¿Xiñee zanitilú ca judíu ni qué naʼ guni cré?

Maʼ stale cosa maʼ biʼniʼ Jesús para cuʼ gana ca binni que guiníʼ íquecaʼ ximodo nuucaʼ nezalú Dios. Yanna, despué de guniʼné Jesús caadxi binni fuera de ra lidxi ti fariseu, gúpabe sti oportunidad para guiníʼnebe laacaʼ sti biaje.

Chupa chonna de ca binni ni nuu raqué gúdxicaʼ Jesús de ti desgracia ni bizaaca. Gúdxicabe laabe biiti Poncio Pilato, ni naca gobernador stiʼ Roma, «caadxi binni de Galilea ni cudii sacrificiu» (Lucas 13:1). ¿Tudé ndiʼ caníʼcabe?

Zándaca caníʼcabe de ca binni de Galilea ni biiticabe laacaʼ ora bicaalú mil de judíu Pilato purtiʼ biquiiñeʼ bueltu stiʼ templu que para bizáʼ casi ti canal de concretu para chiné nisa ndaaniʼ guidxi Jerusalén. Zándaca gucuaa Pilato bueltu que purtiʼ bidii ca líder stiʼ ca judíu que ni laa. Zándaca caníʼ ique ca binni ni caniʼné Jesús de desgracia riʼ biʼniʼ ca binni de Galilea xiixa cosa malu ngue runi biiticabe laacaʼ. Peru cadi nuu diʼ Jesús de acuerdu né laacabe.

Ngue runi, gunabadiidxaʼ Jesús laacabe: «¿Ñee rábitu bizaaca ca binni de Galilea ndiʼ purtiʼ jma nápacaʼ pecadu que xcaadxi binni xquídxicaʼ la?». Para bicabi Jesús coʼ. Peru biquiiñebe desgracia riʼ para gudixhenabe ca judíu ra gúdxibe laacaʼ: «Pa qué gaca arrepentirtu la? laaca zanitilú guiratu» (Lucas 13:2, 3). De raqué guniʼné Jesús laacabe de sti desgracia ni cadi xadxí de bizaaca, ne zándaca bizaaca ni pur bicuícabe canal de concretu que.

Para guniʼruʼ Jesús: «Ca 18 binni gutiʼ ora biaba torre de Siloam luguiacaʼ, ¿ñee rábitu jma nápacabe pecadu que guiráʼ binni nabeza Jerusalén la?» (Lucas 13:4). Zándaca caníʼ ique ca binni ni caniʼné Jesús que guti ca binni que purtiʼ bíʼnicaʼ xiixa cosa malu ngue runi gúticaʼ. Peru laaca cadi nuu diʼ Jesús de acuerdu né ni caníʼ ique ca binni que. Nanna Jesús zanda guizaacanu xiixa cosa ni cadi cabézanu, ne zándaca nga nga ni bizaaca ca binni que (Eclesiastés 9:11). Neca zaqué, naquiiñeʼ niziidiʼ ca binni ni cucaadiaga Jesús xiixa de ni bizaaca riʼ. Ngue runi, gudixhená Jesús laacabe: «Pa qué gaca arrepentirtu la? laaca zanitilú guiratu, cásica binitilúcabe» (Lucas 13:5). ¿Xiñee gudixhená Jesús laacabe óraque pue?

Purtiʼ mayaca guiluxe guni xhiiñaʼ Dios lu Guidxilayú. Ne gudixhe Jesús ti ejemplu para gusiene ni: «Guyuu ti hombre napa ti yaga duʼgaʼ lu layú uva stiʼ, ne yeyubi cuananaxhi luni, peru gastiʼ qué nidxela. De raqué gúdxibe hombre runi dxiiñaʼ lu layú que: “Maʼ né ndiʼ chonna iza de redayubeʼ cuananaxhi lu yaga duʼgaʼ riʼ, ne gastiʼ qué ridxelaʼ. ¡Bisaba ni! ¿Xi para caroobaʼ ni lu layú riʼ pa cadi cudii ni cuananaxhi?”. Para ná hombre que rabi laabe: “Señor, bisaana ni sti iza si, chindaaʼ ñee ni ne chiuchayaʼ ni abono. Pa gudii ni cuananaxhi despué la? zaa zuhuaa ni; peru pa coʼ la? bisaba ni”» (Lucas 13:6-9).

Maʼ ziné Jesús jma de chonna iza de cayacané ca judíu que gápacaʼ fe. Peru neca cayúnibe dxiiñaʼ que, huaxiéʼ si tu cayaca discípulo stibe. Yanna, ra maʼ zinebe tapa iza de cayúnibe xhiiñaʼ Dios jmaruʼ si cayúnibe stipa para gacanebe laacaʼ. Cayuni predicar ne cusiidiʼ Jesús ndaaniʼ guidxi Judea ne Perea, casi ñaca nindaa ne nuchá abono ñee «yaga duʼgaʼ» ni zeeda gaca ca judíu que. Peru ¿xi huabeendube yaʼ? Caadxi si judíu huayaca discípulo stibe. Peru, mayoría de ca judíu qué nacaʼ gaca arrepentircaʼ, nga runi zanitilucaʼ.

Ne qué nindaa bihuinni ximodo naca ca binni ni qué naʼ gaca arrepentir. Ti dxi, cusiidiʼ Jesús ndaaniʼ ti sinagoga dxi sábadu, málasi biiyabe ti gunaa natigu deche pur ti demonio ne maʼ ziné gunaa riʼ 18 iza de huará. Biá Jesús gunaa riʼ, ne gudxi laabe: «Gunaa, maʼ bianda guendahuará stiluʼ» (Lucas 13:12). Óraque gudixhenáʼ Jesús luguiáʼ gunaa riʼ ne oraqueca bizuhuaa derechu ne bizulú cusisaca Dios.

Ora biʼyaʼ presidente stiʼ sinagoga ni bizaaca riʼ, guizáʼ bidxiichi ne guníʼ: «Nuu xhoopaʼ gubidxa para gaca dxiiñaʼ, nga runi latáʼ ca dxi ca para guiándatu, peru cadi gueedatu sábadu» (Lucas 13:14). Runi cré hombre riʼ napa Jesús poder para gusianda binni huará. Peru gudindenebe ca binni que purtiʼ riecaʼ ra nuu Jesús dxi sábadu para gusiándabe laacaʼ. Para bicabi Jesús hombre que: «Aque hipócrita laatu, ¿ñee qué ruxhéguetu toro o burru stitu ra cayó para chiugueʼtu nisa laame sábadu la? Yanna, gunaa riʼ, xiiñiʼ Abrahán laa, ne maʼ raca 18 iza de nundiibi Binidxabaʼ laa, ¿ñee cadi jneza guiándabe de guendahuará stibe neca sábadu la?» (Lucas 13:15, 16).

Ora guniʼbe ca diidxaʼ riʼ, bituilú guiráʼ ca ni cucaalú laabe, peru biecheʼ guiráʼ binni nuu raqué pur guiráʼ cosa sicarú ni cayuni Jesús. Óraque, bibiguetaʼ guniʼbe ndaaniʼ guidxi Judea chupa ejemplu ni caníʼ de Reinu, maca bizeetebe ca ejemplu riʼ dxi bisiidibe ndaaniʼ ti canuá lu nisadóʼ stiʼ Galilea (Mateo 13:31-33; Lucas 13:18-21).