuinni chupa hombre, «Moisés ne Elías». Ne caníʼcabe «napa xidé cheʼ Jesús», ne zaca cumplir ndiʼ Jerusalén (Lucas 9:30, 31). Ca diidxaʼ «napa xidé cheʼ Jesús», zazaacaʼ ni dxi gatiʼ Jesús ne guiasa de lade gueʼtuʼ, ne cadi tan xadxí bizeeteʼ Jesús ni (Mateo 16:21). Peru neca qué náʼ Pedro gatiʼ Jesús, qué zanda guni xiixa para gucueeza guendaguti stiʼ Jesús.

Maʼ biree bacaandaʼ lu ca apóstol que, guizáʼ cadxagayaacaʼ pur ni cayuuyacaʼ ne guiráʼ ni cayunadiágacaʼ. Neca ti visión nga bíʼyacabe, peru guizáʼ dxandíʼ bihuinni ni dede guníʼ Pedro: «Rabí, ¡aque galán nuunu raríʼ xa! Zuni armardu chonna carpa: tobi para lii, tobi para Moisés ne tobi para Elías» (Marcos 9:5). ¿Ñee guniʼbe ngue purtiʼ racaláʼdxibe guindaa visión que la?

Laga caníʼ Pedro, málasi bitaaguʼ ti za nabé ruzaaniʼ laacabe ne biree ti voz lade za que ne ná: «Ndiʼ nga Xiiñeʼ ni nadxieeʼ; ni rusiecheʼ naa. Lagucaadiaga laa». Ora binadiaga ca apóstol que voz stiʼ Dios, guizáʼ bidxíbicaʼ, bizuxíbicaʼ ne gundeteʼ íquecaʼ, peru Jesús gudxi laacabe: «Laguiasa. Cadi guidxíbitu» (Mateo 17:5-7). Ora biásacaʼ maʼ guirutiʼ ñuuyacaʼ, sínuque Jesús si. Raqué biluxe visión que. Maʼ birá gueelaʼ, laga ziyétecabe lu dani que, gudxi Jesús laacabe: «Cadi gábitu guirutiʼ visión ni bíʼyatu riʼ dede ora maʼ biasa Xiiñiʼ Hombre lade gueʼtuʼ» (Mateo 17:9).

Cumu biiyaʼ ca apóstol que Elías lu visión que, ngue runi gunabadiidxacaʼ Jesús: «¿Ximodo nga ná ca escriba primeru naquiiñeʼ gueeda Elías pue?». Para bicábibe laacaʼ: «Maʼ beeda Elías ne qué ñunibiáʼcabe laa» (Mateo 17:10-12). Caníʼ Jesús de Juan Bautista, laa nga biʼniʼ dxiiñaʼ stiʼ casi biʼniʼ Elías. Biʼniʼ preparar Elías ti neza para Eliseo ne Juan biʼniʼ preparar ti neza para Cristu.

Nanna dxíchinu bidii visión riʼ stipa Jesús ne ca apóstol stiʼ, purtiʼ biiyacaʼ gloria stiʼ Cristu ora maʼ gaca Rey lu Reinu stiʼ Dios. Casi maca guníʼ Jesús, zuuyacabe «zeeda Xiiñiʼ Hombre lu Reinu stiʼ» (Mateo 16:28). Laapecabe bíʼyacabe «gloria stibe» lu dani que. Neca gucalaʼdxiʼ ca fariseu que nudii Jesús laacaʼ ti señal ni nusihuinni laa nga Rey ni gulí Dios, peru qué nudiibe ni laacaʼ. Peru ca discípulo ni jma bidxaaga Jesús, gunda biiyacaʼ visión ra bidxaa modo bihuinni Jesús, ne de Reinu riʼ nga ni guníʼ ca profecía que. Ngue runi despué bicaa Pedro: «Runi crenu zaca cumplir guiráʼ ni riníʼ Dios» (2 Pedro 1:16-19).