Biguetaʼ ti leproso bidii xquixe peʼ purtiʼ maʼ bianda

Nuu Sanedrín que guuti Jesús, peru qué ganda gúnicaʼ ni purtiʼ zebe ndaaniʼ guidxi Efraín, ti guidxi ni riaana ladu noreste de Jerusalén. Ne biaananebe ca discípulo stibe raqué, zitu de ca xhenemígube (Juan 11:54). Cumu maʼ zedadxiña Pascua stiʼ iza 33 la? naquiiñeʼ guni viajarbe sti biaje. Zebe ladu guiaʼ, gudíʼdibe Samaria ne yendabe Galilea. Ndiʼ nga últimu biaje chebe región que ante gátibe.

Ne ra zidiʼdiʼ Jesús ca guidxihuiiniʼ que, bidxaagalube chii hombre napa lepra. Guendahuará riʼ, nuu tiru chaahuidugá rusiaya ni beela ladi binni, casi ca bicuinináʼ o diaga (Números 12:10-12). Ley stiʼ Dios que ná pa tuuxa napa lepra naquiiñeʼ gucaa ridxi ne guiníʼ nabiidiʼ o impuro laa ne cadi naquiiñeʼ chuʼ gaxha de binni (Levítico 13:45, 46).

Ne pur ngue, bizuhuaa ca hombre riʼ zitu de Jesús. Ne bicaacaʼ ridxi: «¡Jesús, Maestru, biá laadu!». Ora biʼyaʼ Jesús laacabe, guníʼ: «Laché, guʼyaʼ ca sacerdote laatu» (Lucas 17:13, 14). Zaqué bisihuínnibe runi respetarbe Ley, purtiʼ Ley que ná ca sacerdote nga naquiiñeʼ guiniʼcaʼ pa maʼ bianda tuuxa de lepra. Despué de nga, maʼ zanda chúʼcabe gaxha de ca binni nazaaca (Levítico 13:9-17).

Cumu napa ca leproso riʼ confianza napa Jesús poder para guni milagru ne gusianda laacaʼ la? ngue runi neca caʼruʼ guiándacaʼ zecaʼ ra nuu ca sacerdote. Laga zérucabe neza, bidiicabe cuenta maʼ qué gápacabe lepra, pur fe ni gúpacabe Jesús.

Gaʼ hombre ni maʼ bianda que, maʼ qué nibiguétacaʼ, peru tobi de laacabe, ni naca samaritanu, bibiguetaʼ ra nuu Jesús. ¿Xiñee biguétabe yaʼ? Purtiʼ nuube gudiibe xquixe peʼ Jesús pur bisianda laabe. Ngue runi, biguetaʼ ne cucaa ridxi «cusisaca Dios», purtiʼ bidii cuenta pur poder stiʼ Jehová nga bianda (Lucas 17:15). Ne ora bíʼyabe Jesús, gundeteʼ íquebe layú ne bidiibe xquixe peʼ laa.

Ora biʼyaʼ Jesús hombre si que bibiguetaʼ, gúdxibe ca ni nuu raqué: «¿Ñee cadi chii nga bianda la? Yanna, ¿gunáʼ xcaʼ que yaʼ? ¿Ñee ninruʼ stobi qué nibiguetaʼ para nusisaca Dios, sínuque hombre si de sti guidxi riʼ la?». Para gúdxibe samaritanu que: «Biasa ne guyé; fe stiluʼ nga bisianda lii» (Lucas 17:17-19).

Ra bisianda Jesús ca hombre riʼ, bihuinni cayacané Jehová laabe. Ne pur milagru riʼ, tobi de laacabe zándaca bidxela neza ra zanda guicaa guendanabani. Ca dxi nabáninu riʼ, maʼ qué riquiiñeʼ Dios Xiiñiʼ para guni clase milagru riʼ. Peru, pa gápanu fe Jesús, laaca zanda sanu lu neza ni ziné lu guendanabani ni qué zaluxe. ¿Ñee laaca rudiʼnu xquixe peʼ casi biʼniʼ samaritanu que la?