Bisianda Jesús ti hombrehuiiniʼ ni nuu demonio lu xcuerpu

Ora biete Jesús, Pedro, Santiago ne Juan lu dani, biiyacabe stale binni. Ruluíʼ cayaca xiixa raqué. Nuu caadxi escriba ra nuu ca discípulo stibe ne cayuni discutirnecaʼ laacabe. Ora biʼyaʼ ca binni que Jesús, bidxagayaacaʼ ne ziguxooñecaʼ para guidxagalucaʼ laabe. Ora biʼyaʼ Jesús ca binni que, gunabadiidxabe laacaʼ: «¿Xi cayuni discutirtu né laacabe pue?» (Marcos 9:16).

Málasi biree ti hombre lade ca binni que, bizuxibi nezalube ne gudxi laabe: «Maestru, bedaniaʼ xiiñeʼ ra nuuluʼ purtiʼ nuu ti espíritu luguiabe ni maʼ biʼniʼ laabe mudu. Cada biaje guni atacar espíritu riʼ joven riʼ, rusaba laabe layú, riree bichiiñaʼ ruaabe, ruquiichiʼ láyabe ne rirá stipa stibe. Gunabaʼ ca discípulo stiluʼ nibeecaʼ espíritu riʼ, peru qué ñanda ñúnicaʼ ni» (Marcos 9:17, 18).

Ruluíʼ cayuni burla ca escriba que ca discípulo stiʼ Jesús purtiʼ qué ñanda nusiándacaʼ hombrehuiiniʼ que. Lugar de nicabi Jesús bixhoze hombrehuiiniʼ que, gúdxibe ca binni que: «¡Qué gapa generación riʼ fe ne ruchee! ¿Xpabiáʼ tiempu naquiiñeʼ guiaananiaʼ laatu pue? ¿Xpabiáʼ tiempu naquiiñeʼ guneʼ huantar laatu pue?». Nánnanu guniʼbe ca diidxaʼ riʼ pur ca escriba ni cayuni discutir né ca discípulo stibe, laga nuube lu dani que. Óraque gudxi Jesús bixhoze hombrehuiiniʼ que guedané xiiñiʼ ra nuube (Mateo 17:17).

Ora bidxiña hombrehuiiniʼ que Jesús, bisaba demonio que laabe layú ne biʼniʼ pur gudii ataque laabe. Bitubi hombrehuiiniʼ que layú ne biree bichiiñaʼ ruaa. Óraque gunabadiidxaʼ Jesús bixhózebe: «¿Dede padxí rácabe sicaríʼ pue?». Para bicabi: «Dede dxi nácabe ti xcuidihuiiniʼ. Stale biaje rusaba espíritu riʼ laabe lu bele ne ndaaniʼ nisa para guuti laabe». Ne gunábabe Jesús: «Pa zanda gúniluʼ xiixa la? biá laadu ne gucané laadu» (Marcos 9:21, 22).

Guizáʼ nuu bixhoze hombrehuiiniʼ que xizaa, purtiʼ nin ca discípulo stiʼ Jesús qué ñanda ñúnicaʼ xiixa pur laabe. Óraque bicabi Jesús laabe né diidxaʼ nadóʼ ni gudixhedxí ladxidoʼbe: «¡Ni guniʼluʼ: “Pa zanda gúniluʼ”...! Guiráʼ ni zanda gaca para ti binni napa fe». Oraqueca bicaa bixhoze hombrehuiiniʼ que ridxi: «¡Napaʼ fe! ¡Peru gucané naa gapaʼ jma fe!» (Marcos 9:23, 24).

Ora bidii Jesús cuenta zeeda guxooñeʼ stale binni ra nuucaʼ, gudindenebe espíritu malu que ne gúdxibe laa: «Espíritu mudu ne diagacuaataʼ, ¡cayuneʼ mandar lii guireeluʼ de lu xcuérpube ne maʼ cadi chuʼluʼ sti biaje!». Peru ante guiree demonio que, bicaabe hombrehuiiniʼ que gucaa ridxi ne bíʼnibe pur gudii ataque laa stale biaje. Ne biaana hombrehuiiniʼ que casi gueʼtuʼ. Ngue runi ná ca binni que maʼ gútibe (Marcos 9:25, 26). Peru gunaazeʼ Jesús náʼ hombrehuiiniʼ que ne gundisaʼ laabe, maʼ biándabe (Mateo 17:18). Nánnanu guizáʼ bidxagayaa ca binni que ora bíʼyacaʼ ni biʼniʼ Jesús que.

Raca chupa chonna gubidxa, biseendaʼ Jesús ca discípulo stiʼ chiguni predicar, ne ca dxi que gunda guleecaʼ demonio luguiáʼ binni. Biuu si Jesús ne ca discípulo stiʼ ndaaniʼ ti yoo, gunabadiidxacaʼ laabe laga nuucabe stúbicabe: «¿Xiñee qué ñanda nibeedu demonio ca pue?». Para gudxi Jesús laacaʼ purtiʼ huaxiéʼ fe nápacaʼ ne laaca guníʼ: «Né oración si zanda guiree clase demonio riʼ» (Marcos 9:28, 29). Para ñanda nibeecabe demonio ni napa poder que la? naquiiñeʼ ñápacabe stale fe ne ñuni orárcabe Dios para ñacané laacabe.

Ne últimu, gudxi Jesús laacabe: «Gábecaʼ laatu, pa nápatu fe biaʼ ti biidxiʼ mostaza la? zanda gábitu dani riʼ “Biree de raríʼ”, ne zaree; gastiʼ qué zaca nagana para laatu» (Mateo 17:20). ¡Pabiáʼ naroʼbaʼ poder napa fe!

Ca guendanagana ne ca yuubaʼ ni ridxaagalunu ora rúninu ni ná Jehová, zanda gaca ni naroʼbaʼ casi ti dani. Peru pa gaca fe stinu naguidxi la? zanda gudxíʼlunu ni.